12
1-2 ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီအသံသ့ဧၢ, နအိၣ်နဆိးလၢပှၤဂီၢ်မုၢ်လၢ
အပူထီၣ်တၢ်အသိးအကျါလီၤ.အဝဲသ့ၣ်အမဲာ်ချံတဖၣ်အိၣ်, ဘၣ်ဆၣ်တထံၣ်တၢ်နီတမံၤဘၣ်. အဝဲသ့ၣ်အနၢ်တဖၣ်အိၣ်, ဘၣ်ဆၣ်တနၢ်ဟူတၢ်နီတမံၤဘၣ်. မ့ၢ်လၢအဝဲသ့ၣ်ပူထီၣ်လီထီၣ်တၢ်
အဃိန့ၣ်လီၤ.
3 ပှၤကညီလၢအသံသ့ဧၢ, ခဲကနံၣ်အံၤဘိၣ်ထီၣ်တၢ်ဘိၣ်တဘိၣ်ဒ်ပှၤဘၣ် ဃ့ၢ်ကွံာ်ဆူထံဂၤကီၢ်ဂၤကမၤဝဲအသိး, ဒီးတချုးတၢ်ခံးလီၤဒံးဘၣ်န့ၣ်, ဟးထီၣ်နဲတက့ၢ်.
ပျဲပှၤကိးဂၤဒဲးထံၣ်ထွဲနတၢ်ဟးထီၣ်ဒီးလဲၤဆူတၢ်လီၢ်အဂၤ
တတီၤန့ၣ်တက့ၢ်. ဘၣ်သ့ၣ်သ့ၣ်, ပှၤပူထီၣ်တၢ်တဖၣ်န့ၣ်ကပာ်သူၣ်ပာ်သးလၢနၤလီၤ.
4 ဖဲမုၢ်ဆါအတၢ်ကပီၤအိၣ်ဒံးဝဲန့ၣ်, ဘိၣ်ထီၣ်နတၢ်ဘိၣ်လၢတၢ်လဲၤ ကဲကုၢ်အဂီၢ်, ဒ်သိးအဝဲသ့ၣ်ထံၣ်ဘၣ်နၤကသ့, ဒီးပျဲအဝဲသ့ၣ်ထံၣ်နဟးထီၣ်လၢဟါခီ, ဒ်နကလဲၤဆူတၢ်ဘၣ်စိာ်မၢကဲကုၢ်အပူၤအသိးန့ၣ်တက့ၢ်.
5 ဖဲအဝဲသ့ၣ်ကွၢ်တၢ်အဖၢမုၢ်န့ၣ်ဘၢၣ်ဖျိတၢ်ပူၤတပူၤလၢနဟံၣ် အတၢ်ဒူၣ်, ဒီးစိာ်ထီၣ်ကွံာ်နတၢ်ဘိၣ်ခီဖျိတၢ်ပူၤအံၤန့ၣ်တက့ၢ်.
6 ပျဲအဝဲသ့ၣ်ကွၢ်နဝံထီၣ်ယိးထီၣ်နတၢ်ဘိၣ်လၢနဖံဘၣ်ခိၣ်အလိၤ ဒီးနတၢ်ဟးထီၣ်ကွံာ်ဆူတၢ်ခံးကျါအိၣ်ဒီးနမဲာ်ချံတဖၣ်ဘၣ်တၢ်
ကးဘၢအီၤ, ဒ်သိးနကလဲၤဆူလဲၣ်န့ၣ်နထံၣ်ဘၣ်သုတသ့တဂ့ၤန့ၣ်
တက့ၢ်. တၢ်လၢနမၤအီၤအံၤကမ့ၢ်တၢ်ဟ့ၣ်ပလီၢ်တမံၤလၢပှၤ
အံၣ်စရ့လးဖိတဖၣ်အဂီၢ်န့ၣ်လီၤ.”
7 ယမၤတၢ်လၢယွၤတဲဘၣ်တ့ၢ်ယၤလၢယကဘၣ်မၤအီၤန့ၣ်လီၤ. မုၢ်နံၤအဝဲန့ၣ်ယဘိၣ်ထီၣ်တၢ်ဘိၣ်တဘိၣ်ဒ်ပှၤဃ့ၢ်ကွံာ်ဆူထံဂၤ ကီၢ်ဂၤတဂၤမၤဝဲအသိး, ဒီးလၢဟါအဝဲန့ၣ်ဖဲတၢ်ခံးလီၤန့ၣ်, ယဘၢၣ်ဖျိတၢ်ပူၤတပူၤလၢဟံၣ်အတၢ်ဒူၣ်လၢယစုဒၣ်ယဲဒီးဟးထီၣ်
ကွံာ်ယဲလီၤ. ဖဲပှၤကိးဂၤဒဲးကွၢ်တၢ်အဖၢမုၢ်န့ၣ်, ယဝံထီၣ်တၢ်ဘိၣ်လၢယဖံဘၣ်ခိၣ်အလိၤဒီးဟးထီၣ်ကွံာ်န့ၣ်လီၤ.
8 လၢခံတဂီၤယွၤကတိၤတၢ်ဒီးယၤလီၤ.
9 အဝဲစံးဝဲ, “ပှၤကညီလၢအသံသ့ဧၢ, ခဲကနံၣ်အံၤ, မ့ၢ်လၢပှၤအံၣ်စရ့လးဖိလၢအပူထီၣ်တၢ်တဖၣ်သံကွၢ်နၤလၢနမၤ တၢ်မနုၤလဲၣ်, အဃိန့ၣ်,
10 တဲဘၣ်အဝဲသ့ၣ်လၢယၤ, ယွၤပၢဘၣ်တၢ်ခဲလၢာ်ကစၢ်, စံးဘၣ်တဲဘၣ်အဝဲသ့ၣ်န့ၣ်တက့ၢ်. တၢ်ကစီၣ်အံၤမ့ၢ်လၢစီၤပၤ ဖိလၢအပၢတၢ်လၢဝ့ၢ်ယရူၤၡလ့ၣ်အပူၤအဂီၢ်ဒီးလၢပှၤဂီၢ်မုၢ်ခဲ
လၢာ်လၢအအိၣ်ဆိးဖဲန့ၣ်အဂီၢ်လီၤ.
11 တဲဘၣ်အဝဲသ့ၣ်လၢ, တၢ်လၢနမၤတ့ၢ်န့ၣ်, မ့ၢ်တၢ်ပနီၣ်တမံၤလၢတၢ် လၢယဟဲဘၣ်အဝဲသ့ၣ်အဂီၢ်န့ၣ်တက့ၢ်. အဝဲသ့ၣ်ကကဲထီၣ်ပှၤဘၣ်ဃ့ၢ်ကွံာ်ဆူထံဂၤကီၢ်ဂၤတဖၣ်ဒီးပှၤလၢ
အဘၣ်တၢ်ဖီၣ်န့ၢ်အီၤတဖၣ်န့ၣ်လီၤ.
12 စီၤပၤဖိလၢအပၢအဝဲသ့ၣ်, ကဝံထီၣ်ယိးထီၣ်အတၢ်ဘိၣ်လၢအဖံဘၣ် ခိၣ်လၢတၢ်ခံးတၢ်နၤအကျါဒီးဃ့ၢ်ထူၣ်ဖျဲးကွံာ်ခီဖျိတၢ်ပူၤတပူၤလၢ
အဝဲသ့ၣ်ဘၢၣ်ဖျိဝဲလၢအဂီၢ်လၢတၢ်ဒူၣ်အပူၤန့ၣ်လီၤ. အဝဲကကးဘၢအမဲာ်ချံတဖၣ်ဒီးအဝဲကလဲၤဆူလဲၣ်န့ၣ်တထံၣ်ဝဲဘၣ်.
13 ဘၣ်ဆၣ်ဒီး, ယကသလၣ်ထီၣ်ယစၤဒီးဖီၣ်န့ၢ်အီၤလၢအပူၤန့ၣ်လီၤ. ဝံၤဒီး, ယကလဲၤစိာ်အီၤဆူဝ့ၢ်ဘၤဘူၤလိၣ်, တၢ်လီၢ်ဖဲအဝဲကသံဝဲ
လၢတၢ်တထံၣ်ဘၣ်ဝ့ၢ်အံၤဘၣ်န့ၢ်လီၤ.
14 ယကမၤလီၤပြံလီၤပြါကယဲၢ်ပှၤလၢအအိၣ်လၢအနူၢ်ဧိၤစီၤဧိၤအဂၢၤပူၤ, ဒီးအပှၤဟ့ၣ်ကူၣ်တၢ်တဖၣ်ဒီးအပှၤခိးအသးသမူတဖၣ် ဆူတၢ်လီၢ်ကိးကပၤဒဲး, ဒီးပှၤဂီၢ်မုၢ်ကဃုအဝဲသ့ၣ်လၢကမၤ
သံအဝဲသ့ၣ်အဂီၢ်န့ၣ်လီၤ.
15 ဖဲယမၤလီၤပြံလီၤပြါအဝဲသ့ၣ်လၢပှၤကလုာ်ဂၤတဖၣ်အကျါဒီးလၢ တခီထံတခီကီၢ်တဖၣ်အပူၤန့ၣ်, အဝဲသ့ၣ်ကသ့ၣ်ညါဝဲလၢယမ့ၢ်ယွၤန့ၣ်လီၤ.
16 ယကပျဲအဝဲသ့ၣ်စှၤဂၤအိၣ်လီၤတဲာ်တ့ၢ်လၢတၢ်ဒုးတၢ်ယၤ, တၢ်သၣ်ဝံၤလီၤဒိ, ဒီးလၢတၢ်ဆူးတၢ်ဆါတဖၣ်မၤအသးဝံၤအလီၢ်ခံ, ဖဲန့ၣ်လၢပှၤကလုာ်တဖၣ်အကျါ့ၣ်, အဝဲသ့ၣ်ကသ့ၣ်ညါနၢ်ပၢၢ်ဝဲလၢ
အတၢ်မၤတဖၣ်လီၤသးဘၣ်အၢတ့ၢ်ဒ်လဲၣ်ဒီးကအၢၣ်လီၤအီၤလီၤဝဲလၢ
ယမ့ၢ်ယွၤ, န့ၣ်လီၤ.”
17-18 ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီလၢအသံသ့ဧၢ, ဖဲနအီၣ်တၢ်န့ၣ်ကနိးကစုာ်
ဒီးဖဲနအီတၢ်န့ၣ်, ဟူးဝးလၢတၢ်ပျံၤတၢ်ဖုးအပူၤတက့ၢ်.
19 တဲဘၣ်ပှၤဒီကလုာ်ညါ, အအံၤမ့ၢ်ယွၤပၢဘၣ်တၢ်ခဲလၢာ်ကစၢ်အတၢ် ကစီၣ်ဆူဝ့ၢ်ယရူၤၡလ့ၣ်အပှၤဂီၢ်မုၢ်လၢအအိၣ်ဆိးဒံးဒၣ်လၢအကီၢ်
ပူၤအအိၣ်တက့ၢ်. အဝဲသ့ၣ်ကကနိးကစုာ်ဝဲဖဲအအီၣ်တၢ်အခါ, ဒီးကဟူးဝးဝဲလၢတၢ်ပျံၤတၢ်ဖုးအပူၤ, ဖဲအအီတၢ်အခါလီၤ. အဝဲသ့ၣ်အထံအကီၢ်ကဘၣ်တၢ်ဂုာ်န့ၢ်ဆူၣ်အီၤစီဖ့ကလ့ၤ, မ့ၢ်လၢပှၤအိၣ်ဖဲန့ၣ်ကိးဂၤဒဲးမ့ၢ်ပှၤလၢအတဒိကနၣ်တၢ်သိၣ်တၢ်
သီအဃိန့ၣ်လီၤ.
20 ဝ့ၢ်တဖၣ်လၢအခဲအံၤပှဲၤဝဲဒီးပှၤဂီၢ်မုၢ်န့ၣ်ကဘၣ်တၢ်မၤဟး ဂီၤကွံာ်အီၤဒီးထံကီၢ်ကဘၣ်တၢ်ဒုးကဲထီၣ်အီၤလၢပှၢ်မုၢ်
ကနၢတတီၤန့ၣ်လီၤ. အန့ၣ်ဒီး, အဝဲသ့ၣ်ကသ့ၣ်ညါဝဲလၢယမ့ၢ်ယွၤန့ၣ်လီၤ.
21-22 ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီလၢအသံသ့ဧၢ, ဘၣ်မနုၤအဃိ
ကီၢ်အံၣ်စရ့လးအပှၤဂီၢ်မုၢ်စံးဝံၤစံးက့ၤတၢ်ကတိၤဒိလၢ
အစံးဝဲ, တၢ်ဆၢကတီၢ်လဲၤပူၤကွံာ်ဒီးတၢ်တဲဆိပာ်စၢၤ
တဖၣ်တမၤအသးနီတမံၤ, န့ၣ်လဲၣ်.
23 ခဲကနံၣ်အံၤ, တဲဘၣ်အဝဲသ့ၣ်လၢယၤ, ယွၤပၢဘၣ်တၢ်ခဲလၢာ်ကစၢ်, ကစံးတၢ်ဘၣ်ဃးဒီးတၢ်ဂ့ၢ်န့ၣ်တက့ၢ်. ယကဒုးဆိတ့ၢ်တၢ်ကတိၤဒိ
အဝဲန့ၣ်လီၤ. လၢကီၢ်အံၣ်စရ့လးအပူၤန့ၣ်,
တၢ်တစံးကဒီးလၢၤအီၤနီတစုဘၣ်. အခိၣ်တလိာ်,
တဲဘၣ်အဝဲသ့ၣ်လၢ, တၢ်ဆၢကတီၢ်ဟဲတုၤလံဒီးတၢ်လၢတၢ်တဲဆိ
ပာ်စၢၤသ့ၣ်တဖၣ်ကလၢထီၣ်ပှဲၤထီၣ်ဝဲလီၤ.
24 လၢကီၢ်အံၣ်စရ့လးအပှၤဂီၢ်မုၢ်အကျါန့ၣ်, တၢ်ထံၣ်လၢညါခီလၢအတတီတဖၣ်မ့ၢ်ဂ့ၤ, ဝံအတၢ်စံးပာ်လၢအဆှၢကမၣ်တၢ်တဖၣ်မ့ၢ်ဂ့ၤ, တအိၣ်လၢၤနီတမံၤဘၣ်န့ၣ်လီၤ.
25 ယၤ, ယွၤအံၤ, ကတိၤတၢ်ဒီးအဝဲသ့ၣ်, ဒီးတၢ်လၢယစံးန့ၣ်ကဘၣ်တၢ်မၤအီၤန့ၣ်လီၤ.
တၢ်မၤယံာ်မၤနီၢ်တအိၣ်လၢၤဘၣ်. သုဝဲပှၤပူထီၣ်တၢ်ဖိသ့ၣ်ဧၢ, လၢသုတၢ်အိၣ်မူအမုၢ်နံၤဒၣ်ဝဲအပူၤန့ၣ်, ယကမၤတၢ်လၢယဟ့ၣ်ပလီၢ်တ့ၢ်သုလၢယကမၤအီၤန့ၣ်လီၤ.
ယကတိၤလံတၢ်လံ.” ယွၤပၢဘၣ်တၢ်ခဲလၢာ်ကစၢ်စံးဝဲ.
26-27 ယွၤစံးဘၣ်ယၤ, “ပှၤကညီလၢအသံသ့ဧၢ, ပှၤအံၣ်စရ့လးဖိတဖၣ်ဆိကမိၣ်ဝဲလၢနတၢ်
ထံၣ်လၢညါခီတဖၣ်ဒီးဝံအတၢ်စံးပာ်တဖၣ်န့ၣ်ဘၣ်ဃးဒၣ်ဒီးခါ
ဆူညါလၢအယံၤဒံးန့ၣ်လီၤ.
28 အဃိဒီးတဲဘၣ်အဝဲသ့ၣ်လၢ, ယၤ, ယွၤပၢဘၣ်တၢ်ခဲလၢာ်စံးဝဲ, တၢ်မၤယံာ်မၤနီၢ်တအိၣ်လၢၤဘၣ်. တၢ်လၢယစံးတ့ၢ်န့ၣ်ကဘၣ်တၢ်မၤအီၤလီၤ. ’
ယၤ, ယွၤပၢဘၣ်တၢ်ခဲလၢာ်ကစၢ်, ကတိၤလံတၢ်လံ.”