3
1 စီၤပၤနဘူၤကးန့စၢ်မၤလိာ်ဝဲလၢတၢ်ဂီၤထူအထီအိၣ်အပျၢ်ဃုဆံ, အဒီၣ်တူာ်အိၣ်ဃုပျၢ်တဒုကဘၣ်တၢ်တ့ထီၣ်ဒီးဆီလီၤအီၤဖဲ ဝ့ၢ်ဒူရၤအတၢ်ပၢၤခိၣ်တတီၤလၢကီၢ်ဘၤဘူၤလိၣ်အပူၤန့ၣ်လီၤ.
2 အန့ၣ်ဝံၤဒီးစီၤပၤဟ့ၣ်လီၤအကလုၢ်လၢကီၢ်ဆၣ်အပဒိၣ်ပပှၢ်တဖၣ်, ကီၢ်စဲၣ်အပဒိၣ်ပပှၢ်တဖၣ်, ပှၤပၢတၢ်တဖၣ်, ပှၤကူၣ်လိာ်တၢ်တဖၣ်, ပှၤပၢၤစ့ဒီးတၢ်စုလီၢ်ခီၣ်ခိၣ်တဖၣ်, စံၣ်ညီၣ်ကွီၢ်တဖၣ်, ပှၤနၢ်ပၢၢ်တၢ်သိၣ်တၢ်သီတဖၣ်ဒီးပဒိၣ်ပပှၢ်အဂၤအိၣ်လၢကီၢ်ဘၤဘူၤ လိၣ်ပူၤခဲလၢာ်ကဟဲပာ်ဖှိၣ်ထီၣ်အသးလၢတၢ်ပာ်စီဆှံတၢ်ဂီၤ လၢစီၤပၤနဘူၤကးန့စၢ်မၢပှၤတ့ထီၣ်ဆီလီၤအီၤအဂီၢ်န့ၣ်လီၤ.
3 ဖဲပဒိၣ်ပပှၢ်ခဲလၢာ်ပာ်ဖှိၣ်ထီၣ်တ့ၢ်အသးလၢတၢ်ပာ်စီဆှံအ ဂီၢ်ဒီးဆၢထၢၣ်ဝဲလၢတၢ်ဂီၤအမဲာ်ညါန့ၣ်,
4 မူးခိၣ်ဘိးဘၣ်သ့ၣ်ညါတၢ်လၢအကလုၢ်ဖးဒိၣ် “ကယဲၢ်ပှၤ ဂီၢ်မုၢ်လၢထံကီၢ်ခဲလၢာ်, ပှၤကိးကလုာ်ဒဲးဒီးပှၤက တိၤကျိာ်အကလုာ်ကလုာ်ခဲလၢာ်သ့ၣ်ဧၢ,
5 တုၤသုနၢ်ဟူကွဲၤ, ပံ, တနၢ်, တနၢ်သၢနၢၣ်, သီတူၢ်ဒီးကယဲၢ်တၢ်ဒ့တၢ်အူအသီၣ် သီၣ်ထီၣ်ဝဲန့ၣ်သုကဘၣ်ချံးခီၣ်တီၤလီၤဒီးဘူၣ်ထီၣ် ဘါထီၣ်တၢ်ဂီၤထူလၢစီၤပၤနဘူၤကးန့စၢ်တ့ထီၣ်ဆီလီၤတ့ၢ်အီၤန့ၣ်လီၤ.
6 ပှၤတဂၤလၢ်လၢ်လၢအတချံးခီၣ်တီၤလီၤဒီးဘူၣ်ထီၣ်ဘါထီၣ်တၢ်န့ၣ်ကဘၣ် တၢ်ကွံာ်လီၤအီၤဆူမ့ၣ်အူကဲၤကဖးအဖၣ်ကပူၤတဘျီဃီန့ၣ်လီၤ.”
7 မၤသးဒ်န့ၣ်ဒီး, တုၤအဝဲသ့ၣ်နၢ်ဟူကယဲၢ်တၢ်ဒ့တၢ်အူတဖၣ်သီၣ်ထီၣ်န့ၣ်, ကယဲၢ်ပှၤဂီၢ်မုၢ်လၢထံကီၢ်ခဲလၢာ်, ပှၤကိးကလုာ်ဒဲးဒီးပှၤကတိၤအ ကျိာ်အကလုာ်ကလုာ်ခဲလၢာ်ချံးခီၣ်တီၤလီၤဒီးဘူၣ်ထီၣ်ဘါ ထီၣ်တၢ်ဂီၤထူလၢစီၤပၤနဘူၤကးန့စၢ်တ့ထီၣ်ဆီလီၤတ့ၢ်အီၤန့ၣ်လီၤ.
8 အကတီၢ်ဖဲန့ၣ်ပှၤဘၤဘူၤလိၣ်ဖိတနီၤဟံးန့ၢ်တၢ်အခွဲးအယာ်ဒီး ဆှိးအၢပှၤယူဒၤဖိတဖၣ်န့ၣ်လီၤ.
9 အဝဲသ့ၣ်စံးဘၣ်စီၤပၤနဘူၤကးန့စၢ်, “မ်စီၤပၤမူဝဲလီၤထူလီၤယိာ်တက့ၢ်.
10 နဲဒၣ်, စီၤပၤဧၢ, နဟ့ၣ်လီၤတ့ၢ်နကလုၢ်လၢ, တုၤတၢ်ဒ့တၢ်အူ သီၣ်ထီၣ်တဘျီဃီန့ၣ်ပှၤကိးဂၤဒဲးကဘၣ်ချံးခီၣ်တီၤလီၤဒီး ဘူၣ်ထီၣ်ဘါထီၣ်တၢ်ဂီၤထူန့ၣ်လီၤ.
11 ဒီးပှၤတဂၤလၢ်လၢ်လၢအတချံးခီၣ်တီၤလီၤဒီးဘူၣ်ထီၣ်ဘါ ထီၣ်ဝဲန့ၣ်ကဘၣ်တၢ်ကွံာ်လီၤအီၤဆူမ့ၣ်အူကဲၤကဖးအဖၣ်ကပူၤ န့ၣ်လီၤ.
12 ပှၤယူဒၤဖိတနီၤလၢနပာ်ထီၣ်အီၤဒ်ကိတိာ်တဖၣ်လၢကီၢ်ဘၤ ဘူၤလိၣ်အပူၤ, စီၤၡၤဒရး, စီၤမ့ၤၡး, စီၤဧဘ့ၤဒနကိၤတဖၣ်န့ၣ်လုၢ် သ့ၣ်ခါပတာ်နဲဒၣ်စီၤပၤအကလုၢ်တဖၣ်လီၤ. အဝဲသ့ၣ်တဘူၣ်ထီၣ်ဘါထီၣ်ဘၣ်နကစၢ်ဒီးတချံးခီၣ်တီၤလီၤဘၣ် ဆူတၢ်ဂီၤထူလၢနတ့ထီၣ်ဆီလီၤအီၤန့ၣ်ဘၣ်.”
13 တုၤစီၤပၤနဘူၤကးန့စၢ်နၢ်ဟူတၢ်န့ၣ်ဒီးအသးထီၣ်ဂီၤဆှုၣ်ကလာ် ဒီးမၤလိာ်လၢပှၤကဟဲဆှၢပှၤသၢဂၤန့ၣ်ဆူအမဲာ်ညါလီၤ.
14 ဒီးစီၤပၤနဘူၤကးန့စၢ်စံးဘၣ်အဝဲသ့ၣ်, “စီၤၡၤဒရး, စီၤမ့ၤၡး, စီၤဧဘ့ၤဒနကိၤသ့ၣ်ဧၢ, သုဂ့ၢ်လိာ်တၢ်ဘူၣ်ထီၣ်ဘါထီၣ်ယကစၢ် ဒီးတချံးခီၣ်တီၤလီၤဘၣ်ဆူတၢ်ဂီၤထူ လၢယတ့ထီၣ်ဆီလီၤအီၤန့ၣ်မ့ၢ်သပှၢ်တၢၢ်ဧါ.
15 ခဲကနံၣ်အံၤ, တုၤသုနၢ်ဟူကွဲၤ, ပံ, တနၢ်, တနၢ်သၢနၢၣ်, သီတူၢ်ဒီးတၢ်ဒ့တၢ်အူအဂၤခဲလၢာ်သီၣ်ထီၣ်န့ၣ်သုကဘၣ်ချံး ခီၣ်တီၤလီၤဒီးဘူၣ်ထီၣ်ဘါထီၣ်တၢ်ဂီၤန့ၣ်လီၤ. ဘၣ်ဆၣ်ဒီးသုမ့ၢ်တဘူၣ်ထီၣ်ဘါထီၣ်န့ၣ်သုကဘၣ်တၢ်တ့ၢ်လီၤ ကွံာ်သုတဘျီဃီဆူမ့ၣ်အူကဲၤကဖးအဖၣ်ကပူၤအပူၤန့ၣ်လီၤ. ကစၢ်လၢအမၤပူၤဖျဲးသုလၢယစုပူၤကန့ၢ်အိၣ်ဝဲတဂၤဂၤဧါ.”
16 စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤစံးဆၢဝဲဒၣ်, “စီၤပၤနဘူၤကးန့စၢ်ဧၢ, ဘၣ်ဃးဒီးတၢ်ဂ့ၢ်အံၤပစံးဆၢနၤ အလီၢ်တအိၣ်ဘၣ်.
17 တၢ်မ့ၢ်မၤအသးဒ်နစံးအသိးဒီး, ပကစၢ်ယွၤလၢပမၤအတၢ် မၤန့ၣ်မၤပူၤဖျဲးပှၤလၢမ့ၣ်အူကဲၤကဖးအဖၣ်ကပူၤသ့ဝဲ, ဒီးကမၤပူၤဖျဲးပှၤလၢနစုပူၤလီၤ.
18 မ့တမ့ၢ်ဘၣ်ဒ်န့ၣ်အသိးဒၣ်လဲာ်, သ့ၣ်ညါနဲဒၣ်စီၤပၤဧၢ, ပတမၤဘၣ်နကစၢ်တဖၣ်အတၢ်မၤဘၣ်ဒီးတဘူၣ်ထီၣ်ဘါထီၣ် ဘၣ်တၢ်ဂီၤထူလၢနတ့ထီၣ်ဆီလီၤအီၤန့ၣ်ဘၣ်.”
19 တုၤနုၤတစုစီၤပၤနဘူၤကးန့စၢ်အသးဖျိးထီၣ်ဝဲဒိၣ်ဒိၣ်ကလဲာ် ဒီးအမဲာ်သၣ်ထီၣ်ဂီၤဝဲဒၣ်လၢတၢ်သးဒိၣ်ဘၣ်စီၤၡၤဒရး, စီၤမ့ၤၡး, ဒီးစီၤဧဘ့ၤဒနကိၤအဃိန့ၣ်လီၤ. ဒီးဟ့ၣ်လီၤအကလုၢ်လၢဖၣ်က ပူၤမ့ၣ်အူကဘၣ်တၢ်မၤကဲၤထီၣ်အီၤအါန့ၢ်ဒံးအလီၢ်နွံစးန့ၣ်လီၤ.
20 ဒီးမၤလိာ်ဝဲပှၤအဂံၢ်အဘါဆူၣ်တဖၣ်လၢအသုးမုၢ်သံၣ်ဘိအကျါ လၢကစၢဃာ်ပှၤသၢဂၤန့ၣ်ဒီးတ့ၢ်လီၤကွံာ်အီၤဆူမ့ၣ်အူကဲၤကဖး အဖၣ်ကပူၤန့ၣ်လီၤ.
21 မၤသးဒ်န့ၣ်ဒီး, အဝဲသ့ၣ်တဖၣ်ဘၣ်တၢ်စၢဃာ်အီၤအိၣ်ဃုာ်ဒီးအတၢ် ကူတၢ်သိးအလၢအပှဲၤဃုာ်ဒီးအဖျီၣ်ခံ, ဆ့ကၤ, ခိၣ်ဖၢၣ်ဒီးအဂၤခဲလၢာ်ဒီးဘၣ်တၢ်တ့ၢ်လီၤကွံာ်အီၤဆူမ့ၣ်အူကဲၤကဖး အဖၣ်ကပူၤန့ၣ်လီၤ.
22 မ့ၢ်လၢစီၤပၤအတၢ်မၤလိာ်ဃံးဝဲ, ဒီးဖၣ်ကပူၤမ့ၣ်အူန့ၣ်ကိၢ် ဝဲနးနးကလဲာ်သတးဒီးမ့ၣ်အူလၣ်ပျဲၤအီၣ်သံကွံာ်ပှၤတဖၣ်လၢ အလဲၤတ့ၢ်လီၤကွံာ်ပှၤသၢဂၤန့ၣ်လီၤ.
23 ဒီးစီၤၡၤဒရး, စီၤမ့ၤၡးဒီးစီၤဧဘ့ၤဒနကိၤလီၤတဲာ်စၢဃာ် အသးဆူမ့ၣ်အူကဲၤကဖးအသးကံၢ်ပူၤန့ၣ်လီၤ.
24 ဒီးဖဲန့ၣ်စီၤပၤနဘူၤကးန့စၢ်ဆၢထၢၣ်သတူာ်ကလာ်လၢတၢ်ကမၢ ကမၣ်အပူၤဒီးစံးဘၣ်အပှၤဟ့ၣ်ကူၣ်တၢ်တဖၣ်, “ပစၢဃာ်ပှၤသၢဂၤ ဒီးတ့ၢ်လီၤအီၤဆူဖၣ်ကပူၤတမ့ၢ်ဘၣ်ဧါ.” အဝဲသ့ၣ်စံးဆၢစီၤပၤ, “မ့ၢ်သပှၢ်ကတၢၢ်လီၤစီၤပၤဧၢ.”
25 စီၤပၤစံးဝဲ, “မ့မ့ၢ်ဒ်န့ၣ်ဒီးဘၣ်မနုၤယထံၣ်ပှၤလွံၢ်ဂၤဟးဝ့ၤဝီၤ လၢမ့ၣ်အူပူၤန့ၣ်လဲၣ်. အဝဲသ့ၣ်တဘၣ်တၢ်စၢဃာ်အီၤဘၣ်. ဒီးအဝဲသ့ၣ်တဖျါဘၣ်ဒိဘၣ်ထံးစ့ၢ်ကီးဘၣ်. ပှၤလွံၢ်ဂၤတဂၤန့ၣ်လီၤ ဂာ်မးဒီးကစၢ်ယွၤအဖိခွါတဂၤလီၤ.”
26 မၤသးဒ်န့ၣ်ဒီးစီၤပၤနဘူၤကးန့စၢ်လဲၤဘူးထီၣ်ဆူမ့ၣ်အူကဲၤကဖး အဖၣ်ကပူၤအတြဲၤဒီးကိးစိဃီၤဝဲ, “စီၤၡၤဒရး, စီၤမ့ၤၡး, စီၤဧဘ့ၤဒနကိၤ, တၢ်ထီကတၢၢ်ကစၢ်ယွၤအခ့အပှၤသ့ၣ်ဧၢ, ဟဲက့ၤထီၣ်တက့ၢ်.” ဒီးအဝဲသ့ၣ်ဟဲက့ၤထီၣ်ဝဲတကီၢ်ခါလီၤ.
27 ဒီးကီၢ်ဆၣ်အပဒိၣ်ပပှၢ်တဖၣ်, ကီၢ်စဲၣ်အပဒိၣ်ပပှၢ်တဖၣ်, ပှၤပၢတၢ်တဖၣ်, ဒီးစီၤပၤအပှၤကူၣ်လိာ်တၢ်အဂၤတဖၣ်ပာ်ဖှိၣ်ထီၣ်အသးလၢအက ကွၢ်ပှၤသၢဂၤလၢမ့ၣ်အူတမၤဆါဘၣ်အီၤဘၣ်န့ၣ်လီၤ. ဒီးထံၣ်ဝဲလၢအခိၣ်သူတကိၢ်ဃိာ်ဘၣ်နီတဘိဘၣ်. အတၢ်ကူတၢ်သိးတဖၣ်မ့ၣ်အူတအီၣ်ကွံာ်ဘၣ်ဒီး မ့ၣ်အူလုၢ်တနၢဘၣ်လၢအလိၤဘၣ်န့ၣ်လီၤ.
28 စီၤပၤနဘူၤကးန့စၢ်စံးဝဲဒၣ်, “စီၤၡၤဒရး, စီၤမ့ၤၡးဒီးစီၤဧဘ့ၤဒနကိၤအကစၢ်ယွၤမ် အဘၣ်တၢ်စံးထီၣ်ပတြၢၤအီၤတက့ၢ်. ဆှၢလီၤဝဲအကလူးဒ်သိးကအုၣ် က့ၤခီၣ်က့ၤပှၤလၢအမၤအတၢ်မၤဒီးစူၢ်အီၤနာ်အီၤတဖၣ်အံၤန့ၣ်လီၤ. အဝဲသ့ၣ်တကနၣ်ဘၣ်ယကလုၢ်ဘၣ်ဒီးညိကွံာ်အသးသမူဒူဝဲအါ န့ၢ်ဒံးအကချံးခီၣ်တီၤလီၤဘူၣ်ထီၣ်ဘါထီၣ်ကစၢ်တဂၤဂၤလၢ အတမ့ၢ်ဘၣ်အကစၢ်ယွၤဘၣ်န့ၣ်လီၤ.
29 ဒီးခဲကနံၣ်အံၤ, ယခါလီၤယကလုၢ်လၢကယဲၢ်ပှၤတဂၤလၢ်လၢ် လၢထံကီၢ်တဘ့ၣ်လၢ်လၢ်အကျါမ့ၢ်ဂ့ၤ, ပှၤတကလုာ်လၢ်လၢ်အကျါမ့ၢ်ဂ့ၤ, ပှၤကတိၤကျိာ်တကျိာ်လၢ်လၢ်အကျါမ့ၢ်ဂ့ၤ, မ့ၢ်ကတိၤထီဒါစီၤၡၤဒရး, စီၤမ့ၤၡးဒီးစီၤဧဘ့ၤဒနကိၤအကစၢ်ယွၤလၢတၢ်တယူးတယီၣ်ဘၣ် အပူၤန့ၣ်ကဘၣ်တၢ်ဒီၣ်တဲာ်ကွံာ်အီၤတကူာ်တကူာ်, ဒီးအ ဟံၣ်ကကဲထီၣ်တၢ်ဟးဂီၤတဖၣ်အတၢ်ပာ်ဖှိၣ်န့ၣ်လီၤ. အဂ့ၢ်ဒ်အံၤ, ကစၢ်အဂၤလၢအကမၤပူၤဖျဲးတၢ်ဒ်သိးအံၤတအိၣ် ဘၣ်နီတဂၤဘၣ်.”
30 အန့ၣ်ဝံၤဒီးစီၤပၤသုးထီထီၣ်စီၤၡၤဒရး, စီၤမ့ၤၡးဒီးစီၤဧဘ့ၤဒနကိၤဆူလီၢ် လၤထီန့ၢ်ဒံးအလီၢ်လၤအိၣ်ပာ်စၢၤန့ၣ်လၢကီၢ်ဘၤဘူၤလိၣ်အပူၤန့ၣ်လီၤ.