4
1 စီၤပၤနဘူၤကးန့စၢ်ဘိးဘၣ်သ့ၣ်ညါလီၤတၢ်ဆူကယဲၢ်ပှၤဂီၢ် မုၢ်လၢထံကီၢ်ခဲလၢာ်, ပှၤကိးကလုာ်ဒဲး, ဒီးပှၤကတိၤကျိာ် အကလုာ်ကလုာ်လၢအအိၣ်လၢဟီၣ်ခိၣ်ဒီဘ့ၣ်, “မ်တၢ်ဃူတၢ်မုာ်ဂံၢ်အါထီၣ်အသးလၢသုဂီၢ်တက့ၢ်.
2 ယဆိကမိၣ်တၢ်, မ့ၢ်တၢ်ဂ့ၤဘၣ်ယၤလၢယကဒုးသ့ၣ်ညါက့ၤ တၢ်ပနီၣ်တဖၣ်ဒီးတၢ်လီၤလးတဖၣ်လၢတၢ်ထီကတၢၢ်ကစၢ် ယွၤလီၣ်ဖျါထီၣ်တ့ၢ်လၢယၤန့ၣ်လီၤ.
3 ယွၤအတၢ်ပနီၣ်တဖၣ်ဒိၣ်နီၢ်မး,
အတၢ်လီၤလးတဖၣ်လီၤဘီလီၤမုၢ်မးလီၤ.
ကစၢ်ယွၤအဘီအမုၢ်န့ၣ်မ့ၢ်ဘီမုၢ်အထူအယိာ်ဒီးအတၢ်ပၢတၢ် ပြးမ့ၢ်တၢ်အစိၤစိၤအဃၣ်ဃၣ်တမံၤန့ၣ်လီၤ.
4 ယၤ, စီၤပၤနဘူၤကးန့စၢ်အိၣ်မုာ်ဆိးပၢၤလၢယဟံၣ်ပူၤ, ဒီးမုာ်လၤ သးခုလၢယတၢ်ဘီၣ်ထီၣ်ညီထီၣ်ဖးဒိၣ်လၢယနူၢ်ပူၤစီၤပူၤလီၤ.
5 ဖဲယမံသပ့ၤဘၣ်ယသးအခါန့ၣ်ယအိၣ်ဒီးတၢ်မံမီၢ်ဒီးတၢ်ထံၣ် လၢညါခီတဖၣ်လၢအလီၤပျံၤလီၤဖုးဒိၣ်ဒိၣ်ကလဲာ်န့ၣ်လီၤ.
6 မၤသးဒ်န့ၣ်ဒီး, ယဟ့ၣ်လီၤယကလုၢ်လၢယပှၤဟ့ၣ်ကူၣ်တၢ် အိၣ်လၢကီၢ်ဘၤဘူၤလိၣ်ပူၤခဲလၢာ်ကဘၣ်တၢ်ဆှၢထီၣ်အီၤဆူ ယမဲာ်ညါလၢကဖးဒီးလီၣ်ဖျါထီၣ်န့ၢ်ယၤလၢယတၢ်မံမီၢ် အခီပညီန့ၣ်လီၤ.
7 တုၤနုၤတစု, ပှၤဖးတၢ်ဟဲဝံဟဲစိာ်, ပှၤမၤကဒါမဲာ်, ပှၤသ့သမူပယၢ် တၢ်ဒီးပှၤဖးဆၣ်ဧိၤဖီဧိၤအဂ့ၢ်တဖၣ်ဟဲဝဲဒီးယစံးဘၣ်တဲ ဘၣ်အဝဲသ့ၣ်လၢယတၢ်မံမီၢ်န့ၣ်လီၤ. ဘၣ်ဆၣ်ဒီးအဝဲသ့ၣ်ဖးဖျါထီၣ်န့ၢ် ယၤလၢယတၢ်မံမီၢ်အခီပညီတန့ၢ်ဘၣ်.
8 လၢခံကတၢၢ်န့ၣ်စီၤဒၤနံးယ့လး, လၢအဘၣ်တၢ်ယုၢ်က့ၤအမံၤ လၢဘ့ၤလးတၡါစၢ်ဒ်ယကစၢ်အမံၤအသိးန့ၣ်, ဟဲနုာ်ဆူ ယမဲာ်ညါလီၤ. ကစၢ်ယွၤလၢအစီဆှံတဂၤအသးအိၣ်လၢ အပူၤသတးဒီးယစံးဘၣ်အီၤတၢ်လၢယမံမီၢ်တ့ၢ်န့ၣ်လီၤ.
9 ယစံးဘၣ်အီၤ, ပှၤဟ့ၣ်ကူၣ်တၢ်တဖၣ်အခိၣ်အဒိၣ်ကတၢၢ် စီၤဘ့ၤလးတၡါစၢ်ဧၢ, ယသ့ၣ်ညါလၢကစၢ်ယွၤလၢအစီဆှံ တဂၤအသးအိၣ်လၢနပူၤဒီးနနၢ်ပၢၢ်တၢ်ခူသူၣ်အဒိၣ်အယိာ် ခဲလၢာ်န့ၣ်လီၤ. အအံၤ, မ့ၢ်ယတၢ်မံမီၢ်န့ၣ်လီၤ. ဖးန့ၢ်ယၤလၢအခီပညီန့ၣ်တက့ၢ်.
10 ဖဲလၢယမံသပ့ၤဘၣ်ယသးန့ၣ်ယထံၣ်တ့ၢ်တၢ်လၢညါခီတမံၤ, ဒီးကွၢ်ကွၢ်, သ့ၣ်ဖးဒိၣ်တထံးအိၣ်ဝဲလၢဟီၣ်ခိၣ်အခၢၣ်သးန့ၣ်လီၤ.
11 သ့ၣ်တထံးအံၤဒိၣ်ထီၣ်ထီထီၣ်ဝဲဒီးအဂံၢ်အဘါဆူၣ်ထီၣ်ဝဲလီၤ. အစိးထီၣ်ဘးဝဲဆူမူခိၣ်ဒီးဘၣ်တၢ်ထံၣ်အီၤသ့လၢပှၤကိးဂၤဒဲး လၢဟီၣ်ခိၣ်ချၢန့ၣ်လီၤ.
12 အလၣ်သ့ၣ်တဖၣ်ဃံလၤဝဲဒီးအသၣ်တဖၣ်အိၣ်ပှဲၤလုၣ်ကွံာ်လၢ အလိၤတုၤအလၢဝဲလီၣ်ဝဲလၢပှၤဟီၣ်ခိၣ်ဖိခဲလၢာ်ကအီၣ်ဝဲအဂီၢ် န့ၣ်လီၤ. ဆၣ်ဖိကီၢ်ဖိအမံၤတဖၣ်အိၣ်ဘှံးလၢအကဒုအဖီလာ်, ထိၣ်ဖိလံာ်ဖိတဖၣ်မၤအသွံတဖၣ်လၢအဒ့အတြၢ်တဖၣ်အလိၤဒီး တၢ်အိၣ်ဒီးအသးသမူခဲလၢာ်အီၣ်ဘၣ်အီဘၣ်အသၣ်တဖၣ်န့ၣ်လီၤ.
13 ဖဲယဆိကမိၣ်တၢ်ထံၣ်လၢညါခီတမံၤန့ၣ်အဂ့ၢ်အဖၢမုၢ်ယထံၣ်ဘၣ် ကလူးဟဲလီၤလၢမူခိၣ်တဂၤလၢအအိၣ်ဒီးတၢ်သူၣ်ပ့ၢ်သးဆှါ ဒီးတၢ်မဲာ်စီၣ်နါစီၣ်န့ၣ်လီၤ.
14 အဝဲဘိးဘၣ်သ့ၣ်ညါဝဲလၢတၢ်ကကူာ်လီၤကွံာ်သ့ၣ်တထံးန့ၣ်ဒီး ပဲာ်တဲာ်ကွံာ်အဒ့အတြၢ်တဖၣ်, တြုၤလီၤကွံာ်အလၣ် ခဲလၢာ်ဒီးမၤလီၤပြံလီၤပြါကွံာ်အသၣ်တဖၣ်, နီၣ်ကွံာ်ဆၣ်ဖိကီၢ်ဖိတဖၣ်လၢအကဒုဖီလာ်ဒီးထိၣ်ဖိလံာ်ဖိ တဖၣ်လၢအဒ့အတြၢ်တဖၣ်အလိၤန့ၣ်လီၤ.
15 မ့မ့ၢ်အခိၣ်ဆၢၣ်အိၣ်ဒီးအဂံၢ်တဖၣ်လၢဟီၣ်ခိၣ်လာ်န့ၣ်တၢ် ကဘၣ်စၢတံၢ်ဃာ်အီၤလၢထးသွဲဒီးတိၢ်ဘီအပျံၤ, ဒီးပာ်တ့ၢ်အီၤလၢတပံၢ်တမါတဖၣ်အကျါလၢပျီပူၤန့ၣ်လီၤ. ပှၤတဂၤန့ၣ်ကဘၣ်စီၣ်ဒၣ်ဝဲလၢမူခိၣ်အပစီၤထံ, ဒီးမ်ကအိၣ်ဒၣ် ဝဲလၢဆၣ်ဖိကီၢ်ဖိအသိးဒီးနီၣ်ဧိၤမံၤဧိၤအကျါန့ၣ်တက့ၢ်.
16 လၢနွံနံၣ်အတီၢ်ပူၤန့ၣ်ပှၤကညီအသးကလီၤမၢ်ကွံာ်လၢအပူၤ ဒီးဆၣ်ဖိကီၢ်ဖိအသးကအိၣ်လၢအပူၤလီၤ.
17 တၢ်စံၣ်ညီၣ်အံၤဘၣ်တၢ်ပာ်လီၤအီၤလၢကလူးလၢအသူၣ်ပ့ၢ်သး ဆှါဒီးမဲာ်စီၣ်နါစီၣ်တဖၣ်န့ၣ်လီၤ. မၤသးဒ်န့ၣ်ဒီး, တုၤလၢတၢ် အကတၢၢ်တစုန့ၣ်မ်ပှၤအမူတဖၣ်ကသ့ၣ်ညါဝဲလၢတၢ်ထီ ကတၢၢ်ကစၢ်ယွၤတဂၤအိၣ်ဒီးတၢ်စိတၢ်ကမီၤ လၢကပၢတၢ်လၢပှၤကညီအဘီအမုၢ်တဖၣ်အဖီခိၣ်ဒီးဟ့ၣ်လီၤဝဲဆူ ပှၤလၢအဃုထၢဝဲတဂၤလၢ်လၢ်ဒ်အတၢ်ဘၣ်အသးဒၣ်ဝဲအသိးသ့, တုၤဒၣ်လဲာ်ဆူပှၤအသးစူၤဒီးဆီၣ်လီၤအသးနးကတၢၢ်န့ၣ်တက့ၢ်.
18 တၢ်မံမီၢ်အံၤ, ယၤစီၤပၤနဘူၤကးန့စၢ်ထံၣ်တ့ၢ်ဝဲလီၤ. ဒီးခဲကနံၣ်အံၤ, စီၤဘ့ၤလးတၡါစၢ်ဧၢ, ဖးဖျါထီၣ်အခီပညီတက့ၢ်. အဂ့ၢ်ဒ်အံၤ, ယပှၤဟ့ၣ်ကူၣ်တၢ်အိၣ်လၢယဘီမုၢ်အပူၤခဲလၢာ်န့ၣ်ဖးဖျါထီၣ် န့ၢ်ယၤတသ့ဘၣ်. မ့မ့ၢ်နဲဒၣ်အံၤနမၤနဲသ့လီၤ. အဂ့ၢ်ဒ်အံၤ, ကစၢ်ယွၤလၢအစီဆှံတဂၤအသးအိၣ်လၢနပူၤလီၤ.”
19 တုၤနုၤတစု, စီၤဒၤနံးယ့လးလၢအဘၣ်တၢ် ကိးစ့ၢ်ကီးအီၤလၢစီၤဘ့ၤလးတၡါစၢ်အသးလီၤကတုၤတစိၢ် တလီၢ်ဒီးအတၢ်ဆိကမိၣ်မၤကိၢ်မၤဂီၤအသးန့ၣ်လီၤ. စီၤပၤစံးဘၣ်အီၤ, “စီၤဘ့ၤလးတၡါစၢ်ဧၢ, ပျဲတၢ်မံမီၢ်မ့ၢ်ဂ့ၤ, အခီပညီအဒိၣ်အယိာ်မ့ၢ်ဂ့ၤမၤကိၢ်မၤဂီၤနသးတဂ့ၤ.” စီၤဘ့ၤလးတၡါစၢ်စံးဆၢဝဲဒၣ်, “နဲဒၣ်စီၤပၤဧၢ, ယဆၢလၢတၢ်မံမီၢ်အံၤကမ့ၢ်ဒၣ်ဝဲလၢပှၤလၢအ သးဟ့နၤတဖၣ်အဂီၢ်ဒီးအခီပညီအဒိၣ်အယိာ်ကမ့ၢ်ဒၣ်လၢန ဒုၣ်နဒါတဖၣ်အဂီၢ်န့ၣ်လီၤ.
20 သ့ၣ်တထံးလၢနထံၣ်ဘၣ်အီၤလၢအဒိၣ်ထီၣ်ထီထီၣ်ဝဲဒီးအဂံၢ် အဘါဆူၣ်ထီၣ်တုၤအစိးထီၣ်ဘးဆူမူခိၣ်ဒီးဘၣ်တၢ်ထံၣ်အီၤ သ့လၢပှၤကိးဂၤဒဲးလၢဟီၣ်ခိၣ်ချၢ,
21 အလၣ်တဖၣ်ဃံလၤဝဲဒီးအသၣ်တဖၣ်အိၣ်ပှဲၤလုၣ်ကွံာ်တုၤအလၢ ဝဲလီၣ်ဝဲလၢဟီၣ်ခိၣ်ဖိခဲလၢာ်ကအီၣ်အဂီၢ်ဒီးမ့ၢ်ဝဲတၢ်အီၣ်လၢပှၤကိး ဂၤအဂီၢ်, ဒီးဆၣ်ဖိကီၢ်ဖိအမံၤတဖၣ်အိၣ်ဘှံးလၢအကဒုဖီလာ်, ဒီးထိၣ်ဖိလံၣ်ဖိတဖၣ်မၤအသွံလၢအဒ့အတြၢ်တဖၣ်အလိၤန့ၣ်
22 မ့ၢ်ဒၣ်နၤလီၤစီၤပၤဧၢ. နဒိၣ်ထီၣ်နထီထီၣ်နဂံၢ်နဘါဆူၣ်ထီၣ်လီၤ. နတၢ်ဒိၣ်တၢ်မုၢ်, ထီၣ်ဘးဝဲတုၤလၢမူခိၣ်ဒီးနတၢ်ပၢတၢ်ပြး န့ၣ်လဲၤတုၤပၢၢ်တုၤလၢဟီၣ်ခိၣ်အကတၢၢ်လီၤ.
23 နဲဒၣ်စီၤပၤထံၣ်ဘၣ်ကလူးဟဲလီၤလၢမူခိၣ်တဂၤလၢအအိၣ်ဒီး တၢ်သူၣ်ပ့ၢ်သးဆှါဒီးတၢ်မဲာ်စီၣ်နါစီၣ်စံးဝဲဒၣ်, ကူာ်လီၤကွံာ် သ့ၣ်တထံးန့ၣ်ဒီးမၤဟးဂီၤကွံာ်အီၤတက့ၢ်. မ့မ့ၢ်အခိၣ်ဆၢၣ်အိၣ်ဒီးအ ဂံၢ်တဖၣ်လၢဟီၣ်ခိၣ်လာ်န့ၣ်စၢဃးအီၤလၢထးသွဲဒီးတိၢ်ဘီအပျံၤဒီးပာ်တ့ၢ် အီၤလၢတပံၢ်တမါတဖၣ်အကျါလၢပျီပူၤတက့ၢ်. ပှၤတဂၤန့ၣ် ကဘၣ်စီၣ်ဒၣ်ဝဲလၢမူခိၣ်အပစီၤထံဒီးမ်အအိၣ်ဒၣ်ဝဲလၢ ဆၣ်ဖိကီၢ်ဖိတဖၣ်အသိးအကျါတုၤအယံာ်နွံနံၣ်တက့ၢ်န့ၣ်,’
24 အခီပညီမ့ၢ်ဒ်အံၤနဲဒၣ်စီၤပၤဧၢ, တၢ်န့ၣ်မ့ၢ်တၢ်ထီကတၢၢ်ကစၢ် ယွၤအတၢ်စံၣ်ညီၣ်အကလုၢ်လၢအလီၤဘၣ်လၢယကစၢ်စီၤပၤ အလိၤန့ၣ်လီၤ.
25 နကဘၣ်တၢ်နီၣ်ထီၣ်ကွံာ်နၤလၢပှၤကညီအသိးအကျါဒီးနတၢ် အိၣ်တၢ်ဆိးအလီၢ်ကမ့ၢ်ဝဲလၢဆၣ်ဖိကီၢ်ဖိအမံၤတဖၣ်အသိး အကျါလီၤ. နကအီၣ်တပံၢ်တမါဒ်ဂီၤဖံးတဒုအသိးဒီးမံလီၤလၢတၢ် ပျီပူၤဖဲပစီၤထံကလီၤဘၣ်လၢနလိၤကယံာ်ဝဲနွံနံၣ်လီၤ. တုၤနုၤတစု, နကအၢၣ်လီၤက့ၤလၢတၢ်ထီကတၢၢ်ကစၢ်ယွၤတဂၤပၢတၢ်လၢ ပှၤဟီၣ်ခိၣ်ဖိအဘီအမုၢ်တဖၣ်အဖီခိၣ်ဒီးဟ့ၣ်လီၤဝဲတၢ်စိတၢ် ကမီၤဆူပှၤလၢအဃုထၢဝဲတဂၤလၢ်လၢ်ဒ်အတၢ်ဘၣ်အသး ဒၣ်ဝဲအသိးသ့ဝဲန့ၣ်လီၤ.
26 ဒီးဒ်တၢ်မၤလိာ်အိၣ်ဝဲလၢသ့ၣ်အခိၣ်ဆၢၣ်အိၣ်ဒီးအဂံၢ်တဖၣ်န့ၣ် ကဘၣ်တၢ်ပာ်တ့ၢ်အီၤအသိးနဘီနမုၢ်န့ၣ်, ကမ့ၢ်က့ၤသပှၢ်ကတၢၢ် လၢနဂီၢ်ဖဲအကတီၢ်လၢနသ့ၣ်ညါက့ၤလၢကစၢ်ယွၤပၢတၢ်န့ၣ်လီၤ.
27 မၤသးဒ်န့ၣ်, ဒီးနဲဒၣ်စီၤပၤဧၢ, တူၢ်လိာ်ယတၢ်ဟ့ၣ်ကူၣ်နၤတက့ၢ်. ဆိကတီၢ်ကွံာ်တၢ်မၤတၢ်ဒဲးဘး, မၤတၢ်လၢအဘၣ်ဒီးသူၣ်ကညီၤသးကညီၤပှၤဖှီၣ်ဖိယာ်ဖိတက့ၢ်. အန့ၣ်တစုနကဘီၣ်ထီၣ်ညီထီၣ်ဆူညါကွ့ၢ်ကွ့ၢ်န့ၣ်လီၤ.”
28 ဒီးတၢ်စံးပာ်ခဲလၢာ်န့ၣ်လီၤဘၣ်လၢစီၤပၤနဘူၤကးန့စၢ်အလိၤန့ၣ်လီၤ.
29 တၢ်မၤအသးဖဲ, ထဲတဆံခံလါဝံၤအလီၢ်ခံန့ၣ် အဝဲဟးယဲၤယီၤလၢတၢ်လီၢ်ထီၣ်ထီအလီၢ်ပၢၤအိၣ်လၢအနူၢ်အစီၤအပူၤ,
30 ဒီးစံးဝဲဒၣ်, “ဘၤဘူၤလိၣ်ဒိၣ်ဝဲဆံးဒိၣ်ဆံးဒိၣ်လဲၣ်န့ၣ်ကွၢ်တက့ၢ်. ယသူၣ်ထီၣ်အီၤဒ်ယဝ့ၢ်ခိၣ်အသိးလၢကလီၣ်ဖျါ ထီၣ်ယစိကမီၤဒီးယဂံၢ်ယဘါယလၤကပီၤယကဟုကညီၢ်လီၤ.”
31 ဖဲတၢ်ကတိၤတဖၣ်အံၤအိၣ်ဒံးလၢစီၤပၤအထးခိၣ်အဖၢမုၢ်န့ၣ်, တၢ်ကလုၢ်သီၣ်ထီၣ်ဝဲလၢမူခိၣ်, “စီၤပၤနဘူၤကးန့စၢ်ဧၢ, ယစံးဘၣ်နၤခဲကနံၣ်အံၤ, ဘီမုၢ်အံၤဘၣ်တၢ်ဟံးထီၣ်ကွံာ် လၢနအိၣ်လံ.
32 ဒီးနကဘၣ်တၢ်နီၣ်ထီၣ်ကွံာ်နၤလၢပှၤကညီအကျါ, ဒီးနတၢ်အိၣ်တၢ်ဆိးအလီၢ်ကမ့ၢ်ဝဲလၢဆၣ်ဖိကီၢ်ဖိအမံၤတဖၣ် အသိးအကျါလီၤ. နကအီၣ်တပံၢ်တမါဒ်ဂီၤဖံးတဒုအသိး လၢနွံနံၣ်အတီၢ်ပူၤလီၤ. တုၤနုၤတစု, နကသ့ၣ်ညါက့ၤလၢတၢ်ထီကတၢၢ်ကစၢ်ယွၤတဂၤပၢတၢ်လၢပှၤဟီၣ် ခိၣ်ဖိအဘီအမုၢ်တဖၣ်အဖီခိၣ်ဒီးဟ့ၣ်လီၤတၢ်ဆူပှၤလၢအဃု ထၢဝဲဒ်အသးအိၣ်ဒၣ်ဝဲအသိးအစုပူၤသ့ဝဲန့ၣ်လီၤ.”
33 တၢ်ကတိၤတဖၣ်အံၤလၢထီၣ်ပှဲၤထီၣ်ဝဲတကီၢ်ခါလၢစီၤနဘူၤကး န့စၢ်အလိၤန့ၣ်လီၤ. အဝဲဘၣ်တၢ်ဟီထီၣ်ကွံာ်အီၤလၢပှၤကညီ အသိးအကျါဒီးအီၣ်ဝဲတပံၢ်တမါဒ်ဂီၤဖံးတဒုအသိး, ဒီးအနီၢ်ခိဘၣ်စီၣ်လၢမူခိၣ်အပစီၤထံတုၤအဆူၣ်အဒံးတဖၣ်ထီ ထီၣ်ဝဲဒ်လံာ်ကြီကြာ်တဖၣ်အဆူၣ်အဒံးအသိး, ဒီးအစုမ့ၣ်ခီၣ်မ့ၣ်တဖၣ်ထီဝဲဒ်ထိၣ်ဧိၤလံာ်ဧိၤတဖၣ်အခီၣ်မ့ၣ် အသိးန့ၣ်လီၤ.
34 “တုၤနွံနံၣ်ပူၤကွံာ်ဝဲဒီး, ယၤ, စီၤနဘူၤကးန့စၢ်ကွၢ်ထီၣ်တၢ်ဆူ မူခိၣ်ဒီးယအိၣ်က့ၤဒီးယတၢ်သူၣ်ထံသးဆးလီၤ. ယစံးထီၣ်ပ တြၢၤတၢ်ထီကတၢၢ်ကစၢ်ယွၤဒီးဟ့ၣ်တၢ်ယူးယီၣ်ဒီးတၢ်လၤ ကပီၤဆူပှၤလၢအမူဝဲအထူအယိာ်တဂၤအအိၣ်န့ၣ်လီၤ.
“အဂ့ၢ်ဒ်အံၤ, အတၢ်ပၢတၢ်ပြးန့ၣ်မ့ၢ်တၢ်ပၢတၢ်ပြး အထူအယိာ်,
ဒီးအဘီအမုၢ်အိၣ်ဂၢၢ်အိၣ်ကျၢၤ အစိၤစိၤအဃၣ်ဃၣ်လီၤ.
35 ကယဲၢ်ပှၤအိၣ်လၢဟီၣ်ခိၣ်ချၢခဲလၢာ်န့ၣ်ပာ်ဝဲဒ်တမ့ၢ် တၢ်နီတမံၤအသိး,
ဒီးမၤတၢ်ဖဲအတၢ်ဘၣ်အသးဒၣ်ဝဲလၢမူခိၣ် တၢ်သုးမုၢ်ဂီၢ်မုၢ်အကျါ, ဒီးလၢပှၤအိၣ်လၢဟီၣ်ခိၣ်ချၢတဖၣ် အကျါန့ၣ်လီၤ.
ပှၤတြီအစုမ့ၢ်ဂ့ၤ, သံကွၢ်အီၤမ့ၢ်နမၤတၢ်မနုၤလဲၣ်မ့ၢ်ဂ့ၤ တန့ၢ်ဘၣ်နီတဂၤဘၣ်.
36 ဒီးဖဲယအိၣ်က့ၤဒီးယတၢ်သူၣ်ထံသးဆးန့ၣ်ယဘီယမုၢ်အတၢ် လၤတၢ်ကပီၤ, ယတၢ်ကဟုကညီၢ်ဒီးယလၤယကပီၤတဖၣ် ဘၣ်တၢ်ဟ့ၣ်ကဒါက့ၤယၤလီၤ. ယပှၤဟ့ၣ်ကူၣ်တၢ်တဖၣ်ဒီး ယပဒိၣ်ပပှၢ်တဖၣ်တူၢ်လိာ်မုာ်က့ၤယၤဒီးယဘၣ် တၢ်ပာ်ထီၣ်ထီက့ၤယၤလၢယဘီယမုၢ်အပူၤ, ဒီးတၢ်လၤတၢ်ကပီၤဂံၢ်အါထီၣ်အသးဒီးယၤအါန့ၢ်ဒံး လၢညါဒၣ်လဲာ်လီၤ.
37 ခဲကနံၣ်အံၤ, ယၤစီၤနဘူၤကးန့စၢ်စံးထီၣ်ပတြၢၤ, ယူးယီၣ်ဒီး မၤလၤကပီၤမူခိၣ်အစီၤပၤန့ၣ်လီၤ. အဂ့ၢ်ဒ်အံၤ, အတၢ်မၤခဲလၢာ်ဘၣ်ဝဲ, ဒီးအကျဲတဖၣ်တီဝဲလိၤဝဲန့ၣ်လီၤ. ပှၤလၢအမၤတၢ်လၢတၢ် ပာ်ထီၣ်ထီအသးတဖၣ်န့ၣ်ဆီၣ်လီၤဝဲဒၣ်သ့လီၤ.”