2
1 လၢစီၤပၤစီၤနဘူၤကးန့စၢ်ပၢတၢ်ခံနံၣ်တနံၣ်န့ၣ်မံမီၢ်ဝဲတၢ်မံမီၢ် တမံၤန့ၣ်လီၤ. တၢ်မံမီၢ်န့ၣ်မၤကိၢ်မၤဂီၤအီၤဒိၣ်မးတုၤဒၣ်လဲာ်မံဝဲ တန့ၢ်ဘၣ်,
2 ဒီးစီၤပၤမၢပှၤကိးန့ၢ်အီၤပှၤဖးတၢ်ဟဲဝံဟဲစိာ်, ပှၤသ့အူတၢ်သမူတၢ်, ပှၤမၤကဒါမဲာ်ဒီးပှၤသ့သမူပယၢ်တၢ်တဖၣ်လၢအကဟဲ ဖးန့ၢ်အတၢ်မံမီၢ်န့ၣ်လီၤ. ဖဲအဝဲသ့ၣ်ဟဲတုၤ ဒီးဆၢထၢၣ်တ့ၢ်ဝဲလၢစီၤပၤအမဲာ်ညါန့ၣ်,
3 စီၤပၤစံးဘၣ်အဝဲသ့ၣ်တဖၣ်, “ယမံမီၢ်တ့ၢ်တၢ်တမံၤဒီးယသး သူၣ်ကိၢ်သးဂီၤယဲလီၤ. ယအဲၣ်ဒိးသ့ၣ်ညါတၢ်မံမီၢ်အံၤအခီ ပညီန့ၣ်လီၤ.”
4 ဒီးအဝဲသ့ၣ်စံးဆၢက့ၤစီၤပၤလၢပှၤအၤရၣ်ဖိအကျိာ်, “မ်စီၤပၤမူဝဲလီၤထူလီၤယိာ်တက့ၢ်. စံးဘၣ်ပှၤလၢနတၢ်မံ မီၢ်တက့ၢ်. ဒီးပကဖးဖျါထီၣ်အခီပညီလၢနဂီၢ်လီၤ.”
5 စီၤပၤစံးဘၣ်အဝဲသ့ၣ်, “ယတၢ်ကတိၤမ့ၢ်တၢ်ဂၢၢ်တၢ်ကျၢၤလီၤ. သုမၤဖျါထီၣ်ယတၢ်မံမီၢ်ဒီးအခီပညီမ့ၢ်တသ့ဘၣ်ဒီး, သုကဘၣ်တၢ်ဒီၣ်တဲာ်ကွံာ်သုတကူာ်ဘၣ်တကူာ်ဒီးသုဟံၣ်တဖၣ် ယကဒုးကဲထီၣ်အီၤလၢတၢ်ဟးဂီၤပာ်ဖှိၣ်အသးန့ၣ်လီၤ.
6 ဘၣ်ဆၣ်ဒီးသုတဲဖျါထီၣ်န့ၢ်ယၤယတၢ်မံမီၢ်ဒီးအခီပညီခံမံၤလိာ် မ့ၢ်သ့ဒီးယကဟ့ၣ်ဘျုးသုလၢခိၣ်ဖးတဖၣ်ဒီးတၢ်လၤကပီၤဖး ဒိၣ်န့ၣ်လီၤ. လၢတၢ်န့ၣ်အဃိခဲအံၤတဲယတၢ်မံမီၢ်ဒီးအခီပညီမ့ၢ် တၢ်မနုၤလဲၣ်န့ၣ်တက့ၢ်.”
7 အဝဲသ့ၣ်စံးဆၢကဒီးစီၤပၤ, “စီၤပၤမ့ၢ်တဲဘၣ်ပှၤထဲတၢ်မံ မီၢ်ဧိၤန့ၣ်, ပကဖးဖျါထီၣ်အခီပညီန့ၣ်လီၤ.”
8 အန့ၣ်ဒီးစီၤပၤစံးဝဲ, “ယသ့ၣ်ညါသပှၢ်ကတၢၢ်လၢသုဂုာ်ကျဲး စၢးသုးနံၤသုးသီလီၤ. အဂ့ၢ်ဒ်အံၤ, သုသ့ၣ်ညါလၢယတၢ်ကတိၤမ့ၢ်တၢ်ဂၢၢ်တၢ်ကျၢၤလီၤ.
9 သုမ့ၢ်တတဲယၤလၢယတၢ်မံမီၢ်ဘၣ်ဒီးတၢ်စံၣ်ညီၣ်တမံၤဃီ အိၣ်လၢသုဂီၢ်န့ၣ်လီၤ. သုအိၣ်ဒီးတၢ်သးဃူဃီၣ်လီၤပလိာ်လၢသုကျါ ဒ်သိးသုကလီန့ၢ်ယၤတဘျီဝံၤတဘျီလီၤ. အဂ့ၢ်ဒ်အံၤ, သုမုၢ် လၢ်လၢအကတီၢ်ကအိၣ်ဝဲလၢတၢ်ဂ့ၢ်တဖၣ်ကဆီတလဲအသး န့ၣ်လီၤ. တဲယၤလၢတၢ်မံမီၢ်မ့ၢ်မနုၤလဲၣ်န့ၣ်တက့ၢ်. အန့ၣ်ဒီးယကသ့ၣ်ညါလၢသုဖးအခီပညီသ့စ့ၢ်ကီးလီၤ.”
10 ပှၤဟ့ၣ်ကူၣ်တၢ်တဖၣ်စံးဆၢက့ၤဝဲ, “ပှၤလၢတဲတၢ်ကသ့ဒ်တၢ်လၢစီၤ ပၤအဲၣ်ဒိးသ့ၣ်ညါဝဲန့ၣ်လၢဟီၣ်ခိၣ်ချၢအံၤတအိၣ်ဘၣ်နီတဂၤဘၣ်. စီၤပၤအဒိၣ်ကတၢၢ်ဒီးအစိကမီၤအါကတၢၢ်ဒၣ်လဲာ်လၢကသံ ကွၢ်တၢ်ဂ့ၢ်ဒ်သိးအံၤတမံၤ, ဆူအပှၤဖးတၢ်ဟဲဝံဟဲစိာ်, ပှၤအူတၢ်သမူတၢ်, ဒီးပှၤသမူပယၢ်တၢ်တဖၣ်န့ၣ်တအိၣ်ဘၣ်နီတဂၤဘၣ်.
11 တၢ်ဂ့ၢ်လၢစီၤပၤသံကွၢ်ဝဲန့ၣ်ကီဝဲတုၤဒၣ်လဲာ်မ့တမ့ၢ်ဘၣ်လၢက စၢ်တဖၣ်လၢအတအိၣ်ဝဲဆိးဝဲလၢပှၤကညီအကျါဘၣ်သတး ဒီးပှၤပာ်ဖျါထီၣ်အီၤဆူစီၤပၤတသ့နီတဂၤဘၣ်.”
12 လၢတၢ်အံၤအဃိဒီးစီၤပၤအသးဒိၣ်ထီၣ်ဂီၤဆှုၣ်ကလာ်ဒီး ဟ့ၣ်လီၤအကလုၢ်လၢစီၤပၤအပှၤဟ့ၣ်ကူၣ်တၢ်ခဲလၢာ်လၢကီၢ် ဘၤဘူၤလိၣ်အပူၤကဘၣ်တၢ်မၤသံကွံာ်အီၤန့ၣ်လီၤ.
13 မၤသးဒ်န့ၣ်ဒီး, တုၤတၢ်ကလုၢ်လီၤဝဲလၢပှၤဟ့ၣ် ကူၣ်တၢ်တဖၣ်ကဘၣ်တၢ်မၤသံကွံာ်အီၤခဲလၢာ်န့ၣ်စီၤဒၤနံးယ့လးဒီး အတံၤသကိးတဖၣ်စ့ၢ်ကီးဘၣ်တၢ်ဃုအီၤလၢတၢ် ကမၤသံအီၤအဂီၢ်န့ၣ်လီၤ.
14 တုၤနုၤတစုစီၤဒၤနံးယ့လးလဲၤဆူပှၤပၢၤစီၤပၤအသးသမူအသုး ခိၣ်စီၤအၤရယိးပှၤတဂၤလၢကဘၣ်မၤသံပှၤဟ့ၣ်ကူၣ်တၢ်တဖၣ်န့ၣ် အအိၣ်ဒီးကတိၤတၢ်လၢတၢ်ကူၣ်ဘၣ်ဖးသ့ဒီးတၢ်သးဆးအပူၤ,
15 ဒီးသံကွၢ်ဝဲ, “ဘၣ်မနုၤလၢစီၤပၤဘၣ်ဟ့ၣ်လီၤအကလုၢ်ဆူၣ်ဆူၣ်ကိၤကိၤဒ်အံၤ န့ၣ်လဲၣ်.” လၢတၢ်န့ၣ်အဃိစီၤအၤရယိးဒုးသ့ၣ် ညါစီၤဒၤနံးယ့လးလၢတၢ်မၤတ့ၢ်အသးန့ၣ်လီၤ.
16 ဒီးစီၤဒၤနံးယ့လးလဲၤဝဲတဘျီဃီဆူစီၤပၤအအိၣ်ဒီးဃ့န့ၢ်တၢ် ပျဲလၢကန့ၢ်အါထီၣ်တၢ်ဆၢကတီၢ်ဒ်သိးဖးန့ၢ်စီၤပၤလၢအတၢ် မံမီၢ်အခီပညီကသ့အဂီၢ်န့ၣ်လီၤ.
17 အန့ၣ်ဝံၤဒီးစီၤဒၤနံးယ့လးက့ၤဝဲဆူအဟံၣ်ဒီးတဲဘၣ်အတံၤသကိး စီၤဃနၤနယၤ, စီၤမံၡအ့လး, ဒီးစီၤဧစၤရယၤလၢတၢ်မၤတ့ၢ် အသးတဖၣ်န့ၣ်လီၤ.
18 အဝဲဒၣ်စံးဘၣ်အတံၤသကိးတဖၣ်ဒ်သိးကဘါထုကဖၣ်ဆူကစၢ် ယွၤလၢမူခိၣ်အအိၣ်လၢတၢ်သးကညီအဂီၢ်ဒီးကလီၣ်ဖျါထီၣ် တၢ်ခူသူၣ်အဒိၣ်အယိာ်တမံၤအံၤဆူအဝဲသ့ၣ်ဒ်သိးအသုတဘၣ် တၢ်မၤသံကွံာ်အီၤဃုာ်ဒီးဘၤဘူၤလိၣ်အပှၤဟ့ၣ်ကူၣ်တၢ်အဂၤ တဖၣ်တဂ့ၤအဂီၢ်န့ၣ်လီၤ.
19 ဒီးလၢမုၢ်တနၤဃီအပူၤန့ၣ်တၢ်ခူသူၣ်အဒိၣ်အယိာ်ဘၣ်တၢ်လီၣ် ဖျါထီၣ်တ့ၢ်အီၤဆူစီၤဒၤနံးယ့လးအအိၣ်လၢတၢ်ထံၣ်လၢညါ ခီအပူၤန့ၣ်လီၤ. ဒီးစီၤဒၤနံးယ့လးစံးထီၣ်ပတြၢၤတ့ၢ်ကစၢ် ယွၤလၢမူခိၣ်န့ၣ်လီၤ.
20 ဒီးစီၤဒၤနံးယ့လးစံးဝဲဒၣ်, “ကစၢ်ယွၤမ့ၢ်တၢ်ကူၣ်သ့ဒီး အစိအကမီၤဒိၣ်ဝဲလီၤ.
စံးထီၣ်ပတြၢၤအီၤအစိၤစိၤအဃၣ်ဃၣ်တက့ၢ်.
21 အဝဲပၢတၢ်ဆၢကတီၢ်ဒီးန့ဆၢၣ်အကတီၢ်တဖၣ်,
သုးကွံာ်ဝဲဒီးပာ်ထီၣ်စီၤပၤတဖၣ်,
ဟ့ၣ်လီၤဝဲတၢ်ကူၣ်သ့လၢပှၤကူၣ်တၢ်သ့ဒီးတၢ်သ့ၣ်ညါ လၢပှၤနၢ်ပၢၢ်တၢ်တဖၣ်န့ၣ်လီၤ.
22 အဝဲမၤဖျါထီၣ်တၢ်အယိာ်ဒီးတၢ်ခူသူၣ်အဒိၣ်အယိာ်တဖၣ်လီၤ.
သ့ၣ်ညါဝဲတၢ်မနုၤအိၣ်လၢတၢ်ခံးတၢ်နၤအပူၤ,
ဒီးအဝဲအနီၢ်ကစၢ်ဒၣ်ဝဲန့ၣ်ဘၣ်တၢ်ကဝီၤဃာ်အီၤလၢတၢ်ကပီၤလီၤ.
23 ယစံးထီၣ်ပတြၢၤနၤဒီးမၤလၤကပီၤနၤ, ပှၤလၢယဟဲလီၤစၢၤလီၤသွဲၣ်လၢအီၤတဖၣ်အကစၢ်ယွၤဧၢ,
နဟ့ၣ်လီၤတ့ၢ်ယၤတၢ်ကူၣ်သ့ဒီးတၢ်ဂံၢ်တၢ်ဘါလီၤ.
နစံးဆၢတ့ၢ်ယတၢ်ထုကဖၣ်
ဒီးနဒုးနဲၣ်တ့ၢ်ပှၤတၢ်လၢပကဘၣ်တဲဘၣ် စီၤပၤန့ၣ်လီၤ.”
24 မၤသးဒ်န့ၣ်ဒီးစီၤဒၤနံးယ့လးလဲၤဆူစီၤအၤရယိးအအိၣ်, ပှၤလၢစီၤပၤမၤလိာ်တ့ၢ်အီၤဒ်သိးကမၤသံကွံာ်စီၤပၤအပှၤဟ့ၣ် ကူၣ်တၢ်တဖၣ်န့ၣ်, ဒီးစံးဘၣ်အီၤ, “မၤသံအဝဲသ့ၣ်တဖၣ်တဂ့ၤ. လဲၤကိးယၤဆူစီၤပၤအအိၣ်ဒီးယကတဲဘၣ်အီၤလၢအတၢ်မံ မီၢ်အခီပညီန့ၣ်လီၤ.”
25 စီၤအၤရယိးလဲၤကိးစီၤဒၤနံးယ့လးဆူစီၤပၤနဘူၤကးန့စၢ်အမဲာ် ညါတဘျီဃီဒီးစံးဘၣ်စီၤပၤ, “ယထံၣ်န့ၢ်တ့ၢ်ပှၤတဂၤလၢ ပှၤယူဒၤဖိဘၣ်တၢ်စိာ်မၢကဲကုၢ်အီၤတဖၣ်အကျါလၢအစံး ဘၣ်တဲဘၣ်စီၤပၤအတၢ်မံမီၢ်အခီအပညီသ့ဝဲဒၣ်န့ၣ်လီၤ.”
26 စီၤပၤစံးဘၣ်စီၤဒၤနံးယ့လးလၢအမံၤဘၣ်တၢ်ကိးစ့ၢ်ကီးလၢ စီၤဘ့ၤလးတၡါစၢ်, “နစံးဘၣ်ယၤတၢ်လၢယမံမီၢ်တ့ၢ်န့ၣ် ဒီးဖးန့ၢ်ယၤလၢအခီပညါဘၣ်ကသ့ဧါ.”
27 ဒီးစီၤဒၤနံးယ့လးစံးဆၢစီၤပၤ, “ပှၤသ့သမူပယၢ်တၢ်မ့ၢ်ဂ့ၤ, ပှၤမၤကဒါမဲာ်မ့ၢ်ဂ့ၤ, ပှၤဖးတၢ်ဟဲဝံဟဲစိာ်မ့ၢ်ဂ့ၤ, ပှၤဖးဆၣ်ဧိၤဖီဧိၤအဂ့ၢ်တဖၣ်မ့ၢ်ဂ့ၤလီၣ်ဖျါ ထီၣ်တၢ်အဒိၣ်အယိာ်လၢစီၤပၤသံကွၢ်န့ၣ်တသ့ဘၣ်နီတဂၤဘၣ်.
28 ဘၣ်ဆၣ်ဒီးကစၢ်ယွၤလၢအမၤဖျါထီၣ်အတၢ်ခူသူၣ်အဒိၣ်အ ယိာ်အိၣ်ဝဲဒၣ်လၢမူခိၣ်တဂၤလီၤ. အဝဲလီၣ်ဖျါထီၣ်တ့ၢ်တၢ်ကမၤအ သးလၢမုၢ်နံၤလၢခံတဖၣ်အဂ့ၢ်န့ၣ်ဆူနၤ, စီၤပၤနဘူၤကးန့စၢ်အအိၣ်န့ၣ်လီၤ. ခဲကနံၣ်အံၤယကတဲဘၣ်နၤတၢ်မံမီၢ်ဒီးတၢ်ထံၣ်လၢညါခီလၢ နထံၣ်ဘၣ်တ့ၢ်ဖဲနမံသပ့ၤဘၣ်နသးအခါန့ၣ်လီၤ.
29 နဲဒၣ်စီၤပၤဧၢ, အခါဖဲနမံလီၤလၢနလီၢ်မံဖီခိၣ်ဒီးတၢ်ဆိကမိၣ် တဖၣ်ဟဲပၢၢ်ထီၣ်လၢခါဆူညါတၢ်ကမၤအသးဒ်လဲၣ်အဂ့ၢ် န့ၣ်လီၤ. ဒီးကစၢ်ယွၤလၢအလီၣ်ဖျါထီၣ်တၢ်ခူသူၣ်အဒိၣ် အယိာ်တဖၣ်န့ၣ်ဒုးသ့ၣ်ညါနၤလၢတၢ်ကမၤအသးတဖၣ်န့ၣ်လီၤ.
30 ခဲအံၤ, တၢ်ခူသူၣ်အဒိၣ်အယိာ်အံၤန့ၣ်ဘၣ်တၢ်လီၣ်ဖျါထီၣ် န့ၢ်တ့ၢ်ဆူယအိၣ်လီၤ. တမ့ၢ်ဘၣ်လၢယကူၣ်တၢ်သ့ဒိၣ်န့ၢ် ပှၤအဂၤအဃိဘၣ်. မ့မ့ၢ်ဒ်သိး, နဲဒၣ်စီၤပၤကမၤလိနတၢ်မံ မီၢ်အခီပညီ, ဒီးနၢ်ပၢၢ်တၢ်ဆိကမိၣ်တဖၣ်လၢအဟဲပၢၢ်ထီၣ် လၢနသးပူၤန့ၣ်လီၤ.
31 နဲဒၣ်စီၤပၤဧၢ, လၢနတၢ်ထံၣ်လၢညါခီအပူၤန့ၣ်နထံၣ်တၢ်ဂီၤသိ အသးဖးဒိၣ်တဒုအိၣ်ဆၢထၢၣ်လၢနမဲာ်ညါလီၤ. တၢ်ဂီၤအံၤကပြုၢ်ကပြီၤဒိၣ်မး, ဒီးအက့ၢ်အဂီၤန့ၣ်ပကွၢ်အီၤ လီၤပျံၤလီၤဖုးမးန့ၣ်လီၤ.
32 တၢ်ဂီၤအံၤအခိၣ်န့ၣ်မ့ၢ်ထူစီ, အသးနါပှၢ်ဒီးအစုဒုၣ်စုတီၤ တဖၣ်မ့ၢ်စ့, အဟၢဖၢဒီးအကံၣ်ဒုၣ်တဖၣ်မ့ၢ်တိၢ်ဘီ,
33 အခီၣ်တဖၣ်မ့ၢ်ထးဒီးအခီၣ်လၣ်မ့ၢ်ထးတနီၤကပံာ်တနီၤန့ၣ်လီၤ.
34 ဒီးဖဲနကွၢ်ဃီၤအီၤအဖၢမုၢ်န့ၣ်လၢၢ်ဖးဒိၣ်တဖျၢၣ်လၢပှၤတထိး ဘၣ်အီၤလၢအစုနီတဂၤဘၣ်န့ၣ်လီၤတပှၢ်အသးလၢလ့ကဘျၣ် ဖးထီအလိၤဒီးဟဲလီၤတီၢ်ဘၣ်တၢ်ဂီၤန့ၣ်လၢအခီၣ်လၣ်ဖဲကပံာ် ဒီးထးအိၣ်ဝဲဒီးမၤသဘှံးကွံာ်အီၤန့ၣ်လီၤ.
35 တကီၢ်ခါန့ၣ်, ထး, ကပံာ်, တိၢ်ဘီ, စ့ဒီးထူခဲလၢာ်န့ၣ်လီၤကလဲ ကွံာ်ဒီးကဲထီၣ်ဒ်ဖ့လၢတၢ်ကိၢ်အကတီၢ်လၢကြဲၢ်ပူၤအသိးန့ၣ်လီၤ. ကလံၤအူဒီးစိာ်ကွံာ်အီၤသတးဒီး, အလီၢ်အိၣ်လီၤပျီတ့ၢ်ဝဲလီၤ. မ့မ့ၢ်လၢၢ်လၢအလီၤတဲာ်တီၢ်အီၤန့ၣ်ကဲထီၣ်ကစၢၢ်ဖးဒိၣ်တ ဖျၢၣ်ဒီးမၤပှဲၤဟီၣ်ခိၣ်ဒီဘ့ၣ်ညါန့ၣ်လီၤ.
36 အဝဲအံၤမ့ၢ်တၢ်မံမီၢ်လီၤ. ခဲအံၤယကဖးန့ၢ်နဲဒၣ်စီၤပၤလၢ တၢ်မံမီၢ်အခီပညီန့ၣ်လီၤ.
37 နဲဒၣ်, စီၤပၤဧၢ, နမ့ၢ်စီၤပၤအဒိၣ်ကတၢၢ်လၢကယဲၢ်စီၤပၤတဖၣ်အကျါလီၤ. ကစၢ်ယွၤလၢမူခိၣ်ဒုးပၢနၤလၢဘီမုၢ်အါဘ့ၣ်ဒီးဟ့ၣ်လီၤတ့ၢ်နၤလၢ, တၢ်စိတၢ်ကမီၤ, တၢ်ဂံၢ်ဆူၣ်ဘါဆူၣ်ဒီးတၢ်လၤကပီၤန့ၣ်လီၤ.
38 အဝဲဒုးကဲထီၣ်တ့ၢ်နၤလၢပှၤပၢတၢ်အိၣ်လၢဟီၣ်ခိၣ်ချၢခဲလၢာ်, ဒီးပှၤပၢဆၣ်ဖိကီၢ်ဖိဒီးထိၣ်ဧိၤလံာ်ဧိၤတဖၣ်လီၤ. နမ့ၢ်တၢ်ဂီၤအခိၣ်ထူန့ၣ်လီၤ.
39 လၢတၢ်န့ၣ်အလီၢ်ခံန့ၣ်ဘီမုၢ်အသီတဘ့ၣ်လၢတဒိၣ်ဘၣ်ထဲသိး နဘီမုၢ်န့ၣ်ကပၢၢ်ထီၣ်ဝဲလီၤ. ဒီးလၢခံန့ၣ်တိၢ်ဘီအဘီမုၢ်လၢ အမ့ၢ်ဘီမုၢ်သၢဘ့ၣ်တဘ့ၣ်ကပၢၢ်ထီၣ်ဒီးပၢဟီၣ်ခိၣ်ဒီဘ့ၣ်ညါ လီၤ.
40 အန့ၣ်ဝံၤဒီးဘီမုၢ်လွံၢ်ဘ့ၣ်တဘ့ၣ်လၢအဂံၢ်ဆူၣ်ဝဲဒ်ထးအသိးကပၢၢ်ထီၣ်ဒီး မၤသဘှံးကွံာ်တၢ်ဒီးမၤလီၤကလဲကွံာ်တၢ်ခဲလၢာ်န့ၣ်လီၤ. ဒီးဒ်ထးဒိသဘှံးတၢ်ခဲလၢာ်အသိးန့ၣ်ဘီမုၢ်အံၤကဒိ သ့ၣ်ဖး, ဒိသဘှံးကွံာ်ဘီမုၢ်လၢညါတဖၣ်ခဲလၢာ်လီၤ.
41 ဒီးဒ်နထံၣ်တ့ၢ်အခီၣ်လၣ်ဒီးအခီၣ်မုၢ်ဘိတဖၣ်မ့ၢ်ထးတနီၤကပံာ် တနီၤအသိးန့ၣ်, တၢ်န့ၣ်ကမ့ၢ်ဝဲဘီမုၢ်အိၣ်လီၤဖးအသးန့ၣ်လီၤ. ဘၣ်ဆၣ်ဒီးတၢ်ဂံၢ်ဆူၣ်ဘါဆူၣ်ဒ်ထးအသိးတနီၤကအိၣ်လၢအကျါ, ဒ်နထံၣ်တ့ၢ်ထးအိၣ်ဃါဃုာ်အသးဒီးကပံာ်အသိးန့ၣ်လီၤ.
42 ဒီးဒ်အခီၣ်မုၢ်ဘိတဖၣ်တနီၤမ့ၢ်ထးဒီးတနီၤမ့ၢ်ကပံာ်အသိးန့ၣ်, ဘီမုၢ်ကဆူၣ်တနီၤဒီးကစၢ်ဝဲတနီၤန့ၣ်လီၤ.
43 ဒ်နထံၣ်တ့ၢ်ထးဃါဃုာ်သးဒီးကပံာ်ပှဲာ်အသိး, ဘီမုၢ်အပှၤပၢတၢ်တဖၣ်ကကျဲးစၢးစၢဖှိၣ်ဒူၣ်ဖိထၢဖိတဖၣ် ခီဖျိတၢ်တ့တၢ်ဖျီန့ၣ်လီၤ. ဘၣ်ဆၣ်ဒီးဒ်ထးတကျဲၣ်ကျီ ဃုာ်ဒီးကပံာ်အသိးန့ၣ်အဝဲသ့ၣ်တစဲဘူးလိာ်အသးဘၣ်.
44 လၢစီၤပၤတဖၣ်အမုၢ်နံၤအပူၤန့ၣ်ကစၢ်ယွၤလၢမူခိၣ်ကသူၣ်ထီၣ် ဘီမုၢ်တဘ့ၣ်လၢအကတၢၢ်တအိၣ်ဘၣ်လီၤ. ဘီမုၢ်န့ၣ်ဘၣ်တၢ်မၤနၢၤကွံာ်အီၤတန့ၢ်ဘၣ်. မ့မ့ၢ်ကမၤဟးဂီၤကွံာ်ဘီမုၢ်တဖၣ်လၢာ် လၢာ်ဆ့ဆ့ဒီးကအိၣ်ဂၢၢ်ကျၢၤဝဲလီၤထူလီၤယိာ်လီၤ.
45 ဒ်နထံၣ်တ့ၢ်လၢၢ်တဖျၢၣ်လၢပှၤတထိးဘၣ်အီၤလၢအစုနီတဂၤ န့ၣ်လီၤတပှၢ်လၢလ့ကဘျၣ်ဖးထီအလိၤဒီးဟဲလီၤတီၢ်ဘၣ်တၢ်ဂီၤ န့ၣ်ဒီးမၤသဘှံးကွံာ်ထး, တိၢ်ဘီ, ကပံာ်, စ့ဒီးထူအသိးန့ၣ်, ကစၢ်ယွၤဖးဒိၣ်တဂၤလီၣ်ဖျါထီၣ်န့ၢ်နဲဒၣ်စီၤပၤလၢတၢ် ကမၤအသးဆူညါတဖၣ်အဂ့ၢ်န့ၣ်လီၤ. ယစံးဘၣ်တ့ၢ်နၤလီၤတံၢ်လီၤဆဲးတၢ်လၢနမံမီၢ်တ့ၢ်ဒီးဖးန့ၢ် တ့ၢ်နၤအခီပညီအမ့ၢ်အတီလီၤ.”
46 တုၤနုၤတစုစီၤပၤနဘူၤကးန့စၢ်ချံးခီၣ်တီၤလီၤဒီးဟ့ၣ်တၢ်ယူး ယီၣ်ဆူစီၤဒၤနံးယ့လးအအိၣ်, ဒီးဟ့ၣ်လီၤအကလုၢ်လၢ ပှၤကမၤဘူၣ်တၢ်လုၢ်မၤဘူၣ်ဒီးတၢ်လုၢ်နၢမူတဖၣ်ဆူစီၤဒၤနံးယ့လး အအိၣ်န့ၣ်လီၤ.
47 စီၤပၤစံးဘၣ်စီၤဒၤနံးယ့လး, “မ့ၢ်မးနကစၢ်ယွၤန့ၣ်မ့ၢ် ဝဲကစၢ်တဖၣ်အကစၢ်ယွၤဒီးစီၤပၤတဖၣ်အယွၤ, ဒီးမ့ၢ်ပှၤလၢအမၤဖျါ ထီၣ်တၢ်ခူသူၣ်အဒိၣ်အယိာ်တဖၣ်လီၤ. ယသ့ၣ်ညါတၢ်အံၤ မ့ၢ်လၢနမၤဖျါထီၣ်တၢ်ခူသူၣ်အဒိၣ်အယိာ်အံၤသ့ဝဲဒၣ်အဃိ န့ၣ်လီၤ.”
48 အန့ၣ်ဝံၤဒီးစီၤပၤဟ့ၣ်လီၤစီၤဒၤနံးယ့လးလၢတၢ်လၤကပီၤဖး ဒိၣ်ဒီးခိၣ်ဖးအါအါကလဲာ်, ဒီးဒုးကဲထီၣ်အီၤလၢကီၢ်ဘၤဘူၤ လိၣ်ဒီကီၢ်ညါအကိတိာ်ခိၣ်ကျၢၢ်ဒီးပှၤအခိၣ်အဒိၣ်ကတၢၢ်လၢ စီၤပၤအပှၤဟ့ၣ်ကူၣ်တၢ်ခဲလၢာ်အဖီခိၣ်န့ၣ်လီၤ.
49 စီၤဒၤနံးယ့လးဃ့တၢ်လၢစီၤပၤဒီးစီၤပၤပာ်လီၤစီၤၡဒရး, စီၤမ့ၤၡး, ဒီးစီၤဧဘ့ၤဒနကိၤဒ်ကိတိာ်တဖၣ်လၢကီၢ်ဘၤဘူၤလိၣ်အပူၤလီၤ. မ့မ့ၢ်စီၤဒၤနံးယ့လးဆ့ၣ်နီၤဝဲဒ်ကိတိာ်ခိၣ်ကျၢၢ်အသိးလၢစီၤပၤ အနီပူၤန့ၣ်လီၤ.