လံာ်ဒၤနံးယ့လး
DANIEL
လံာ်ဒၤနံးယ့လးဘၣ်တၢ်ကွဲးတ့ၢ်အီၤဖဲပှၤယူဒၤဖိတဖၣ်တူၢ် ဘၣ်တၢ်ဒိၣ်ဒိၣ်ကလဲာ်တဘျီဖဲစီၤပၤတစူၢ်တနာ်ကစၢ်ယွၤတဂၤ အတၢ်မၤအၢမၤသီဒီးမၤနးမၤဖှီၣ်တၢ်အတၢ်ပၢတၢ်ပြး အကတီၢ်န့ၣ်လီၤ. ပှၤကွဲးလံာ်အံၤသူဝဲတၢ်တဲပူတဖၣ် ဒီးတၢ်ထံၣ်လၢညါခီအတၢ်တိၢ်နီၣ်တိၢ်ဃါတဖၣ် ဒီးဟ့ၣ်ဂံၢ်ဟ့ၣ်ဘါပှၤဂီၢ်မုၢ်လၢအဝဲဒၣ်အစိၤန့ၣ်လီၤ. အဝဲအိၣ်ဒီးတၢ်မုၢ်လၢ်လၢကစၢ်ယွၤကဆီၣ်လီၤကွံာ်ပှၤပၢ တၢ်အၢအၢသီသီအံၤဒီးကစၢ်ယွၤကဟ့ၣ် က့ၤအပှၤဂီၢ်မုၢ်လၢအထံအကီၢ်အတၢ်ပၢတၢ်ပြးအစိအကမီၤ န့ၣ်လီၤ.
လံာ်အံၤအိၣ်ဒီးတၢ်နီၤဖးမိၢ်ပှၢ်ခံတီၤန့ၣ်လီၤ. တၢတတီၤမ့ၢ် တၢ်တဲပူဘၣ်ဃးစီၤဒၤနံးယ့လးဒီးအတံၤသကိးတနီၤလၢ အဘၣ်တၢ်စိာ်မၢကဲကုၢ်အီၤဆူတခီထံတခီကီၢ်ဒီးခီဖျိ လၢအဝဲသ့ၣ်အတၢ်စူၢ်တၢ်နာ်ဒီးတၢ်ဒိကနၣ်ကစၢ်ယွၤအဃိ မၤနၢၤကွံာ်အဒုၣ်အဒါတဖၣ်အဂ့ၢ်န့ၣ်လီၤ. တၢ်တဲပူတဖၣ်အံၤသူၣ်ထီၣ်အသးလၢပှၤဘၤဘူၤလိၣ်ဖိဒီးပှၤပၤ ရၣ်ဖိတဖၣ်အဘီအမုၢ်အကတီၢ်တၢ်မၤအသးတဖၣ်အဖီခိၣ် န့ၣ်လီၤ. ခံတီၤတတီၤမ့ၢ်ဝံဒၤနံးယ့လးအတၢ်ထံၣ်လၢညါ ခီလၢအပိာ်ထွဲလိာ်အခံတမံၤဘၣ်တမံၤဃုာ်ဒီးအတၢ်ပနီၣ် တဖၣ်န့ၣ်လီၤ. တၢ်ထံၣ်လၢညါခီတဖၣ်အံၤပာ်ဖျါထီၣ်ဘီမုၢ် တဖၣ်အတၢ်ဟဲဒိၣ်ထီၣ်ဒီးအတၢ်လီၤပှီၢ်တကတီၢ်ဝံၤတကတီၢ်, စးထီၣ်လၢဘၤဘူၤလိၣ်အဘီအမုၢ်, ဒီးတဲဖျါဆိပှၤတစူၢ်တနာ် ကစၢ်ယွၤ, လၢအမၤနးမၤဖှီၣ်တၢ်အံၤအတၢ်လီၤပှီၢ်ဒီးကစၢ် ယွၤအပှၤဂီၢ်မုၢ်အတၢ်မၤနၢၤအဂ့ၢ်န့ၣ်လီၤ.
1
စီၤဒၤနံးယ့လးဒီးအတံၤသကိးတဖၣ်အပူ
1 လၢကီၢ်ယူဒၤအပူၤဖဲစီၤပၤစီၤယဟိၤယါကံၣ်ပၢတၢ်သၢနံၣ်တနံၣ် န့ၣ်ကီၢ်ဘၤဘူၤလိၣ်အစီၤပၤစီၤနဘူၤကးန့စၢ်ဟဲကဝီၤဃာ်ဝ့ၢ် ယရူၤၡလ့ၣ်ဒီးဒုးတၢ်ဒ်သိးကမၤန့ၢ်အီၤန့ၣ်လီၤ.
2 ဒီးယွၤဟ့ၣ်လီၤကွံာ်ကီၢ်ယူဒၤအစီၤပၤစီၤယဟိၤယါကံၣ်ဆူအစု ပူၤဃုာ်ဒီးတၢ်လုၢ်ဒိၣ်ပှ့ၤဒိၣ်တနီၤလၢယွၤအတၢ်လုၢ်ဟံၣ်အပူၤ န့ၣ်လီၤ. ဒီးက့ၤဖီၣ်န့ၢ်ဝဲပှၤယူဒၤဖိတနီၤဆူကီၢ်ၡံနၢ်ဒီးပာ်ဝဲလီခီ ထူလီခီစ့တဖၣ်န့ၣ်, လၢအကစၢ်တဖၣ်အဟံၣ်အတၢ်ပာ်ဖှိၣ် အလီၢ်ပူၤန့ၣ်လီၤ.
3 ဒီးစီၤပၤနဘူၤကးန့စၢ်ဟ့ၣ်လီၤအကလုၢ်ဆူအပဒိၣ်ခိၣ်ကျၢၢ် စီၤအၤၡပနးဒ်သိးကဃုထၢန့ၢ်ပှၤသးစၢ်တနီၤလၢအမ့ၢ် စီၤလိၣ်စီၤပၤဒီးပဒိၣ်ပပှၢ်အဒူၣ်ဖိထၢဖိလၢပှၤအံၣ်စရ့လးဖိ လၢအဘၣ်တၢ်စိာ်မၢကဲကုၢ်အီၤတဖၣ်အကျါန့ၣ်လီၤ.
4 ပှၤသးစၢ်တဖၣ်အံၤကဘၣ်မ့ၢ်ပှၤဒိၣ်တၢ်ဂ့ၤ, ပှၤအိၣ်ဒီးတၢ်ကူၣ်တၢ်ဆး, ပှၤအိၣ်ဒီးတၢ်သ့ၣ်ညါ, ပှၤမၤလိန့ၢ်တၢ်ချ့, ဒီးမဲၣ်သူမဲၣ်ဂီၤတအိၣ်ဘၣ် လၢအလိၤဒ်သိးကကြၢးဒီးတၢ်ဖံးတၢ်မၤလၢစီၤလိၣ် စီၤပၤအနီပူၤအဂီၢ်န့ၣ်လီၤ. စီၤအၤၡပနးကဘၣ် သိၣ်လိအဝဲသ့ၣ်လၢကသ့ဖး, သ့ကွဲးကီၢ်ဘၤဘူၤလိၣ်အကျိာ် ဒီးအလံာ်အလဲၢ်န့ၣ်လီၤ.
5 ဒီးစီၤပၤမၤလိာ်တ့ၢ်စ့ၢ်ကီးလၢပှၤသးစၢ်တဖၣ်အံၤကဘၣ်တၢ်ဒုး အီၣ်ဒုးအီအီၤကိးနံၤဒဲးတမံၤဃီဒ်စီၤပၤအတၢ်အီၣ်ဒီးစပံး ထံလၢစီၤပၤအီဝဲတဖၣ်အသိးန့ၣ်လီၤ. တုၤတၢ်သိၣ်လိမၤယုၤ အဝဲသ့ၣ်သၢနံၣ်ဝံၤအလီၢ်ခံန့ၣ်ကဘၣ်တၢ်ပာ်ဖျါထီၣ်အီၤဆူ စီၤပၤအမဲာ်ညါန့ၣ်လီၤ.
6 ပှၤလၢအဘၣ်တၢ်ဃုထၢတ့ၢ်အီၤတဖၣ်အကျါန့ၣ်မ့ၢ်ဝဲစီၤဒၤနံးယ့လး, စီၤဃနၤနယၤ, စီၤမံၡအ့လးဒီးစီၤဧစၤရယၤန့ၣ်လီၤ. အဝဲသ့ၣ်ခဲလၢာ်န့ၣ်ဟဲထီၣ်လၢယူဒၤအဒူၣ်အပူၤလီၤ.
7 စီၤပၤအပဒိၣ်ခိၣ်ကျၢၢ်ဟ့ၣ်က့ၤအဝဲသ့ၣ်လၢအမံၤအသီဒီး စီၤဒၤနံးယ့လးဘၣ်တၢ်ကိးအီၤလၢစီၤဘ့ၤလးတၡါစၢ်, စီၤဃနၤနယၤန့ၣ်လၢစီၤၡၤဒရး, စီၤမံၡအ့လးန့ၣ်လၢစီၤမ့ၤ ၡး, ဒီးစီၤဧစၤရယၤန့ၣ်လၢစီၤဧဘ့ၤဒနကိၤန့ၣ်လီၤ.
8 စီၤဒၤနံးယ့လးပာ်လီၤအသးလၢအသုတမၤဘၣ်အၢလီၤအသး ခီဖျိတၢ်အီၣ်စီၤပၤအတၢ်အီၣ်ဒီးအီစပံးထံလၢစီၤပၤအီဝဲဘၣ် အဃိ, ဃ့ကညးဝဲစီၤအၤၡပနးလၢကမၤစၢၤအီၤ,
9 ဒီးကစၢ်ယွၤမၤတ့ၢ်ဝဲဒ်သိးစီၤအၤၡပနးကသူၣ်အိၣ်သးအိၣ် စီၤဒၤနံးယ့လးန့ၣ်လီၤ.
10 ဘၣ်ဆၣ်ဒီးစီၤအၤၡပနးပျံၤဘၣ်စီၤပၤသတးဒီးစံးဘၣ်စီၤဒၤနံးယ့လး, စီၤပၤစံၣ်ညီၣ်တဲာ်တၢ်လၢသုကဘၣ်အီၣ်ဒီးအီဝဲတဖၣ်လီၤ. သုမ့ၢ်တဖျါပှဲၤဂံၢ်ပှဲၤဘါထဲသိးဒီးပှၤသးစၢ်အဂၤတဖၣ်န့ၣ်, စီၤပၤကမၤသံကွံာ်ယၤလီၤ.
11 မၤသးဒ်န့ၣ်ဒီးစီၤဒၤနံးယ့လးလဲၤဆူပှၤအခိၣ်လၢစီၤအၤၡပနးပာ် လီၤအီၤဒ်သိးအကကွၢ်ထွဲအဝဲဒီးအတံၤသကိးသၢဂၤအအိၣ် ဒီးစံးဝဲ,
12 မၤကွၢ်ပှၤထဲအသီတဆံတက့ၢ်. ဟ့ၣ်ပှၤတၢ်ဒိးတၢ်လၣ်တဖၣ် လၢပကအီၣ်ဒီးထံလၢပကအီအဂီၢ်တက့ၢ်.
13 အန့ၣ်ဝံၤဒီးထိၣ်သတြီၤကွၢ်ပဝဲဒီးပှၤသးစၢ်တဖၣ်လၢအအီၣ် စီၤပၤအတၢ်အီၣ်တၢ်အီတဖၣ်တက့ၢ်. ဒီးပာ်လီၤနတၢ်စံၣ်ညီၣ်တဲာ်ဒ်ပအိၣ် ဖျါလၢနမဲာ်ညါအသိးန့ၣ်တက့ၢ်.
14 လၢတၢ်န့ၣ်အဃိအဝဲဘၣ်သူၣ်ဘၣ်သးဒီးပျဲအဝဲသ့ၣ်ဒီးမၤကွၢ် အီၤအသီတဆံန့ၣ်လီၤ.
15 တုၤတၢ်ဆၢကတီၢ်ပှဲၤထီၣ်ဒီးအဝဲသ့ၣ်ဖျါအိၣ်ဆူၣ်အိၣ်ချ့ဒီး အဂံၢ်အဘါဆူၣ်န့ၢ်ဒံးပှၤအဂၤခဲလၢာ်လၢအအီၣ်တ့ၢ်စီၤပၤ အတၢ်အီၣ်တၢ်အီန့ၣ်လီၤ.
16 စးထီၣ်ဖဲန့ၣ်, ပှၤအခိၣ်လၢအကွၢ်ထွဲတၢ်အီၣ်န့ၣ်ဟံးထီၣ်ကွံာ် တၢ်အီၣ်အဝံၣ်ဒီးစပံးထံလၢကဘၣ်အီဝဲန့ၣ်ဒီးဟ့ၣ်အဝဲသ့ၣ်လၢ တၢ်ဒိးတၢ်လၣ်တဖၣ်န့ၣ်လီၤ.
17 ကစၢ်ယွၤဟ့ၣ်လီၤတ့ၢ်ပှၤသးစၢ်လွံၢ်ဂၤန့ၣ်လၢတၢ်သ့ၣ်ညါဒီး တၢ်သ့တၢ်ဘၣ်ဘၣ်ဃးဒီးကယဲၢ်တၢ်မၤလိမၤဒိးဒီးတၢ်ဆိ ကမိၣ်အဒိၣ်အယိာ်အတၢ်ကူၣ်သ့န့ၣ်လီၤ. လၢတၢ်န့ၣ်တဖၣ်န့ၣ် အမဲာ်ညါကစၢ်ယွၤဟ့ၣ်လီၤတ့ၢ်စီၤဒၤနံးယ့လးတၢ်သ့တၢ်ဘၣ် လၢကတဲဖျါတၢ်ထံၣ်လၢညါခီဒီးတၢ်မံမီၢ်တဖၣ်အခီပညီ န့ၣ်လီၤ.
18 လၢသၢနံၣ်အကတၢၢ်ဒ်စီၤပၤပာ်လီၤတ့ၢ်တၢ်ဆၢကတီၢ်အသိးန့ၣ် စီၤအၤၡပနးလဲၤဆှၢထီၣ်ပှၤသးစၢ်ခဲလၢာ်ဆူစီၤပၤနဘူၤကးန့စၢ် အမဲာ်ညါန့ၣ်လီၤ.
19 ဒီးစီၤပၤကတိၤတ့ၢ်တၢ်ဒီးအဝဲသ့ၣ်ခဲလၢာ်ဒီးစီၤဒၤနံးယ့လး, စီၤဃနၤနယၤ, စီၤမံၡအ့လးဒီးစီၤဧစၤရယၤထုးန့ၢ်တ့ၢ် စီၤပၤအသးဒိၣ်န့ၢ်ဒံးပှၤအဂၤတဂၤလၢ်လၢ်န့ၣ်လီၤ. လၢတၢ်န့ၣ်အဃိအဝဲသ့ၣ်ဘၣ်တၢ်ဂံၢ်ဃုာ်အီၤလၢပှၤကူၣ်လိာ် တၢ်တဖၣ်အကျါလၢစီၤပၤအနီပူၤန့ၣ်လီၤ.
20 ဒီးကယဲၢ်တၢ်ဂ့ၢ်တမံၤလၢ်လၢ်ဘၣ်ဃးတၢ်ကူၣ်သ့ဒီးတၢ်သ့ၣ် ညါနၢ်ပၢၢ်လၢစီၤပၤသံကွၢ်အီၤန့ၣ်ထံၣ်ဘၣ်ဝဲလၢပှၤလွံၢ်ဂၤအံၤ နၢ်ပၢၢ်ဝဲဂ့ၤန့ၢ်ဒံးပှၤဖးတၢ်ဟဲဝံဟဲစိာ်ဒီးပှၤသ့တၢ်အူတၢ် သမူတဂၤလၢ်လၢ်လၢအထံအကီၢ်ဒီဘ့ၣ်ညါအပူၤန့ၣ်, အစးတဆံဒၣ်လဲာ်လီၤ.
21 စီၤဒၤနံးယ့လးမၤဒံးတၢ်လၢစီၤပၤအနီပူၤန့ၣ်တုၤလၢစီၤပၤ စီၤကိရ့ၣ်, ပၤရၣ်အစီၤပၤဖးဒိၣ်လၢအဟဲဒုးန့ၢ်ကီၢ်ဘၤဘူၤလိၣ်, ပၢတၢ်အခီၣ်ထံးတနံၣ်န့ၣ်လီၤ.