1 ကီၢ်အဆၢလၢကလံၤစိးတကပၤန့ၣ်, လၢမုၢ်ထီၣ်တခီစးထီၣ်လၢ ပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်တုၤလၢဝ့ၢ်ဃ့သလိၣ်, ဆူဝ့ၢ်ဃမါသးအကျဲ, ဆူဝ့ၢ်ဃစၢ်ဧ့နၣ်, ဆူကီၢ်ဆၢလၢဒၤမ့ၤ စ့းအဘီအမုၢ်အလီၢ်ကဝီၤတဖၣ်ဒီးဝ့ၢ်ဃမါသး အဘၢၣ်စၢၤန့ၣ်မ့ၢ်လၢဒၣ်အဒူၣ်အဂီၢ်န့ၣ်လီၤ. ဒူၣ်အဂၤအတဒူၣ် စုာ်စုာ်ကဘၣ်ဒိးန့ၢ်တၢ်နီၤဖးတတီၤလၢကီၢ်ပူၤ စးထီၣ်လၢမုၢ်ထီၣ်ကီၢ်ဆၢဆူမုၢ်နုာ်တုၤလၢပီၣ် လဲၣ်ဖးဒိၣ်မဲးဒံးထၢၣ်ရ့နယၢၣ်တကျိၤဒ်တၢ်ရဲၣ်တၢ်ကျဲၤလၢ လာ်အံၤအသိးစးထီၣ်လၢကလံၤစိးတုၤလၢကလံၤထံးန့ၣ်လီၤ. 2 အၤၡ့ၢ်အဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲဒၣ်အဒူၣ်ကပၤစးထီၣ်လၢမုၢ်ထီၣ် တုၤလၢမုၢ်နုာ်န့ၣ်လီၤ. 3 နးသးလံအဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲအၤၡ့ၢ်အဒူၣ်အတၢ်လီၢ် အဆၢစးထီၣ်လၢမုၢ်ထီၣ်တုၤလၢမုၢ်နုာ်န့ၣ်လီၤ. 4 မနၤၡ့ၤအဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. အတၢ်နီၤဖးန့ၣ်ကမ့ၢ်ဖဲနးသးလံအဒူၣ်အလီၢ် အဃၢၤစးထီၣ်လၢမုၢ်ထီၣ်တုၤဆူမုၢ်နုာ်န့ၣ်လီၤ. 5 အ့ဖရဲၣ်အဒူၣ်ကမၤန့ၢ်တၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲမနၤၡ့ၣ်အဒူၣ်အလီၢ်အဃၢၤ စးထီၣ်လၢမုၢ်ထီၣ်တုၤဆူမုၢ်နုာ်န့ၣ်လီၤ. 6 ရူၤဘ့ၣ်အဒူၣ်ကမၤန့ၢ်တၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲအ့ဖရဲၣ်အဒူၣ်အလီၢ် အဃၢၤစးထီၣ်လၢမုၢ်ထီၣ်တုၤဆူမုၢ်နုာ်န့ၣ်လီၤ. 7 ယူဒၤအဒူၣ်ကမၤန့ၢ်တၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲရူၤဘ့ၣ်အဒူၣ်အလီၢ် အဃၢၤစးထီၣ်လၢမုၢ်ထီၣ်တုၤဆူမုၢ်နုာ် န့ၣ်လီၤ.

8 ကီၢ်အတၢ်နီၤဖးလၢခံတတီၤန့ၣ်ကဘၣ်တၢ်ပာ် လီၤဆီအီၤလၢတၢ်ကသူလီၤဆီအီၤအဂီၢ်န့ၣ်လီၤ. တၢ်လီၢ်န့ၣ်လဲၢ်ဝဲစးထီၣ်လၢကလံၤစိးဆူကလံၤထံးအပျၢ် ခံကလးယဲၢ်ကထိ, ဒီးအထီစးထီၣ်လၢမုၢ်ထီၣ်တုၤဆူမုၢ် နုာ်န့ၣ်ကဘၣ်ဒ်သိးသိးလိာ်အသးဒီးတၢ်လီၢ်အတီၤ တဖၣ်လၢအဘၣ်တၢ်ဟ့ၣ်နီၤအီၤဆူပှၤအဒူၣ်တဖၣ် အအိၣ်န့ၣ်လီၤ. ယွၤအတၢ်လုၢ်ဟံၣ်ကဘၣ်အိၣ်လၢတၢ်လီၢ် တတီၤအံၤအပူၤန့ၣ်လီၤ. 9 လၢတၢ်လီၢ်တတီၤအံၤအခၢၣ်သးန့ၣ်တၢ်လီၢ်လီၤဆီ တကဝီၤလၢအတၢ်ထိၣ်အထီမ့ၢ်ဝဲအပျၢ်ခံကလးယဲၢ် ကထိဒီးအဒီၣ်ဃီၤမ့ၢ်ဝဲအပျၢ်တကလးန့ၣ်ကဘၣ်တၢ်လုၢ်ထီၣ်အီၤ ဆူယွၤအအိၣ်န့ၣ်လီၤ. 10 တၢ်လီၢ်ကဝီၤစီဆှံအံၤမ့ၢ်တၢ်လီၢ်လၢပှၤလုၢ်တၢ်အခိၣ်တဖၣ် ကဘၣ်ဒိးန့ၢ်ဘၣ်အီၤဒ်အတၢ်နီၤဖးအသိးန့ၣ်လီၤ. စးထီၣ်လၢမုၢ်ထီၣ်တုၤဆူမုၢ်နုာ်န့ၣ်အဝဲသ့ၣ် အတၢ်နီၤဖးအလီၢ်အံၤကဘၣ်တၢ်ထိၣ်အီၤအပျၢ်ခံကလးယဲၢ်ကထိ, ဒီးစးထီၣ်လၢကလံၤစိးဆူကလံၤထံးန့ၣ်ကဘၣ်မ့ၢ်ဝဲအပျၢ် တကလးန့ၣ်လီၤ. ယွၤအတၢ်လုၢ်ဟံၣ်န့ၣ်ကဘၣ်အိၣ်ဝဲဒၣ်ဖဲ တၢ်လီၢ်ကဝီၤအံၤအခၢၣ်သးန့ၣ်လီၤ. 11 တၢ်လီၢ်ကဝီၤစီဆှံအံၤန့ၣ်ကဘၣ်မ့ၢ်ဝဲဒၣ်ပှၤလုၢ်တၢ်အခိၣ်တဖၣ် လၢအလီၤစၢၤလီၤသွဲၣ်လၢစီၤစၤဒိးအဂီၢ်န့ၣ်လီၤ. အဝဲသ့ၣ် တဖၣ်မၤတ့ၢ်ယတၢ်မၤလၢတၢ်သူၣ်တီသးတီအပူၤဒီးတမၤဃုာ် သကိးတၢ်ကမၣ်ဒီးပှၤအံၣ်စရ့လးဖိအဂၤတဖၣ်ဒ်ပှၤအဂၤတဖၣ် လၢလ့ၤဝံအဒူၣ်အပူၤမၤတ့ၢ်ဝဲအသိးန့ၣ်ဘၣ်. 12 လၢတၢ်န့ၣ်အဃိအဝဲသ့ၣ်ကဘၣ်ဒိးန့ၢ်ဘၣ်တၢ်လီၢ်လီၤဆီတတီၤ လၢအအိၣ်ဝဲဖဲတၢ်လီၢ်ကဝီၤလၢအဘၣ်ဃးဒီးပှၤလ့ၤဝံဖိတဖၣ် အကပၤ, ဒီးတၢ်လီၢ်န့ၣ်မ့ၢ်တၢ်စီဆှံကတၢၢ်န့ၣ်လီၤ. 13 ပှၤလ့ၤဝံဖိတဖၣ်စ့ၢ်ကီးကဘၣ်ဒိးန့ၢ်တၢ်လီၢ်လီၤဆီတကဝီၤလၢ ပှၤလုၢ်တၢ်အခိၣ်သ့ၣ်တဖၣ်အတၢ်လီၢ်အံၤအကလံၤထံးတကပၤ န့ၣ်လီၤ. တၢ်လီၢ်အံၤစ့ၢ်ကီးအတၢ်ထိၣ်ကဘၣ်မ့ၢ်ဝဲလၢမုၢ်ထီၣ် ဆူမုၢ်နုာ်န့ၣ်အပျၢ်ခံကလးယဲၢ်ကထိဒီးလၢကလံၤစိးဆူကလံၤထံး န့ၣ်အပျၢ်တကလးန့ၣ်လီၤ. 14 တၢ်လီၢ်ကဝီၤလၢအဘၣ်တၢ်လုၢ်ထီၣ်အီၤလၢယွၤန့ၣ်မ့ၢ်လီၢ် အဂ့ၤကတၢၢ်လၢကီၢ်ပူၤဒီးပှၤတဘၣ်ဆါကွံာ်အီၤမ့ၢ်ဂ့ၤ, တဘၣ်လဲလိာ်အီၤမ့ၢ်ဂ့ၤ, တဘၣ်ဟ့ၣ်ဆူပှၤအဂၤတဂၤအအိၣ် မ့ၢ်ဂ့ၤနီတဂၤဘၣ်. တၢ်လီၢ်ကဝီၤအံၤစီဆှံဒီးဘၣ်ဃးဒီးယွၤ န့ၣ်လီၤ. 15 တၢ်လီၢ်လီၤဆီလၢအအိၣ်တ့ၢ်ဒံးတကဝီၤလၢထီမ့ၢ်ဝဲအပျၢ်ခံ ကလးယဲၢ်ကထိဒီးအဒီၣ်ဃီၤမ့ၢ်ဝဲအပျၢ်ယဲၢ်ကထိန့ၣ် တမ့ၢ်ဘၣ်တၢ်စီဆှံဘၣ်. မ့မ့ၢ်မ့ၢ်လၢပှၤဂီၢ်မုၢ်ကသူအီၤထီ ရီၤအဂီၢ်န့ၣ်လီၤ. အဝဲသ့ၣ်ကအိၣ်ဆိးဖဲန့ၣ်ဒီးကသူဝဲတၢ်လီၢ် န့ၣ်လီၤ. ဝ့ၢ်ကဘၣ်အိၣ်လၢတၢ်လီၢ်န့ၣ်အခၢၣ်သး, 16 ဒီးတၢ်လီၢ်န့ၣ်ကမ့ၢ်တၢ်လီၢ်တတီၤလၢအကပၤလွံၢ်ကပၤ ဃူလိာ်အသး, အတၢ်ထိၣ်တကပၤစုာ်စုာ်မ့ၢ်ဝဲ, အပျၢ်လွံၢ်ကထိ ယဲၢ်ကယၤန့ၣ်လီၤ. 17 ဝးတရံးဝ့ၢ်န့ၣ်တကပၤစုာ်စုာ်ကဘၣ်အိၣ်ဒီးတၢ်လီၢ်လီၤပျီ တတီၤစုာ်စုာ်လၢအလဲၢ်အိၣ်ဝဲအပျၢ်ခံကယၤယဲၢ်ဆံန့ၣ်လီၤ. 18 ဖဲဝ့ၢ်န့ၣ်တၢ်ဘှီထီၣ်အီၤဝံၤအလီၢ်ခံ, လၢတၢ်လီၢ်ကဝီၤန့ၣ် အပူၤတၢ်လီၢ်အိၣ်တ့ၢ်ဒံးဝဲတတီၤလၢအိၣ်သဃီၤစဲဘူးလိာ်အသးဒီး တၢ်လီၢ်ကဝီၤစီဆှံလၢကလံၤထံးလၢအတၢ်ထိၣ်မ့ၢ်ဝဲလၢမုၢ်ထီၣ် တကပၤန့ၣ်အထီဒီးအဒီၣ်ဃီၤအိၣ်ဝဲဒၣ်အပျၢ်တကလးဒီး ယဲၢ်ကထိဒီးလၢမုၢ်နုာ်တကပၤန့ၣ်အထီဒီးအဒီၣ်ဃီၤအိၣ်ဝဲအပျၢ် တကလးဒီးယဲၢ်ကထိန့ၣ်လီၤ. တၢ်လီၢ်န့ၣ်ကဘၣ်တၢ်သူအီၤ လၢပှၤဂီၢ်မုၢ်လၢအအိၣ်လၢဝ့ၢ်န့ၣ်အပူၤဒ်စံာ်ဧိၤပှဲၤဧိၤအသိးန့ၣ်လီၤ. 19 ပှၤတဂၤလၢ်လၢ်လၢအအိၣ်ဆိးလၢဝ့ၢ်ပူၤ, အဝဲမ့ၢ်ဒူၣ်မတၤဂ့ၤ မတၤဂ့ၤအဒူၣ်ဖိန့ၣ်ဖံးအီၣ်မၤအီၣ်လၢတၢ်လီၢ်အဝဲန့ၣ်သ့ဝဲဒၣ် န့ၣ်လီၤ. 20 ဒီးလၢတၢ်န့ၣ်အဃိလီၢ်ကဝီၤလၢအအိၣ်လၢတၢ်လီၢ်တတီၤန့ၣ် အခၢၣ်သးလၢအဘၣ်တၢ်ပာ်လီၤဆီအီၤကဘၣ်မ့ၢ်တၢ်လီၢ်တတီၤ လၢအကပၤလွံၢ်ကပၤလိာ်အတၢ်ထိၣ်မ့ၢ်တၢ်ဒ်သိးသိး, လၢတကပၤစုာ်စုာ်ကဘၣ်မ့ၢ်ဝဲအပျၢ်ခံကထိယဲၢ်ကယၤန့ၣ်လီၤ. ဝ့ၢ်အတၢ်လီၢ်ကဝီၤကအိၣ်ဖဲတၢ်လီၢ်အံၤအပူၤန့ၣ်လီၤ. 21 တၢ်လီၢ်လၢအအိၣ်ဝဲဒီးယွၤအတၢ်လုၢ်ဟံၣ်, ပှၤလုၢ်တၢ်အခိၣ်တဖၣ် အလီၢ်အကျဲ, ပှၤလ့ၤဝံဖိတဖၣ်အလီၢ်အကျဲ, ဒီးဝ့ၢ်အလီၢ် အကျဲတကဝီၤအံၤ, အမုၢ်ထီၣ်ဒီးအမုၢ်နုာ်, တၢ်လီၢ်လၢအအိၣ် လီၤတဲာ်အဂၤတဖၣ်န့ၣ်ဘၣ်ဃးဒီးစီၤပၤဖိခွါလၢအပၢတၢ်န့ၣ်လီၤ. 22 တၢ်လီၢ်အံၤအဆၢလၢမုၢ်ထီၣ်တကပၤန့ၣ်, လဲၤဝဲယံၤတုၤလၢမုၢ်ထီၣ်ကီၢ်အဆၢဒီးလၢ မုၢ်နုာ်တကပၤန့ၣ်လဲၤဝဲတုၤဆူပီၣ်လဲၣ်ဖးဒိၣ် မဲးဒံးထၢၣ်ရ့နယၢၣ်ဒီးတၢ်လီၢ်တတီၤလၢအဘၣ်ထွဲဒီး ယူဒၤအဒူၣ်, မ့ၢ်တၢ်လီၢ်အံၤအဆၢလၢကလံၤစိးတကပၤ, ဒီးတၢ်လီၢ်တတီၤလၢအဘၣ်ထွဲဒီးဘံၣ်ယၤမံၣ်အဒူၣ်, မ့ၢ်တၢ်လီၢ်အံၤအဆၢလၢကလံၤထံးတကပၤန့ၣ်လီၤ.

23 လၢတၢ်လီၢ်လီၤဆီအံၤအကလံၤထံးတကပၤန့ၣ်ဒူၣ်တဖၣ်လၢ အအိၣ်လီၤတဲာ်ဒံးတဒူၣ်စုာ်စုာ်, ကဘၣ်မၤန့ၢ်တၢ်လီၢ်တတီၤ စုာ်စုာ်စးထီၣ်လၢမုၢ်ထီၣ်အကီၢ်ဆၢဆူမုၢ်နုာ်တကပၤတုၤဆူ ပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်, ဒ်တၢ်ရဲၣ်လီၤကျဲၤလီၤလၢ လာ်အံၤ, စးထီၣ်လၢကလံၤစိးဆူကလံၤထံးန့ၣ်လီၤ. ဘံၣ်ယၤမံၣ်အဒူၣ် ကအိၣ်ဒီးတၢ်လီၢ်တတီၤလီၤ. တၢ်လီၢ်န့ၣ်ကမ့ၢ်ဝဲစးထီၣ်လၢ မုၢ်ထီၣ်တကပၤတုၤဆူမုၢ်နုာ်တကပၤန့ၣ်လီၤ. 24 စူၤမ့းအိၣ်အဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲဘံၣ်ယၤမံၣ်အဒူၣ်အလီၢ်ကဝီၤ အဃၢၤဒီးစးထီၣ်လၢမုၢ်ထီၣ်တုၤလၢမုၢ်နုာ်န့ၣ်လီၤ. 25 ယံးစၣ်ကၢ်အဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲစူၤမ့းအိၣ်အဒူၣ်အလီၢ်ကဝီၤ အဃၢၤစးထီၣ်လၢမုၢ်ထီၣ်တုၤလၢမုၢ်နုာ်န့ၣ်လီၤ. 26 စဘူလိၣ်အဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲယံးစၣ်ကၢ်အဒူၣ်အလီၢ်ကဝီၤ အဃၢၤစးထီၣ်လၢမုၢ်ထီၣ်ပၢၢ်တုၤလၢမုၢ်နုာ်န့ၣ်လီၤ. 27 ကးအဒူၣ်ကမၤန့ၢ်အတၢ်နီၤဖးတတီၤန့ၣ်လီၤ. တၢ်နီၤဖးန့ၣ်ကမ့ၢ်ဖဲစဘူလိၣ်အလီၢ်ကဝီၤ အဃၢၤစးထီၣ်လၢမုၢ်ထီၣ်တုၤလၢမုၢ်နုာ်န့ၣ်လီၤ. 28 လၢတၢ်နီၤဖးတတီၤလၢတၢ်ဟ့ၣ်အီၤဆူကးအဒူၣ်, အကလံၤထံးန့ၣ်, ကီၢ်အဆၢလဲၤဝဲဆူကလံၤထံးမုၢ် နုာ်စးထီၣ်လၢဝ့ၢ်တၤမၢ်ပၢၢ်တုၤလၢကၤဒ့ၣ်အမဲး မုၢ်ခိၣ်ထံအိၣ်အလီၢ်တတီၤ, အန့ၣ်ဝံၤဒီးလဲၤဝဲဆူ ကလံၤစိးမုၢ်နုာ်တကပၤလၢအဲၤကူပတူးအကီၢ်ဆၢတကျိၤ တုၤဆူပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ. 29 ယွၤ, ပၢဘၣ်တၢ်ခဲလၢာ်ကစၢ်စံးဝဲဒၣ်, တၢ်န့ၣ်မ့ၢ်ကျဲလၢကီၢ် ကဘၣ်တၢ်နီၤလီၤအီၤဆူတၢ်နီၤဖးတဖၣ်လၢကီၢ်အံၣ်စရ့လး ဒူၣ်တဖၣ်ကဒိးန့ၢ်အီၤအဂီၢ်န့ၣ်လီၤ.

30 ဝ့ၢ်ယရူၤၡလ့ၣ်အိၣ်ဒီးအတၢ်လဲၤနုာ်အကျဲစၢၤ တဆံခံခါန့ၣ်လီၤ. တၢ်ဒူၣ်လွံၢ်ကပၤလိာ်, တကပၤစုာ်စုာ်အတၢ်ထိၣ်မ့ၢ်ဝဲ, အထီအပျၢ်လွံၢ် ကထိယဲၢ်ကယၤန့ၣ်လီၤ. 31 တၢ်ဒူၣ်တကပၤစုာ်စုာ်အိၣ်ဒီးအတြဲၤဖးဒိၣ်သၢဘ့ၣ်, လၢတဘ့ၣ်စုာ်စုာ်ဘၣ်တၢ်ယုၢ်န့ၣ်အမံၤဒ်ဒူၣ်တဖၣ် အကျါတဒူၣ်အမံၤန့ၣ်လီၤ. တြဲၤဖးဒိၣ်တဖၣ်လၢအအိၣ်လၢ ကလံၤစိးအတၢ်ဒူၣ်န့ၣ်, တၢ်ကိးအီၤလၢရူၤဘ့ၣ်, ယူဒၤ, ဒီးလ့ၤဝံန့ၣ်လီၤ. 32 လၢအအိၣ်လၢမုၢ်ထီၣ်တၢ်ဒူၣ်တဖၣ်န့ၣ်ဘၣ် တၢ်ကိးအီၤလၢယိၤသး, ဘံၣ်ယၤမံၣ်, ဒီးဒၣ်န့ၣ်လီၤ. 33 လၢအအိၣ်လၢကလံၤထံးအတၢ်ဒူၣ်တဖၣ်န့ၣ် ဘၣ်တၢ်ကိးအီၤလၢစူၤမ့းအိၣ်, ယံးစၣ်ကၢ်, ဒီးစဘူလိၣ်န့ၣ်လီၤ. 34 ဒီးလၢအိၣ်လၢမုၢ်နုာ်တၢ်ဒူၣ်တကပၤန့ၣ်ဘၣ်တၢ် ကိးအီၤလၢကး, အၤၡ့ၢ်ဒီးနးသးလံန့ၣ်လီၤ. 35 ဝ့ၢ်အတၢ်ဒူၣ်လွံၢ်ကပၤလိာ်အတၢ်ထိၣ်ခဲလၢာ် န့ၣ်မ့ၢ်ဝဲအပျၢ်တကလးဃိးကထိန့ၣ်လီၤ. စးထီၣ်လၢခဲအံၤဒီးဆူညါန့ၣ်ဝ့ၢ်အံၤအမံၤကဘၣ် တၢ်ကိးအီၤလၢ “ယွၤအိၣ်ဝဲဖဲအံၤ” န့ၣ်လီၤ.