8
1 ခဲကနံၣ်အံၤ, ဘၣ်ထွဲဒီးတၢ်ဂ့ၢ်လၢသုကွဲးဖျါသုဝဲဘၣ်ဃးတၢ်အီၣ် တၢ်အီလၢအဘၣ်တၢ်လုၢ်ထီၣ်ပာ်ထီၣ်အီၤဆူတၢ်ဂီၤတၢ်ဖီၣ်တဖၣ်
အအိၣ်န့ၣ်,
သပှၢ်ကတၢၢ်, မ့ၢ်ဝဲတီဝဲကစီဒီလီၤ. ဒ်အဝဲသ့ၣ်စံးဝဲအသိးန့ၣ်,
“ပဝဲကိးဂၤဒဲးပအိၣ်ဒီးတၢ်သ့ၣ်ညါနၢ်ပၢၢ်လီၤ.” ဘၣ်ဆၣ်ဒီး, တၢ်သ့ၣ်ညါဒ်န့ၣ်အသိး, မၤကဖိထီၣ်ပှၤကညီလၢတၢ်ပာ်
ကဖၢလၢသးလီၤ. မ့မ့ၢ်တၢ်အဲၣ်တၢ်ကွံန့ၣ်, မၤထီၣ်မၤထီတၢ်လီၤ.
2 ပှၤတဂၤလၢ်လၢ်လၢအဆိကမိၣ်အသ့ၣ်ညါတၢ်တမံၤန့ၣ်, တသ့ၣ်ညါတၢ်နီၢ်နီၢ်ဒ်အကြၢးသ့ၣ်ညါဝဲအသိးဘၣ်.
3 မ့မ့ၢ်ပှၤတဂၤလၢအအဲၣ်ကစၢ်ယွၤန့ၣ်, ဘၣ်တၢ်သ့ၣ်ညါအီၤလၢ ယွၤလီၤ.
4 လၢတၢ်န့ၣ်အဃိ, ဘၣ်ဃးဒီးတၢ်အီၣ်လၢအဘၣ်တၢ်လုၢ်ထီၣ် ပာ်ထီၣ်အီၤဆူတၢ်ဂီၤတၢ်ဖီၣ်အအိၣ်န့ၣ်, ပသ့ၣ်ညါလၢတၢ်ဂီၤတဒုပာ်ဖျါထီၣ်တၢ်တမံၤလၢအတအိၣ်နီၢ်နီၢ်ဘၣ်
န့ၣ်လီၤ. ပသ့ၣ်ညါပဝဲလၢကစၢ်ယွၤအိၣ်ဝဲထဲတဂၤဧိၤလီၤ.
5 တၢ်လၢပှၤကိးဝဲလၢ “ယွၤတဖၣ်” မ့ၢ်အိၣ်ဝဲဒၣ်လဲာ်, လၢမူခိၣ်မ့ၢ်ဂ့ၤ, ဟီၣ်ခိၣ်မ့ၢ်ဂ့ၤ, ဒီး “ယွၤ” ဒ်အံၤအသိးတဖၣ်, ဒီး “ကစၢ်” ဒ်အံၤအသိးတဖၣ်မ့ၢ်အိၣ်ဝဲအါအါဂီၢ်ဂီၢ်ဒၣ်လဲာ်န့ၣ်,
6 လၢပဝဲဒၣ်ပဂီၢ်, ကစၢ်ယွၤအိၣ်ထဲတဂၤဧိၤ, လၢအမ့ၢ်ပၢ်ကစၢ်, လၢအမ့ၢ်ပှၤတ့လီၤပာ်လီၤတၢ်ကိးမံၤဒဲး ဒီးလၢပမူလၢအဂီၢ်, ဒီးကစၢ်အိၣ်ထဲတဂၤ, ယ့ၣ်ၡူးခရံာ်လၢတၢ်ကိးမံၤဒဲးဘၣ်တၢ်တ့လီၤခီဖျိအီၤ, ဒီးလၢပမူပဝဲခီဖျိအီၤန့ၣ်လီၤ.
7 ဘၣ်ဆၣ်ဒီးပှၤတသ့ၣ်ညါတၢ်မ့ၢ်တၢ်တီအဝဲအံၤကိးဂၤဒဲးဘၣ်. ပှၤတနီၤညီနုၢ်လၢတၢ်ဂီၤတၢ်ဖီၣ်ဒ်အံၤအသိးတဖၣ်တုၤဒၣ်လဲာ်, တုၤလီၤလၢမုၢ်မဆါတနံၤအံၤဖဲအဝဲသ့ၣ်အီၣ်တၢ်အီၣ်ဒ်န့ၣ် အသိးတဖၣ်န့ၣ်, အဝဲသ့ၣ်ဆိကမိၣ်ဒံးဝဲလၢအဂ့ၢ်ဒ်အမ့ၢ်တၢ်အီၣ်လၢအမ့ၢ်တၢ်ဂီၤ
တၢ်ဖီၣ်တဖၣ်အတၢ်န့ၣ်လီၤ. အဝဲသ့ၣ်အသးလၢအသ့ၣ်ညါဒၣ်တၢ်
အဂံၢ်အဘါစၢ်, ဒီးဆိကမိၣ်လီၤအသးလၢအဘၣ်တၢ်မၤဘၣ်အၢအီၤလၢတၢ်အီၣ်
န့ၣ်လီၤ.
8 ဘၣ်ဆၣ်ဒီး, တၢ်အီၣ်န့ၣ်တမ့ၢ်အကမၤဂ့ၤထီၣ်ပတၢ်ဘၣ်ထွဲဒီး ကစၢ်ယွၤဘၣ်. ပမ့ၢ်တအီၣ်ဒီးတၢ်တလီၤမၢ်လၢပဂီၢ်နီတမံၤဘၣ်. ဒ်န့ၣ်အသိးပမ့ၢ်အီၣ်တၢ်ကစီဒီဒီး, တမ့ၢ်လၢပကမၤန့ၢ်အါထီၣ်
တၢ်တမံၤမံၤဘၣ်.
9 ဘၣ်ဆၣ်ဒီး, ပလီၢ်သုသးဒ်သိးသုတပျဲသုတၢ်သဘျ့လၢသု ကမၤဖဲသုသးဒုးလီၤဃံၤပှၤလၢအဂံၢ်စၢ်ဘါစၢ်တဖၣ်ဆူ
တၢ်ဒဲးဘးအပူၤတဂ့ၤ.
10 ပစံးဒၣ်ကလိာ်, ပှၤတဂၤလၢအသးလၢအသ့ၣ်ညါဒၣ်တၢ်အဂံၢ် အဘါစၢ်လၢတၢ်ဂ့ၢ်အဝဲအံၤတကပၤတဂၤထံၣ်သုဝဲလၢအအိၣ်ဒီး
တၢ်လၢပှၤကိးဝဲလၢ “တၢ်သ့ၣ်ညါနၢ်ပၢၢ်” န့ၣ်,
အီၣ်တၢ်လၢတၢ်ဂီၤတၢ်ဖီၣ်တဒုအတၢ်လုၢ်ဟံၣ်အပူၤဒီး, အဝဲကဘၣ်တၢ်မၢန့ၢ်ဆီၣ်ခံအီၤလၢအကအီၣ်တၢ်အီၣ်လၢအဘၣ်
တၢ်လုၢ်ထီၣ်အီၤဆူတၢ်ဂီၤတၢ်ဖီၣ်တဖၣ်အအိၣ်တမ့ၢ်ဘၣ်ဧါ.
11 ဒီးလၢတၢ်န့ၣ်အဃိပှၤဂံၢ်စၢ်ဘါစၢ်တဂၤအံၤ, နဒီပုၢ်ဝဲၢ်လၢခရံာ် သံလၢအဂီၢ်န့ၣ်, ကလီၤမၢ်ကွံာ်ဝဲ, မ့ၢ်လၢန, “တၢ်သ့ၣ်ညါနၢ်ပၢၢ်”
အဃိန့ၣ်လီၤ.
12 ဒီးလၢကျဲဒ်အံၤအပူၤနကမၤဘၣ်တၢ်ဒဲးဘးထီဒါခရံာ် ခီဖျိနမၤတၢ်ဒဲးဘးထီဒါနဒီပုၢ်ဝဲၢ်ပှၤခရံာ်ဖိတဖၣ်ဒီး
မၤဘၣ်ဒိအသးလၢအသ့ၣ်ညါဒၣ်တၢ်လၢအဂံၢ်စၢ်ဘါစၢ်န့ၣ်လီၤ.
13 မ့မ့ၢ်ဒ်န့ၣ်ဒီး, တၢ်အီၣ်မ့ၢ်ဒုးမၤယဒီပုၢ်ဝဲၢ်လၢတၢ်ဒဲးဘးန့ၣ်, ယတအီၣ်လၢၤတၢ်ဖံးတၢ်ညၣ်နီတစုဘၣ်. ဒ်သိးယသုတဒုးလီၤဃံၤယဒီပုၢ်ဝဲၢ်လၢတၢ်ဒဲးဘးအပူၤ တဂ့ၤအဂီၢ်န့ၣ်လီၤ.