7
1 အခဲအံၤ, ပကကွၢ်ဆိကမိၣ်ဘၣ်ဃးဒီးတၢ်ဂ့ၢ်တၢ်ကျိၤလၢ သုကွဲးဖျါတ့ၢ်သုဝဲတဖၣ်န့ၣ်လီၤ. ပှၤပိာ်ခွါတဂၤမ့ၢ်တန့ၢ်
အမါန့ၣ်ဂ့ၤဝဲလီၤ.
2 ဘၣ်ဆၣ်ဒီး, တၢ်မၤကမၣ်မုၣ်ကမၣ်ခွါအိၣ်ဝဲဒၣ်အါမး အဃိ, ပှၤပိာ်ခွါကိးဂၤဒဲးကြၢးအိၣ်ဒီးအမါဒၣ်ဝဲ, ဒီးပှၤပိာ်မုၣ်ကိးဂၤဒဲးကြၢးအိၣ်ဒီးအဝၤဒၣ်ဝဲန့ၣ်လီၤ.
3 ပှၤပိာ်ခွါတဂၤကြၢးမၤလၢမၤပှဲၤအမူအဒါဒ်ဝၤတဂၤအသိး, ဒီးပှၤပိာ်မုၣ်တဂၤကြၢးမၤလၢမၤပှဲၤအမူအဒါဒ်မါတဂၤ အသိး, ဒီးတဂၤကြၢးမၤလၢမၤပှဲၤအဝဲတဂၤအတၢ်လိၣ်တဖၣ်
လီၤ.
4 မါတဂၤတမ့ၢ်အနီၢ်ခိဒၣ်ဝဲအကစၢ်ဘၣ်, မ့ၢ်ဝဲအဝၤလီၤ. ဒ်န့ၣ်အသိးဝၤတဂၤတမ့ၢ်အနီၢ်ခိဒၣ်ဝဲအကစၢ်ဘၣ်. မ့ၢ်ဝဲအမါလီၤ.
5 မ့တမ့ၢ်လၢသုအိၣ်ဒီးတၢ်အၢၣ်လီၤဆိပာ်သုသး, လၢသုကအိၣ်လီၤဖးတစိၢ်တလီၢ်ဒ်သိးသုကအိၣ်ဒီးတၢ်ဆၢ ကတီၢ်လၢတၢ်ထုကဖၣ်အဂီၢ်န့ၣ်, တဘၣ်အိၣ်လီၤဖးလိာ်သုသးတဂၤဒီးတဂၤတဂ့ၤ.
ဘၣ်ဆၣ်ဒီးတၢ်န့ၣ်ဝံၤအလီၢ်ခံအိၣ်က့ၤဒီး
တၢ်ဘၣ်ထွဲလိာ်သုသးဒ်နီၢ်ဒီမိဝၤအသိးတက့ၢ်.
လၢကျဲဒ်အံၤအပူၤန့ၣ်, သုကပူၤဖျဲးဒီးတၢ်ဟ့ၣ်လီၤသုသးဆူမုၣ်ကီၤလံၢ်အတၢ်လ့ပစီ
အပူၤလၢသုတၢ်ပၢၤသူၣ်ပၢၤသးတအိၣ်ဘၣ်အဃိန့ၣ်လီၤ.
6 ယစံးဘၣ်တဲဘၣ်သုတၢ်တမံၤအံၤန့ၣ်, မ့ၢ်ဒ်တၢ်အၢၣ်လီၤဟ့ၣ် အခွဲးအသိး, ဒီးတမ့ၢ်ဘၣ်ဒ်တၢ်ဟ့ၣ်လီၤတၢ်ကလုၢ်အသိးဘၣ်.
7 အနီၢ်နီၢ်တခီ, ယဆၢလၢသုဝဲကိးဂၤဒဲးသုကလီၤဂာ်ဒ်ယၤ အသိးလီၤ. ဘၣ်ဆၣ်ဒီးပှၤတဂၤဒီးတဂၤအိၣ်ဒီးအတၢ်ဟ့ၣ်လီၤ
ဆီဒၣ်ဝဲလၢအဟဲလၢကစၢ်ယွၤအအိၣ်န့ၣ်လီၤ.
တဂၤအိၣ်ဒီးတၢ်ဟ့ၣ်တမံၤအံၤ, အဂၤတဂၤအိၣ်ဒီးတၢ်ဟ့ၣ်
အဝဲန့ၣ်တမံၤလီၤ.
8 ခဲကနံၣ်အံၤ, ဆူပှၤအိၣ်သဘျ့တဖၣ်ဒီးဆူပှၤမုၣ်ကမဲ တဖၣ်န့ၣ်, ယစံးယဲလၢဂ့ၤဒိၣ်တက့ၢ်, သုကအိၣ်သဘျ့သုဝဲဆူညါဒ်ယၤအသိး
န့ၣ်လီၤ.
9 ဘၣ်ဆၣ်ဒီး, သုပၢၤဃာ်သုတၢ်သးကွံမ့ၢ်တန့ၢ်သၢပျၢၤ, န့ၢ်မါန့ၢ်ဝၤတက့ၢ်. သုန့ၢ်မါန့ၢ်ဝၤန့ၣ်ဂ့ၤဒိၣ်န့ၢ်သုအိၣ်ဒီးတၢ်သူၣ်ကတၢသးကတၢ
တက့ၢ်လီၤ.
10 ဆူပှၤအိၣ်ဒီးအမါအဝၤတဖၣ်အအိၣ်န့ၣ်, ယဟ့ၣ်လီၤတၢ်အကလုၢ်လၢအတမ့ၢ်ယကလုၢ်ဒၣ်ယဲဘၣ်. မ့မ့ၢ်, မ့ၢ်ဝဲကစၢ်အကလုၢ်န့ၣ်လီၤ. မါတဂၤတကြၢးပာ်တီၢ်
အဝၤဘၣ်.
11 ဘၣ်ဆၣ်ဒီးအဝဲမ့ၢ်ပာ်တီၢ်အဝၤန့ၣ်, ကဘၣ်အိၣ်သဘျ့ဝဲ ဆူညါ, မ့တမ့ၢ်ကဘၣ်ဒိးတၢ်မၤဃူမၤဖိးက့ၤအီၤဒီးအဝၤ
န့ၣ်လီၤ. ဒီးဝၤတဂၤတဘၣ်ပာ်မၢ်ကွံာ်အမါဘၣ်.
12 ဆူပှၤဂၤတဖၣ်န့ၣ်ယစံးယဲ, (ယၤ, ယနီၢ်ကစၢ်ဒၣ်ယဲ, တမ့ၢ်ကစၢ်ဘၣ်.) ပှၤခရံာ်ဖိပိာ်ခွါတဂၤမ့ၢ်အိၣ်ဒီးအမါလၢ
အတမ့ၢ်ပှၤစူၢ်က့ၤနာ်က့ၤခရံာ်ဘၣ်, ဒီးအဝဲဒၣ်အၢၣ်လီၤလၢအကအိၣ်ဒံးဒီးအဝၤန့ၣ်,
အဝဲတဘၣ်ပာ်မၢ်ကွံာ်ပိာ်မုၣ်အံၤဘၣ်.
13 ဒီးပှၤခရံာ်ဖိပိာ်မုၣ်တဂၤလၢအဒိးတ့ဒိးဖျီအသးဒီးပှၤ တစူၢ်က့ၤနာ်က့ၤခရံာ်တဂၤ, ဒီးအဝဲဒၣ်အၢၣ်လီၤလၢအကအိၣ်ဒံးဆူညါဒီးအမါန့ၣ်,
အဝဲတဘၣ်ပာ်မၢ်ကွံာ်ပိာ်ခွါတဂၤအံၤဘၣ်.
14 အဂ့ၢ်ဒ်အံၤ, ဝၤလၢအတစူၢ်က့ၤနာ်က့ၤတၢ်တဂၤဘၣ်တၢ်ကတဲာ်ကတီၤအီၤဒ်သိး အကဘၣ်တၢ်တူၢ်လိာ်ပာ်တီပာ်လိၤအီၤလၢကစၢ်ယွၤအမဲာ်ညါ
ခီဖျိတၢ်ပာ်ဖှိၣ်ဃုာ်အီၤဒီးအမါ, ဒီးအမါလၢအတစူၢ်တနာ်တၢ်တဂၤဘၣ်တၢ်ကတဲာ်ကတီၤအီၤဒ်သိး
အကဘၣ်တၢ်တူၢ်လိာ်ပာ်တီပာ်လိၤအီၤလၢကစၢ်ယွၤအမဲာ်ညါ
ခီဖျိတၢ်ပာ်ဖှိၣ်ဃုာ်အီၤဒီးအဝၤ, ပှၤခရံာ်ဖိတဂၤန့ၣ်လီၤ.
မ့တမ့ၢ်ဒ်န့ၣ်ဘၣ်ဒီး, အဝဲသ့ၣ်အဖိအလံၤတဖၣ်ကလီၤဂာ်ဒ်ပှၤသူခိၣ်ဖိအဖိအလံၤ
အသိးလီၤ. ဘၣ်ဆၣ်ဒီး, ဒ်တၢ်မၤအသးအသိးန့ၣ်, အဝဲသ့ၣ်ဘၣ်တၢ်တူၢ်လိာ်ပာ်တီပာ်လိၤအီၤလၢကစၢ်ယွၤ
အမဲာ်ညါလီၤ.
15 ဘၣ်ဆၣ်ဒီး, ပှၤလၢအမ့ၢ်ပှၤတစူၢ်က့ၤနာ်က့ၤတၢ်တဂၤ, မ့ၢ်သးအိၣ်ပာ်တီၢ်ကွံာ်အသကိးပှၤခရံာ်ဖိန့ၣ်, ပျဲအီၤတက့ၢ်. မ့မ့ၢ်ဒ်န့ၣ်ဒီးတံၤသကိးလၢအမ့ၢ်ပှၤခရံာ်ဖိတဂၤန့ၣ်, ဝၤမ့ၢ်ဂ့ၤ, မါမ့ၢ်ဂ့ၤ, အိၣ်ဒီးတၢ်သဘျ့လၢအကမၤဖဲဒၣ်အသးလီၤ. ကစၢ်ယွၤကိးတ့ၢ်သုဒ်သိးသုကအိၣ်လၢတၢ်ဃူတၢ်ဖိး
အပူၤလီၤ.
16 မါပှၤခရံာ်ဖိဧၢ, နတအုၣ်က့ၤခီၣ်က့ၤနဝၤန့ၣ်, နသ့ၣ်ညါလီၤတံၢ် ကသ့ဝဲလၢကျဲဒ်လဲၣ်. မ့တမ့ၢ်ဘၣ်ဒီး, ဝၤပှၤခရံာ်ဖိဧၢ,
နတအုၣ်က့ၤခီၣ်က့ၤနမါန့ၣ်, နသ့ၣ်ညါလီၤတံၢ်ကသ့ဝဲလၢကျဲဒ်လဲၣ်.
17 ပှၤတဂၤဘၣ်တဂၤကြၢးအိၣ်မူဝဲဆူညါ, လီၤပလိာ်ဒီးကစၢ်အတၢ်ဟ့ၣ်လၢအဟ့ၣ်အီၤ, ဒီးဒ်အအိၣ်မူတ့ၢ်ဝဲဖဲကစၢ်ယွၤကိးအီၤအဆၢကတီၢ်န့ၣ်လီၤ. အဝဲအံၤမ့ၢ်တၢ်ဘျၢလၢယသိၣ်လီၤသီလီၤယဲလၢတၢ်အိၣ်ဖှိၣ်ကိး ဖုဒဲးအပူၤလီၤ.
18 ပှၤလၢအဒိးတ့ၢ်တၢ်ကူးတရံးတဂၤမ့ၢ်တူၢ်လိာ်လံကစၢ်ယွၤ အတၢ်ကိးန့ၣ်, အဝဲတကြၢးဂုာ်ကျဲးစၢးထုးကွံာ်တၢ်ပနီၣ်
တဖၣ်လၢအဘၣ်ဃးဒီးတၢ်ကူးတရံးဘၣ်. ပှၤလၢအတဒိးတၢ်ကူးတရံးတဂၤမ့ၢ်တူၢ်လိာ်လံကစၢ်ယွၤ
အတၢ်ကိးန့ၣ်, အဝဲဒၣ်တကြၢးဒိးတၢ်ကူးတရံးဘၣ်.
19 အဂ့ၢ်ဒ်အံၤ, ပှၤတဂၤဒိးတၢ်ကူးတရံးမ့ၢ်ဂ့ၤ, တဒိးတၢ်ကူးတရံး မ့ၢ်ဂ့ၤ, အခီပညီတအိၣ်တၢ်နီတမံၤဘၣ်. တၢ်လၢအကါဒိၣ်န့ၣ်, မ့ၢ်တၢ်ကစူၢ်ကစၢ်ယွၤအတၢ်မၤလိာ်တဖၣ်လီၤ.
20 ပှၤကိးဂၤဒဲးကြၢးမ့ၢ်တၢ်ဒ်အမ့ၢ်တ့ၢ်ဝဲ, ဖဲအဝဲဒၣ်တူၢ်လိာ်ကစၢ်ယွၤအတၢ်ကိးအဆၢကတီၢ်န့ၣ်လီၤ.
21 ဖဲကစၢ်ယွၤကိးနၤအဆၢကတီၢ်န့ၣ် နမ့ၢ်နဲကုၢ်တဂၤဧါ. မ့မ့ၢ်ဒ်န့ၣ်ဒီးအတွးတအိၣ်ဘၣ်. ဘၣ်ဆၣ်ဒီးနမ့ၢ်အိၣ်ဒီးအခွဲးအယာ်လၢနကကဲထီၣ်ပှၤသဘျ့ တဂၤန့ၣ်, သူတၢ်အခွဲးအယာ်တမံၤန့ၣ်တက့ၢ်.
22 အဂ့ၢ်ဒ်အံၤ, ကုၢ်တဂၤလၢအဘၣ်တၢ်ကိးတ့ၢ်အီၤလၢ ကစၢ်န့ၣ်, မ့ၢ်ကစၢ်အပှၤသဘျ့တဂၤလီၤ. လၢကျဲတဘိဃီန့ၣ်, ပှၤသဘျ့တဂၤလၢအဘၣ်တၢ်ကိးတ့ၢ်အီၤလၢ
ခရံာ်န့ၣ်, မ့ၢ်အဝဲဒၣ်အကုၢ်လီၤ.
23 ကစၢ်ယွၤပှ့ၤတ့ၢ်လံနၤလၢတၢ်အပှ့ၤကလံၤတမံၤလီၤ. မ်ဒ်န့ၣ်ဒီး, တဘၣ်ကဲထီၣ်ပှၤကညီအကုၢ်အပှၤတဖၣ်တဂ့ၤ.
24 ယဒီပုၢ်ဝဲၢ်သ့ၣ်ဧၢ, ပှၤတဂၤဒီးတဂၤကြၢးအိၣ်ဒံးဝဲလၢ အတၢ်ရ့လိာ်မုာ်လိာ်အတၢ်ဘၣ်ထွဲဒီးယွၤ, ဒ်အအိၣ်တ့ၢ်ဝဲဖဲအဝဲဘၣ်တၢ်ကိးတ့ၢ်အီၤအဆၢကတီၢ်
အသိးန့ၣ်လီၤ.
25 ခဲကနံၣ်အံၤ, ဘၣ်ဃးဒီးတၢ်ဂ့ၢ်လၢသုကွဲးတ့ၢ်သုဝဲဘၣ်ဃး ပှၤလၢအတန့ၢ်မါန့ၢ်ဝၤတဖၣ်န့ၣ်, ယတအိၣ်ဒီးတၢ်အကလုၢ်လၢယွၤဟ့ၣ်လီၤယၤဘၣ်. ဘၣ်ဆၣ်ဒီး, ယဟ့ၣ်ထီၣ်ယတၢ်ဆိကမိၣ်ဒ်ပှၤတဂၤလၢ, ခီဖျိကစၢ်အတၢ်သး
ကညီၤန့ၣ်, ကြၢးဝဲဘၣ်ဝဲဒီးတၢ်နာ်န့ၢ်အီၤန့ၣ်လီၤ.
26 ပမ့ၢ်ကွၢ်ပဝဲဒ်အဘၣ်ထွဲဒီးတၢ်ကီတၢ်ခဲလၢဆၢကတီၢ်နၣ်ရံၣ် အဝဲအံၤအသိးန့ၣ်, ယဆိကမိၣ်, ကဂ့ၤတက့ၢ်လၢပှၤတဂၤကအိၣ်ဒ်အအိၣ်ဝဲအသိးန့ၣ်လီၤ.
27 နအိၣ်နဲဒီးမါတဂၤဧါ. မ့ၢ်အိၣ်ဒီးဂုာ်ကျဲးစၢးဃုထူၣ်ဖျဲးကွံာ်လၢ အီၤတဂ့ၤ. နမ့ၢ်ပှၤသဘျ့ဖိတဂၤဧါ. မ့မ့ၢ်ဒီး, တဘၣ်ဃုနမါတဂ့ၤ.
28 ဘၣ်ဆၣ်ဒီးနမ့ၢ်န့ၢ်နမါန့ၣ်တမ့ၢ်နမၤတ့ၢ်တၢ်ဒဲးဘးတမံၤဘၣ်. ဒီးပိာ်မုၣ်လၢအသဘျ့တဂၤမ့ၢ်န့ၢ်အဝၤန့ၣ်, တမ့ၢ်အဝဲဒၣ်မၤတ့ၢ်တၢ်ဒဲးဘးတမံၤဘၣ်. မ့မ့ၢ်, ယသးအိၣ်ဒုးပူၤဖျဲးသုဒီးကိးနံၤဒဲးအတၢ်ကီတၢ်ခဲ
တဖၣ်, လၢပှၤအိၣ်ဒီးအမါအဝၤတဖၣ်ကဘၣ်ကွၢ်ဆၢၣ်မဲာ်ဝဲန့ၣ်လီၤ.
29 တၢ်လၢယသးအိၣ်စံးယဲန့ၣ်, ယဒီပုၢ်ဝဲၢ်သ့ၣ်ဧၢ, မ့ၢ်ဒ်အံၤလီၤ. တၢ်ဆၢကတီၢ်တအိၣ်တ့ၢ်အါကဲၣ်ဆိးဘၣ်. ဒီးစးထီၣ်ခဲအံၤဒီး ဆူညါန့ၣ်, ပှၤပိာ်ခွါလၢအမါအိၣ်တဖၣ်ကြၢးအိၣ်ဝဲဒ်အမါ
တအိၣ်ဘၣ်အသိး,
30 ပှၤလၢအဟီၣ်အယၢၤတဖၣ်, ဒ်အသူၣ်တအုးအသးတအုး အသိး, ပှၤလၢအနံၤအအ့တဖၣ်ဒ်အသူၣ်တခုသးတခုအသိး, ပှၤလၢအပှ့ၤတၢ်တဖၣ်, ဒ်တၢ်လၢအပှ့ၤဝဲတမ့ၢ်အတၢ်အသိး,
31 ပှၤလၢအမၤတၢ်ဘၣ်ထွဲဒီးအအံၤတဃၣ်အတၢ်ဖိတၢ်လံၤ တဖၣ်, ဒ်အတၢ်ဘၣ်ထွဲတအိၣ်ဒီးအီၤလၢာ်လၢာ်ဆ့ဆ့အသိး
န့ၣ်လီၤ. အဂ့ၢ်ဒ်အံၤ, ဟီၣ်ခိၣ်တဘ့ၣ်အံၤဒ်အအိၣ်ဝဲခဲကနံၣ်အံၤ
အသိးန့ၣ်, တအိၣ်ကၢအိၣ်ခိးဝဲယံာ်ယံာ်လၢၤဘၣ်.
32 ယအဲၣ်ဒိးလၢသုကအိၣ်ပူၤဖျဲးဒီးတၢ်ကိၢ်တၢ်ဂီၤလီၤ. ပှၤပိာ်ခွါလၢအမါတအိၣ်ဘၣ်တဂၤန့ၣ်အသးစၢၢ်ဆၢလၢကစၢ် အတၢ်ဖံးတၢ်မၤလီၤ. အဂ့ၢ်ဒ်အံၤ,
အဝဲဒၣ်ဂုာ်ကျဲးစၢးမၤဘၣ်ကစၢ်အသးလီၤ.
33 မ့မ့ၢ်ပှၤလၢအမါအိၣ်တဂၤန့ၣ်, ဘၣ်ကိၢ်ဘၣ်ဂီၤဘၣ်ဃးဒီးဟီၣ်ခိၣ်အတၢ်ဂ့ၢ်တၢ်ကျိၤတဖၣ်, အဂ့ၢ်မ့ၢ်လၢအဝဲဒၣ်သးအိၣ်မၤမုာ်အမါအသးအဃိလီၤ.
34 လၢတၢ်န့ၣ်အဃိအဝဲအသးဘၣ်တၢ်ထုးန့ၢ်အီၤခံကပၤလီၤ. ပိာ်မုၣ်လၢအဝၤတအိၣ်, မ့တမ့ၢ်အမုၣ်ကနီၤတဂၤန့ၣ်အသးစၢၢ်ဆၢလၢကစၢ်အတၢ်ဖံးတၢ်မၤ, အဂ့ၢ်မ့ၢ်လၢအဝဲဒၣ်သးအိၣ်ပာ်စီဆှံအသးလၢနီၢ်ခိဒီးနီၢ်သး ခံမံၤခံကပၤလၢာ်လီၤ. မ့မ့ၢ်ပိာ်မုၣ်လၢအဝၤအိၣ်တဂၤန့ၣ်အသးစၢၢ်ဆၢလၢဟီၣ်ခိၣ်
အတၢ်ဂ့ၢ်တၢ်ကျိၤတဖၣ်, အဂ့ၢ်မ့ၢ်လၢအဝဲဒၣ်အသးအိၣ်မၤမုာ်အဝၤအသးအဃိန့ၣ်လီၤ.
35 ယစံးဘၣ်တဲဘၣ်သုဒ်အံၤန့ၣ်, မ့ၢ်လၢယသးအိၣ်မၤစၢၤသု အဃိလီၤ. တမ့ၢ်ယဂုာ်ကျဲးစၢးမၤဃံးမၤစ့ၤသုဘၣ်. မ့မ့ၢ်ယသးအိၣ်လၢသုကမၤတၢ်လၢအကြၢးအဘၣ်ဒီးဘၣ်ဘျီး
ဘၣ်ဒါ, ဒီးဟ့ၣ်လီၤသုသးလၢာ်လၢာ်ဆ့ဆ့ပူၤဖျဲးဒီးတၢ်တံာ်တာ်
တမံၤလၢ်လၢ်, လၢကစၢ်အတၢ်ဖံးတၢ်မၤအဂီၢ်န့ၣ်လီၤ.
36 မ့မ့ၢ်ဖဲလၢအဘၣ်ဃးဒီးပှၤခံဂၤလၢအဘၣ်အဲၣ်တီလိာ်အသး, ဒီးပာ်လီၤတ့ၢ်အသးလၢအတဒိးတ့ဒိးဖျီအသးန့ၣ်, ပိာ်ခွါမ့ၢ်ထံၣ်လီၤအသးလၢအတၢ်ပာ်သူၣ်ပာ်သးလၢပိာ်မုၣ် အဖီခိၣ်တမ့ၢ်တၢ်အကြၢးဝဲဘၣ်ဝဲဘၣ်, ဒီးအတၢ်သူၣ်ဂဲၤသးဂဲၤအသဟီၣ်ဆူၣ်တလၢ, ဒီးအဝဲဒၣ်ထံၣ်လၢအဝဲသ့ၣ်ကြၢးဒိးတ့ဒိးဖျီအသးန့ၣ်,
ဒ်အဝဲအဲၣ်ဒိးဝဲအသိး, အဝဲသ့ၣ်ကြၢးဒိးတ့ဒိးဖျီအသးလီၤ.
လၢတၢ်တမံၤအံၤအပူၤန့ၣ်တၢ်ကမၣ်တအိၣ်နီတမံၤဘၣ်.
37 ဘၣ်ဆၣ်ဒီးပှၤပိာ်ခွါတဂၤ, လၢအတမ့ၢ်တၢ်မၢဆူၣ်အဃိဘၣ်, မ့ၢ်ပာ်လီၤအသးဃံးဃံးလၢအတဒိးတ့ဒိးဖျီအသး, ဒီးအဝဲမ့ၢ်အိၣ်ဒီးတၢ်ပၢၤသူၣ်ပၢၤသးလၢာ်လၢာ်ဆ့ဆ့, ဒီးအဝဲဒၣ်ကမၤဒ်လဲၣ်ဒ်လဲၣ်အဂ့ၢ်မ့ၢ်အိၣ်လံဒီးအနီၢ် ကစၢ်ဒၣ်ဝဲအတၢ်ပာ်လီၤအသးလံန့ၣ်, အဝဲမ့ၢ်တဒိးတ့ဒိးဖျီအသးလၢပိာ်မုၣ်တဂၤန့ၣ်ဒီးဂ့ၤ
ကစီဒီလီၤ.
38 လၢတၢ်န့ၣ်အဃိပှၤပိာ်ခွါလၢအဖျီအသးတဂၤန့ၣ်မၤတၢ်လၢအ ကြၢး, မ့မ့ၢ်အဝဲလၢအတဖျီအသးတဂၤန့ၣ်မၤတၢ်လၢအကြၢး
ဝဲဘၣ်ဝဲဒိၣ်ဒံးတက့ၢ်လီၤ.
39 ပိာ်မုၣ်လၢအဝၤအိၣ်တဂၤန့ၣ်, ဖဲလၢအဝၤအိၣ်မူဒံးအဆၢ ကတီၢ်, တအိၣ်ဒီးတၢ်သဘျ့ဘၣ်. မ့မ့ၢ်အဝဲဒၣ်အဝၤမ့ၢ်သံဒီး, အဝဲအိၣ်ဒီးတၢ်သဘျ့လၢအကဖျီအသးဒီးပိာ်ခွါတဂၤလၢ်လၢ်လၢ
အဘၣ်သူၣ်ဘၣ်သးဝဲ, ဘၣ်ဆၣ်ဒီးပိာ်ခွါကဘၣ်မ့ၢ်ပှၤခရံာ်ဖိ
တဂၤလီၤ.
40 ဘၣ်ဆၣ်ဒီးအဝဲမ့ၢ်အိၣ်သဘျ့န့ၣ်, ကသူၣ်ခုသးခုဘၣ်ဝဲဒိၣ်ဒၣ်တၢ် တက့ၢ်လီၤ. အဝဲန့ၣ်မ့ၢ်ယတၢ်ထံၣ်, ဒီးယဆိကမိၣ်လၢယနီၢ်ကစၢ်ဒၣ်
ယဲစ့ၢ်ကီးယအိၣ်ဒီးကစၢ်ယွၤအသးစီဆှံန့ၣ်လီၤ.