9
1 ယတမ့ၢ်ပှၤတဂၤလၢအအိၣ်ဒီးတၢ်သဘျ့ဘၣ်ဧါ. ယတမ့ၢ်ပှၤတၢ်မၢဖိတဂၤဘၣ်ဧါ. မ့ၢ်ယတထံၣ်ဘၣ်တ့ၢ်ယဲယ့ၣ်ၡူးပကစၢ်န့ၣ်ဘၣ်ဧါ. ဒီးသုတမ့ၢ်ယတၢ်ဖံးတၢ်မၤလၢကစၢ်အဂီၢ်အတၤသၣ်ဘၣ်ဧါ.
2 ပှၤဂုၤပှၤဂၤတဖၣ်မ့ၢ်တတူၢ်လိာ်ယၤဒ်ပှၤတၢ်မၢဖိတဂၤအသိး ဒၣ်လဲာ်န့ၣ်, သပှၢ်ကတၢၢ်သုဝဲသုတူၢ်လိာ်ကစီဒီလီၤ. ခီဖျိသုတၢ်အိၣ်မူပာ်ဖှိၣ်ဃုာ်သုသးဒီးကစၢ်န့ၣ်, သုနီၢ်ကစၢ်ဒၣ်သုဝဲသုမ့ၢ်တၢ်အုၣ်အသးဘၣ်ဃးဒီးယမ့ၢ်ပှၤတၢ် မၢဖိတဂၤအဂ့ၢ်န့ၣ်လီၤ.
3 ဖဲပှၤပာ်တၢ်ကမၣ်လၢယလိၤန့ၣ်ယကတိၤကဟုကယာ်လီၤယသး ဒ်အံၤလီၤ.
4 မ့ၢ်ယတအိၣ်ဒီးတၢ်အခွဲးအယာ်လၢတၢ်ကဟ့ၣ်ယၤတၢ်အီၣ် တၢ်အီလၢယတၢ်ဖံးတၢ်မၤအဂီၢ်န့ၣ်ဘၣ်ဧါ.
5 မ့ၢ်ယတအိၣ်ဒီးတၢ်အခွဲးအယာ်လၢယကကွၢ်လိပှၤတၢ်မၢဖိ အဂၤတဖၣ်, ဒီးကစၢ်အဒီပုၢ်ဝဲၢ်တဖၣ်ဒီးစီၤပ့းတရူး, ခီဖျိယဟးကိးဒီးယမါပှၤခရံာ်ဖိတဂၤလၢယတၢ်လဲၤတၢ်က့ၤတဖၣ် အပူၤန့ၣ်ဘၣ်ဧါ.
6 မ့တမ့ၢ်ဘၣ်ဒီး စီၤဘၢ်နါဘၤဒီးယၤ, ထဲခံဂၤဧိၤ, ပကဘၣ်ဖံးတၢ်မၤတၢ်လၢတၢ်လုၢ်အီၣ်ပသးသမူအဂီၢ်န့ၣ်ဧါ.
7 မ့ၢ်သုးဖိတဂၤဂၤဟ့ၣ်ဘၣ်အတၢ်လၢာ်ဘူၣ်လၢာ်စ့ၤလၢအနီၢ်ကစၢ်ဒၣ်ဝဲအဂီၢ် ဖဲအိၣ်လၢသုးပူၤအဆၢကတီၢ်န့ၣ်တစုစုဧါ. ပှၤသူၣ်တၢ်ဖျးတၢ်ဖိမတၤတဂၤလၢအတအီၣ်စပံးသၣ်လၢ အစပံးလီၢ်ဒၣ်ဝဲအပူၤန့ၣ်လဲၣ်. ပှၤကွၢ်သိမတၤတဂၤလၢအတသူ တၢ်နုၢ်ထံလၢအသိဒၣ်ဝဲအကျါန့ၣ်လဲၣ်.
8 မုၢ်ဆ့ၣ်မုၢ်ဂီၤအတၢ်ဒိတၢ်တဲာ်တဖၣ်အံၤ, တမ့ၢ်ယနီၢ်ကစၢ်ပာ်ဖျါဒၣ်ယဲဖဲယသးန့ၣ်ဘၣ်. အဂ့ၢ်ဒ်အံၤ, တၢ်သိၣ်တၢ်သီပာ်ဖျါထီၣ်တၢ်တမံၤဃီန့ၣ်လီၤ.
9 လၢစီၤမိၤၡ့အတၢ်သိၣ်တၢ်သီအပူၤန့ၣ် ပဖးဘၣ်ပဝဲ, “ဖဲနသူဂီၤဖံးလၢကယီၢ်ဘုအဆၢကတီၢ်န့ၣ်, တဘၣ်ပသံးဃာ်အထးခိၣ်တဂ့ၤ.” ခဲကနံၣ်အံၤ, မ့ၢ်ကစၢ်ကွၢ်တၢ်လၢဂီၤဖံးအဂီၢ်ဧါ.
10 ဖဲအဝဲဒၣ်စံးတၢ်န့ၣ်, နီၢ်နီၢ်တခီမ့ၢ်အကွၢ်တၢ်လၢပဂီၢ်တမ့ၢ် ဘၣ်ဧါ. သပှၢ်ကတၢၢ်တၢ်ကွဲးတတီၤန့ၣ်ဘၣ်တၢ်ကွဲးအီၤလၢပဂီၢ်လီၤ. ပှၤတဂၤလၢအထဲၣ်တၢ်ဒီးပှၤတဂၤလၢအကူးဘုန့ၣ်, ကြၢးမၤအတၢ်ဖံးတၢ်မၤအိၣ်ဒီးတၢ်မုၢ်လၢ်လၢကနီၤလီၤဟံးန့ၢ် သကိးဘုန့ၣ်လီၤ.
11 ပဖှံလီၤတ့ၢ်သးအတၢ်ချံလၢသုသိးသုကျါလီၤ. ပမ့ၢ်ကူးဘၣ် က့ၤတၢ်ဘျုးတၢ်ဖှိၣ်ဘၣ်ဃးဒီးတၢ်ဖံးတၢ်ညၣ်လၢသုအိၣ်န့ၣ်, တမ့ၢ်တၢ်အါကဲၣ်ဆိးဧါ.
12 ပှၤအဂၤတဖၣ်မ့ၢ်အိၣ်ဒီးအခွဲးအယာ်လၢအကဆၢန့ၢ်ဘၣ်တၢ် တမံၤအံၤလၢသုအိၣ်ဒီး, ပဝဲဒၣ်သ့ၣ်တဖၣ်အံၤပအိၣ်ဒီးအခွဲးအယာ်အါန့ၢ်အန့ၣ်တက့ၢ် တမ့ၢ်ဘၣ်ဧါ.
ဘၣ်ဆၣ်ဒီး, ပတသူတၢ်အခွဲးအယာ်တမံၤအံၤန့ၣ်ဘၣ်. မ့မ့ၢ် တခီ, ပဒိးတ့ၢ်တၢ်ခဲလၢာ်လၢတၢ်သူၣ်စူၤသးစူၤအပူၤ, ဒ်သိးပသုတဒုးအိၣ်ထီၣ်တၢ်နိးတၢ်ဘျးလၢခရံာ်အတၢ်သးခု ကစီၣ်အကျဲပူၤတဂ့ၤအဂီၢ်န့ၣ်လီၤ.
13 သုကသ့ၣ်ညါကစီဒီလီၤ. ပှၤလၢအမၤတၢ်လၢတၢ်လုၢ်ဟံၣ်အပူၤ တဖၣ်ဒိးန့ၢ်ဘၣ်အတၢ်အီၣ်လၢတၢ်လုၢ်ဟံၣ်အပူၤ, ဒီးပှၤလၢအလုၢ်ထီၣ်တၢ်လုၢ်တၢ်ပာ်လၢတၢ်လုၢ်လီၢ်တဖၣ် ဒိးန့ၢ်ဘၣ်တၢ်နီၤဟ့ၣ်အီၤလၢတၢ်လုၢ်တၢ်ပာ်တဖၣ်န့ၣ်လီၤ.
14 လၢကျဲတဘိဃီန့ၣ်, ကစၢ်ဟ့ၣ်လီၤတ့ၢ်အကလုၢ်လၢ ပှၤစံၣ်တဲၤတဲလီၤတၢ်သးခုကစီၣ်တဖၣ်ကဒိးန့ၢ်ဘၣ်တၢ်လုၢ်အီၣ် အသးသမူလၢအပူၤန့ၣ်လီၤ.
15 ဘၣ်ဆၣ်ဒီးယတသူတ့ၢ်ယဲတၢ်အခွဲးအယာ်တဖၣ်အံၤနီတခါ ဒံးဘၣ်. ဒီးယတကွဲးစ့ၢ်ကီးတၢ်ခဲအံၤဒ်သိး ယကဟံးန့ၢ်တၢ်အခွဲးအယာ်တဖၣ်အံၤလၢယနီၢ်ကစၢ်ဒၣ်ယဲ အဂီၢ်ဘၣ်. ယမ့ၢ်ဘၣ်သံ, ယကသံဒါခီလီၤ. မတၤတဂၤမးတဘၣ်လဲလိာ်ကွံာ်ယတၢ်ကတိၤပာ်ကဖၢလၢသး လၢအကြၢးအဘၣ်တမံၤန့ၣ်ဆူတၢ်ကတိၤအကလီကလီတဖၣ် ဘၣ်.
16 ယတအိၣ်ဒီးတၢ်အခွဲးအယာ်လၢယကပာ်ကဖၢလၢယသး, မ့ၢ်လၢယစံၣ်တဲၤတဲလီၤတၢ်သးခုကစီၣ်အဃိဘၣ်. နီၢ်နီၢ်တခီန့ၣ်တၢ်ဟ့ၣ်လီၤယၤတၢ်ကလုၢ်လၢယကမၤတၢ်မၤ တမံၤအံၤန့ၣ်လီၤ. ဒီးယမ့ၢ်တစံၣ်တဲၤတဲလီၤတၢ်သးခုကစီၣ်န့ၣ်, တၢ်ကနးကဖှီၣ်မးလၢယဂီၢ်ဆံးဒိၣ်လဲၣ်.
17 ယမ့ၢ်မၤယတၢ်မၤဒ်ယတၢ်ဃုထၢဒၣ်ယဲအသိးန့ၣ်, ယမုၢ်လၢ်လၢတၢ်ကဟ့ၣ်ဘူးဟ့ၣ်လဲယၤသ့ဝဲလီၤ. ဘၣ်ဆၣ်ဒီးယမၤအီၤဒ်မူဒါအသိး, အဂ့ၢ်မ့ၢ်လၢကစၢ်ယွၤဟ့ၣ်လီၤယၤတၢ်မၤတမံၤအံၤအဃိန့ၣ်လီၤ.
18 မ့မ့ၢ်ဒ်န့ၣ်ဒီးယဒိးန့ၢ်ဘၣ်တၢ်ဘူးတၢ်လဲမနုၤတမံၤလဲၣ်. မ့ၢ်ဝဲယခွဲးယယာ်ဘၣ်ဃးဒီးတၢ်စံၣ်တဲၤတဲလီၤတၢ်သးခု ကစီၣ်တအိၣ်ဒီးတၢ်ဃ့အဘူးအလဲ, တအိၣ်ဒီးတၢ်ဃ့ယခွဲးယယာ်တဖၣ်လၢယတၢ်မၤတၢ်သးခုကစီၣ် အတၢ်မၤအပူၤန့ၣ်ဘၣ်လီၤ.
19 ယမ့ၢ်ပှၤသဘျ့တဂၤ, ဒီးတမ့ၢ်ပှၤကုၢ်နီတဂၤဘၣ်န့ၣ်လီၤ. ဘၣ်ဆၣ်ဒီးယကဲပှၤကိးဂၤဒဲးအကုၢ်ဒ်သိးယကဒိးန့ၢ်က့ၤပှၤအါ အါတသ့ဖဲအသ့ဆူခရံာ်အအိၣ်န့ၣ်လီၤ.
20 ဖဲယမၤတၢ်လၢပှၤယူဒၤဖိအသိးအကျါအဆၢကတီၢ်န့ၣ်, ယအိၣ်မူယဲဒ်ပှၤယူဒၤဖိအသိးဒ်သိးယကမၤန့ၢ်က့ၤအဝဲသ့ၣ် ဆူခရံာ်အအိၣ်အဂီၢ်န့ၣ်လီၤ. ဒီးယနီၢ်ကစၢ်ဒၣ်ယဲယတအိၣ် လၢစီၤမိၤၡ့အတၢ်သိၣ်တၢ်သီအဖီလာ်သနာ်က့, ဖဲယမၤ တၢ်လၢပှၤအိၣ်လၢစီၤမိၤၡ့အတၢ်သိၣ်တၢ်သီအဖီလာ်တဖၣ် အဆၢကတီၢ်န့ၣ်, ယအိၣ်ယဲဒ်ပှၤအိၣ်လၢတၢ်သိၣ်တၢ်သီအဝဲန့ၣ် အဖီလာ်ဒ်သိးယကမၤန့ၢ်က့ၤအဝဲသ့ၣ်ဆူခရံာ်အအိၣ်န့ၣ်လီၤ.
21 ဒ်န့ၣ်အသိး, ဖဲယမၤတၢ်လၢပှၤကလုာ်တဖၣ်အသိးအကျါ န့ၣ်, ယအိၣ်မူယဲဒ်ပှၤကလုာ်ဂၤတဂၤအသိး, လၢယူဒၤ တၢ်သိၣ်တၢ်သီအချၢ, ဒ်သိးယကမၤန့ၢ်က့ၤပှၤကလုာ်ဂၤတဖၣ်ဆူခရံာ်အအိၣ်န့ၣ်လီၤ. အဝဲအံၤန့ၣ်, အခီပညီတမ့ၢ်လၢယတဒိကနၣ်ယွၤအတၢ်သိၣ်တၢ် သီဘၣ်. ယအိၣ်ယဲနီၢ်နီၢ်လၢခရံာ်အတၢ်သိၣ်တၢ်သီအဖီလာ်လီၤ.
22 လၢပှၤတၢ်စူၢ်တၢ်နာ်အဂံၢ်အဘါစၢ်တဖၣ်အသိးအကျါန့ၣ်, ယကဲထီၣ်ပှၤဂံၢ်စၢ်ဘါစၢ်ဒ်အဝဲသ့ၣ်အကျါတဂၤအသိးဒ်သိး ယကမၤန့ၢ်က့ၤအဝဲသ့ၣ်လၢခရံာ်အဂီၢ်န့ၣ်လီၤ. လၢတၢ်န့ၣ်အဃိ, ယကဲထီၣ်တၢ်ကိးမံၤဒဲးလၢပှၤကိးဂၤဒဲးအသိး အကျါဒ်သိးယကအုၣ်က့ၤခီၣ်က့ၤအဝဲသ့ၣ်တနီၤ, ခီဖျိကျဲတဘိဘိလၢအအိးဟိထီၣ်အသးန့ၣ်လီၤ.
23 တၢ်သ့ၣ်တဖၣ်အံၤခဲလၢာ်န့ၣ်ယမၤအီၤလၢတၢ်သးခုကစီၣ် အဃိဒ်သိးယကဒိးန့ၢ်ဘၣ်ဃုာ်အတၢ်ဆိၣ်ဂ့ၤဆိၣ်ဝါတဖၣ် အဂီၢ်န့ၣ်လီၤ.
24 သုသ့ၣ်ညါသုဝဲကစီဒီလီၤ. လၢတၢ်ဃ့ၢ်ပြၢတဘျီအပူၤန့ၣ်, ပှၤပြၢတၢ်ဖိအိၣ်ဝဲအါဂၤ, ဘၣ်ဆၣ်ဒီးပှၤဒိးန့ၢ်ဘၣ်ခိၣ်ဖးအိၣ်ဝဲထဲ တဂၤဧိၤလီၤ. မ့မ့ၢ်ဒ်န့ၣ်ဒီး ဃ့ၢ်သုဝဲဒ်သိးသုဒိးန့ၢ်ခိၣ်ဖးကသ့ဝဲ အဂီၢ်တက့ၢ်.
25 ပှၤလိာ်ကွဲဖိကိးဂၤဒဲး, ဖဲအမၤလ့ၤအသးအဆၢကတီၢ်န့ၣ်, ဟ့ၣ်လီၤအသးဆူတၢ်ဒိကနၣ်ဃံးဃံးဒ်သိးအကဘၣ်တၢ်ဒုးကုာ် ထီၣ်အီၤဖီကွီၤလၢအတအိၣ်ကၢအိၣ်ခိးဘၣ်တကွီၤလီၤ. မ့မ့ၢ်ပဝဲသ့ၣ် တဖၣ် ပမၤပဝဲလၢဖီကွီၤတကွီၤလၢအအိၣ်ကၢအိၣ်ခိးလီၤထူလီၤယိာ် အဂီၢ်န့ၣ်လီၤ.
26 လၢတၢ်န့ၣ်အဃိယဃ့ၢ်ယဲဒၣ်လိၤလိၤဆူဖီတၢၣ်အကတၢၢ်လီၤ. လၢတၢ်န့ၣ်အဃိယလီၤဂာ်ဒီးပှၤထိတၢ်ဖိတဂၤလၢအတထိ ဘၣ်ထဲကလံၤန့ၣ်ဘၣ်လီၤ.
27 ယမၤဆူၣ်မၤကိၤထီၣ်ယနီၢ်ခိခီဖျိတၢ်ထိတၢ်တီၢ်တဖၣ်ဒီး ကတဲာ်ကတီၤအီၤဒ်သိးအကအိၣ်လၢတၢ်ပၢၤဃာ်အီၤဃံးဃံး အဖီလာ်အဂီၢ်, ဒ်သိးဒီးယမၢဃီၤပှၤဆူတၢ်ပြၢဝံၤအလီၢ်ခံဒီး ယသုတဘၣ်တၢ်ညိကွံာ်ယၤတဂ့ၤအဂီၢ်န့ၣ်လီၤ.