2
ကီၢ်မိၤအး
1 ဒီးယွၤစံးဝဲဒၣ်, “ပှၤကီၢ်မိၤအးဖိတဖၣ်မၤတ့ၢ်လံတၢ်ဒဲးဘးတဘျီဝံၤတဘျီလံ. ဒီးလၢတၢ်အံၤအဃိယကစံၣ်ညီၣ်အီၤသပှၢ်ကတၢၢ်လီၤ. အဝဲသ့ၣ်မၤတရီတပါပှၤကီၢ်အဒိၣ်ဖိအစီၤပၤခီဖျိတၢ်ဒွဲၣ်အူ ကွံာ်အီၤတုၤအကဲထီၣ်ဖၣ်ဆါန့ၣ်လီၤ.
2 ယကဆှၢလီၤမ့ၣ်အူဆူပှၤမိၤအးဖိအကီၢ်ဒီးဒွဲၣ်အူကွံာ်ဝ့ၢ်ကရံ ယိးအတိာ်ဧိၤတာ်ဧိၤတဖၣ်န့ၣ်လီၤ. ပှၤကီၢ်မိၤအးဖိတဖၣ်ကသံကွံာ်ဝဲလၢတၢ်ဒုး တၢ်ယၤအတၢ်သီၣ်အပူၤဖဲပှၤသုးဖိသ့ၣ်တဖၣ်ကိးပသူထီၣ်ဒီးကွဲၤ တဖၣ်ဘၣ်တၢ်အူထီၣ်အီၤအခါန့ၣ်လီၤ.”
3 ယကမၤသံကွံာ်ပှၤကီၢ်မိၤအးဖိအစီၤပၤဒီးကယဲၢ်အပဒိၣ်ခဲလၢာ် လၢကီၢ်အပူၤန့ၣ်လီၤ.”
ကီၢ်ယူဒၤ
4 ဒီးယွၤစံးဝဲဒၣ်, “ပှၤကီၢ်ယူဒၤဖိတဖၣ်မၤတ့ၢ်လံတၢ်ဒဲးဘးတဘျီဝံၤတဘျီလံ. ဒီးလၢတၢ်အံၤအဃိယကစံၣ်ညီၣ်အီၤသပှၢ်ကတၢၢ်လီၤ. အဝဲသ့ၣ်တပာ်ကဲဘၣ်ယတၢ်သိၣ်လိဒီးတတိၢ်န့ၢ်ဘၣ် ယတၢ်မၤလိာ်တဖၣ်ဘၣ်. အဝဲသ့ၣ်ဘၣ်တၢ်ဆှၢကမၣ်တ့ၢ်လံအီၤလၢတၢ်ဂီၤတၢ်ဖီၣ်တမံၤဃီလၢ အမိၢ်ပၢ်လၢပျၢၤတဖၣ်မၤတ့ၢ်အတၢ်န့ၣ်လီၤ.
5 မၤသးဒ်န့ၣ်ဒီးယကဆှၢလီၤမ့ၣ်အူဆူကီၢ်ယူဒၤအဖီခိၣ်ဒီးဒွဲၣ်အူ ကွံာ်ဝ့ၢ်ယရူၤၡလ့ၣ်အတိာ်ဧိၤတာ်ဧိၤတဖၣ်န့ၣ်လီၤ.”
6 ဒီးယွၤစံးဝဲဒၣ်, “ပှၤကီၢ်အံၣ်စရ့လးဖိတဖၣ်မၤတ့ၢ်လံတၢ်ဒဲးဘးတဘျီဝံၤ တဘျီလံ. ဒီးလၢတၢ်အံၤအဃိယကစံၣ်ညီၣ်အီၤသပှၢ်ကတၢၢ်လီၤ. အဝဲသ့ၣ်ဆါလီၤကွံာ်ပှၤတီပှၤလိၤလၢအလိးက့ၤအကမၣ်တန့ၢ်တဖၣ် ဆူကုၢ်အလီၢ်, ဒီးပှၤဖှီၣ်ဖိယာ်ဖိလၢအလိးက့ၤအကမၣ်တန့ၢ်တ ဖၣ်န့ၣ်လၢခီၣ်ဖံးတဆိအပှ့ၤဒၣ်လဲာ်လီၤ.
7 အဝဲသ့ၣ်ယီၢ်တံၢ်လီၤပှၤဂံၢ်စၢ်ဘါစၢ်ဒီးပှၤလၢတၢ်မၤစၢၤအီၤ တအိၣ်ဒီးဆီၣ်ဖျိးကွံာ်ပှၤဖှီၣ်ဖိယာ်ဖိလၢအကျဲန့ၣ်လီၤ. ပှၤတဂၤဒီးအပၢ်မံဃုာ်ဒီးကုၢ်ပိာ်မုၣ်တဂၤဃီဒီးမၤဘၣ် အၢဘၣ်သီယမံၤစီဆှံန့ၣ်လီၤ.
8 လၢကယဲၢ်တၢ်ဘူၣ်တၢ်ဘါအလီၢ်တပူၤလၢ်လၢ်န့ၣ်ပှၤပိာ်ခွါတဖၣ်မံ လီၤလၢတၢ်ကူတၢ်သိးအဖီခိၣ်လၢအဟံးန့ၢ်ဝဲလၢပှၤ ဖှီၣ်ဖိယာ်ဖိအအိၣ်ဒ်တၢ်အုၣ်ကီၤလၢအဒ့ၣ်ကမၣ်အဂီၢ်လီၤ. လၢအဝဲသ့ၣ်အကစၢ်ယွၤအတၢ်လုၢ်ဟံၣ်အပူၤန့ၣ်အီဝဲစ ပံးထံလၢအဟံးန့ၢ်ဝဲလၢပှၤလိၢ်အဝဲသ့ၣ်အစ့တဖၣ်အအိၣ်လီၤ.
9 ဘၣ်ဆၣ်ဒီးယပှၤဂီၢ်မုၢ်ဧၢ, လၢသုဂီၢ်န့ၣ်ယမၤဟးဂီၤကွံာ်ကယဲၢ်ပှၤအမိၢ်ဖိလၢအဒိၣ် အထီဒ်သ့ၣ်ဆှိးအ့ရ့းတဖၣ်ဒီးဂံၢ်ဆူၣ်ဘါဆူၣ်ဝဲဒ်သ့ထိးဖၣ် တဖၣ်အသိးန့ၣ်လီၤ.
10 ယထုးထီၣ်သုလၢကီၢ်အဲၤကူပတူးအပူၤ, ဒီးဆှၢတ့ၢ်သုလၢပှၢ် မုၢ်ကနၢအနံၣ်လွံၢ်ဆံဒီးဟ့ၣ်လီၤတ့ၢ်သုလၢပှၤအမိၢ် ဖိအကီၢ်လၢကကဲထီၣ်သုကီၢ်န့ၣ်လီၤ.
11 ပှၤအံၣ်စရ့လးဖိသ့ၣ်ဧၢ, ယဃုထၢတ့ၢ်လံသုဖိခွါတနီၤလၢဝံ, ဒီးသုပှၤသးစၢ်တနီၤလၢပှၤနစၤရံ ဖိလီၤ. တၢ်အံၤတမ့ၢ်ဘၣ်ဧါ. ယၤ, ယွၤ, စံးတ့ၢ်လံတၢ်လံ.
12 ဘၣ်ဆၣ်ဒီးသုမၤတ့ၢ်တုၤပှၤနစၤရံဖိတဖၣ် အီစပံးထံဒီးသုမၤလိာ်တ့ၢ်ဝံတဖၣ်လၢအသုတကတိၤယတၢ် ကစီၣ်တဂ့ၤလီၤ.
13 ဒီးခဲကနံၣ်အံၤ, ယကဆီၣ်လီၤကွံာ်သုဆူဟီၣ်ခိၣ်လိၤ ဒီးသုတၢ်ကအုကစွါအသီၣ်န့ၣ်ကလီၤဂာ်ဒ်လ့ၣ် ကဟၣ်လၢအပှဲၤဒီးဘုကဒိၣ်ကအုကစွါအသိးန့ၣ်လီၤ.
14 ပှၤလၢအဃ့ၢ်တၢ်ချ့တဖၣ်ဒၣ်လဲာ်တပူၤဖျဲးဘၣ်. ပှၤဂံၢ်ဆူၣ်ဘါဆူၣ်တဖၣ်အဂံၢ်အဘါကလၢာ်ကွံာ် ဝဲဒီးပှၤသုးဖိတဖၣ်အုၣ်က့ၤခီၣ်က့ၤအသးသမူတန့ၢ်ဘၣ်.
15 ပှၤလၢအစိာ်ချံၣ်ဧိၤပျၢ်ဧိၤတဖၣ်န့ၣ်ဆၢထၢၣ်ဂၢၢ်ကျၢၤဖဲအလီၢ်တန့ၢ်ဘၣ်. ပှၤလၢအဃ့ၢ်တၢ်ချ့တဖၣ်န့ၣ်ဃ့ၢ်ထီၣ်လၢအလီၢ်တန့ၢ်ဘၣ်. ဒီးပှၤလၢအဒိးကသ့ၣ်တဖၣ်န့ၣ်တပူၤဖျဲးဘၣ်ဃုာ်ဒီးအသးသမူဘၣ်.
16 လၢမုၢ်တနံၤန့ၣ်ပှၤသုးဖိလၢအဒူအဃိၤကတၢၢ်တဖၣ် ဒၣ်လဲာ်ကတ့ၢ်လီၤကွံာ်အစုကဝဲၤဒီးဃ့ၢ်ကွံာ်လီၤ.” ယွၤကတိၤလံတၢ်လံ.