လံာ်ဧၤမိၣ်
AMOS
ဝံဧၤမိၣ်မ့ၢ်ဝံအဆိကတၢၢ်တဂၤလၢလံာ်စီဆှံအပူၤ သနာ်က့အတၢ်ကစီၣ်ဘၣ်တၢ်ကွဲးနီၣ်ကွဲးဃါအီၤဒၣ်လၢ အါနံၣ်အါလါပူၤကွံာ်အလီၢ်ခံန့ၣ်လီၤ. အဝဲဟဲလၢဝ့ၢ်အိၣ်လၢကီၢ်ယူ ဒၤအပူၤသနာ်က့စံၣ်တဲၤတဲလီၤတၢ်ဆူပှၤဂီၢ်မုၢ်အိၣ်လၢကီၢ် အံၣ်စရ့လးလၢကလံၤစိးဘီမုၢ်တခီ, ဖဲချခန နံၣ်ကယၤဃိးအခၢၣ်သးအကတီၢ်ဃၣ်ဃၣ်န့ၣ်လီၤ. အကတီၢ်အံၤမ့ၢ်တၢ်အီၣ်ကုးအီပှဲၤအိၣ်ဝဲဒိၣ်ဒိၣ်မုၢ်မုၢ်, တၢ်ပာ်ကဲတၢ်ဘူၣ်တၢ်ဘါဟူထီၣ်သါလီၤဝဲဒီးတၢ်ဘံၣ်တၢ်ဘၢအိၣ် ဝဲအကတီၢ်န့ၣ်လီၤ. ဘၣ်ဆၣ်ဝံဧၤမိၣ်ထံၣ်ဝဲဒၣ်လၢတၢ်အီၣ်ကုးအီပှဲၤအံၤမ့ၢ်ဒၣ်ထဲ လၢပှၤထူးပှၤတီၤတဖၣ်အဂီၢ်လၢအမၤတၢ်တတီတလိၤဒီးမၤ အၢမၤနးပှၤဖှီၣ်ဖိယာ်ဖိသ့ၣ်တဖၣ်အဂီၢ်ဧိၤန့ၣ်လီၤ. လၢတၢ်ဘူၣ်တၢ်ဘါအလုၢ်အလၢ်န့ၣ်တမ့ၢ်လၢတၢ်သူၣ်အိၣ်သးအိၣ်နီၢ် နီၢ်အပူၤဘၣ်. ဒီးတၢ်ဘံၣ်တၢ်ဘၢစ့ၢ်ကီးမ့ၢ်ဒၣ်တၢ်အိၣ်လၢ ခိအါန့ၢ်ဒံးတၢ်မ့ၢ်တၢ်တီနီၢ်နီၢ်န့ၣ်လီၤ. လၢတၢ်သူၣ်ကညီၤသးကညီၤဒီးတၢ်သူၣ်ဒူသးဒူအ ပူၤန့ၣ်စံၣ်တဲၤတဲလီၤဝဲလၢကစၢ်ယွၤကစံၣ်ညီၣ်ထံကီၢ်န့ၣ် လီၤ. အဝဲကိးထီၣ်ဝဲဒၣ်လၢတၢ်တီတၢ်လိၤ “ကယွၤလီၤဝဲဒ်ထံကျိ ဖိအသိး” အဂီၢ်, ဒီးစံးဝဲ, “ဘၣ်တဘၣ်ယွၤကသးကညီၤ ပှၤဂီၢ်မုၢ်လၢထံကီၢ်ပူၤအံၤလၢတၢ်ပာ်မူတ့ၢ်ဒံးဝဲန့ၣ်လီၤ” (၅:၁၅).
1
1 တၢ်တဖၣ်အံၤမ့ၢ်ပှၤကွၢ်သိစီၤဧၤမိၣ်လၢဝ့ၢ်တကိၤ, အတၢ်ကတိၤတဖၣ်န့ၣ်လီၤ. တချုးလၢဟီၣ်ခိၣ်ဟူးဝးဒံးဘၣ်ခံနံၣ်, ဖဲစီၤပၤဧူးစံယါမ့ၢ်ကီၢ်ယူဒၤအစီၤပၤဒီးစီၤယိၤအၣ်အဖိ ခွါစီၤယၤရၤဘၣ်မ့ၢ်ကီၢ်အံၣ်စရ့လးအစီၤပၤန့ၣ်, ကစၢ်ယွၤလီၣ်ဖျါထီၣ်ကယဲၢ်တၢ်အံၤခဲလၢာ်ဘၣ်ဃးဒီး ကီၢ်အံၣ်စရ့လးဆူစီၤဧၤမိၣ်န့ၣ်လီၤ.
2 ဒီးစီၤဧၤမိၣ်စံးဝဲဒၣ်, “ယွၤကိးသတြီထီၣ်လၢကစၢၢ်စံယိၣ်, ထုထီၣ်အကလုၢ်လၢဝ့ၢ်ယရူၤၡလ့ၣ်လီၤ. တၢ်အီၣ်ဆၣ်အလီၢ်တဖၣ်ဃ့ထီကွံာ်ဝဲ ဒီးတပံၢ်တမါလၢကစၢၢ်ကၢ်မ့ၤလးအဒီခိၣ်ဃ့ထီကွံာ်ဝဲလီၤ.”
ကီၢ်စူၤရံ
3 ဒီးယွၤစံးဝဲဒၣ်, “ပှၤဒၤမ့ၤစ့းဖိတဖၣ်မၤတ့ၢ်လံတၢ်ဒဲးဘးတဘျီ ဝံၤတဘျီလံ. လၢတၢ်အံၤအဃိယကစံၣ်ညီၣ်အီၤသပှၢ်ကတၢၢ်လီၤ. အဝဲသ့ၣ်မၤဆါတ့ၢ်ပှၤကံးလဧးဖိအၢအၢသီသီန့ၣ်လီၤ.
4 မၤသးဒ်န့ၣ်ဒီးယဆှၢလီၤမ့ၣ်အူဆူနီလၢအဘၣ်တၢ်ဘှီအီၤလၢ စီၤပၤဃစ့လးအဖီခိၣ်ဒီးယကဒွဲၣ်အူကွံာ်စီၤပၤဘ့ၣ်ဟဒး အတိာ်ဧိၤတာ်ဧိၤတဖၣ်န့ၣ်လီၤ.
5 ဒီးယကဒိကၢ်ကွံာ်ဝ့ၢ်ဒၤမ့ၤစ့းအပဲတြီတဖၣ်ဒီးသုးကွံာ်ပှၤ အိၣ်ဖဲအၤဝ့ၣ်ကစၢၢ်ကဆူးအတၢ်ပၢၤခိၣ်ဒီးဘ့ၤသဧ့ၤဒၣ် အစီၤပၤန့ၣ်လီၤ. ဒီးပှၤကီၢ်စူၤရံဖိကဘၣ်တၢ်စိာ်ကွံာ်အီၤဒ်ကုၢ် တဖၣ်အသိးဆူကီၢ်ကံၢ်အပူၤန့ၣ်လီၤ.”
ကီၢ်ဖလ့ၡသး
6 ဒီးယွၤစံးဝဲဒၣ်, “ပှၤဝ့ၢ်ဂါစၤဖိတဖၣ်မၤတ့ၢ်လံတၢ်ဒဲးဘးတဘျီ ဝံၤတဘျီလံ. လၢတၢ်အံၤအဃိယကစံၣ်ညီၣ်အီၤသပှၢ်ကတၢၢ်လီၤ. အဝဲသ့ၣ်စိာ်ကွံာ်ပှၤကီၢ်ဖိဒီတကီၢ်ညါဒီးဆါကွံာ်ဝဲဒ်ကုၢ် တဖၣ်အသိးဆူပှၤကီၢ်အဒိၣ်ဖိတဖၣ်အအိၣ်လီၤ.
7 မၤသးဒ်န့ၣ်ဒီးယကဆှၢလီၤမ့ၣ်အူဆူဝ့ၢ်ဂါစၤအခိၣ်ဒူတဖၣ် အလိၤဒီးဒွဲၣ်အူကွံာ်အတိာ်ဧိၤတာ်ဧိၤတဖၣ်န့ၣ်လီၤ.
8 ဒီးယကသုးကွံာ်ပှၤပၢၤဝ့ၢ်အၤစဒိာ် ဒီးဝ့ၢ်အၤၡကလိၣ်အပဒိၣ်တဖၣ်န့ၣ်လီၤ. ဒီးယကစံၣ်ညီၣ်ဝ့ၢ်ဧ့ကြိၣ်ဒီးကယဲၢ်ပှၤဖလ့ၡသးဖိတဖၣ်လၢအအိၣ် လီၤတဲာ်န့ၣ်ကသံလီၤ.”
ဝ့ၢ်ထါယၢၣ်
9 ဒီးယွၤစံးဝဲဒၣ်, “ပှၤဝ့ၢ်ထါယၢၣ်ဖိတဖၣ်မၤတ့ၢ်လံတၢ်ဒဲး ဘးတဘျီဝံၤတဘျီလံ. လၢတၢ်အံၤအဃိယကစံၣ်ညီၣ်အီၤသပှၢ် ကတၢၢ်န့ၣ်လီၤ. အဝဲသ့ၣ်စိာ်မၢကဲကုၢ်ကွံာ်ပှၤကီၢ်ဖိဒီတကီၢ် ညါဒ်ကုၢ်အသိးဆူကီၢ်အဒိၣ်အပူၤ, ဒီးတဟံးဃာ်ဘၣ်တၢ်ရ့တံၤရ့သကိးအတၢ်အၢၣ်လီၤလၢအမၤတ့ၢ်ဝဲ န့ၣ်ဘၣ်.
10 မၤသးဒ်န့ၣ်ဒီးယကဆှၢလီၤမ့ၣ်အူဆူဝ့ၢ်ထါယၢၣ်အခိၣ် ဒူတဖၣ်အလိၤဒီးဒွဲၣ်အူကွံာ်အတိာ်ဧိၤတာ်ဧိၤတဖၣ်န့ၣ်လီၤ.”
ကီၢ်အဒိၣ်
11 ဒီးယွၤစံးဝဲဒၣ်, “ပှၤကီၢ်အဒိၣ်ဖိတဖၣ်မၤတ့ၢ်လံတၢ်ဒဲးဘး တဘျီဝံၤတဘျီလံ. ဒီးလၢတၢ်အံၤအဃိယကစံၣ်ညီၣ်အီၤ သပှၢ်ကတၢၢ်န့ၣ်လီၤ. အဝဲသ့ၣ်လူၤမၤဟး ဂီၤအဒီပုၢ်ဝဲၢ်ပှၤအံၣ်စရ့လးဖိတဖၣ်လၢဃဲာ်ဧိၤနးဧိၤ, ဒီးတပာ်ဖျါထီၣ်အတၢ်သးကညီၤအဝဲသ့ၣ်ဘၣ်. အတၢ်သးထီၣ်အကတၢၢ်တအိၣ်ဘၣ်ဒီးတပျဲအလီၤပံာ်ကွံာ်ဘၣ်.
12 မၤသးဒ်န့ၣ်ဒီးယကဆှၢလီၤမ့ၣ်အူဆူဝ့ၢ်တ့ၤမၣ်ဒီးဒွဲၣ်အူကွံာ် အတိာ်ဧိၤတာ်ဧိၤလၢဘိးစရၤတဖၣ်န့ၣ်လီၤ.”
ကီၢ်ဧၤမိၣ်
13 ဒီးယွၤစံးဝဲဒၣ်, “ပှၤကီၢ်ဧၤမိၣ်ဖိတဖၣ်မၤတ့ၢ်လံတၢ်ဒဲးဘး တဘျီဝံၤတဘျီလံ. ဒီးလၢတၢ်အံၤအဃိယကစံၣ်ညီၣ်အီၤသပှၢ်ကတၢၢ်န့ၣ်လီၤ. လၢအဝဲသ့ၣ်တၢ်ဒုးတၢ်ယၤတဖၣ်ဒ်သိးကမၤလဲၢ်ထီၣ်အကီၢ်အဃၢၤအဂီၢ် အပူၤန့ၣ်, ကွဲးသ့ၣ်ဖးဒၣ်လဲာ်ကီၢ်ကံးလဧးအပိာ်မုၣ်လၢအဒၢတဖၣ် အဟၢဖၢန့ၣ်လီၤ.
14 မၤသးဒ်န့ၣ်ဒီးယဆှၢလီၤမ့ၣ်အူဆူဝ့ၢ်ရးဘးအခိၣ်ဒူဒီးဒွဲၣ်အူကွံာ် အတိာ်ဧိၤတာ်ဧိၤတဖၣ်န့ၣ်လီၤ. တုၤနုၤတစု, တၢ်ကိးပသူ တဖၣ်ကအိၣ်ထီၣ်လၢတၢ်ဒုးတၢ်ယၤအမုၢ်တနံၤဒီးတၢ်ဒုးလိာ်ယၤလိာ် ကဆူၣ်ဝဲဒ်ကလံၤသဝံးအသိးန့ၣ်လီၤ.
15 အစီၤပၤ, ဒီးအပဒိၣ်သ့ၣ်တဖၣ်ကဘၣ်တၢ်စိာ်မၢကဲကုၢ်အီၤလီၤ.”