37
1 ယွၤအစုအိၣ်ဝဲလၢယလိၤ, ဒီးစိာ်ထီၣ်ယၤလၢယွၤအ သး, ဒီးပာ်လီၤယၤလၢကစၢၢ်ကဆူးအပူၤ, လၢအပှဲၤ ဝဲဒီးတၢ်ဃံတၢ်ကွဲ,
2 ဒီးဒုးလဲၤတြူာ်ယၤဝးတရံးဝဲ,ဒီး ကွၢ်ကွၢ်,အိၣ်ဝဲအါမးလၢကစၢၢ်ကဆူးအပူၤ, ဒီးကွၢ် ကွၢ်, ဃ့ဝဲနးမးလီၤ.
3 ဒီးစံးဘၣ်ယၤ,ပှၤကညီဖိခွါဧၢ, တၢ်ဃံတၢ်ကွဲအံၤမူ ထီၣ်ဝဲဘၣ်ကသ့ဧါ.ဒီးယစံး, ကစၢ်ယွၤဧၢ,နသ့ၣ်ညါ နဲလီၤ.
4 ဒီးစံးဘၣ်ယၤ, ကတိၤတၢ်လၢဝံကျိာ်လၢတၢ်ဃံတၢ် ကွဲအံၤအဖီခိၣ်, ဒီးစံးဘၣ်အီၤ, တၢ်ဃံဃ့သ့ၣ်ဧၢ,က နၣ်ယွၤအကလုၢ်တက့ၢ်.
5 ကစၢ်ယွၤစံးဘၣ်တၢ်ဃံ တၢ်ကွဲအံၤ,ကွၢ်ကွၢ်, ယကဒုးနုာ်သုသါလၢသုပူၤ,ဒီး သုကမူထီၣ်လီၤ.
6 ဒီးယကပာ်တၢ်အထူၣ်တဖၣ်လၢ သုလိၤ, ဒီးယကဒုးထီၣ်သုလိၤလၢတၢ်ညၣ်,ဒီးယက ကျၢၢ်ဘၢသုလၢတၢ်ဖံး, ဒီးယကဒုးနုာ်သုသါလၢသု ပူၤ,ဒီးသုကမူထီၣ်, ဒီးသုကသ့ၣ်ညါလၢယမ့ၢ်ယွၤလီၤ.
7 ဒီးယကတိၤတၢ်လၢဝံကျိာ် ဒ်တၢ်မၤလိာ်ယၤအသိး န့ၣ်,ဒီးလၢယကတိၤတၢ်လၢဝံကျိာ်အဖၢမုၢ်ဒီး, တၢ် သီၣ်ထီၣ်,ဒီးကွၢ်ကွၢ်,တၢ်ဟူးဝးအိၣ်ဝဲ, ဒီးတၢ်ဃံတ ဖၣ်န့ၣ်သုးဖှိၣ်အသးတဘိဒီးတဘိလီၤ.
8 ဒီးယကွၢ်တၢ်,ဒီးကွၢ်ကွၢ်, တၢ်အထူၣ်တဖၣ်အိၣ်ဝဲ လၢအလိၤ, ဒီးတၢ်ညၣ်ထီၣ်လၢအလိၤ, ဒီးတၢ်ဖံးကျၢၢ် ဘၢအီၤလၢအဖီခိၣ်လီၤ. ဘၣ်ဆၣ်ဒီးအသါတအိၣ်လၢ အပူၤဘၣ်.
9 တုၤနုၤတဘျီယွၤစံးဘၣ်ယၤ, ကတိၤတၢ်လၢဝံကျိာ် ဆူတၢ်အသါန့ၣ်, ကတိၤလၢဝံကျိာ်တက့ၢ်,ပှၤကညီ ဖိခွါဧၢ, ဒီးစံးလၢတၢ်အသါန့ၣ်,ကစၢ်ယွၤစံးဒ်အံၤ,ဟဲ လၢကလံၤလွံၢ်ခီတက့ၢ်, တၢ်အသါဧၢ,ဒီးသါထီၣ်လၢ ပှၤဘၣ်တၢ်မၤသံအီၤတဖၣ်အံၤအလိၤ, ဒ်သိးအကမူ ထီၣ်န့ၣ်တက့ၢ်.
10 ဒီးယကတိၤတၢ်လၢဝံကျိာ် ဒ်အမၤလိာ်ယၤအသိး, ဒိးအသါဟဲနုာ်လၢအပူၤ,ဒီးမူထီၣ်ဝဲ, ဒီးဆၢထၢၣ်ဝဲ လၢအခီၣ်,ပှၤဂီၢ်မုၢ်ဖးဒိၣ်လီၤ.
11 ဒီးစံးဘၣ်ယၤ, ပှၤကညီဖိခွါဧၢ,တၢ်အဃံအကွဲအံၤ, မ့ၢ်အံၣ်စရ့လးအပှၤဟံၣ်ဖိခဲလၢာ်လီၤ. ကွၢ်ကွၢ်,စံးဝဲ, ပဃံပကွဲဃ့ထီကွံာ်လံ, ဒီးပတၢ်မုၢ်လၢ်ဟါမၢ်လံ, တၢ်ဒီၣ်တဲာ်ကွံာ်ပှၤလီၤ.
12 မၤသးဒ်န့ၣ်ဒီးကတိၤတၢ်လၢဝံကျိာ်, ဒီးစံးဘၣ်အီၤ, ယွၤစံးဒ်အံၤ,ကွၢ်ကွၢ်,ယပှၤဂီၢ်မုၢ်ဧၢ, ယကအိးထီၣ် သုသွၣ်ခိၣ်ပူၤ, ဒီးဒုးဟဲထီၣ်သုလၢသွၣ်ခိၣ်ပူၤ, ဒီးဒုး ဟဲက့ၤသုဆူကီၢ်အံၣ်စရ့လးအပူၤလီၤ.
13 ယပှၤဂီၢ်မုၢ်ဧၢ, တုၤယအိးထီၣ်သုသွၣ်ခိၣ်ပူၤ,ဒီးဒုး ဟဲထီၣ်သုလၢသုသွၣ်ခိၣ်ပူၤဒီး, သုကသ့ၣ်ညါလၢယ မ့ၢ်ယွၤလီၤ.
14 ဒီးယကဒၢနုာ်ယသါလၢသုပူၤ, ဒီးသု ကမူထီၣ်,ဒီးယကပာ်သုလၢသုကီၢ်ဒၣ်သုဝဲအပူၤလီၤ. ဒီးသုကသ့ၣ်ညါလၢယၤယွၤအံၤ, ယကတိၤလံတၢ်ဒီး မၤလံတၢ်လံလီၤ.ယွၤစံးဝဲဒၣ်.ယွၤအကလုၢ်ဘၣ်ယၤဒီးစံးဝဲဒၣ်,
15-16 ဒီးနဲဒၣ်အံၤ ပှၤကညီဖိခွါဧၢ, ဟံးန့ၢ်သ့ၣ်တဘိဒီးကွဲးလၢအလိၤ, လၢယူဒၤအဂီၢ်ဒီးလၢအတံၤအသကိး ပှၤအံၣ်စရ့လးဖိ အဂီၢ်န့ၣ်တက့ၢ်. ဒီးဟံးန့ၢ်သ့ၣ်တဘိဒၣ်,ဒီးကွဲးလၢ အလိၤလၢစီၤယိၤသးအဂီၢ်, အ့ဖရဲၣ်အသ့ၣ်တဘိ,ဒီး လၢအတံၤအသကိး အံၣ်စရ့လးအပှၤဟံၣ်ဖိခဲလၢာ်အ ဂီၢ်တက့ၢ်.
17 ဒီးထီဘူၣ်အီၤလၢသ့ၣ်တဘိဃီတက့ၢ်. ဒီးကကဲထီၣ်တၢ်တဘိဃီလၢနစုပူၤလီၤ.
18 ဒီးတုၤနပှၤဂီၢ်မုၢ်ဖိကတိၤတၢ်ဒီးနၤဒီးစံး, တၢ်န့ၣ်တ ဖၣ်မ့ၢ်ဒ်လဲၣ်ဒ်လဲၣ်န့ၣ် နတဒုးနဲၣ်ဘၣ်ပှၤဘၣ်ဧါန့ၣ် ဒီး,
19 စံးဘၣ်အီၤ,ကစၢ်ယွၤစံးဒ်အံၤ,ကွၢ်ကွၢ်,ယကဟံး န့ၢ်စီၤယိၤသးဒီးအတံၤအသကိး အံၣ်စရ့လးအဒူၣ်တ ဖၣ်အသ့ၣ်တဘိလၢ အအိၣ်ဝဲလၢအ့ဖရဲၣ်အစုပူၤ,ဒီး ယကထီဘူၣ်အီၤဒီးအဝဲဒၣ်, ဒီးယူဒၤအသ့ၣ်တဘိ,ဒီး ယကထီဘူၣ်အီၤလၢသ့ၣ်တဘိဃီ, ဒီးကကဲထီၣ်တ ဘိဃီလၢယစုပူၤလီၤ.
20 ဒီးသ့ၣ်အဘိတဖၣ်လၢ နကွဲးတၢ်လၢအလိၤန့ၣ်က အိၣ်ဒၣ်ဝဲလၢနစုပူၤလၢအမဲာ်ညါတက့ၢ်.
21 ဒီးစံးဘၣ်အီၤ,ကစၢ်ယွၤစံးဒ်အံၤ, ကွၢ်ကွၢ်,ယကဟံး န့ၢ်ပှၤအံၣ်စရ့လးဖိလၢ ပှၤကလုာ်တဖၣ်အကျါဖဲအ လဲၤတၢ်,ဒီးယကထၢဖှိၣ်အီၤဝးတရံးဝဲ, ဒီးဒုးဟဲအီၤ ဆူအကီၢ်ဒၣ်ဝဲအပူၤလီၤ.
22 ဒီးယကပာ်အီၤလၢ ပှၤတကလုာ်ဃီလၢထံဧိၤကီၢ်ဧိၤ အပူၤလၢအံၣ်စရ့လးအကစၢၢ်ကလိအလိၤ, ဒီးစီၤပၤ တဂၤဃီကကဲထီၣ်အဝဲသ့ၣ်ခဲလၢာ်အစီၤပၤ, ဒီးတကဲ လၢၤဘၣ်ပှၤခံကလုာ်ဘၣ်, ဒီးတၢ်တမၤလီၤဖးလၢၤ အီၤလၢပှၤခံကလုာ်လၢၤဘၣ်,
23 ဒီးတမၤဘၣ်အၢအီၤ လၢၤဘၣ်အသးဒီးအတၢ်ဂီၤတၢ်ဖီၣ်, ဒီးအတၢ်သးဘၣ် အၢ, ဒီးအတၢ်သရူးကမၣ်နီတမံၤဘၣ်. ဒီးယကအုၣ် က့ၤခီၣ်က့ၤအီၤလၢကယဲၢ်အအိၣ်အဆိးအလီၢ်ပူၤ, ဖဲအ မၤကမၣ်တၢ်, ဒီးယကသ့စီအီၤ, ဒီးကကဲထီၣ်ယပှၤ ဂီၢ်မုၢ်, ဒီးယကကဲထီၣ်အကစၢ်လီၤ.
24 ဒီးယခ့ယပှၤစီၤဒၤဝံး ကကဲထီၣ်စီၤပၤလၢ အဖီခိၣ်, ဒီးကအိၣ်ဒီးပှၤကွၢ်သိတဂၤဃီ, ဒီးကလဲၤတၢ်လၢယ တၢ်စံၣ်ညီၣ်အပူၤ, ဒီးတိၢ်န့ၢ်ယတၢ်သိၣ်တၢ်သီ, ဒီး မၤအီၤလီၤ.
25 ဒီးကအိၣ်ကဆိးလၢထံဧိၤကီၢ်ဧိၤအပူၤ လၢယဟ့ၣ် လီၤယခ့ယပှၤစီၤယၤကိာ်, ဖဲသုပၢ်တဖၣ်အိၣ်ဝဲဆိးဝဲ,ဒီးကအိၣ်ကဆိးလၢအပူၤ, အဝဲသ့ၣ်ဒီးအဖိခွါတဖၣ်, ဒီးအဖိခွါအဖိခွါတဖၣ်လီၤစိၤလီၤထီလီၤ. ဒီးယခ့ယ ပှၤစီၤဒၤဝံးကကဲထီၣ်အခိၣ်ဒူလီၤထူလီၤယိာ်လီၤ.
26 ဒီးယကအၢၣ်လီၤအီလီၤတၢ်ဃူတၢ်ဖိး အတၢ်အၢၣ် လီၤဒီးအီၤ, ဒီးကကဲထီၣ်တၢ်အၢၣ်လီၤအီလီၤအထူအ ယိာ်ဒီးအီၤ, ဒီးယကဆှၢအီၤ,ဒီးမၤအါထီၣ်အီၤ,ဒီးပာ် ယလီၢ်စီဆှံလၢအကျါလီၤထူလီၤယိာ်လီၤ.
27 ဒီးယအိၣ်ယဆိးအလီၢ်ကအိၣ်ဒီးအီၤ, ဒီးယကမ့ၢ်အကစၢ်,ဒီးအဝဲသ့ၣ်တဖၣ်န့ၣ် ကမ့ၢ်ယပှၤဂီၢ်မုၢ်လီၤ.-
28 ဒီးတုၤယလီၢ်စီဆှံအိၣ်ဝဲလၢအကျါ လီၤစိၤလီၤထီဒီး, ပှၤအကလုာ်တဖၣ်ကသ့ၣ်ညါဝဲလၢ ယမ့ၢ်ယွၤလၢအ မၤစီဆှံပှၤအံၣ်စရ့လးဖိလီၤ.