21
1 စဎွၩအၥၭအီၪဝ့ၫ လၧယဟိဝၩအစူၪဖၧၩ့ ဘဲၫထံၫ ချိၬအၥိၭနီၪတၭ အဝ့ၫဒၪဘိၭကၠၪဝ့ၫ ထီးဒၪအလးလၧ အဘၪအၥၭလစီၪ့လါလါနီၪလီၫ.
2 ၦၡၩအဖၧၩ့ၥၭတီၩဝ့ၫလီၩ့ဝ့ၫ လၧအမ့ၬၥၪဒၪဝ့ၫအ ဖၧၩ့ကိၭဘီၩ့ဒ့ၭး အ့ၪမွဲၦလၧအမၩခွါ ၦၡၩအၥၭၥံၪ မွဲယဟိဝၩလဂၩနီၪလီၫ.
3 မၩဆၧတီၩတီၩလီၩ့လီၩ့ ဒဲစ့ၩရၫ့ဆၧတီၩနီၪ, ဘၪ ယဟိဝၩအၥၭဂ့ၩနဲၪ့ဒံၭဆၧလုဒံၭလီၫ.
4 ဆၧအီၪက့ၪထၪ့ထီၫမ့ၬၥၪ ဒဲၥၭလၧအမၩဖိၫလိၫအ ၥၭ, ၦလတီၩလလီၩ့ဘၪ အဆၧဖၩ့နီၪ, မွဲဆၧဒဲၩဘၭ လီၫ.
5 ၦအဎၭအဆၧကိၪ့ထၪ့ဖၭလၩ့နီၪ ဘၪဆဲၫ့န့ၫဆၧအၪ ထၪ့အၪအၪလ့ၬး အ့ၪမွဲကယဲၦလၧအလထီးလၩ့ဘၪ ၥၭနီၪ မၩၡၪ့လၩ့ယၬလၩ့ဝ့ၫလီၫ.
6 ဆၧလူဒိၪဎွ့ၩဒိၪ လၧၦန့ဘၪ လၧဖျ့ၩအဘျံၭအဘျၪ အကၠီၩ့နီၪ, မၩအၥၭဘဲၫဆၧအွံၩဒံၩခွံၬဒၪဆၧ, ၦအၪ့ ဎၬဆၧၥံၫလီၫၬ
7 ၦလတီၩလလီၩ့ဘၪ အဆၧမၩဆီၪ့နီၪမိဝ့ၬလၩ့ဘံၭ အနၫ့ဆါၥံၪ, အဂဲးဘဲၫယီၩ ဆၧစ့ၩရၫ့တီၩနီၪ အဝ့ၫၥံၪ မၩအ့ၬ.
8 ၦၡၩလၧအမၩကဲၪ့အဖၧၩ့ၥၭနီၪ ဂၭဖျိၭဝ့ၫဒၪတၭး အ့ၪမွဲၦအဆံၫ့နီၪ အဆၧမၩတီၩတီၩလီၩ့လီၩ့လီၫ.
9 ၦအ့ၪအီၪလၧဂံၪ့ခိၪအနိၪ့ဖၧၩ့နီၪ, မွဲဆၧဂ့ၩနဲၪ့ဒံၭ အီၪလၧၦမုၪလဂၩ လၧအဂဲးလိၬတ့ၭလိၬ လၧဂံၪ့ဖၭ လဲဖၧၩ့ဒံၭလီၫ.
10 ၦလတီၩလလီၩ့ဘၪ ဆိၫ့ဆၧအၧၩ့တၭး ၦအီၪလၧ အနဲၩ့ထံၭနီၪ န့ဘၪဆၧအခိးအတၩ လၧအမ့ၬၥၪဖၧၩ့ နးဆံၭအ့ၬ.
11 ထီးၦမၩကြၩ့ထမးဆၧလဂၩ အ့ၪဘၪဆၧစ့ၩရၫ့စၪ နီၪ, ၦလၧအလမၩလိၪဘၪဆၧနီၪ န့ဘၪဆၧကိၪ့ၥ့ၪတၭး ထီးၦကိၪ့ၥ့ၪဘၪဆၧၥီၪ့လိၪဝ့ၫနီၪ, အဝ့ၫဒၪန့ဘၪဆၧ ၥ့ၪယၫလီၫ.
12 ဆၧတီၩဆၧလီၩ့လဂၩနီၪ ယိထံၫယိဆၭၦလတီၩ လလီၩ့ဘၪအဂံၪ့တၭ, ခွံၬလၩ့ၦအၧၩ့ၥံၪ လၧဆၧဂၭ ဂီၩ့ဂၭစၪဖၧၩ့လီၫ.
13 ၦၡၪ့ဖိၪယၬဖိၪ ကိၭထၪ့ဆၧအဘိၩ့ဘၭနီၪး ၦလဂၩ ဂၩအ့ၪဆွံၫဘံၭအနါဖၧၩ့တၭ, အဝ့ၫဒၪအနၫ့ဆါဒၪဝ့ၫ မိကိၭထၪ့လါနၫ့နီၪ, ဆၧနါဂၧၫ့ဝ့ၫအ့ၬ.
14 ဆၧဖ့ၪလၫ့ၥူၪနီၪ ဒုၭလၩ့ဆါထဲၩ့ဆၧၥၭထၪ့း ဒဲလၬ ဆီၪ့လၧၥၭနၫၡါအဖၧၩ့နီၪ မၩလၩ့မါဆၧၥၭထၪ့ဆီၪ့ နီၪလီၫ.
15 ဆၧစ့ၩရၫ့တီၩနီၪ မွဲဆၧၥုၪ့ထိၬၥၭထိၬ လၧၦတီၩၦ လီၩ့အဂး, အ့ၪမွဲဆၧဂၭဂီၩ့နီၪ အီၪလၧၦမၩအၧၩ့ဆၧ အဂးလီၫ.
16 ၦလဂၩလၧအစဲၪ့ဒၪခွံၬ ဆၧကိၪ့ဘၪကိၪ့ၥ့ၪအဖၧၩ့ ၥၭနီၪ, မိအီၪဝ့ၫလၧၦၥံၫအလၩၥံၪ အဆၧအီၪကီၪ့အ ကျၩနီၪလီၫ.
17 ၦလၧအအဲၪဆၧမုၬလၩနီၪ မိကဲၪထၪ့ၦၡၪ့ဖိၪယၬဖိၪ တၭးၦလၧအအဲၪစဘံၭထံၫဒဲၥိၪလဂၩနီၪ မိကဲၪၦၥထံၫ ဆ့အ့ၬ.
18 ၦလတီၩလလီၩ့ဘၪၥံၪ မိကဲၪၦတီၩၦလီၩ့အဆၧဎွ့ၩ န့ထဲၩ့နီၪး ဒဲၦအၪ့လီၫဆၧ မိအီၪလၧၦတီၩအလးလီၫ.
19 အ့ၪအီၪလၧထံၫၥံၪခးၥံၪအီၪယူဝ့ၫနီၪ, မွဲဆၧဂ့ၩနဲၪ့ ဒံၭအီၪလၧၦမုၪဂဲးလိၬတ့ၭလိၬ ဒဲၥၭထၪ့ဒၪဆၧဘဲၫနီၪ လဂၩအၥိၭလီၫ.
20 ၥိၪဒဲဆၧလူဒိၪဎွ့ၩဒိၪ လၧအဘၪၦအၥၭနီၪ, အီၪလၧ ၦကိၪ့ဆၧၥ့ၪအဂံၪ့ဖၧၩ့တၭ, အ့ၪမွဲၦအဂီၩ့နီၪယုလၩ့ ခွံၬဝ့ၫလီၫ.
21 ၦလၧအလီၩ့ဆီးဆၧတီၩဆၧလီၩ့ ဒဲဆၧအခိးအတၩ လဂၩနီၪ, မိဒၪန့ဆၧမၧၫ့, ဆၧတီၩဆၧလီၩ့, ဒဲဆၧလၩ ဆၧဖၩ့နီၪဆ့လီၫ.
22 ၦကိၪ့ၥ့ၪလဂၩထၪ့ဘၭ လၧၦဆီၪ့ၥံၪအဒိၩ့အခိၪဒၧၩ့ အဖၫ့ခိၪနီၪ, ဒဲမၩလၩ့ဎီးခွံၬ အဆၧဂဲးဆၧဘၭ လၧ ဆၧဒိၭနဲၩ့အၥၭ လၧအဖၧၩ့နီၪလီၫ.
23 ၦလၧအပၧၩ့အနိၭ ဒဲအဖျ့ၩလဂၩနီၪ, မၩဖီၩ့မၩဖျ့ၭ အၥၭလၧဆၧခိဆၧဝီၩၥံၪလီၫ.
24 ၦလၧအမၩထၪ့ထီၫအၥၭ မၩဖိၫလိၫအၥၭနီၪ, အ မံၩ့မွဲၦမၩကြၩ့ထမးဆၧ, မၩဝ့ၫလၧအမၩဖိၫလိၫအၥၭ အၪလၨၪအဖၧၩ့လီၫ.
25 ၦကၠႃၪ့အဆၧဆိၫ့န့ဘၪနီၪ မၩဂၭဂီၩ့အနၫ့ဆါးအဂဲး ဘဲၫယီၩ အစူၪၥံၪမၩဆၧနီၪ အၥၭအီၪအ့ၬ.
26 အဝ့ၫလဂၩၥၭကွံၩဆိၫ့န့ဘၪဆၧၥံၫ့နံၩချီၩ့း အ့ၪမွဲၦ တီၩၦလီၩ့ၥံၪဖ့ၪလၫ့ဒၪဆၧတၭ, လီၫ့ကီၩ့ဆၧအ့ၬ.
27 ၦလတီၩလလီၩ့ဘၪ အဆၧလုနီၪ မွဲဆၧၥၭလိၪတၭ, ၦလၧအဂဲၫဆိၬဝ့ၫ လၧဆၧကိၪ့ထၪ့ဖၭလၩ့အအၧၩ့နီၪ နၭနဲၪ့အနီၪဒံၭ, ဆံၭဒိၪလဲၪၬ
28 ၦထိးအၥၭ အဘျံၭအဘျၪနီၪ မိဂၭဂီၩ့ဝ့ၫး အ့ၪမွဲၦ လၧအခိၭနၪဝ့ၫလဂၩနီၪ မိချဲၩ့ဆၧလထံၪဎးလဘီၩ့ ဎးလီၫ.
29 ၦလတီၩလလီၩ့ဘၪလဂၩနီၪ မၩနီၩ့ထၪ့အမ့ၬး အ့ၪ မွဲၦအၥၭဆုးလီၩ့လဂၩ မိမၩဂုးထၪ့ခၧၫ့ထၪ့အဖၧၩ့ၥၭ ၥံၪလီၫ.
30 လၧယဟိဝၩအမ့ၬယၫနီၪ, ဆၧကိၪ့ၥ့ၪကိၪ့ဘၪ, ဆၧၥုၪ့ဖၭၥၭဖၭ, ဆၧဒုၭကိၪ့ၥ့ၪနီၪ, အီၪအ့ၬ.
31 ကၥ့ၪနီၪဘၪဆၧတဲၩ့ဝဲၩဝ့ၫ လၧဆၧဒုၭၥုၭမုနံၩအ ဂးလါနၫ့တၭ, ဆၧမၩဖီၩ့မၩဖျ့ၭနီၪ ဂဲၫလၧယဟိဝၩ လီၫ.