20
1 စဘံၭထံၫနီၪ မွဲဆၧမၩကြၩ့ထမးဆၧး ဒဲၥံၭထံၫဂၬ ထံၫဒုၭအဲၪ့လိၬဆၧဆီၪ့ဆီၪ့လ့ၬတၭး ၦလၧအမၩမၪ ဆၧလၧအနီၪ, အီၪလၧဆၧကိၪ့ၥ့ၪနးဂၩအ့ၬ.
2 စဎွၩအဆၧဒုၭၥၭမဲၪနီၪ မၩအၥၭဘဲၫဆၬလၥၧၫ့ယုၩ့ ဆၧအၥိၭတၭး ၦလၧအဒုၭၥၭထၪ့အဝ့ၫဒၪနီၪ မၩမၪ ဆၧထၫ့ဒုၪဒၩအၥၭမၧၫ့လီၫ.
3 ၦအ့ၪအီၪလၩ့ဖၭ လၧဆၧဂဲးလိၬတ့ၭလိၬနီၪ, န့ဘၪ ဆၧလၩဖၩ့း အ့ၪမွဲကယဲၦအဂီၩ့ၥံၪ ၥုၪ့ထၪ့ၥၭဂဲၫ့ဆၧ ကိၭဂၩဒ့ၭဆုၬဆုၬလီၫ.
4 လၧဆၧဂီးအကၠီၩ့တၭ, ၦကၠႃၪ့လဂၩနီၪ မိထဲၫဆၧ အ့ၬး အဝ့ၫနီၪ အၪ့ကံၩ့ဆၧလၧကူၭဆၧအထီလါနၫ့ ဘိၩန့ဘၪဆၧနးမံၩ့အ့ၬ.
5 ဆၧကိၪ့ထၪ့ဖၭလၩ့ လၧၦၥၭခံဖၧၩ့နီၪ မွဲထံၫယိၬး အ့ၪမွဲၦလၧအၥုၪ့ဖၭၥၭဖၭနီၪ မိထုၭခွံၬဝ့ၫဒၪလီၫ.
6 ၦအၪဂၩမိကိၭထၪ့အခိးဒၪဝ့ၫ, လဂၩအခိးဒၪဝ့ၫး အ့ၪမွဲၦလၧအလူတီၩလဂၩနီၪ, မွဲပလၫမိဒၪန့ဝ့ၫလဂၩ လဲၪ.
7 ၦတီၩၦလီၩ့လ့ၩဆၧ လၧအဆၧလၧၫ့ဆၧဎွ့ၩအဖၧၩ့ နီၪး အဖိၪအလံၩၥံၪ လၧအလးခဲၫ့နီၪ ဘၪဆၧဆိၪဂ့ၩ လီၫ.
8 စဎွၩဆၧၫ့နၩ့ လၧအဆၧစ့ၩရၫ့ဆၧ အလးဆီၩ့ဆီခိၪ, အမ့ၬၥၪၥံၪ ယိအၪ့ဎူၫအၪ့ဎၬၥ့ၪယၫ ကယဲဆၧအၧၩ့ ဆၧၥၫ့လီၫ.
9 ယၥူၫဝၭဆံၫ့ခွံၬယၥၭနီၪ, ဒဲယဆံၫ့ခွံၬ လၧယဆၧဒဲၩ ဘၭတၭ, မွဲပလၫစံၭမိၥ့ၪလဂၩလဲၪ.
10 ခံၫ့နံၫမံၩ့, ဒဲဆၧတိၪ့နံၫမံၩ့, မွဲဆၧၥၭလိၪ လၧယဟိ ဝၩအမ့ၬယၫ နံၫမံၩ့လူၬလီၫ.
11 ဖိၪၥၪဒၪလ့ၬနီၪ အဆၧဖံၭဆၧမၩၥံၪ, မွဲအဆံၫ့ဧၪ, မွဲ အတီၩဧၪ, ၦၥ့ၪယၫလၧအဆၧမၩဒၪဝ့ၫအကၠီၩ့နီၪလီၫ.
12 နါလၧအနါဂၧၫ့ဆၧ, ဒဲမ့ၬၥၪလၧအဒၪဆၧနီၪ, ယဟိဝၩတဲၩ့လၩ့ဝ့ၫ နံၫမံၩ့လူၬလီၫ.
13 အဲၪဆၧမံၫလဂ့ၩ, နမိၡၪ့မိယၬဘၪခိၬ, စၪ့ထၪ့နမ့ၬ ၥၪတၭ, နမိဘျဲၩအၪ့လၧကိၪလီၫ.
14 ၦလၧအဎွ့ၩဆၧလဂၩစံၭဝ့ၫ, ဆၧနးမံၩ့အ့ၬ, ဆၧနး မံၩ့အ့ၬ, လါနၫ့နီၪး စဲၪ့ထၪ့ခွံၬဝ့ၫတၭ, ထီးနီၪလဖၧၫ့ အူၭလၩ့အၥၭလီၫ.
15 ထီၫ့ၥံၪလွ့ၫၥံၪဒဲမနံၬထၫ့မျါၥံၪ အီၪအၪအၪလ့ၬး အ့ၪ မွဲဆၧၥ့ၪယၫအနိၭဖျံၩလဖၪနီၪ, မွဲဆၧလၧအလူဒိၪဎွ့ၩ ဒိၪလီၫ.
16 ၦလၧအထိးအၥၭလၧၦမွံၩအဂးလဂၩနီၪ, မၩန့ထၬ အကီၩ့အၥိၭဘီၪး ဒဲလၧၦလခီၫဘၩ့မုးဖိၪၥံၪ အဂးနီၪ မၩန့ထၬ ဆၧပီၩ့လၩ့နီၪဆံၭ.
17 အၪ့လီၫန့ဆၧ အကိၪဆၧၫ့ဝ့ၫ လၧၦၡၩအဂးလါနၫ့ တၭ, လၧခဲၫ့ထဲၩ့နီၪ အနိၭမိဎွ့ၩထၪ့ လၧလိးဖိၪမ့ၭဖိၪ လဖၪနီၪလီၫ.
18 ကယဲဆၧကိၪ့ထၪ့ဖၭလၩ့ လမံၩ့လါလါနီၪ ဂုးထၪ့ ခၧၫ့ထၪ့ လၧဆၧဒုၭကိၪ့တၭး လၧဆၧၥိၫ့ထီးအဂ့ၩအ ဘၪနီၪနမိဒုၭဘၪၥုၭလီၫ.
19 ၦလၧအလ့ၩချဲၩ့ခဲၪဆၧနီၪ ဒုၭဖျီၪထၪ့ဆၧအီၪၥူၪဝ့ၫ တၭး အခိးမွဲထၧၫ့ထံၩထၧၫ့ၥိၭ လၧၦလၧအချဲၩ့မုၬနါ ဆၧလဂ့ၩ.
20 ၦလၧအဆိၪအၧၩ့အဖါဒဲအမိနီၪ, အမ့ၪဒိၩ့မိဘၪ ဆၧမၩလၩ့ဖံၬခွံၬဝ့ၫ လၧဆၧခံၭၥၧၫ့အဖၧၩ့လီၫ.
21 ဆၧန့ၥၫနီၪ ၦန့ဘၪဝ့ၫလၧအခၪ့ထံၭ ချဲၫ့ချဲၫ့လါနၫ့ တၭး အထုၬနီၪ ဘၪဆၧဆိၪဂ့ၩၥ့ၪအ့ၬ.
22 ယမိဖ့ၪဆၧၫ့ထဲၩ့ဆၧအၧၩ့နီၪ, ထီးစံၭလဂ့ၩ အီၪ ခိၭယဟိဝၩတၭ, အဝ့ၫနီၪ မိမၩဘိၭမၩဆၧၩ့နၧၩလီၫ.
23 ဆၧခံၫ့ၥၪနံၫမံၩ့နီၪ မွဲဆၧၥၭလိၪလၧယဟိဝၩအမ့ၬ တၭး ခံၫ့အၪ့လီၫဆၧနီၪ မွဲဆၧဂ့ၩအ့ၬ.
24 ၦၡၩခၫထၪ့ဆၧနီၪ ဘၪဆဲၫ့လၧယဟိဝၩတၭး ၦၡၩ နီၪ, မွဲအနၪအဖၧၩ့ၥၭဒၪဝ့ၫ မိၥ့ၪဘဲၫၥ့ၪလဲၪ.
25 ၦလၧအချဲၩ့ကြၩ့ဆၧ လၧအဘၪဆဲၫ့လၧယွၩတၭး ဆီၫ့မီၪ့လၩ့အၥၭ လၧအဆိၪလၩ့အၥၭ အလးခဲၫ့နီၪ, ကဲၪထၪ့ဝ့ၫဖျံၩခွၩ့ လၧအဂးလီၫ.
26 စဎွၩလၧအကိၪ့ဆၧၥ့ၪနီၪ ဂုလၩ့ခွံၬၦအအၧၩ့တၭး ဒုၭလ့ၩလဲၪ့ပၪလၧအလီၩ့လီၫ.
27 ၦၡၩအၥၭနီၪ မွဲယဟိဝၩအမ့ၪဒိၩ့တၭး ယိအၪ့ဎၬ ၥ့ၪယၫကယဲဆၧအယိၬ လၧဂူၭဖိၫ့ဖၧၩ့ထီးအလူၬလီၫ.
28 ဆၧအခိးအတၩဒဲဆၧမွဲဆၧတီၩနီၪ မိမၩဂုးထၪ့စဎွၩ အလးတၭး လၧဆၧအခိးအတၩအကၠီၩ့နီၪ ဖီၪ့ခၧၫ့အ လးဆီၩ့ဆီလီၫ.
29 ဖိၪၥၪခွၫၥံၪအလၩအဖၩ့နီၪ မွဲအဂဲးအဘၭး ဒဲၦၥၭ ၡါၥံၪအဆၧဎံၫဆၧလၩနီၪ မွဲအခိၪဘွၩလီၫ.
30 ဆၧထးဝ့ၫအဖၧၩ့လးနီၪ မွဲဆၧမၩဆံၫ့လၧၦလတီၩ လလီၩ့ဘၪအဂးတၭး မွဲဆၧဒိၪဝ့ၫထီၩ့လၩ့ လၧဂူၭဖိၫ့ ဖၧၩ့လီၫ.