15
1 ဆၧချဲၩ့ဆၧၫ့ဖူၬလူၭနီၪဘိၭကၠၪခွံၬဆၧၥၭထၪ့း အ့ၪ မွဲဆၧချဲၩ့ဆီၪ့နီၪ ထိၪဂဲၩဆၧၥၭထၪ့လီၫ.
2 ၦကိၪ့ဆၧၥ့ၪအဖျ့ၩနီၪလီၩဖျီၪထၪ့ ဆၧၥ့ၪယၫအဂ့ၩ အဘၪး အ့ၪမွဲၦအဂီၩ့အနိၭနီၪ လူၫလၩ့ခွံၬဆၧအဂီၩ့ လီၫ.
3 ယဟိဝၩအမ့ၬၥၪၥံၪ အီၪလၧအလးကိၭစီၪ့ဒ့ၭတၭ, ယိဝ့ၫဆၧအၧၩ့ဒဲဆၧဂ့ၩလီၫ.
4 ၦအဖျ့ၩလၧအမၩမုၬထၪ့ဆၧနီၪ မွဲဆၧမၧၫ့အၥံၪ့လ ထံၭး အ့ၪမွဲဆၧအၪ့လီၫအီၪဝ့ၫ လၧအဖၧၩ့နီၪ မွဲဖၧၩ့ လးလၧၥၭဖၧၩ့လီၫ.
5 ၦအဂီၩ့မၩကြၩ့ထမး အဖါအဆၧအၪ့ၥီၪ့း အ့ၪမွဲၦ လၧအထိးဆၧၫ့ဆၧအၪ့ၥီၪ့နီၪ, ကိၪ့ဆၧၥ့ၪလီၫ.
6 လၧၦတီၩၦလီၩ့အဂံၪ့ဖၧၩ့နီၪ, ဆၧလူဒိၪဎွ့ၩဒိၪအီၪ ဝ့ၫအၪအၪလ့ၬ, အ့ၪမွဲလၧၦလတီၩလလီၩ့ဘၪအဆၧ အၪထၪ့အဖၧၩ့နီၪ, ဆၧခိဆၧဝီၩအီၪဝ့ၫလီၫ.
7 ၦကိၪ့ၥ့ၪအနိၭဖျံၩၥံၪဎွံၪဆၧၥ့ၪယၫတၭး ၦအဂီၩ့ၥံၪ အၥၭမွဲဘဲၫနီၪၥိၭအ့ၬၬ
8 ၦလတီၩလလီၩ့ဘၪအဆၧလုနီၪ, မွဲဆၧၥၭလိၪလၧ ယဟိဝၩအမ့ၬယၫး အ့ၪမွဲၦအၥၭဆုးလီၩ့ အဆၧဘၩ ဆိၪဖၪနီၪ မွဲဆၧဘၪအၥၭလီၫ.
9 ၦလတီၩလလီၩ့ဘၪအဖၧၩ့ၥၭနီၪ, မွဲဆၧၥၭလိၪလၧ ယဟိဝၩအမ့ၬယၫး အ့ၪမွဲၦလၧအလီၩ့ ဆၧတီၩဆၧ လီၩ့အဖၧၩ့ၥၭလဂၩနီၪ, အဲၪဝ့ၫလီၫ.
10 ၦလၧအစဲၪ့ဒၪခွံၬဖၧၩ့ၥၭနီၪ အီၪလၧဆၧအၪ့ၥီၪ့ဝ့ၫ နၭမၬတၭ, ၦလၧအၥၭဂဲၫ့ဆၧအၪ့ၥီၪ့နီၪ မိၥံၫဝ့ၫဒၪလီၫ.
11 ဖျႃဖၧၩ့ဒဲဆၧဂၭဂီၩ့အလး အီၪလၧယဟိဝၩအမ့ၬ ယၫတၭး ၦၡၩအဖိၪၥံၪအၥၭလဖၪနီၪ မွဲအအၪနဲၪ့ဒံၭ အနီၪဆံၭအၪလဲၪၬ
12 ၦဒုၪဒွ့ၪဆၧနီၪ အဲၪၦလၧအအၪ့ၥီၪ့အဝ့ၫဆ့အ့ၬး တၭမိလ့ၩဘၪအၥၭ လၧၦကိၪ့ဆၧၥ့ၪအအီၪနီၪနးဆံၭ အ့ၬ.
13 ၦၥုၪ့ထိၬၥၭထိၬနီၪ မၩဎွံၫထၪ့ၦမ့ၬး အ့ၪမွဲလၧဆၧ ၥုၪ့အုၭၥၭအုၭအကၠီၩ့နီၪ, မၩၥုၪ့ခါၥၭလၩ့ၦၥၭလီၫ.
14 ၦၥုၪ့ဖၭၥၭဖၭအၪ့ဎူၫအၪ့ဎၬ ဆၧၥ့ၪယၫတၭး အ့ၪမွဲၦ အဂီၩ့အနိၭနီၪ အၪ့ဝ့ၫလၧဆၧအဂီၩ့လီၫ.
15 ၦၡၪ့ဖိၪယၬဖိၪအမုနံၩမုနၩၥံၪ ထီးအလူၬနီၪမွဲဆၧ အၧၩ့း အ့ၪမွဲၦအၥၭဎွံၫနီၪ မွဲဆၧဘိၪ့ထံၪဎးဘီၩ့ဎးလီၫ.
16 ဆၧလဆံၭဖိၪ အီၪဎုၬလၧဆၧၥၭမဲၪယဟိဝၩနီၪ,မွဲ ဆၧဂ့ၩနဲၪ့ဆၧလူဒိၪဎွ့ၩဒိၪဖၭဒိၪ လၧအအီၪဎုၬလၧ ဆၧခိဆၧဝီၩလီၫ.
17 ၦအီၪလၧဆၧအဲၪ အၪ့ဘၪန့ၫဆၧဒိၭဆၧလၪၥံၪနီၪ, မွဲအဂ့ၩနဲၪ့ ၦအီၪလၧဆၧၥုၪ့ထၪ့ၥၭဂဲၫ့ အၪ့ဘၪချီဖၫ ဘီၪ့လဒုၩလီၫ.
18 ၦလၧအၥၭထၪ့ယီၫလဂၩနီၪ ထိၪဂဲၩဆၧအဲၪ့လိၬ ဆိၭချဲၩ့ အ့ၪမွဲၦလၧအၥၭထၪ့ကၪလဂၩ ဒုၭလၩ့ဖံၬခွံၬ ဆၧအဲၪ့လိၬဆိၭချဲၩ့လီၫ.
19 ၦကၠႃၪ့အဖၧၩ့ၥၭနီၪ မၩအၥၭဘဲၫဆၧဆူၪထနါ,အ့ၪ မွဲၦအၥၭဆုးလီၩ့အဖၧၩ့ၥၭနီၪ မွဲဖၧၩ့ၥၭမုလီၫ.
20 ဖိၪခွၫအီၪလၧဆၧကိၪ့ၥ့ၪနီၪ ဒုၭၥုၪ့ထိၬၥၭထိၬအဖါ, အ့ၪမွဲၦအဂီၩ့လဂၩ မၩကြၩ့ထမးအမိလီၫ.
21 ဆၧအဂီၩ့နီၪမွဲဆၧၥုၪ့ဎွံၫၥၭယီၫ လၧၦလၧအဆၧ ကိၪ့ဘၪကိၪ့ၥ့ၪလအီၪဘၪအမ့ၬယၫး အ့ၪမွဲၦအၥုၪ့ဖၭ ၥၭဖၭလဂၩ လ့ၩဝ့ၫလီၩ့ထ့ၬဒ့ၭလီၫ.
22 ဆၧကိၪ့လိၬအၥၭ အ့ၪလအီၪဘၪတၭ, ဆၧလၧၦ ကၩ့ကၩဝဲၩဝ့ၫနီၪ, ကဲၪထၪ့ဝ့ၫဒၪအ့ၬး အ့ၪမွဲလၧၦဒုၭ ကိၪ့ဆၧအၪဂၩအကၠီၩ့, ဆၧလဖၪနီၪမိကဲၪထၪ့ဝ့ၫလီၫ.
23 ၦလဂၩအီၪလၧဆၧၥုၪ့ဎွံၫၥၭယီၫ လၧအချဲၩ့ဆၧၫ့ ဆၧလၧအနိၭအကၠီၩ့တၭ, ဆၧချဲၩ့လထံၪလၧအဆၧၫ့ အထီဘၪဝ့ၫနီၪ မွဲဆၧဂ့ၩဆံၭဒိၪလဲၪၬ
24 လၧၦကိၪ့ဆၧၥ့ၪအဂးနီၪ, ဆၧမၧၫ့အဖၧၩ့ၥၭဖိးလၧ ထၭလခီၫး ဘဲၫၥိၭအမိကၠၪခွံၬအၥၭ လၧဖျႃဖၧၩ့အီၪ လၧလၬလခီၫနီၪလီၫ.
25 ၦအီၪက့ၪထၪ့ထီၫအၥၭအဂံၪ့နီၪ, ယဟိဝၩမိမၩဂၭ ဂီၩ့ခွံၬဝ့ၫး အ့ၪမွဲၦမုၪမဲၫအခးဆၧၫ့နီၪ, အဝ့ၫမိမၩဂုး ထၪ့ခၧၫ့ထၪ့ဝ့ၫလီၫ.
26 ဆၧကိၪ့ထၪ့ဖၭလၩ့အအၧၩ့လဖၪနီၪ, မွဲဆၧၥၭလိၪ လၧယဟိဝၩအမ့ၬယၫး အ့ၪမွဲဆၧအခိးအတၩအဆၧ ချဲၩ့ၥံၪနီၪ, မွဲဆၧဆံၫ့ဎံၪလီၫ.
27 ၦလၧအၥၭလိဖၭလဂၩနီၪ, မၩခိမၩဝီၩအဂံၪ့ဖိၪဒၪ ဝ့ၫး အ့ၪမွဲၦလၧအမ့ၬလဲၩၥၭဂဲၫ့ လၬဆီၪ့ၥံၪ မိမၧၫ့ဝ့ၫ လီၫ.
28 ၦတီၩၦလီၩ့အၥၭနီၪ ဆီၫ့မီၪ့ဆၧဘဲၫၥိၭအချဲၩ့ဆၧၫ့ ဆၧမိၥ့ၪး အ့ၪမွဲၦလတီၩလလီၩ့ဘၪအနိၭနီၪ လူၫလၩ့ ခွံၬဆၧအၧၩ့လဖၪလီၫ.
29 ယဟိဝၩအီၪယဲၩ့ လၧၦလတီၩလလီၩ့ဘၪနီၪးအ့ၪ မွဲၦတီၩၦလီၩ့ အဆၧဘၩဆိၪဖၪ, အဝ့ၫဒၪမိခိၭနၪဝ့ၫ လီၫ.
30 ၦမ့ၬၥၪၥံၪအဆၧဖၩ့နီၪ မၩဎွံၫထၪ့ၦၥုၪ့ၦၥၭး ဒဲဆၧ ပရၧၫ့အဂ့ၩနီၪ မၩဘီၪ့ထၪ့ၦဎွံၪၥံၪလီၫ.
31 ၦအနါလၧအခိၭနၪ ဆၧမၧၫ့အဆၧအၪ့ၥီၪ့ဝ့ၫနီၪ,မိ အီၪဂုးခၧၫ့ လၧၦကိၪ့ဆၧၥ့ၪလဖၪအကျၩလီၫ.
32 ၦလၧအခွံၬၡိၭဆၧအၪ့ၥီၪ့နီၪ မၩကြၩ့ထမးအၥၭဒၪ ဝ့ၫး အ့ၪမွဲၦလၧအခိၭနၪဆၧအၪ့ၥီၪ့နီၪ န့ဘၪအၥုၪ့ဖၭ အၥၭဖၭလီၫ.
33 ဆၧၥၭမဲၪယဟိဝၩနီၪ မွဲဆၧၥီၪ့ဆၧၥၫ့လၧဆၧကိၪ့ ဘၪကိၪ့ၥ့ၪအဖၧၩ့း ဒဲဆၧဆၪ့လၩ့ၥၭနီၪ အီၪဆိၫနဲၪ့ ဆၧလၩဆၧဖၩ့လီၫ.