14
1 ကယဲၦမုၪကိၪ့ဆၧၥ့ၪလဂၩလါလါနီၪ, မၩထၪ့အ ဂံၪ့း အ့ၪမွဲၦမုၪအဂီၩ့နီၪ ရိလၩ့ခွံၬဝ့ၫ လၧအစူၪဒၪဝ့ၫ လီၫ.
2 ၦလၧအလ့ၩဆၧလၧဆၧဆုးလီၩ့အဖၧၩ့ၥၭနီၪ, မွဲၦ လၧအၥၭမဲၪယဟိဝၩး အ့ၪမွဲၦလၧအဘိၭကဲၪ့အဖၧၩ့ ၥၭလဖၪနီၪ, ဒူၩယၪ့အဝ့ၫဒၪအ့ၬ.
3 လၧၦအဂီၩ့အနိၭဖၧၩ့နီၪ, ဆၧအီၪက့ၪထၪ့ထီၫအ ၥၭအနိၪထးအီၪဝ့ၫး အ့ၪမွဲၦကိၪ့ဆၧၥ့ၪအနိၭဖျံၩနီၪ, ယိထဲၩ့ခွါထဲၩ့အနၫ့ဆါၥံၪလီၫ.
4 ထီးဒၪအလး လၧချီဖၫလအီၪဘၪနီၪ, တၩ့ခူၬအီၪ ခီၫဝ့ၫး အ့ၪမွဲလၧချီဖၫအဂဲးအဘၭအကၠီၩ့ဆၧအၪထၪ့ ဝ့ၫအၪအၪလ့ၬလီၫ.
5 ၦထိးအၥၭအလူတီၩနီၪ, မိချဲၩ့ဘျံၭချဲၩ့ဘျၪအ့ၬး အ့ၪမွဲၦလၧအၥၪထၪ့ဆၧလတီၩဘၪနီၪ, မွဲၦထိးအၥၭ အဘျံၭအဘျၪလီၫ.
6 ၦဒုၪဒွ့ၪဆၧလဂၩနီၪ, အၪ့ဎူၫအၪ့ဎၬလါနၫ့ဆၧကိၪ့ ၥ့ၪတၭ, ဒၪဘၪဝ့ၫအ့ၬး အ့ၪမွဲလၧၦၥုၪ့ဖၭၥၭဖၭအဂး နီၪ, ဆၧၥ့ၪယၫအီၪယီၫလီၫ.
7 ထီးနအ့ၪဒၪဘၪလၧၦအဂီၩ့လဂၩ လအီၪဘၪလၧ ဆၧၥ့ၪယၫအနိၭဖျံၩနီၪ, စဲၪ့ထၪ့ခွံၬလၧအအီၪဘီၪ.
8 ၦၥ့ၪယၫ ထီးလၩ့အၥၭဂ့ၩ အဆၧကိၪ့ဘၪ ကိၪ့ၥ့ၪ နီၪ, မွဲလၧအနၪၥ့ၪအဖၧၩ့ၥၭအဂဲးအကၠီၪ့း အ့ၪမွဲၦအ ဂီၩ့အဆၧဂီၩ့နီၪ, မွဲဆၧအၪ့လီၫလီၫ.
9 ၦအဂီၩ့ၥံၪမၩကြၩ့ထမးဆၧလၧ ဆၧဒဲၩဘၭအကၠီၩ့း အ့ၪမွဲလၧၦမၩဆုးလီၩ့အၥၭၥံၪအကျၩနီၪ, ဆၧအခိး အတၩအီၪဝ့ၫလီၫ.
10 ၦၡၩအၥၭနီၪၥ့ၪယၫအဆၧခၪဒၪဝ့ၫတၭး ၦလခီၫဘၩ့ မုးဖိၪနီၪ, မၩထံၬထၬအဝ့ၫလၧအဆၧၥၭထိၬဆ့အ့ၬ.
11 ၦအၧၩ့အဂံၪ့နီၪ မိဘၪဆၧဂၭဂီၩ့း အ့ၪမွဲၦအတီၩ အီၪဝ့ၫအလးနီၪ, မိဘီၪထၪ့ယီၫထၪ့ဝ့ၫဒၪလီၫ.
12 ဖၧၩ့ၥၭလီၩ့ဝ့ၫ လၧၦၡၩအမ့ၬယၫလါနၫ့တၭ, အ ထုၬနီၪ, မွဲဆၧၥံၫအဖၧၩ့ၥၭလီၫ.
13 လၧၦနံဝ့ၫအဘိၩ့ဘၭဒၪလ့ၬနီၪး ၥၭဘၪဆၧၥုၪ့အုၭ ၥၭအုၭလခီၫ, ဒဲလၧဆၧမၩမုၬ မၩလၩအၥၭနီၪ, အ ထုၬမွဲဆၧၥၭဎၧၫ့လီၫ.
14 ၦလၧအဂုၩ့ထဲၩ့အၥၭလဂၩနီၪ, မိလၧၫ့ထၪ့ဎွ့ၩထၪ့ လၧအဖၧၩ့ၥၭဒၪဝ့ၫး ဒဲၦအဂ့ၩလဂၩနီၪ, မိမံၫ့ၥုၪ့မံၫ့ ၥၭလၧအနၫ့ဆါဒၪဝ့ၫ အဖၧၩ့ဆ့လီၫ.
15 ၦလၧအလမၩလိၪဘၪဆၧနီၪ, နဲၩဆၧကိၭအမံၩ့ဒ့ၭး အ့ၪမွဲၦၥ့ၪယၫထီးလၩ့အၥၭဂ့ၩလဂၩနီၪ, ယိဆီၫ့မီၪ့ အခၫထၪ့ဆၧအဂဲးအကၠီၪ့လီၫ.
16 ၦကိၪ့ဆၧၥ့ၪလဂၩၥၭမဲၪဆၧတၭ, ကၠၪခွံၬအၥၭလၧ ဆၧအၧၩ့း အ့ၪမွဲၦအဂီၩ့ မၩဖိၫအၥၭတၭ, မၩဒူၩအ ၥၭလီၫ.
17 ၦလၧအၥၭထၪ့ချဲၫ့နီၪ မၩဆၧဘဲၫၦအဂီၩ့အၥိၭး အ့ၪမွဲၦလၧအကိၪ့ ဆၧအၧၩ့လဖၪနီၪ ဘၪဆၧမ့ၬလဲၩ ၥၭဂဲၫ့ဝ့ၫလီၫ.
18 ၦလၧအလမၩလိၪဘၪဆၧနီၪ, န့ၥၫဆၧအဂီၩ့း အ့ၪ မွဲၦၥ့ၪယၫထီးလၩ့အၥၭဂ့ၩနီၪ, ချႃၬဘၪဆၧၥ့ၪယၫ အၥရဖူၩလီၫ.
19 ၦအအၧၩ့ၥံၪၡီၫ့လၩ့အၥၭ လၧၦအဂ့ၩအမ့ၬယၫး ဒဲၦလတီၩလလီၩ့ဘၪ လၧၦတီၩၦလီၩ့အတရၫ့ထံၭနီၪ လီၫ.
20 ၦၡၪ့ဖိၪယၬဖိၪနီၪဘၪဆၧမ့ၬလဲၩဝ့ၫ လၧအထံၩအ ၥိၭဒၪလ့ၬး အ့ၪမွဲၦလၧအအဲၪၦၥထံၫၥံၪ, အီၪဝ့ၫအၪ ဂၩလီၫ.
21 ၦလၧအမၩကြၩ့ထမးအထံၩအၥိၭနီၪ မၩမၪဆၧး အ့ၪမွဲၦလၧအယၫ့ၥၭၦၡၪ့ဖိၪယၬဖိၪနီၪ, အီၪရှူၪအီၪ မုၬဝ့ၫလီၫ.
22 ၦလၧအကိၪ့ဆၧအၧၩ့ဆၧၥၫ့နီၪ, မၩမၪဘၪဆၧ, မွဲ အ့ၬဧၪး အ့ၪမွဲၦကိၪ့ဆၧဂ့ၩနီၪ, အီၪလၧဆၧအခိးအ တၩဒဲဆၧမွဲဆၧတီၩလီၫ.
23 လၧဆၧဖံၭဆၧမၩ ထီးအလူၬအဖၧၩ့နီၪ, အီၪလၧ ဆၧန့ကၩဝ့ၫတၭး အ့ၪမွဲနိၭဖျံၩအဆၧချဲၩ့လဖၪနီၪဘၪ ဆဲၫ့န့ၫဆၧၡၪ့ဆၧယၬလီၫ.
24 ၦကိၪ့ၥ့ၪအၥရဖူၩနီၪ, မွဲအဝ့ၫၥံၪအဆၧလူဒိၪဎွ့ၩ ဒိၪး အ့ၪမွဲၦအဂီၩ့အဆၧဂီၩ့နီၪ, မွဲန့ၫဆၧဂီၩ့လီၫ.
25 ၦထိးအၥၭလၧအလူတီၩနီၪ, မၩဖီၩ့မၩဖျ့ၭၦၥၭမၧၫ့ လဖၪး အ့ၪမွဲၦအၪ့လီၫဆၧနီၪ ချဲၩ့ဘျံၭချဲၩ့ဘျၪဆၧလီၫ.
26 ဆၧဒိၭနဲၩ့အၥၭအလးဂုးခၧၫ့ အီၪဝ့ၫလၧဆၧၥၭမဲၪ ယဟိဝၩအဖၧၩ့တၭး အဖိၪအလံၩၥံၪ အီၪလၧဆၧဖ လ့ၬအၥၭအလးလီၫ.
27 ဆၧၥၭမဲၪယဟိဝၩနီၪ, မွဲဆၧမၧၫ့အထံၫဖၧၩ့, ဘဲၫ ၥိၭၦမိဂၭဎ့ၭခွံၬဆၧၥံၫအဖျံၩခွၩ့နီၪလီၫ.
28 လၧၦခမျၧးၥံၪအီၪအၪအၪလ့ၬအကၠီၩ့နီၪ, စဎွၩလ ဖၪအီၪလၧအလၩအဖၩ့တၭး လၧၦခမျၧးလအီၪဘၪ အကၠီၩ့နီၪ, ၦဒိၪဖၭဒိၪၥံၪဘၪဆၧဂၭဂီၩ့ဝ့ၫလီၫ.
29 ၦလၧအၥၭထၪ့ကၪလဂၩနီၪ အီၪလၧအၥုၪ့ဖၭအ ၥၭဖၭဖၭဒိၪး အ့ၪမွဲၦလဂၩ လၧအၥၭထၪ့ချဲၫ့နီၪဒုၭ ဖျီၪထၪ့ဆၧအဂီၩ့လီၫ.
30 ၦမိၡါအဆၧမၧၫ့နီၪ, မွဲလၧအၥၭအီၪဂုးဖုးတၭး အ့ၪမွဲဆၧၥၭခ့ၬ မွဲဆၧအုၪဆၧကျၪလၧဎွံၪၥံၪအကျၩ နီၪလီၫ.
31 ၦလၧအမၩအၧၩ့ၦၡၪ့ဖိၪယၬဖိၪနီၪ, မၩကြၩ့ထမး ၦလၧအတဲၩ့လၩ့အဝ့ၫလဂၩး အ့ၪမွဲၦလၧအဒူၩယၪ့ အဝ့ၫနီၪ, မွဲၦယၫ့ၥုၪ့ယၫ့ၥၭ ၦၡၪ့ဖိၪယၬဖိၪၥံၪလီၫ.
32 ၦလတီၩလလီၩ့ဘၪအီၪဝ့ၫ လၧအဆၧအၧၩ့ဆၧၥၫ့ အဖၧၩ့နီၪ, ဘၪဆၧနၫ့ထၪ့ခွံၬဝ့ၫး အ့ၪမွဲၦအတီၩအ လီၩ့လၧအဆၧၥံၫအခၫနီၪ အီၪလၧဆၧဒိၭနဲၩ့အၥၭအ လးလီၫ.
33 ဆၧကိၪ့ဘၪကိၪ့ၥ့ၪအီၪဂုးခၧၫ့ လၧၦၥုၪ့ဖၭၥၭဖၭအ ၥၭခံဖၧၩ့း အ့ၪမွဲလၧၦအဂီၩ့အဖၧၩ့နီၪ, ဆၧဘၪနဲၪလိၪ ဝ့ၫလီၫ.
34 ဆၧတီၩဆၧလီၩ့နီၪ ဒုၭထီၫထၪ့ၦခမျၧးၥံၪး အ့ၪမွဲ ဆၧဒဲၩဘၭနီၪ, မွဲဆၧဒုၪဒွ့ၪလၧၦဆၨၩၥံၪအဂးလီၫ.
35 အဎီးအၡၩ လၧအအီၪလၧဆၧကိၪ့ၥ့ၪနီၪ, န့ဘၪစ ဎွၩအခိးအတၩး အ့ၪမွဲၦအအၧၩ့လဂၩနီၪ ထိးဘၪအ ဆၧၥၭထၪ့လီၫ.