33
1 တၭအယီၩမွဲဆၧဆိၪဂ့ၩ လၧယွၩအၡၩစမိစ့ၭ,လၧ အလချႃၭ ၥံၫဒံၭဘၪဆိၪဂ့ၩ ၦအံၫစရ့လၭဖိၪနီၪလီၫ. တၭစံၭဝ့ၫဒၪ,
2 ယဟိဝၩဂဲၫထၪ့လၧစဲနၫ, ဒဲဂဲထုၪ့ဝ့ၫလၧစံအၫ, ဖၩ့ထၪ့ဝ့ၫလၧခိၪလီၩ့ပၫရၫ့, ဒဲဂဲၫဝ့ၫလၧအၡၩဆံၫ့ဎံၪအလၬၥံၪ, လၧအစူၪထွ့ၪနီၪ, ဆၧမၪလူၬမ့ၪလၧအဂးလီၫ.
3 မွဲမၬ, အဲၪအၡၩခမျၧးၥံၪ, အၡၩဆံၫ့ဎံၪထီးအလူၬအီၪလၧနစူၪဖၧၩ့, တၭအဝ့ၫၥံၪဆၧၫ့နၩ့လၧနခၪ့ထံၭ, မိထီးန့နလူနထၫလီၫ.
4 တၭစမိစ့ၭမၪလူၬန့ပၧၩလၧဆၧၥီၪ့ဆၧၥၫ့, မွဲစယၫကူၭအဆၧအီၪကီၪ့အဆၧန့ၥၫ,
5 တၭလၧၦခမျၧးအခိၪလဖၪအီၪကီၪ့, အံၫစရ့လၭအဒီၪ့လဖၪအီၪစီၪ့ဎးနီၪ, အဝ့ၫဒၪမွဲစဎွၩလၧယ့ၭၡရၧၫ့လီၫ.
6 မွဲစရုဘံၫ့မၧၫ့ဆံၭ, မွဲအထီးၥံၫလဂ့ၩ. ဒဲအၡၩနီၪမွဲအအီၪၡၩခိၬဂၩလဂ့ၩ.
7 တၭအယီၩမွဲလၧစယုဒၫအဂဲးအကၠီၪ့, ဒဲအစံၭဝ့ၫ ဒၪ, ယဟိဝၩဧ့, ခိၭနၪစယုဒၫအလူ, ဒဲဒုၭလ့ၩနုၬဝ့ၫလၧအၡၩခမျၧးအကျၩဆံၭ. မွဲအစူၪလဖၪလၧၫ့လၧအဂးဆံၭ. တၭကဲၪထၪ့နဝ့ၫ ဆၧမၩဆၧၩ့ဝ့ၫ လၧအဒုၪအဒၩအ ကၠီၩ့နီၪဆံၭ.
8 တၭလၧစလံဝဲၫအဂဲးအကၠီၪ့အဝ့ၫနီၪစံၭဝ့ၫဒၪ, မွဲနၥုၪ့မံၫ့ဒဲနယုရံၫ့အီၪလၧနၡၩဆံၫ့ဎံၪလဂၩ, လၧနဖစီၩ့မၩခွါလၧမၭစၫ, လၧနမၩခွါဝ့ၫထီးထံၫမ့ရဘၫ,
9 လၧအစံၭအမိအဖါ, ယလဒၪဘၪဝ့ၫ, တၭလအီၪက့ၪၥ့ၪယၫ အၥၭ လၧအထၧၫ့ဖုဝဲလဖၪ, တၭၥ့ၪယၫအဖိၪဒၪဝ့ၫအ့ၬး အဂဲးဘဲၫယီၩအဝ့ၫၥံၪထီးန့နလူနထၫ, ဒဲယိထဲၩ့နဆၧအုၩ့လၩ့လီၫ.
10 အဝ့ၫၥံၪမိၥီၪ့လိၪစယၫကူၭလၧနဆၧစ့ၩရၫ့လဖၪ, ဒဲအံၫစရ့လၭလၧနဆၧၥီၪ့ဆၧၥၫ့, အဝ့ၫၥံၪမိအီၪက့ၪလၩ့ဆၧဆူၭခဲၩနၧၫ့မၧၫ့လၧနမ့ၬယၫ, ဒဲနဆၧလုမ့ၪထၧၫ့ဒုၩယၫလၧနဆၧလုလးအဖၫ့ခိၪ,
11 ယဟိဝၩဧ့, ဆၧဆိၪဂ့ၩအဆၧဖိၪဆၧလံၩ, ဒဲအမၩဆၧလၧအစူၪနီၪ, မွဲအဘၪနၥၭဆံၭ. ၦလၧအဂဲထုၪ့ထၫ့ဒုၩဒၩဝ့ၫ, ဖ့ၬဖျီၫ့အယးဒံၩ့ဆံၭ, ဒဲၦလၧအၥၭဂဲၫဝ့ၫ, ဘဲၫၥိၭအထီးဂဲထုၪ့ထဲၩ့လဂ့ၩ.
12 တၭလၧစဘံၪ့ယမံၫ့အဂဲးအကၠီၪ့, အဝ့ၫနီၪစံၭဝ့ၫဒၪ, ၦလၧယဟိဝၩအဲၪဝ့ၫမိအီၪလၧအနဲၩ့ထံၭအီၪဂုးခၧၫ့, မိယိထဲၩ့ဝ့ၫၥံၫ့နံၩချီၩ့, တၭမိအီၪဝ့ၫလၧအခိၬထံၭခိၪအဆူၭဖၧၩ့လီၫ.
13 တၭလၧစယိၥၭအဂဲးအကၠီၪ့း အဝ့ၫနီၪစံၭဝ့ၫဒၪ, မွဲယဟိဝၩဆိၪဂ့ၩအထံၫအခးဆံၭ. လၧမူၭခိၪအဆၧလူဒိၪဎွ့ၩဒိၪ, လၧဆၩ့ထံၫ, တၭလၧဆၧယိၬဖၧၩ့လၧအခိၬလၩ့လၧလၬလခီၫ,
14 တၭလၧဆၧလူဒိၪဎွ့ၩဒိၪလၧမုဒုၭဂဲၫၥၪထၪ့, တၭလၧဆၧလူဒိၪဎွ့ၩဒိၪလၧလၩဒုၭဂဲၫၥၪထၪ့,
15 တၭလၧခိၪလီၩ့ထိၩ့ချိၬ လၧဖျိၩ့အဆၧအခိၪလဖၪ တၭလၧဆၧစီၩ့ခိၪ အဆိၩအကၠၪ အဆၧလူဒိၪဎွ့ၩဒိၪ,
16 လၧဂၪ့ခိၪအဆၧလူဒိၪဎွ့ၩဒိၪ, ဒဲအဆၧဎွ့ၩ, တၭလၧဆၧဘၪ ၦအၥၭလၧအအီၪ လၧဆၧၡိၬကျၩ, မွဲအဂဲၫဘၪစယိၥၭအခိၪ, လၧအထၧၫ့ဖုဝဲအၦဒိၪဖၭဒိၪအခိၪဒၩ့ခိၪဆံၭ.
17 အချီဖၫဝဲၡါနီၪ မွဲအကယးကဖး, အနိၩ့နီၪမွဲဘဲၫဆၧဒိၪအနိၩ့အၥိၭ, မိဘျႃၪ့ထၪ့ၦခမျၧးလစီၪ့ဎးလၧအဝ့ၫၥံၪ, ဖိးလၧဂၪ့ခိၪအထုၬလီၫ. အဝ့ၫၥံၪနီၪမွဲစအံဖြံၫ့အၡၩအလၬလဖၪ, တၭအဝ့ၫၥံၪနီၪမွဲစမနၭစ့ၫအထီၫ့လဖၪနီၪလီၫ.
18 တၭလၧစဇ့ၭဘလၧၫ့ အဂဲးအကၠီၪ့, အဝ့ၫနီၪစံၭဝ့ၫ ဒၪ, ၥၭထိၬ, ဇ့ၭဘလၧၫ့ဧ့, လၧနလ့ၩထၪ့ဆၧ, ဒဲစအံစခၫဧ့, လၧနတဲၩဖၧၩ့နီၪဆံၭ.
19 အဝ့ၫၥံၪမိကိၭန့ၦခမျၧးလၧခိၪလီၩ့လဖျိၪ့နီၪ, ထီးနီၪမိလုထၪ့ဆၧတီၩအဆၧလုလဖၪ, အဂဲးဘဲၫယီၩမိအၪ့ဆူၭထၪ့မၫဆမံၭအဆၧလၧၫ့ဎွ့ၩ, ဒဲဆၧလူဒိၪအီၪၥူၪလၧမ့ၭကျၩလီၫ.
20 တၭလၧစဂၭအဂဲးအကၠီၪ့, အဝ့ၫနီၪစံၭဝ့ၫဒၪ, ၦလၧအမၩလဲထၪ့စဂၭမွဲအဘၪဆၧဆိၪဂ့ၩဆံၭ. အီၪဝ့ၫဘဲၫဆၬလၥၧၫ့မိအၥိၭ, တၭအဲၪ့ၡၫ့ဆၧအစူၪဒဲအခိၪဒၩ့လီၫ.
21 တၭဒၪဘၪဆၧအခိၪအဂ့ၩထုၬလၧအဂးဒၪဝ့ၫ, အဂဲးဘဲၫယီၩထီးနီၪဆၧအဂးလၧၦမၪလူၬဝ့ၫနီၪအီၪ ဂုးခၧၫ့, တၭဂဲၫလၧၦခမျၧးအခိၪလဖၪ, မၩဝ့ၫလၧယဟိဝၩဆၧတီၩဆၧလီၩ့, ဒဲအဆၧစ့ၩရၫ့လၧအံၫစရ့လၭလီၫ.
22 တၭစဒၫ့အဂဲးအကၠီၪ့ အဝ့ၫနီၪစံၭဝ့ၫဒၪ, စဒၫ့မွဲဆၬလၥၧၫ့အဖိၪလဒုၩ, အဝ့ၫဒၪမိစဲၪ့ဝ့ၫလၧဘၫၡၫ့လီၫ.
23 တၭလၧစနၭၥလဲၫအဂဲးအကၠီၪ့, အဝ့ၫနီၪစံၭဝ့ၫဒၪ, စနၭၥလဲၫဧ့, ဘၪဆၧအၥၭနီၪနန့ဘျဲၩန့, တၭနဎွ့ၩလၧယဟိဝၩအဆၧဆိၪဂ့ၩနီၪ, မၩန့ဝ့ၫလၧမုနုၬဒဲလၧမုခံၫ့လခီၫနီၪဆံၭ.
24 တၭလၧစအၭၡၧၫ အဂဲးအကၠီၪ့, အဝ့ၫနီၪစံၭဝ့ၫဒၪ, မွဲစအၭၡၧၫဘၪဆၧဆိၪဂ့ၩလၧဖိၪၥၪလဖၪဆံၭး မွဲအဘၪအထၧၫ့ဖုဝဲအၥၭ, မွဲအဘၧၩ့လၩ့အခၪ့လၧၥိၪဖၧၩ့ဆံၭ.
25 နခၪ့ဖံၭနီၪမွဲထၭဒဲထီးဝီၩ, တၭဘဲၫနမုနံၩလဖၪအၥိၭနီၪနဂဲးနဘၭမိအီၪလီၫ.
26 တၭဘဲၫယ့ၭၡရၧၫ့အယွၩအၥိၭလအီၪဘၪ, ၦထူၬမူၭခိၪလၧအမိမၩဆၧၩ့နၧၩ, ဒဲအထူၬဆၧအုၪ့လၧအလၩအဖၩ့အဖၧၩ့လီၫ.
27 ယွၩအဆိၩအကၠၪနီၪမွဲနဆၧဖလ့ၬအလး, တၭဆၧအစူၪအဆိၩအကၠၪလဖၪနီၪအီၪလၧနဖၫ့လၬ, တၭအဝ့ၫမိနၫ့ထၪ့ခွံၬ ဆၧအဒုၪအဒၩလၧနမ့ၬယၫ, ဒဲအမိစံၭ, မၩဂၭဂီၩ့အဝ့ၫၥံၪဘီၪ.
28 တၭအံၫစရ့လၭမိအီၪဂုးအီၪခၧၫ့လစီၪ့ဎး, စယၫကူၭအထံၫထၪ့ဖျိၭအဖၧၩ့, လၧထံၫၥံၪခးၥံၪအီၪလၧဘုၪကၠိၩ့, ဒဲစဘံၭထံၫအဖၧၩ့, အမူၭခိၪမိဒုၭလၩ့ဆၩ့ထံၫဆ့လီၫ.
29 အံၫစရ့လၭဧ့, နဘၪဆၧဆိၪဂ့ၩလီၫ. မွဲၦလၩ့ဂၬနၧၩလဂၩလဲၪ, ၦၡၩခမျၧးဧ့, လၧအဘၪဆၧထိးထဲၩ့တၩ့ထဲၩ့ဝ့ၫလၧယဟိဝၩ, ဆၧမၩဆၧၩ့နၧၩအထၩ့ဖံးလဘံၪ့, ဒဲနကယးကဖးအနၭလဘံၪ့, တၭနဒုၪနဒၩၥံၪမိဆၪ့လၩ့ကျဲၩ့မၩလၧနစူၪအဖၫ့လၬ, တၭနမိယဲးဘၪအဝ့ၫၥံၪ အလးထၪ့ထီၫလဖၪနီၪလီၫ.