CHUNGH 52
Mangso dah Soetuon Cho
1 Zau soeu Doeg eh, nvng ma gis cho mha chamus moengs nyeis lah?
Mangso dah wontang cho ka vjangh joq.
2 Nvng gohyuk dyoqbis das cho nghamh toeuq nyeis.
Nah lhyo ka zuk dah uhyuk shamthoh teh hwah cho lhoq thuq nyeis.
3 Nvng gas gis zis thoq lyis ma gis yvlyis,
jyoeng zis thoq lyis hwah das yvlyis zes ngwis. (Selah)
4 Hwah soeu eh, nvng dius jens lyis
nos nhang dang lyis ngwis.
5 Housoeh las Mangso nvng lyis vcaiq vto thyoq tyamp las,
nyang nvng lyis nah yhen mhayah langshe lha dwis nyeis bang mau masyah yoeus tyamp das. (Selah)
6 Dan bang hauh zis lyis nyvng lyis gyuk das;
nyamoq nvng lyis yis zoh lyis taiq zis gas,
7 Mangso lhyi ma khau, nyah zisyos lyis khau las
nyah dah lhung cho mha yombos nyeis soeu lhyi yoeuh geh, ge das.
8 Nghuot laus eq ngos gas Mangso yhen mha yuk dah tsanlun zains teh nghuot.
Ngos Mangso dah mathank magons jyetdap yvmas vcaiq vto loms.
9 Mangso eh, ngos nvng kuot dyei cho lhyi vjangh nhaiqshoqlang sang das;
Nvng gis cho lhyi ngos nah dius jens xikkhonh mas taiq hoeuh das.