CHUNGH 51
Yobos Khyuot Dyei das zis Dung
1 Mangso eh, nah jyetdap sainhnos zis yah ngos lyis nhaiqnyen aq.
Nah kuh thank nhaiqnyen shohgyo zis yah ngos lyi lhyweq cho lhyi buot tyamp dyei aq.
2 Ngah lyi ma chi cho lhyi shank shoq cheih dyei aq.
Ngah yaunos masyah ngos lyis cheihshang kat aq.
3 Ngos ngah lyi lhyweq cho seq toh las,
ngah yaunos ngah xikkhonh mas vjangh joq.
4 Nvng taiq dang dan bas jungh, nah soetuon cho mha yobos huon chank ma bos bas jungh,Ref 51.4: Rom 3.4
ngos nvng lyis kyingh yobos kuot las, nah xikkhonh mas ma gis muh kuot goeus.
5 Yoeuh aq, ngos yaunos mas khoeu los las
ungwes ung masyah yangh yaunos dap.
6 Ungkhau mha dah jyoeng cho lhyi nvng ngwis las
noq thank dah ngah nhaiqlom mas nvng ngos lyis joeui seq nhang aq.
7 Shomnhamh kyang yah nvng ngos lyis cheihshang lha ngos lhoqshang.
Ngos lyis cheih dyei las ngos gyu thoq lyis thyoeu los das.
8 Nvng khyauh tyamp dah shohyau doms tsain gauslaus bas jungh,
gauslaus zis yahge gausyis zis kyoh aq.
9 Ngah yaunos masyah nah nyoqnho shung tyamp las,
ngah lyi ma chi cho dvnganh lyis buot tyamp dyei aq.
10 Mangso eh, ngos mas lhoqshang ehnyet gvnkhanh toh las,
goeng joq dah dyos ngah vkhau mha doms kat dyei aq.
11 Ngos lyis nah xikkhonh masyah vkhat tyamp.
Ngah jyank masyah nah Gyingshang Dyos vyoeus tyamp.
12 Nah khyuot yoeus cho dah gauslaus zis gas ngos lyis doms dyei las,
Mes dah Dyos yah ngos lyis thuk toh aq.
13 Houlhyi lyi lhyweq bang lyis ngos nah cho jyauh las,
yaunos wons bang nah jyank mas thaiq los das.
14 Mangso eh, ngos lyis khyuot yoeus Mangso eh, suih huot yobos masyah ngos lyis lhuiq kat aq.
Hauh uhlyis ngah lhyo nah dan cho lyi kaiq chungh das.
15 Yhensain eh, ngah nhuotkuk haq nhang aq.
Housoeh lyis ngah nhuot nvng lyis chungh das cho taiq kyoh das.
16 Nvng phudyei yvlyis ma ngwis, ma nghuot ya ngos dyei das:
ngheq dyei jyungshuk lyis eq nvng ma gaus.
17 Mangso jyet dah phudyei gas nhaiqngis dah dyos, nhaiqngis las curhen nhaiqlom nghuot.
Mangso eh, nvng hauh yvlyis ma peq tyamp dyei.
18 Nah kang twih ehnyet yah Zion lhyi gis zis kuot dyei aq.
Yerusalem wusciank doms ci toh dyei aq.
19 Housoeh nvng gas dan dah phudyei, ngheq dyei jyungshuk yahge
gungs gonh ngheq dyei jyungshuk lyis nhaiqdoeus.
Nah phon thoq mas nyamoq noeulu phudyei das.