CHUNGH 105
Mangso yahge Nyah Dius
(1Ss 16:8-22)
1 Yhensain lhyi nhaiqshoqlang chungh geh, nyah kuhxing cho lhyi taiq hoeuh geh:
nyang kuot goeus cho, dius nyau jens lyis taiq kyoh geh.
2 Yhensain lhyi chunghthwe kat las chungh geh;
nyang kuot goeus dah mauhphoh cho lhyi taiq geh.
3 Yang gas nyang yah sen lha gausyis geh;
nyang lyis paiq bang dvnganh gauslaus bas jungh.
4 Pangh das xiklyis Yhensain jyank mas loh geh,
nyang lyis vjangh tsoq paiq geh.
5 Nyah jyeidwis Abraham dah vnyau vshih,
Yakop dah lo jens, nyang khyen yoeus toh bang eh,
6 nyang kuot khoq mauh loqmuh, nyah yomsoq muh,
nyang dyei toh soetuon cho lhyi soh geh.
7 Yhensain ka yah Mangso nghuot.
Nyah vmingh gas mungkvn gonh xiklyis nghuot.
8 Nyang nyah thanghchvp lyis vcaiq vto toh,
nyah dangthoengh dius caiq dvkhyoengh goeng nhang das.
9 Houka nyang Abraham yah xamxonh goh toh,Ref 105.9: Vpm 12.7, 17.8, 26.3
Isak lyis dangthoengh toh cho nghuot.
10 Yhensain ka Yakop yah thanghchvp toh,Ref 105.10-11: Vpm 28.13
hauh zis vcaiq vto goeng joq das.
11 Nyang taiq zis gas, Khanan mau ngos nvng lyis dyei das,
hauh zis gas nvng vcaiq vto sain toh das.
12 Mangso dah dius jens gas ma tham,
Khanan mau mas boengh dvlos duot nyeis.
13 Dius nyau dvnyau masyah dvnyau,
munghdan dvkoeuq masyah dvkoeuq dyung yenh.
14 Nghuot laus eq Mangso ka hank yah eq nyamoq lyis ma zaiq nhang,Ref 105.14-15: Vpm 20.3-7
nyamoq lyis gos zis yah hwankti jens lyis zaih nhang.
15 Nyang taiq zis gas, Ngos khyen toh, ngah jyeidwis jens lyis vzangh goh,
ngah lvpe jens lyis vtanh goh, ge.
16 Yhensain ka nyamoq mau mas phanghkhauq khyoq zis yahRef 105.16: Vpm 41.53-57
nyamoq dah zonoms dvnganh yoeus tyamp.
17 Nghuot laus eq nyang nyamoq dah xik pheh dius dvyuk nhang kat.Ref 105.17: Vpm 37.28, 45.5
Houka Yosep jons teh ungh kat zis xauh soeu nghuot.
18 Nyang gas khyei lhyi jvngchoh twih,Ref 105.18-19: Vpm 39.20—40.23
lainzain lyis thyeq yah twih zis xauh.
19 Houka Yhensain dah dang nyang mas kyink lyis jus las
nyang taiq toh dang nyuk los shoq nghuot.
20 Hauh thang lhyi Egutu hwankti ka
nyang lyis phank kat nhang lhaRef 105.20: Vpm 41.14
dius nyau jens dah guon soeu ka nyang lyis lhuiq kat.
21 Hwankti ka nyang lyis nyah vtsuyaq lyis shwih nhang;Ref 105.21: Vpm 41.39-41
mau gonh lyis guon soeu kuot nhang.
22 Housoeh nyang gas hwankti dah muh wons bang thoq mas yomsoq bos;
nyang lyis joeui dyei bang lyis eq taiq shet das toeuh yoh.
23 Hauh thang lhyi Yakop gas Egutu mas e lha,Ref 105.23: Vpm 46.6, 47.11
hauh mau mas nyeis.
24 Yhensain ka nyah dius nyau lyis svsoh jebais los nhang lha,Ref 105.24-25: Dyu 1.7-14
nyamoq dah jeswus jens thoq lyis yom zes bos nhang.
25 Nyang gas Egutu bang nyah dius jens lyis hoeng lha
nyah jyeidwis jens lyis mhuihzo das khyvlyis kuot.
26 Nyang nyah jyeidwis Moshe yahgeRef 105.26: Dyu 3.1—4.17
nyang khyen toh dah Aron lyis nhang kat.
27 Nyah aiq yuk gas Egutu mas Mangso dah yomzains muh yahge
yomsoq muh tsain kuot.
28 Mangso ka hauh mau mas mauchuot cho nhang kat las chuot joq nhang.Ref 105.28: Dyu 10.21-23
Nghuot laus eq Egutu bang nyang tying dang lyis domsyos ma gyo.
29 Housoeh las nyang nyamoq dah jeislvng jens lyis suih bweh nhang lhaRef 105.29: Dyu 7.17-21
nyamoq dah oengdoq lyis sat.
30 Nyamoq mau mas puh los nhang lha,Ref 105.30: Dyu 8.1-6
hwankti yhen mas yangh dyingh joq.
31 Mangso taiq toh goeus ya,Ref 105.31: Dyu 8.16-17, 20-24
dvmau gonh yvngkhungh dyingh joq, dvmau gonh tyop yah dyingh joq.
32 Nyang nyamoq mau mas gyutomp lyis mau soeh wus nhang,Ref 105.32-33: Dyu 9.22-25
maunyoq eq nyik nhang.
33 Nyamoq dah zvbiq nwis yahge maiphang zains lyis bat las
mau gonh dah saiq lyis khyauh tyamp.
34 Nyang taiq toh las,Ref 105.34-35: Dyu 10.12-15
janghgyik ma thoq suon lo shoq los zis yah,
35 mau gonh mas anghphoq zo tyamp,
yos mas jyo eq zo tyamp.
36 Nyang Egutu yhenbang dvnganh dahRef 105.36: Dyu 12.29
37 Hauh thang lhyi nyang Israel jens lyis shwih thuq los;Ref 105.37-38: Dyu 12.33-36
nyamoq ngwis xing yah dvgeh thuq los.
Nyamoq dvnganhmoq yanghzan las yombos.
38 Nyamoq thuq los lyis Egutu bang gaus nyeis:
khasoeh ge lyis, nyamoq hauh bang lyis gyuk.
39 Mangso ka nyah dius jens lyis jyommauh yah lhywa nghop dyei,Ref 105.39: Dyu 13.21-22
nyenh lyis nyamoq bvng zis yoh das nyhenshang nyi tuonh dyei.
40 Nyamoq dung las, nyang mvne nghoq khyoq dyei;Ref 105.40: Dyu 16.2-15
nyamoq lyis maukhung mha dah zonoms yah nhaiqtap nhang.
41 Nyang lukmuh lom phank lyis jeis thuq los lasRef 105.41: Dyu 17.1-7; Gyu 20.2-13
kyuk yvmas jeismuh lvng teh yaus loh.
42 Nyang nyah jyeidwis Abraham lyis taiq toh,
nyah gyingshang dangthoengh lyis soh.
43 Housoeh nyang khyen toh, nyah dius jens lyis shwih thuq los,
nyamoq gas gaus dah chunghthwe kaiq kat.
44 Nyang nyamoq lyis gohtoeu dius jens dah maunyeis dyei.Ref 105.44: Yosh 11.16-23
Gohyuk kuot toh danh lyis yoeus nhang.
45 Houka nyah dius jens gas nyang tyingtoh dang chank las
nyah lyi domsyos gyo bas jungh ge zis nghuot.
Haleluya!