CHUNGH 106
Yhensain dah Dius jens xiklyis Nyah gis Cho
1 Haleluya!Ref 106.1: 1Ss 16.34; 2Ss 5.13, 7.3; Ezr 3.11; Chd 100.5, 107.1, 118.1, 136.1; Yer 33.11
Yhensain ka gis yvmvyah
nyah jyehjuh lyis chungh goh;
nyah jyetdap cho ka vcaiq vto joq.
2 Yhensain dah yomzains muhzoh lyis hank yoh thoq taiq lah?
Nyang lyis hank ma yoh thoq chungh!
3 Nyah dang lyis domsyos gyo las,
vjangh dan khyvlyis kuot bang gas ngelhoq.
4 Yhensain eh, nvng nah dius jens lyis pangh uhlyis ngos lyis soh aq.
Nyamoq lyis khyuot yoeus uhlyis ngos lyis pangh aq.
5 Nvng khyen toh bang dah nyeisgis yaplhoq cho ngos lyis nyvng nhang aq.
Nah dius nyau gausyis yvmas ngos lyis gauslaus nhang aq.
Nvng yah sen bang nvng lyis chungh yvmas ngos yoh bos bas jungh.
6 Ngamoq gas ngamoq phauh thyeih moq teh yaunos kuot goeus.
Ngamoq lhung lha ma gis khyvlyis kuot goeus.
7 Egutu mau mas ngamoq phauh thyeih moq Mangso dah mauh loqmuh lyis ma seqgyo,Ref 106.7: Dyu 14.10-12
nyoshoq lhain nyah jyetdap cho chixoeuq yvlyis nyamoq tohnyhik las
nyamoq gas Thomh Nes mas Yomzains lyis gomloeus tsain toq.
8 Nghuot laus eq, nyah kuhxing yomsoq lyis chixoeuq das xiklyis
nyang dangthoengh toh zis yah dvyhangteh nyang nyamoq lyis khyuot yoeus.
9 Nyang Thomh Nes lyis vmingh dyei lyis hauh zis kanh loh.Ref 106.9-12: Dyu 14.21-31
Housoeh nyang nyah dius jens lyis tungyos cho shwih lai los.
10 Nyang nyamoq lyis, nyamoq hoeng bang loq masyah khyuot yoeus las
nyamoq dah jeswus loq masyah khyuot kat.
11 Jeis gas nyamoq dah jeswus jens lyis nghop tyamp;
nyamoq dvyuk eq ma nyet lo.
12 Hauh uhlyis nyah dius jens gas nyah dangthoengh lyis lomsjingh las,Ref 106.12: Dyu 15.1-21
nyang lyis chunghthwe kat las chungh.
13 Nghuot laus eq nyamoq gas nyah muh lyis lvnyap tohnyhik las,
nyang joeui dyei yvlyis ma langh lo kuot loh.
14 Nyamoq mhanhdyvp mas obos las,Ref 106.14-15: Gyu 11.4-34
nyeis kyuk yos mas Mangso lhyi shiyoeuh.
15 Nyang nyamoq sang zis tyink dyei laus eq,
nyamoq lyis gyukphoh noslom dyei.
16 Hau mhanhdyvp mas nyamoq gas MosheRef 106.16-18: Gyu 16.1-35 yahge Yhensain dah
gyingshang jyeidwis Aron lyis tsain noh.
17 Nyeisjvng ghoh los las Dathan lhyi nyhau tyamp.
Abiram yahge nyah yhenbang lyis nghop tyamp.
18 Nyamoq dah thang chank bang mas nyi gyoh las
lhung bang lyis ngheq tyamp.
19 Nyamoq Sina boms mas xing noeulu lo kuot las,Ref 106.19-23: Dyu 32.1-14
hauh gungslho lyis tsain paiq.
20 Nyamoq gas Mangso dah phunk lyis
mhanh zo noeulu lho yah thaiq tyamp.
21 Egutu mas nyah yomzains muh yah nyamoq lyis khyuot yoeus dah
Mangso lhyi tsain tohnyhik tyamp.
22 Nyang houmha mauhphoh muh cha kuot!
Thomh Nes yvm mas mauhphoh zis kuot goeus!
23 Mangso ka, nyah dius jens lyis mhont das ge taiq uhlyis
nyang khyen toh dah jyeidwis Moshe ka nyah xikkhonh mas yap las sang lhyi,
mhont das ge nhaiqyo yvlyis yoh gyoh nhang.
24 Hauh thang lhyi nyamoq hau pyo dah mau lyis peq tyamp;Ref 106.24-26: Gyu 14.1-35
khasoeh ge lyis nyamoq Mangso dah dangthoengh lyis ma lomsjingh.
25 Nyamoq gas nyamoq zvng mas tsain lop nyeis las,
Yhensain dah thwe lhyi ma gyo.
26 Housoeh las nyang nyamoq lyis mhanhdyvp mas shei nhang das ge,
nyamoq lyis zaih nhang.
27 Nyamoq dah vnyau vshih lyis eq gohnyau bang mas sanh tyamp das,Ref 106.27: Lew 26.33
lvbaus mau mas shei nhang das, ge.
28 Peor mas Mangso dah dius jens gas Ba mangso lhyi bos paiq,Ref 106.28-31: Gyu 25.1-13
soq ma bos dah mangso lhyi kyangh dah shoh tsain zo.
29 Nyamoq housoeh kuot zis yah
Yhensain lhyi nhaiq lhoq yo las
nyamoq mas gyukphoh yomh los.
30 Nghuot laus eq Phineha toq yap las
yobos bos bang lyis joeng thang lhyi yomh doms tyamp.
31 Hou mhayah nyang nyoqnho yoh cho lhyi
jweh los das vcaiq caiq vjangh yah soh nyeis das, ge.
32 Meriba jeisthuq dwang jens mas dius jens gas Yhensain lhyi nhaiqyo nhang.Ref 106.32-33: Gyu 20.2-13
Nyamoq gvng mas Moshe eq yau cho bos loh.
33 Nyamoq gas nyang lyis nhaiq khoh nhang yvmvyah
nyang nghamh das shishenh ma bos lo nhuot taiq shuot loh.
34 Yhensain taiq toh zis yah dvyhangteh
nyamoq gohnyau bang lyis shank shoq ma sat.Ref 106.34-36: Soe 2.1-3, 3.5-6
35 Gohnyau bang yah lhukgoh nyeisyap loh las
nyamoq dah lyi lyis tsain xuq.
36 Mangso dah dius jens phvra lyis bos paiq las,
hauh zis nyamoq dah dyoqbis cho bweh loh.
37 Khanan phvra jens lyis phudyei das
xiklyis nyamoq dah loloeu lonyi jens dyei tyamp.Ref 106.37: 2Hw 17.17
38 Nyamoq gas yobos ma bos dah loshang jens lyis sat.Ref 106.38: Gyu 35.33
Dius sat bang yah hauh mau lyis vwot v-oeu mus nhang.
39 Nyamoq muhzoh gvng mas nyamoq ma lhoq ma shang mus los.
Houka Mangso lhyi lom ma luk cho nghuot.
40 Housoeh yvmvyah Yhensain ka nyah dius jens lyis nhaiqyo,Ref 106.40-46: Soe 2.14-18
nyang nyamoq lyis choqh.
41 Nyang nyamoq lyis gohnyau loq mas kyauh tyamp las,
nyamoq dah jeswus gas nyamoq lyis los guon.
42 Nyamoq dah jeswus jens yah nyamoq lyis zaiq,
nyamoq hauh loq khau mha gop joq.
43 Yhensain ka nyah dius jens lyis nyoshoq lhain khyuot kat laus eq,
nyamoq gas nyang lyis gomloeus dvtoq.
Housoeh las nyamoq gas yaunos mas zes nyop loh.
44 Nghuot laus eq nyamoq kaiq lui lyis Yhensain xauhgyo dyei.
Nyang nyamoq dah chiqjyen lhyi yoeuh dyei.
45 Nyang nyamoq xiklyis nyah thanghchvp lyis soh zis yahge
nyah kuhxing jyetdap cho gvng mas nyah nhaiqyo gyoh tyamp.
46 Nyamoq lyis zaiq bang dvnganh lyis eq
nhaiq seq nyen das cho phank dyei.
47 Yhensain, ngamoq dah Mangso eh, ngamoq lyis khyuot yoeus aq,Ref 106.47-48: 1Ss 16.35-36
ngamoq lyis dius nyau jens jyank masyah shwih tauh los aq.
Housoeh lyis ngamoq nhaiqshoqlang oen
nah gyingshang nyings lyis chungh das.
48 Yhensain, Israel dah Mangso lhyi chungh geh.
Nyang lyis gvshih eq vcaiq caiq eq chungh geh!
Dius yuk khanghmuh Amen, ge bas jungh.
Haleluya!