CHUNGH 104
Gvnkhanh Soeu lhyi Chungh
1 Ngah dyos eh, Yhensain lhyi chungh aq.
Ngah Yhensain Mangso eh, nvng gas svsoh kuhxing.
Nvng gas shoenkkhyi yahge phunk wuot toh.
2 Nvng bvng yvlyis dyimis teh wuot toh.
Maukhung lhyi mis teh lhywa toh.
3 Nvng nah yhen lhyi jeis thoq mas tsuk toh.
Jyommauh lyis nah lhyingh teh yhung lha, lyeis dah dungs yah dang loh.
4 Lyeis lyis nah loeuswons bang,Ref 104.4: Heb 1.7
maunyoq lyis nah jyeidwis jens khyvlyis yhung.
5 Nvng nyeisjvng lyis goeng yvmas vpom tsuk toh,
houka khanhamp eq ma lop ma loeh das.
6 Nvng hauh thoq mas thomh yah misseh teh nghop toh.
Jeis gas boms jens lyis nghop toh.
7 Nvng jeis lyis nyho lhyi nyamoq phang loh;
nyamoq nah vmingh thwe xauhgyo lyis nyap nyap loh.
8 Nyamoq gas boms thoq cho yah yaus las langhkhau mha yaus gyoh loh.
Nvng nyamoq lyis toh yvmas joq.
9 Nvng nyamoq ma yoh lai das maukyo toh,
nyamoq nyeisjvng lyis ma yoh doms nghop shoq kyoq toh.
10 Nvng gas langhkhau mha jeis thuq nhang lha,
boms jens dah vjo chank yaus nyeis.
11 Houka yewus jens lyis shuk nhang.
Ye luzoe jens shet lyis xauh shuk.
12 Hauh vyvm mas dah saiqzains jens mas nghoq jens sot sot las
chunghthwe tsain kat nyeis.
13 Nvng boms mas maukhung mhayah mau wus gyuon;
nyeisjvng gas nah shvmanh yah dyingh joq.
14 Nvng noeu jens xiklyis mhanh, dius yhung das xiklyis vzains yuk los nhang.
Housoeh nyang jyo yoh khyoq zo.
15 Zvbiq gas nyang lyis pyo nhang,
tsanlun coeu ka nyoqnho diu nhang;
wom eq nyang lyis yombos nhang.
16 Lebanon mas Yhensain nyang tsungh toh,
nyah arit zains jens mau jeis nyoshoq xauh shuk nyeis.
17 Houmha nghoq sot tsain sot;
nghoq kywank eq xoeuh zains mas sot sot toh.
18 Ye shvbeq jens gas boms nyhang mha nyeis,
lukkhyung mha tyoeu jens gas lukmhung mha tamh joq.
19 Lhamhmuh khyvp suon das xiklyis nvng lhamhmuh lyis kuot toh.
Buis eq nyang wvng das shishenh seq.
20 Nvng nyenh lyis kuot toh las,
mauchuot lyis yewus dvnganh thuq los.
21 Khangkhyi kyoh lo jens gas Mangso dyei toh dah zonoms xo,
shoh khat uhlyis nyings.
22 Buisthuq los lyis
nyamoq khyung mha tauh loh las whop joq.
23 Dius jens gas nyamoq yoszoh pheh loh las
nyenhthang jweh shoq muh tsain zwi khank.
24 Yhensain eh, nvng vyhang nyoshoq kuot toh!
Nvng dvnganh yvlyis joeui yah kuot toh.
Nyeisjvng gas nah dah dwis ya dwis zis yah dyingh joq.
25 Kuh las lvm dah thomh tsain joq,
hauh yvmas ngis ja kuh ja ma yoh thoq suon lo dah
dwis ya dwis zis bos.
26 Houmha sangpho jens loh lasRef 104.26: Yob 41.1; Chd 74.14; Is 27.1
nvng gvnkhanh toh mvnjung eq yang nyeis.
27 Nyamoq chah uhlyis nyamoq lyis zonoms dyei das xiklyis
dvnganh gas nvng lyis nges toh.
28 Nvng nyamoq lyis zonoms dyei las nyamoq zo,
nvng nyamoq lyis zo das wom dyei las nyamoq zo jo.
29 Nvng nungs phuk loh lyis nyamoq chiqh;
nvng nyamoq dah soq lhyi yoeus tyamp goeus ya,
nyamoq shei lha nyamoq los dah tsoh mas tauh e.
30 Nghuot laus eq nvng nah soq nyamoq lyis dyei lyis nyamoq gas gvnkhanh toh zis xauh las,
nvng nyeisjvng mas kang dwis zis vsaiq dyei.
31 Yhensain dah phunk vcaiq vto joq bas jungh.
Yhensain ka nyang kuot toh muh mas pyo bas jungh.
32 Nyang nyeisjvng lyis yoeuh las houka nvn nyeis;
nyang boms lyis tanh lyis nyikhauh thuq los.
33 Ngos dvcaiq gonh Yhensain lhyi chunghthwe kat das.
Ngos dwis nyeis dvchank ngah Mangso lhyi chunghthwe kat las chungh das.
34 Ngos gaus cho ka nyah jyank masyah los yvmvyah
ngah chunghthwe ka nyang lyis nhaiqdoeus nhang bas jungh.
35 Yaunos wons bang nyeisjvng masyah dyoqbis tyamp bas jungh,
lhung bang ma bos lo bas jungh.
Ngah dyos eh, Yhensain lhyi chungh aq.
Yhensain lhyi chungh aq!