15
1 Noeuh nhamp zis yah phuk taiq zis gas nhaiqyo bi nhang. Dang zoeu gas nhaiqyo cho dvlhoeu thuq kat.
2 Joeui bos soeu dah lhyo ka seq cho lhyi shunk toh. Koh soeu dah nhuot gas koh zis huot khyoq.
3 Yhensain ka khalhye chamus zis dvnganh nyvng. Nyang gas gis zis yahge ma gis zis aiq ja lyis yah zungh yoeuh nyeis.
4 Jyetdap sainhnos dang gas kang saiqzains teh kang she los. Mhuih lhyo ka dyos lyis dvnos nhang.
5 Koh soeu ka uwus dah jyauh cho lhyi chaxwe ma nhang; Nghuot laus eq zaih soeu ka nyang taiq kyingh zis tsomh toh.
6 Dan bang gas nyamoq nhaiqlom mas zisyos bos. Lhung bang gas yau cho kyingh dvxauh.
7 Joeui bos dah nhuotkuk gas seq cho lhyi tyo kat. Koh soeu dah ehnyet gas housoeh ma nghuot.
8 Lhung soeu dah phudyei gas Yhensain xiklyis vchoqh vlhauq nghuot. Ehnyet zungh soeu dah shvmanh dung zis gas nyah nhaiqdoeus cho dvnghuot.
9 Lhung soeu dah cho lhyi Yhensain choqh. Nghuot laus eq dan cho chank xo soeu lhyi ka nyang jyet.
10 Ma jus zis kuot soeu ka than than dvmdyei zis xauh das. Nyho lha jyauh zis lyis hoeng soeu ka shei das.
11 Yhensain ka shei mau mas cha bweh nyeis zis seq. Yhensain ka dius dah nghamh cho lhyi kha iq zes seq.
12 Jwangh soeu ka nyang lyis soq dyei soeu lhyi ma jyet. Housoeh las nyang gas joeui bos soeu jyank masyah joeui ma sang.
13 Ehnyet pyo lyis nyoqnho dyoeu; nghuot laus eq kukxi lhyi ehnyet yomgyau.
14 Seqgyo cho bos bang gas zes xuq mes; nghuot laus eq koh bang gas koh cho yah ehnyet tap nyeis.
15 Nyungs bang dah kang dwis cho ka malyenlo loeutyonh nyeis. Ehnyet pyo bang gas vjangh pwe kuot nyeis.
16 Yhensain lhyi gyukwoms zis yah yoh dah zisyos dvmhauh gas yaukyenh zis yah nyoshoq yoh dah zisyos thoq lyis zes gis.
17 Jyet zis yah anghphoq dvnyo zo das zis gas hoeng zis yah nyhuk toh noeu dvdoeu satzo das thoq lyis zes gis.
18 Nhaiqlom dyis soeu ka zan goh cho lhoeu thuq, nghuot laus eq nhaiqlom xing soeu ka dyoqgoh cho doms nhang.
19 Lan soeu ka dvkhauyah yau cho thungh phuh; nghuot laus eq ehnyet zungh soeu ka yau cho ma bos das.
20 Joeui bos dah lo gas uwus lyis gaus nhang; koh soeu ka nyah ungwes lyis ma phauh dvkuot.
21 Koh soeu ka nyang koh yvmas pyo nyeis. Seqgyo cho bos soeu ka dan khyvlyis dvsuh e.
22 Ma xamgoh lyis nghamh toh cho dyoq loh; nghuot laus eq joeui da bang nyo lyis houka ung los.
23 Dius gas nyah shishenh yah nyang zangh dah phuk taiq dang lyis o. Nyah yoq yah phi yvlyis taiq zis gas kha iq gis!
24 Joeui bos bang gas shei yvpheh gyoh loh dah cho chank ma nghuot, kang yoh das cho nyhang cho loh.
25 Yhensain ka khwank soeu dah yhen lhyi mhont tyamp; nghuot laus eq nyang chauhmuh dah zisyos lyis gos toh dyei.
26 Yhensain ka lhung soeu dah nghamh cho lhyi choqh; nghuot laus eq nhaiqnyen shohgyo dah dang lyis gas nyang nhaiqdoeus.
27 Vmyat lyis nyoqnoq soeu ka nyah yhenbang lyis lhoeu yau. Nghuot laus eq khauwhot lyis hoeng soeu ka kang dwis das.
28 Dan bang gas dang ma phuk taiq shih lyis nghamh yoeuh; lhung bang gas ma gis dah dang dvhuot khyoq.
29 Yhensain ka lhung bang yah we nyeis; nghuot laus eq nyang, dan bang dah shvmanh dung dang lyis gyo yoeus dyei.
30 Nyoqnho dyoeu zis gas ehnyet lyis pyo nhang. Loeus gis gas shohyau lyis yanghzan nhang.
31 Gis das xiklyis nghamh las nyho yvlyis gyo yoeus soeu ka joeui bos.
32 Jyauh cho lhyi ngoek soeu ka nyah dyos lyis dvnos nhang; nghuot laus eq taiq kyingh zis gyo yoeus soeu ka seqgyo cho yoh das.
33 Joeui omes lyis Yhensain lhyi gyukwoms chah, nyoqnho ngelang yoh mes lyis ehnyet nyhen mha gyoh chah.