16
1 Dius jens gas nyamoq nghamh toeuq cho kuot toh laus eq hauh yvlyis Yhensain kyingh dvyoh bweh los nhang.
2 Dius gas vsainnyang kuot zis dvnganh jus ge nghamh mvbeh. Nghuot laus eq Yhensain ka ehnyet lyis laiq yoeuh.
3 Nvng cha kuot zis dvnganh Yhensain lhyi kyauh aq, housoeh lyis nvng nghamh toh cho ung los das.
4 Yhensain ka dvnganh nyang nghamh toeuq khyvlyis kuot toh. Lhung bang lyis yangh joeng das buisnyeis kuot toh.
5 Ehnyet mas khwank soeu khanghmuh lyis Yhensain choqh. Nyang gas nyamoq lyis yau ma dyei ma toh.
6 Jyetdap sainhnos las lomluk zis yah yaunos khyuot tyamp dyei. Yhensain lhyi gyukwoms zis yah ma gis cho lhyi yoh jhank.
7 Dius dvyuk nyah cho Yhensain lhyi nhaiqdoeus nhang lhyi ka, nyah jeswus lyis yangh nyang yah nyenstap nhang das.
8 Dan zis yah dvmhauh yoh zis gas lyi ma jus zis yah vmyat nyoshoq yoh thoq lyis zes gis.
9 Dius dvyuk gas nyah ehnyet mas nyah cho lhyi nghamh toeuq laus eq, Yhensain ka nyah beszoh lyis choshet.
10 Hwankti nhuotkuk mas Mangso jyank masyah vmingh bos las nyang nghamh thyet cho lyi jus chah.
11 Jyoeng dah jvngshih yahge jvng gas Yhensain yah sen. Ihtsung mha bos dah jvngshih dvnganh jus chah.
12 Dius dvnyau gas dan cho yah doengs nhang toh yvmvyah hwankti jens lhung khyvlyis kuot cu lhyi vchoqh vlhauq nghuot.
13 Hwankti jens gas jyoeng dang lyis nhaiqdoeus las, nyamoq gas jus zis taiq bang lyis jyet.
14 Hwankti dah nhaiqyo zis gas dvyuk yuk lyis yoh shei nhang. Nghuot laus eq joeui bos soeu ka hwankti nhaiqyo yvlyis yoh bi nhang.
15 Hwankti pyo lhyi dius kang luiq. Nyang nyoqnho dyei cho ka cungh thuq zoh lyis gyoh dah maunhungh teh nghuot.
16 Joeui yoh zis gas xing yoh thoq lyis kha iq zes gis! Ngwis thoq lyis seqgyo cho khyen yoeus das zis zes gis.
17 Ehnyet zungh bang gas ma gis yvlyis jhank. Nyah cho lhyi tsomh soeu ka nyah kang lhyi gomh nyeis.
18 Khwank zis gas dyoqbis cho dah xik pheh, lhoq lhoq teh kuot zis gas lains das cho dah xik pheh loh.
19 Nhiq zaiq zis xauh bang yah dvgeh ehnyet nyhen mha gyoh nyeis zis gas, khwank bang yah dvgeh lvnyhvp gvmgoh thoq lyis zes gis.
20 Taiqshet yvlyis kamp gyo soeu ka ung cho yoh das. Yhensain lhyi loms soeu ka ngelhoq.
21 Joeui bos soeu lhyi, Seqgyo soeu ge hoeuh. Dang mvno gyomes mvno taiqshet cho mha zes yoh jyoeuq yoeus.
22 Seqgyo cho bos soeu xiklyis hau seqgyo cho ka kang jeisthuq dwang nghuot. Koh soeu lhyi jyauh mhoq zis gas shishenh dvthank.
23 Joeui bos soeu ka nghamh yoeuh las dang taiq. Housoeh las nyang taiq dang yah zes yoh jyoeuq yoeus las dius jens zes yoh xuq.
24 Gyomes dang gas dyowhom mha dah dyoyhei teh nghuot las, dius jens lyis pyo nhang, yanghzan nhang.
25 Dius dvyuk xiklyis nyah cho ka jus ge nghamh laus eq, hauh vthang ka shei cho pheh dvloh mvbeh.Ref 16.25: Sod 14.12
26 Muh zwi khank soeu dah zomes cho ka nyang lyis yomkat nhang; khasoeh ge lyis nyang yuot cho lhyi jo nhang mes.
27 Gywes ma tsungh bang gas gohyuk lyis nos nhang das cho xo nyeis. Nyamoq taiq dang gas nyi ngeh teh nghuot.
28 Nhaiqlom guih soeu ka dyoqgoh cho xo nyeis. Loeusmus soeu ka dyenschangh kau jens lyis kangh tyamp.
29 Lhuotzo soeu ka nyah yhenkyoh lyis mhuih las nyang lyis ma gis cho pheh shwih loh.
30 Nyoq nyik soeu ka guih cho khaujeini las, dang ma taiq ching soeu ka ma gis cho nghamh toeuq nyeis.
31 Kang xing zis gas dan cho dah phauh shangh zis nghuot. Cam thyoeu zis gas phunk bos buismuk nghuot.
32 Jhen soeu ka yomsoq bos dah seqlyes thoq lyis zes gis, vsainnyang ehnyet lyis seq joeu soeu ka wus yoh zan yoeus soeu thoq lyis zes gis.
33 Doeugoh zis yah Yhensain dah ehnyet lyis xuq; hau nghamh thyet cho ka Yhensain jyank masyah nghuot.