8
Bildad
1-2 Nvng hauh cho khanyhank jweh shoq taiq das? Nah dang gas lyeis than dvnghuot.
3 Mangso ka lyi jus cho lhyi khanhamp eq malhyent;
nyang gas jus yvlyis ma jus khyvlyis ma kuot.
4 Nah lo jens gas Mangso yah tyi dah yaunos kuot las
nyamoq kuot zis yah dvyhangteh nyang nyamoq lyis joeng.
5 Nghuot laus eq nvng gvshih tauh los las
Maukhung Jesphung Mangso lhyi shangphu aq.
6 Nvng koptoq las shangkyei nghuot lyis,
Mangso nvng lyis los pangh das,
nvng lyis phauh shangh khyvlyis nah yhenbang lyis doms toeu dyei das.
7 Thang pheh Mangso nvng lyis dyei das zis yah byi lyis
nvng chithyuk dah yohkhuiq cho dvnganh gas cha ma nghuot.
8 Gohlhain dius cauh dah joeui lhyi dvsoq xo lha,
yah phauh thyeih moq xuq dah jyoeng cho lhyi nghamh yoeuh aq.
9 Yah kang ka lyung las yang cha ma seq;
nyeisjvng thoq mas, yah buisnyeis gas siyet lai loh teh dvnghuot.
10 Nghuot laus eq gohlhain dah dius cauh joeui bos bang lyis jyauh nhang aq;
nyamoq cha taiq chah zis gyo geh.
11 Jeis ma joq yvmas jvmbu ma yoh yuk,
hauh zis thomhbop ma joq yvmas khanhamp eq ma nyvng.
12 Jeis kanh loh lyis hauh zis shih nyhauh loh,
hauh zis thyet yhung das nyhenshang nyo ngis shih.
13 Mangso ma bos bang gas hauh jvmbu teh nghuot.
Mangso ma bos dah nghamhloms cho ka dyuk loh das.
14 Nyamoq loms zis gas janghnyholvkhyank yhen dah khying teh lvnyap dyet tyamp das.
15 Nyamoq janghnyholvkhyank yhen lhyi nges lyis vyoh kham das lah?
Nyamoq hau khying lhyi lang lyis vyoh goeng joq das lah?
16 Ma gis bang gas buis tso yvmas dah mhanh teh yuk los.
Hauh dvzains masyah dvkhyam gonh yuk nyenh loh teh nghuot.
17 Hauh vnyet gas lukzungs mas chent las,
hauh luklom khanghmuh lyis lang toh.
18 Nghuot laus eq hauh yvlyis nuot tyamp las
hauh zis houmha nghuot khoq zis hank khanhamp eq ma seq.
19 Nghuot goeus, hau dvnganh gas ma gis bang yoh dah gaus cho nghuot.
Gvshih nyamoq joqyos lyis gohyhamh bang los yoeus toh.
20 Nghuot laus eq Mangso ka lomluk soeu lhyi khanhamp eq ma tyamp das,
nghuot ya ma gis zis kuot bang lyis gas ma pangh.
21 Nyang nvng lyis doms yis las kaiq nhang das.
22 Nghuot laus eq nvng lyis hoeng bang lyis nyang xoqphuh cho she los dyei das;
lhung bang dah yhen ka dyoq dyuk das.