7
1 Dius dah kang ka jesmuh tsoengh wons wuq teh,
Muh changh zwi dah uhkung jens kang dwis teh nghuot.
2 Jons gas jyamh dah buisshen yoh phohya ge teh,
uhkung eq uhkung phauh langh teh nghuot.
3 Ngos gas lhamhmuh dvkhyvp thang lhyi dvkhyvp kang khoeu zis ma yoh.
Dvnyens thang lhyi dvnyens kuk cho dvshe los.
4 Ngos lhain toh lyis, Ngos yhet yoh toq shoq kha iq nyangh oen nghamh.
Son xing lha nyoqnyvng shoq ngos gon nyeis.
5 Ngah gungs gas luk yah dyingh joq.
Dvmkyvp yah nghop toh;
dvm masyah huot yaus nyeis.
6 Ngah buisnyeis gas yoqgan nghvt thoq lyis zes nyap las
nghamhloms cho ma bos lai loh.
7 Mangso eh, ngah kang ka soq dvnghuot yvlyis soh aq.
Ngah pyo cho ka thank goeus.
8 Nvng ngos lyis gvshih nyvng, nghuot laus eq khanhamp eq ma doms nyvng lo das.
Nvng ngos lyis xo lhyi ngos dyuk goeus.
9-10 Jyommauh lhang dyuk loh teh,
ngamoq cangsoeu dius gas shei lha khanhamp eq ma doms tauh los lo.
ngamoq lyis seq bang dvnganh eq ngamoq lyis tohnyhik goeus.
11 Housoeh las ngos samlo ma yoh nyeis.
Ngos nhaiq khoh, nhaiq eq yo las dang taiq chah.
12 Nvng ngos lyis chamus lhunk toh?
Nvng nghamh lyis ngos thomh mas mvnjung nghuot lhyeh?
13 Ngos lhain lha tungh no.
Ngos ngah dvm sunghhuq das zis xo.
14 Nghuot laus eq nvng ngos lyis yhetmoq yah kyuk,
ngah jyank mas nyoqnyvng dyei, yhetthyiq thyiq nhang.
15 Houka ngos shanghsenh gungsdom mas nyeis das
thoq lyis lains shei mes shoq nghuot.
16 Ngos kang ma mes dwis lo, ngos lyis toh tyamp lo aq,
ngah kang dwis cho ka vjyuk ma bos mus.
17 Nah xiklyis dius gas chamus hou iq yhaugyen?Ref 7.17: Chd 8.4, 144.3
Nyamoq cha kuot yvlyis chamus hou iq yoeuh nyeis?
18 Nvng nyamoq lyis nvp yau nvp komh,
shishenh khanghmuh shiyoeuh.
19 Nvng ngah jyank masyah nyoq ma huq,
ngos jyeih nyau das nyhank yangh ngvnyang lyis kyingh ma toh.
20 Dius lyis zungh soeu eh, ngos yaunos kuot lyis ngos nvng lyis cha cu?
Nvng ngos lyis nah baiq toeuqkhom chamus kuot?
Ngos nah xiklyis lyei dah yvwons duot los lhyeh?
21 Nvng ngah yaunos khanhamp eq ma yoh tohnyhik lo lhyeh?
Ngos kuot cu zis ma yoh khyuot dyei lhyeh?
Ngos ngah lop mas wvng bah ge,
nvng ngos lyis xo uhlyis ngos dyuk loh das.