23
Yoba
1-2 Ngos Mangso lhyi tyi lha gomloeus toq zis yah lop shih.
Ngos nos ma kyingh ma yoh kuot.
3 Ngos nyang lyis khamha xo das zis kha iq seq mes.
Nyang nyeis yvmas khasoeh loh das zis seq mes.
4 Ngos nyah xikkhonh mas ngah soe taiq las,
ngos taiq goh mes cho dvnganh taiq das.
5 Nyang cha taiq das zis yahge ngos lyis
khasoeh phuk taiq das zis ngos seq mes.
6 Mangso ka nyah yom dvnganh yhung lha ngos lyis tyi das lah?
Ma nghuot, ngos taiq zis yah dvyhangteh gyo dyei das.
7 Ngos koptoq las ngos Mangso yah yoh taiq goh.
Dvnganh xiklyis dvlhain lhyi yah nyang ngos lyis tswi ma bos ge hoeuh das.
8 Ngos buisthuq pheh xo goeus laus eq Mangso houmha ma nyeis.
Ngos buiswvng pheh xo lhyi nyang lyis ma xo nyvng.
9 Mangso ka mautsung mautyi pheh muh khanh nyeis laus eq
ngos nyang lyis ma nyvng shih.
10 Nghuot laus eq Mangso ka ngos bes cheh khanghmuh seq.
Nyang ngos lyis shi yoeuh lyis ngos yobos ma bos zis nyvng das.
11 Ngos gas nyang khyen yvcho lomluk luk chank.
Khashot pheh eq khanhamp eq ma whang loh.
12 Ngos Mangso tying toh zis vjangh kuot.
Ngos gas ngvnyang omes zis ma nghuot, nyah ehnyet dvchank.
13 Nyang gas khanhamp eq ma thaiq loh, nyang lyis loqyom hank ma yoh tyonh,
nghuot ya nyang kuot mes zis kuot nyeis masyah hank ma yoh tomp.
14 Nyang ngah xiklyis sont toh cho lhyi tyink dyei das.
Hau nghamh toeuq cho ka nyang toeuq cho nyoshoq mas zis dvkoeuq dvnghuot.
15 Ngos nyah xikkhonh mas gyuk zis yah nvn nyeis.
Ngos Mangso lhyi nghamh las svsoh gyuk los.
16-17 Maukhung Jesphung Mangso ka ngah dah womh cho lhyi mhont tyamp dyei.
Chuot zis gas ngos lyis nyoqjet nhang laus eq,
ngos lyis gyuk nhang zis gas chuot zis ma nghuot, Mangso dvnghuot.