22
Somh Vlhain Jisgoh
Elipha
1-2 Joeui bos thank soeu ka nyah xiklyis vmyat yoh kuot.
Dius dvyuk yuk Mangso xiklyis vkyuh yoh kuot lhyeh?Ref 22.2-3: Yob 35.6-8
3 Nah dan cho ka Mangso lhyi vkyuh dyei lhyeh?
Nghuot ya nvng tswi ma bos zis gas nvng lyis pangh jus lhyeh?
4 Nvng Mangso lhyi gyukwoms gvng mas nyang nvng lyis ma joeng das.
Haih xiklyis nyang nvng lyis soetuon jang mas ma shwih loh das.
5 Houka nah yaunos ma thoq thank lo;
Nvng kuot dah ma gis cho dvnganh gvng mas nghuot.
6 Nvng gas nah vmang vnoeuh shauh dah ngwis cvp das nyhenshang nvng nyah dyimis,
nyang wuot das zis cha ma nyet lo shoq yoeus tyamp.
7 Nvng nyungdaus bang lyis shuk jeis dyei das zis ngoek;
yuot bang lyis tsoh das zis ngoek.
8 Nvng maunyeis dvkoeuq gonh yoeus das xiklyis
nah yomsoq yahge nvng yoh dah vkhom vkeq yhung.
9 Nvng chauhmuh jens lyis pangh das zis ngoek zis kyingh ma nghuot,
chauhlo jens lyis eq thyoq zo las ma gis khyvlyis kuot.
10 Housoeh las gvshih nah yvmlhaink yah twih khyoq toh las,
nvng nyetlos nyettant gyuk los zis xauh.
11 Houka soeng soeng noq los las nvng ma yoh nyvng,
jeisphauq gas nvng lyis nghop tyamp.
12 Kyi ka tsain nyhang joq laus eq Mangso ka nyhang thank maukhung mha nyeis las,
kyi lhyi tsain yoeuh khyoq kat ma nghuot lhyeh?
13 Nvng nyei zis gas, Mangso cha seq?
Nyang lyis jyommauh yah gos toh las nyang yang lyis soe khasoeh yoh tuon?
14 Nyang mauyvm khomh mas suh loh zis yah dvyhangteh,
hau jyommauh thoeu yah nyang ma nyvng shoq yoh gos toh ge namoq nghamh, ge.
15 Nvng ma gis dah bang vjangh chank dah cho mha
suh das oen nghamh thyet lhyeh?
16 Nyamoq gas shishenh yangh ma jweh shih lyis,
nyamoq gas jeisphauq yah yhen lhyi khyuot loh teh khyuot loh zis tsain xauh.
17 Haih bang gas Mangso lhyi peq tyamp las
nyang nyamoq lyis cha ma yoh kuot ge lomsjingh bang nghuot.
18 Nghuot laus eq nyamoq lyis nyeisgis nhang soeu ka Mangso nghuot.
Ngos lhung bang dah nghamh cho lhyi ngoek.
19 Dius gis jens hauh lhung bang joeng zis xauh yvlyis nyvng lyis
nyamoq gaus las tswi ma bos bang yis nyeis.
20 Lhung bang sain zis dvnganh gas dyoqbis tyamp.
Nyet shih zis dvnganh gas nyi yah ngeh tyamp.
21 Yoba eh, Gvshih Mangso yah nyenstap cho kuot aq.
Nyang lyis jeswus lyis teh kuot cho no aq,
nvng housoeh kuot lyis nyang nvng lyis shvmanh dyei das.
22 Nyang dyei dah jyauh cho lhom yoeus las,
nyah dang nah nhaiqlom mas kat toh aq.
23 Nghuot goeus, nvng Mangso jyank tauh los chah.
Housoeh lyis nah yhen mha bweh dah ma gis cho dvnganh thank loh das.
24 Nah xing lyis doeuh tyamp aq.
Nah dah yungh thank xing lhyi jeislo lvng kyuk dah tvpkhyoh mas doeuh tyamp toh aq.
25 Yomzains Mangso ka nah xing nghuot bas jungh,
nyang gas nah ngwis yung boms toh zis nghuot bas jungh.
26 Housoeh nvng gas vjangh Mangso lhyi loms das las
nyang gas nvng gauslaus das vpom nghuot yvlyis xo nyvng das.
27 Nvng shvmanh dung lyis, nyang gyo dyei das.
Nvng nyhen toh zis chank tyink das.
28 Nvng kuot zis dvnganh yvmas ung los das,
bvng zis gas nah cho mha pank dyei das.
29 Mangso ka khwank soeu lhyi khyoq laus eq,
ehnyet nyhen mha gyoh soeu lhyi khyuot yoeus.
30 Nvng kuot zis dannote 22.30 Hai sonzoh ngis zis 30 Hebre mas bvng bvng ma nghuot. las nvng tswi ma bos lyis gas nyang nvng lyis khyuot das, ge.