24
1 Mangso ka nyang lyis phuqsoe bang xiklyis lyi jus buisnyeis,
soetuon das buisnyeis chamus ma toh lah?
2 Dius jens gas maunyeis nyo nyo yoh das xiklyis khyamkyoh zains cheh,
nyamoq yvng khauh las nyamoq nyang dah yvng khom mas kat.
3 Nyamoq chauhlo jens yah sen dah mauhlyihzoe yoeus;
chauhmuh dah noeu lyis nyah jyen dye cap shoq yoeus toh.
4 Nyamoq gas shohjyen bang dah toeuh yoh das yvmas gos toh,
nyungs bang lyis tsoengh phang tamh nhang.
5 Housoeh las shohjyen bang gas mauhlyihzoe lamh teh
kyuk dah mhanhdyvp mas zonoms xo laus eq
nyamoq lo jens xiklyis zonoms khalhye eq ma xauh xo.
6 Nyamoq gas nyamoq ma sain dah yos mas jyo yhomh chah.note 24.6 Nyungs bang gas gohyuk dah yos mas uhkung phauh nainlo yah muh tsoengh zwi nhang zis xauh.
Lhung bang dah zvbiq khyam mha zvbiq shih thyoq dyei chah.
7 Nyenh lyis nyamoq phomh yhet das zis cha ma yoh.
Ngamh lyis cha ma wuot.
8 Nyamoq boms mas wus dah mau yah jyweq.
Nyamoq gas khaugus ma bos yvmvyah luk-uk nvm mas tsain nyeis.
9 Ma gis bang gas chauhlo lonoeuh jens lyis nauh shuk nyeis masyah yoeus las jons tsain kuot.
Shohjyen bang dah loshang jens lyis eq nyamoq dah jyen xiklyis tank toh nhang.
10 Nghuot laus eq shohjyen bang gas nyamoq lyis gos das dyimis ma bos suh yenh chah.
Sunghso yhomh uhlyis eq yuot zis yah loh chah.
11 Nyamoq gas tsanlun coeu nyhet,
zvbiq jeis nyhet laus eq nyamoq shet nyeis.
12 Wus mas dvmdap bang yahge shei loh nyeis bang kaiq nyeis.
Nghuot laus eq Mangso ka nyamoq shvmanh dung yvlyis ma gyo dyei.
13 Houmha bvng zis lyis peq bang bos, nyamoq bvng cho lhyi ma seqgyo,
nghuot ya hauh bvng zis choshe yvcho ma loh.
14 Dius sat soeu ka nyoq nyvng lyis toq las
shohjyen bang, nyungs bang lyis loh sat,
nyenh lyis gas khauh.
15 Nyi shuot soeu ka mauchuot das zis langh nyeis,
nyang lyis hank ma yoh nyvng das xiklyis nyah nyoqnho nghop toh.
16 Khauh bang gas nyenh lyis yhen mha tsain thyoq wvng,
nghuot laus eq nyeih lyis gas bvng yvlyis jhank las tamh joq.
17 Nyamoq gas nyeih lyis dah bvng yvlyis gyuk.
Nghuot laus eq chuot zis gas nyamoq xiklyis gyukphoh ma nghuot.
Zopha
18 Lhung bang gas jeisphauq yah shenh loh zis xauh.
Nyamoq sain dah maunyeis lyis eq Mangso nhoengh toh.
Nyamoq gas nyamoq dah zvbiq khyam mha muh ma loh zwi lo.
19 Gyu gas gywes yvmas dyuk las kyuk loh teh,
yaunos kuot bang gas dwis nyeis mau masyah dyuk loh das.
20 Gvshih nyamoq dah ungwes moq yangh nyamoq lyis ma soh lo.
Nyamoq lyis luk yah zo tyamp las lains dah saiqzains teh dyoqbis tyamp das.
21 Housoeh bweh zis gas, chauhmuh jens lyis ma gis khyvlyis kuot,
dyei thonh jens lyis nhaiq ma bos cho chixoeuq yvmvyah nghuot.
22 Mangso ka nyah yom yah yomzains bos bang lyis mhont tyamp.
Mangso kuot lyis lhung bang shei loh.
23 Mangso ka nyamoq lyis jesluiq shohluiq nyeis nhang mvbeh,
nghuot laus eq nyang nyamoq lyis nyoqjeih ma shen yoeuh nyeis.
24 Lhung bang gas dvsoq nyeisgis nyeis.
Nghuot laus eq nyamoq nyoq teh,
yet toh dah jyo zains teh nyhauh loh.
25 Haih zis ma jus lyis, ngos shuot oen hank yoh kyink?
Ngah dang phauh ma dap ge hank yoh chixoeuq, ge.