6
Ma jus Nhaiqlom thaiq cho
1 Yhensain jyank mas tauh loh goh: nyang yang lyis nos nhang laus eq jyoengh doms gis los nhang das. Nyang yang lyis dvmtap laus eq dvm lyis lyet dyei das, ma nghuot lhyeh?
2 Aiq somh nyeih lyis nyang yang lyis kyoeu las yang nyah xikkhonh mas kang dwis das.
3 Yang Yhensain lhyi seq shoq tungh kuot goh. Mau gas jyoengh buh los teh, nyeisjvng mas mauxeih jyoengh gyoh teh nyang yah jyank mas jweh los das.
4 Yhensain taiq, Israel yahge Yuda eh, ngos namoq lyis khasoeh kuot das? Namoq ngos lyis jyet cho ka nvpsangh dah jyommauh teh lvnyap dyuk loh. Noq yah dyuk loh dah jyweh teh nghuot.
5 Housoeh yvmvyah ngos nah jyank mas ngah lvpe jens lyis yah, ngah soetuon loeus, thyoqpi loeus kyoh kat. Ngos nah jyank masyah omes zis gas, bvng bvng shang shang nghuot.
6 Ngos omes zis gas nah gaunyhauq phudyei cho ma nghuot, mathank magons jyetdap cho dvnghuot; ngah dius jens ngheq jyungshuk thoq lyis ngos lyis seq das zis zes o.Ref 6.6: Mat 9.13, 12.7
7 Adam teh, namoq ngah thanghchvp thyoq las, ngos lyis gomloeus toq.
8 Gilead gas ma gis dah dius jens yahge dius sat bang yah dyingh dah wus nghuot.
9 Phudyei bang gas dvyuk yuk lyis thyoq das zis lhom nyeis dah khyanktau phung teh nghuot. Gyingshang joqyos Shekhem pheh loh dah cho mha yangh dius tsain sat. Nyamoq gas hai ma gis cho dvnganh vlhomuh tsain kuot.
10 Ngos Israel mas gyukphoh zis nyvng goeus. Ngah dius jens gas phvra lyis paiq zis yah nyamoq nyang gungs lyis vwot v-oeu kuot.
11 Yuda dius jens eh, namoq xiklyis eq namoq kuot nyeis cho nyhenshang ngos namoq lyis joeng das shishenh toh toh goeus.