5
1 Phudyei bang eh, haih zis gyo geh; Israel jens eh, kamp gyo geh; hwankti yhen yah sen bang eh, gyo geh; namoq gas lyi jus yah soetuon chah bang nghuot. Housoeh las namoq soetuon zis xauh das. Namoq gas Mizpa boms mas lhyik, Tabor boms mas thung toh dah nyho, bweh los.
2 Akhesha wus mas dwang noq bweh los. Ngos namoq dvnganh lyis joeng das.
3 Israel cha yah doeusgoh zis ngos seq. Nyang ngos lyis ma yoh tamh. Nyang ngos lyis lom maluk, nyah dius jens gas ngos lyis paiq das zis ma mon.
Phvra Paiq cho Zoehsoe Nhang
4 Dius jens kuot dah ma gis cho ka nyamoq lyis nyamoq Mangso jyank mas tauh los das cho masyah kyamp gos toh. Phvra paiq cho ka nyamoq lyis yomsoq bos bos zwi toh las nyamoq Yhensain lhyi ma seq.
5 Israel jens dah lhoq lhoq teh kuot cho ka nyamoq lyis tyi lha kaiq. Nyamoq dah yaunos gas nyamoq lyis thungh lains nhang, Yuda jens eq nyamoq yah dvgeh lains.
6 Nyamoq dah noeu yahge yvng Yhensain lhyi lomhxangh khyvlyis dyei das zis chi los laus eq nyamoq lyis gis cho ma dyei. Nyang nyamoq lyis tyamp toh goeus yvmvyah nyamoq ma yoh xo nyvng.
7 Nyamoq gas Yhensain lhyi lom ma luk; nyamoq dah lo jens gas nyang yah ma sen. Housoeh las gvshih nyamoq eq, nyamoq dah maunyeis eq ma nyangh lyis dyoqbis das.note 5.7 Hebre mas ma bvng.
Yuda yahge Israel jo Jeszan cho
8 Gibea mas moeng zan lvbuh muot geh! Rama mas thwe kat geh! Awen mas jeszan cho kaiq hoeu geh. Benyamin jens eh, jeszan yvmas wvng geh.
9 Joeng buisnyeis gas jweh los nyeis las Israel jens dyoqbis das. Israel dius jens eh, haih zis jyoengh bweh das.
10 Yhensain taiq, Yuda uhshe bang gas Israel mau mas nyhenh wvng las nyah maunyeis khauh loh yvmvyah ngos nhaiqyo. Housoeh las ngos nyamoq thoq mas joeng cho jeis nhauq teh huot khyoq das.
11 Israel gas zaiq zis xauh kham nyeis. Nyang gas pangh cho ma yoh dyeinote 5.11 Pangh cho ma yoh dyei bang ge zis Hebre mas Vmingh, ge bos. dah phvra lyis nghamh tsuk zains toh yvmvyah nyah toeuh maunyeis chithyuk.
12 Ngos Israel lyis sauh lyis yop zo teh mhont das; Yuda dius jens dah yom lyis thangh phomh dunghkuq teh nhuk nhang das.
13 Israel gas nyang kha iq nos yvlyis, Yuda eq nyah dvm lyis nyvng lyis, Israel gas Asiria hwankti zainsmuh lyis pangh cho loh dung. Nghuot laus eq nyang nyamoq lyis ma yoh yhoh, nyamoq dvm lyis ma yoh gis los nhang.
14 Ngos Israel yahge Yuda dius jens lyis khangkhyi teh zan das. Nyamoq lyis ngvnyang vchingh chingh lang chingh toh khoq das. Ngos nyamoq lyis she loh lyis nyamoq lyis hank ma yoh khyuot kat das.
15 Ngos ngah dius jens lyis nyamoq dah yaunos dye kham lha ngos lyis xo los shoq tyamp toh das. Nyamoq shanghsenh uhlyis ngos lyis tungh xo mvbeh, ge.