3
Jerusalem Sualnak le Tatlehnak
1 Jerusalem cu a bolal toh hi! A nawngkai zetmi le ngal a tho nuam zetmi khuapi, mai mihing a nuainem litu khuapi in cimnak tawk tuk hi.
2 Topa i thu ngai nuam ngawlin a nunhilhnak vang sang ma hi. A muansannak cu Topa i nelah koih ngawlin, Topa i bopnak vang ngen ma hi.
3 A bawite cu a hawk limi kiosa bang haw hi; a thusontu bawite cu cingne ngilkial bang haw in; a longaak leita haw hangin a zingleh tian hei ah sa nguh pa khat hei koih thei ngawlte hi.
4 A profette cu amu nuam bang nungte haw hi. A thiampite cu thil a thiangthote nintik haw in, Pathian daante amu deihdanin, mel pepel haw hi.
5 Mahnaven khuapi sungah Topa cu um hi. A dikmi bek bawlin, a pha ngawlmi bawl awng ma hi. Zingsial pelh ngawlin a mihing tei nelah thumannak hengtik hi. Mahnaven mipha ngawl ten thilpha ngawl bawl leleng haw in, zakca haw ma hi.
6 Topa in, “Miphun tampi siatsuah khawng zo ing. A khuapi haw cu siatsuah khawngin, a pang haw le a ngalvilnak innkuate cu buaksehnakin cangtik khawng zo ing. Khuapi cu zamsan haw tuk, khuasung lampite cu veng diudeu in, kuamah tang haw tukma hi.
7 Hiti bang ceng ten ka mihing ten upatin, maizah haw tuk a, ka nunzilhnakte pomin, ka thuzilhte phawkngil haw tukma toh tin ngaisung ing. Mahnaven amasa bang lengin, a nungcang haw cu sia leleng tuk hi.
8 “Ngak hih un! Miphun tampi sual ka nawt ni tian ngak hih un. Miphun tampi le uknak tampi ten ka thinuknak a nase dan a theihnak haw tukin le munkhatah hulawm tukin ngaisung ciang zo ing. Ka thinuknakin lei buppi hi mei bangin kang khawng tuk hi.
9 “Mahten miphun hempoh tei muk le kam thek tung a, pathian dang nelah thungen ngawltohin, keima nel bekah thungen haw tuk hi. A venghawng haw in, ka thu ngai haw tuk hi.
10 Ngam khawlapi Ethiopia ngam pen a khenkeh sa ka mihingte nangawnin piak tuk nate tuah hunpih haw tuk hi.
11 noh ka mihingte, keimah na langpang uh hangin zakca in um tukma toh uh ci. Mi ngal le mi pualthau hempoh cu phathongtik khawng tung a, noh ten ka mual thiangtho hum pen dodalleh tukma toh uh ci.
12 Mahlai pen mi thinsau le mi niamkhiatte bopnak ngenin, ka nelah a hung tuk mite zam tung hi.
13 Israel mi a tang calam ten kuamah i lakah thil sual bawl ngawltohin, zolthu hei son haw tukma toh, mizol hei tum haw tukma toh hi. Mi neinung zetin cang haw tuk hi, himdamzet haw tuk a, kuamah lau haw tukma,” ti hi.Ref 3:13 Mang 14:5;
Lungdamnak La
14 Israel mite, lungdamin, lasa in au un.
Maw Jerusalem canu,
na lungmu venghawng tuah
lungdamin umin hi.
15 Topa in, a dantatnak cu
cawl zo a, na ngalte
vawksak khawng zo hi.
Topa,
Israel i kumpipa cu
na nelah um hi,
lauthawng tuk imah umma toh hi.
16 Hun cu heng tuk a, Jerusalem nelah,
“Zion khuapi aw,
imah lau pahsun.
Na khut vang
zawngtik pahsuh.
17 Topa na Pathian cu
na nelah um hi,
a ngilnak huhamin nehnak pia hi.
Topa cu na humah
a lungdamin,
a hehpihnak hangin
nunnak thak pia tuk hi.
Lasa tuk a, na humah
a lungdam tuk hi.
18 Puai bawl hunin,
a lungdammi bangin,”
tin ti haw tuk hi.
Topa in,
“Na haksatnak can cu
botik ing,
na zahcaknak cu
vawksak khawng zo ing.
19 Hun cu heng tukin,
a dantatnakte cu
keimah in dantatleh tung hi.
Ke nei ngawlte panleh tung a,
ngalmat thawngta mite
pui kikleh tung hi.
A mualphonak haw cu
upat conakin bawl tung hi.
Leihum mi hempoh ten
pahcawi haw tuk hi.
20 Hun cu heng tukin,
a khenkhek sa mi
na mihingte pui kikleh tung hi.
Leihum buppi ah
mi minthangin
bawl tung a,
mi neinung zetin
bawlleh tung,” ti hi.
Topa in son zo toh hi.