2
Topa Nelah Sihkiknak
1 Zahcaknak nei ngawlte, pak bang thimin, na thih laih ngawl uhin,
2 Topa i thinuknak cu mei alh bangin na hum uhah a hen laih ngawlin le a thin pulhang ni a hen laih ngawlin thu ngaisung thiammi hi toh un.
3 Ngamsung a um, noh mi lungnem le a thukham a zuitute Topa i nelah kikleh toh un. Thildik bawl unna, Topa i mai ah lungnemmi hi un. Topa in, a thinuknak a langtik ni ten dantatnak pen suakca thei tuk uh ci.
Israel Elkim Miphun Tei Bonak
4 Gaza khuapi sungah kuamah a tang um tukma hi. Ashkelon cu zamsan haw tuk hi. Ashdod mite cu ni lang sungin hawlvawk khawng hi haw tuk a, Ekron mite cu a khuapi haw pen hawlvawk khawng hi haw tuk hi.Ref 2:4-7 Isa 14:29-31; Jer 47:1-7; Ezk 25:15-17; Joel 3:4-8; Amos 1:6-8; Zek 9:5-7;
5 Noh Filistin mi, tuipi mawk a ummite, bothal zo uh ci. Topa in, na humah thusonnak nei zo. Siatsuah tuk a, pa khat hei suakca tukma uh ci.
6 Tuipi mawk a, na ngam uh cu tuucing ngiahbuk le tuu tei tatnak hampa lakin cang tuk hi.
7 Na ngam uh cu Judah mi a tang calam ten luah haw tuk hi. Mahlai ah a tuucing haw tuk a, Ashkelon a innte ah cam haw tuk hi. Topa a Pathian haw cu amu nelah um tuk a, mi neinungin cangleh haw tuk hi.
8 Cungnungbel Topa in, “Moab mi le Ammon miten ka miphunte a zotsak haw le a nautatnak haw za zo ing. A ngam haw sut khawng tuk hung tin, a tuangkhawnnak haw vang za zo ing.Ref 2:8-11 Isa 15:1-16:14; 25:10-12; Jer 48:1-49:6; Ezk 21:28-32; 25:1-11; Amos 1:13-15;
9 Israel tei Pathian nung ka hih bangin, Moab le Ammon cu Sodom le Gomorah bangin siatsuah khawng hi tukin tiam ing. Ci khuk umnak munin cang haw tuk hi. Kumkhua in sia cimit tuk a, hampa bek po tuk hi. A tang calam mihing ten siatsuahin, a ngam cu luahtum haw tuk,” ti hi.Ref 2:9 Pian 19:24;
10 Mahti bangin Moab mi le Ammon mite cu ngal le pualthau in, Cungnungbel Topa i mihingte a zotsak haw hangin dantatnak tawk haw tuk hi.
11 Topa cu amu ca in lauhuai zetmi hi tuk hi. Leihum pathiante cu imah ngawlin bawl khawng tuk hi. Miphun hempohin amah cu amu umnak le amu ngam tek pen bia haw tuk hi.
12 Topa in, Ethiopia mite vang thitik tuk hi.Ref 2:12 Isa 18:1-7;
13 Topa in, Assiria siatsuahnakah a huham mang tuk hi. Nineveh khuapi cu tui um ngawlnak phillawnin cangtik tuk a, zamsanmi buaksehin cang tuk hi.Ref 2:13-15 Isa 10:5-34; 14:24-27; Nah 1:1-3:19;
14 Khui, tuu le ngamsa phunkim tei kualnak munin cang tuk hi. Buakseh lakah simbu um tuk a, kongkano pen ham li tuk hi. Inn hum a, sidar thing hempoh cu laksak khawng hi haw tuk hi.
15 Kei ngilzet ing tin, a pualthaumi le kei him ing tin, a ngaisungtu tei humah mahti bang thute cu heng tuk hi. Leihum pen a khuapi uh hi ngengbel hi tin, khua sungmi ten ngaisung haw hi. A khuapi haw cu ngamsa ngiahnak ngamkhingin cang tuk hi. A mutu hempoh ten lamdangsa in canzok haw tuk hi.