HAGGAI
Laibu
(The Book of Haggai)
Thulamsial
Haggai laibu cu 520 BC laih a, profet Haggai nel a Topa hilhmi thu comno ngat mi hi. Judah mite cu saltannak pen kiklehin, hun tawkmoh cu Jerusalem ah umleh zo haw hi. Mahnaven Biakinn cu abang lengin sia laih hi. Haggai in biakinn saleh tukin sosuahin Pathian in lemdaihnak thupha pia tuk ti hi.
1
Biakinn Sa Tukin Topa i Thupiak
1 Darias in Persia kumpi a deh kum nihnak, ha luk ha, ni khat ni-in, Topa i thu cu profet Haggai nelah heng hi. A hengmi thu cu Judah ngamuktu bawi Sheatiel capa Zerubabel i ca le Thiampi Sang Jehozadak capa Joshua i ca hi.Ref 1:1 Ezr 4:24-5:2; 6:14;
2 A sangbel Topa in Haggai nelah, “Tu hun hi Biakinn saklehnak tukin hun lemcang ma laih tin mipi ten ti li haw hi.”
3 Mah hangin profet Haggai mangin mipi nelah Topa i thu cu hi bangin heng hi.
4 “Ka mihingte, ka Biakinn buakseh bangin a umlaihin, ita nohte cu inn phapha ah um si uh ci?
5 Na hum uh a thil a hengmi hi mu ma uh cim maw?
6 Anci tampi in cing uh ci, mahnaven an dawmno bek cawm uh ci. An eih tuk nei uh ci, mahnaven vonvah thamin, ei ma uh ci. Sabit intuk nei uh ci, mahnaven kham tham hei nei ma uh ci. Puan silh tuk nei uh ci, mahnaven khawlum tham tuk puan pha nei ma uh ci. Nadektu pa vangin pumcawmnak thamin lawh ma uh ci.
7 Itahim titale hi bangin na hum uhah a piangmi hi thei ma uh cim maw?
8 Mualhumah kai un, thingte la in, Biakinn saleh un. Ka lungdam tung a, mahlai ah ka sunloihnak langtik tung hi.
9 An hauzet tuk hung tin, ngaisung uh ci, mahnaven na cop khawm ngangai uh cu dawmno hi. Na an uh cu innah na puak uhten keimah in mutvawk khawng ing. Itahim ka muhvawk tih thei uh cim? Na venghawng uhin nangmu inntek sa in, man thei ngawlin na um laihtak uhin, ka inn cu phiatlet sami buakseh bangin na umtik uh hang hi.
10 Mah hangin ven nguahzu ngawlin imah a po theih ngawl cu!
11 Nguahzu ngawlin lei kotik khawng ing; mualhum, lolai sung le sabit huan, olif huante, leihum a pomi ankung humah le mihing le ngan ngulh humah mihing tei a cin haw mi na hempoh humah nguahzu tuk ngawlin kotik ing,” ti hi.
Mipi Ten Topa Thupiak Zui Haw
12 Zerubbabel, Joshua le Babilon saltannak pen a pinlehtu hempohin Topa Pathian i hilhmi cu dek haw hi. A thinsu haw in, Topa i palai profet Haggai i thu cu ngai haw hi.
13 Haggai in Topa i thu cu mipi nelah hilh hi; “Nangmu nelah um tung, tin thutiam ing,” ti hi.
14 Topa in, mi hempoh cu Biakinn sa tukin a thin haw sotik hi. Judah ngamuktu bawi Zerubbabel, Thiampi Sang, Joshua le saltannak pen a pinlehtute tel khawng haw hi. Cungnungbel Topa Pathian i Biakinn cu saleh pan haw hi.
15 Darias in, Persia kumpi a deh sawng kum nih kum, ha luk ha, ni sawm nih le ni li ni-in, sa pan haw hi.