ZEFANIAH
Laibu
(The Book of Zephaniah)
Thulamsial
Profet Zefeniah i thuhilh hun cu 650 BC hawng hi in, 621 BC kum kumpi Josiah in biaknak a lep deuh laihngawl kum sawm sung hi tuk hi. Hi laibu sungah profet dang tei hilhsa mi vang tel bok hi. Mahmi cu Judah miten Pathian dang a biak haw hangin Pathian in dantat tuk hi. Topa in miphun dangte vang dantat tuk hi. Man Jerusalem cu sia tuk naven lemleh hi tukin a sungah mi nunnem le mi dikcangte um haw tuk tin ngan hi.
1
1 Amon capa Josiah in Judah kumpi a deh laihin, Topa i thu cu Zefeniah nelah heng hi. Zefeniah cu kumpi Hezekiah i casuan hi in, a pu le pate cu Amariah, Gedaliah le Kushi haw hi.Ref 1:1 2Kum 22:1-23:30; 2Khang 34:1-35:27;
Topa i Thukhen Ni
2 Topa in, “Leihum a um ihempoh cu siatsuah khawng tung.
3 Mihing hihen, ngamsa hihen, vano le ngasa tiangin siatsuah khawng tung. Mipha ngawlte siatsuah khawng tung. Mihing cu cimittik tung a, pa khat hei suakca haw tukma hi. Topa keimah in son zo ing.
4 “Judah mi le Jerusalem mite bawlsia tung hi. Baal biaknak a tang calamte vang siatik khawng tung a, Baal i nadektu thiampite cu kuamah in theileh haw tukma toh hi.
5 Inn humah kaito in ni, hade le aksi a biatute cu siatsuah khawng tung hi. Keimah a biatu le ka min suangin, tiamdunnak bawltu hi haw naven Milkom min tuah tiamdunnak a bawltu cu siatsuah tung hi.
6 Keimah zamsanin, a zuileh ngawltu le ka nelah a hung ngawltu, keimah thu a sonpih ngawltu cu siatsuah khawng tung,” ti hi.
7 Topa i thukhennak ni cu nai zo hi. Mah hangin a mai ah daino in um un. Topa in, a miphunte cu biakpiaknakah piak tuk tumtahin, Judah ngam siatsuah tukin ngalte sawm hi.
8 Topa in, “Biakpiaknak piak ni ten,” kumpi capate le bawite, miphun dang tei nun daan a zuitute cu dantatleh tung hi.
9 Lawki mi bangin dawih a biatu le a pathian inn sungah nate a dimin, um tukin mi a thattu le ngucate cu dantatleh tung hi.
10 “Mah ni ten,” Jerusalem khua a, Ngasa Kongka ah kahnak aw za tuk uh ci. Khua thak vengah taunak aw za tuk uh ci a, mualhumah thum dudumin, a cakkeh thawm za tuk uh ci.
11 Noh khuapi nuailam a umtute cu; mah thawm na zak uhten nohte vang kapin, au li un hi. Itahim titale sumbawltute cu thi khawng haw tuk hi.
12 “Mah hun ten, mei inn kengin Jerusalem khua sung cu zei tung hi. Mah le mah muangdunzet le lungmuang zetin, a umtute, “ Topa in imah bawl awng ma; a pha hei bawl ma, a sia hei bawl ma’ tin, a titute cu bawlsialeh tung hi.
13 A hauhnak haw cu lonsak khawng hi haw tuk a, a innte cu siatsuah khawng hi haw tuk hi. A sak lih haw mi a innte cu ngak awng haw tukma hi, a phut lih haw mi sabit kung i sabittui cu in awng haw tukma,” ti hi.
14 Topa i ni cu nai zo hi: naizet zo in, a ngei ngawl heng paih tuk hi. Mah ni cu siatnak ni hi tuk hi, itahim titale ngalkap a hangbelpa vang lungbingin kap tuk hi.
15 Mah ni cu thinukzet ni hi tuk a, haksat le mangbang a um ni, siatsuah ni le bolal ni, khuathim ni le lungbing ni, ni thim le khua nim ni hi tuk hi.
16 Ngaldonak thawmvang le pengkul aw tuah a dim ni, ngalkap ten kulhtian khuapi le ngalvilnak innsangpite do tukin le a do thah haw in, a aunak tuah a dim ni hi tuk hi.
17 Topa in, “Mihing hum a, siatlalnak a hentik mi cu nasezet tuk a, mi hempoh cu mitcaw bangin vak haw tuk hi. Ka humah a sual leita haw hangin a thisan haw cu tui bangin bua lei in, a luang haw cu leihumah uih zetin muatcih haw tuk,” ti hi.
18 Topa in, a thinuknak a langtik ni a hen ten a sui le ngun ten kuamah pan thei tukma hi. A thinuknak meipi in lei buppi cu kang tuk hi. Leihum a um mi hempoh hi thakhat thu in, a nunnak haw botik tung hi.