4
Zilhnak Man Ngawlte
1 Hun dawllam ten mi khenkhat ten Khristian upnak zamin; zolthu son thei hawvangte sangin, khawhuai tei zilhnakte zui haw tuk hi, tin Hawvang Thiangtho in ciang zetin hilh hi.
2 Mahtibang zilhnakte cu mizol thiam ten pungzaitik haw hi. Amuhte cu thiksa noih bangin sia le pha khenkhuai theihnak lungmu a nei ngawlmite haw hi.
3 Mahti bangmi ten nupa huaidunnak le an a khenkhatte eih thiang ma tihte zilh haw hi. Mahnaven Pathian in mah ante cu eih tuk bawlin Pathian a umtu le thuman a theitu tei ca in lungdam thungetnak tuah eih thei tukin tui le ante cu Pathian in bawl hi.
4 Pathian i bawlmi hempoh cu thiang khawngin, vawk tuk imah umma hi. Mahnaven ihempoh cu lungdam thungetnak tuah cosan tuk ngeh hi.
5 Itahim titale Pathian i awnkam hei in hihen, thungetnak tuah hei in hihen, thiangthotikmi a hih zo toh hangin hi.
Khrih Jesuh Nadektu Pha
6 Hi zilhdunnakte hi, Khristian a unaupih uhte na hilh tale, na zuimi upnak le a manmi thupom zui in, na man hangin nang cu Khrih Jesuh i nadektu pha hi tuk ci.
7 Mahnaven Pathian thu tuah pehdunnakin, sullam a nei ngawlmi, hilhdun tuk hei in, a tak ngawlmi tangthu thawthongte cu pialin hi. Pathian deihzawng nung tukin zilhdun leleng un hi.
8 Taksa damnak tukin cunmi cu man nei bok naven hawvang damnak tukin cunmi cu ihempoh ah man a neimi hi. Itahim titale atu-in hihen, mailam ca hei in hihen, nunnak tukin thutiam hi.
9 Hitin ka hilhmi hi thuman hi a, up tak le co takmi hi.
10 Cim le kham zetin nadek hung; itahim titale kumkhua in, a nungmi Pathian humah a muansannak uh bulh hung hi. Mah Pathian cu mi hempoh Nunpantu hi a, amah a umtu tei ca in, a cuangcung hi.
11 Hi zui tukmi le thuzilhnakte hi hilh inna zilhin hi.
12 Khangno na hihnak hangin kuamah in nautat haw pahsuh hen. Mahnaven na otdan, na umdan, na ziaza, itnak, upnak le thianthohnakah thu umtu dang tei zohteh tak tukin nungin hi.
13 Na lakah ka hen laih ngawl sung cu mipi tei mai ah Lai Thiangtho sialin, thuhilhnak le thuzilhnakin, na hun le na zaangtha cu mangin hi.
14 Profet ten thuhilhin, upa ten na lu humah khutsuan haw laih a, na ngahmi Hawvang laksawng khi hahsuah pahsun hi.
15 Na khantoh zia khi mi hempoh ten amuh theihnak haw tukin hite hi na hun le na zaangtha pia in mangin hi.
16 Na nundan ngalling inna, na zilhmite vang ngallingin hi. Hite cu a catngawlin bawlin hi. Na bawl leleng thei tale nangmah le na thuzilhmi a zatu tei nunpan ngah tuk ci.