TIMOTE
Lakah Paul i Laikuat Vei Khatnak
(Paul’s First Letter to Timothy)
Thulamsial
Timote cu Asia Minor ngam a ummi Khristian khangno hi. A pa cu Grik mi hi in, a nu cu Judah mi hi. Paul i Pathian nadehnakah a dehpih le bawmtu hi. Timote lakah Paul i laikuat vei khatnak sungah thil thupizet pa thum um hi.
(1) Pawlpi sung a zilhdunnak man ngawl a ummi tuah pehdunin ngallinnak thu ngan hi. A zilhnak haw cu Judah le Judah ngawl tei ngaihsutnak cokhelmi hi. A zilhbelmi cu a lei tisa nun uh hi a pha ngawlmi hi. Mah hangin kuamah i theih ngawlmi thu-ip theih theihnak, zi le pasal neih ngawlnak le an a khenkhat ei ngawlin cannak bek tuah nunpatnak ngah theih hi, tin ti haw hi.
(2) Hi lai sungah pawlpi cinkhawinak lam le Pathian biak khawmnak thuzilhnakte vang tel hi. Lampuitu ten iti bang ziaza neih tuk tih thu vang tel hi.
(3) Jesuh Khrih i nadektu pha hi iti bangin hi thei kam nung? tih thu Timote lakah ngaihsutnak pia hi. Jesuh umtu tei humah deh tuk dehvo a neihnakte vangin hilh hi.
1
1 Ohtei Nunpantu a Pa uh Pathian le a muansan uhmi Jesuh Khrih i hangin Khrih i tiikmi keimah Paul in,
2 upnak sungah ka capa ahi ngangai mi Timote na lakah laikuat ing.
A Pa uh Pathian le a Topa uh Jesuh Khrih in hehpihnak le lemdaihnak thupha pia zal tahen.Ref 1:2 Nung 16:1;
Zilhnak Sualte Ngallinnak
3 Macedonia ngam ka hawh tuk ten ka hilhsa zo bangin Efesa khua ah na um tuk khi deih sak ing. Efesa khua a zilhnak man ngawl a zilh litu khi mahtih bang zilhleh tuk ngawltohin kham loli in, tih deih ing.
4 Thu eldunnak tuk bek a piangtiktu tangthu thawthong le a suahkehnak haw pupa min sauzet a ngatmi a uangdunnakte lawl tukin hilhin hi. Itahim titale mahtibang miten Pathian i tuptahnak ngangai kimtik thei haw ma hi. Upnak tuah bekin Pathian i tuptahnak theihtheih hi.
5 Hitih bangin ka tih ten ka tuptahmi cu lungmu thiang sung pen a tulmi itnak le sia le pha khen theihnak lungmu thiang le a manmi muannak um hen tih deihnak hangin hi.
6 Mahti bangte cu mi khenkhat ten zui ngawlin a nemcuam ngawlmi thu eldunnakte bawlin lampial zo haw hi.
7 A son haw mi thu nangawn i sullam hei thei haw ma hi. Mah hi lak pen Pathian i daan thu le la ah zilhtu dek nuam haw lai hi.
8 Daan cu a hihnak bangin man ten pha mi hi, tih cu thei hung hi.
9 Mahnaven a cintuk uh a kulmi cu daan tihmi cu mipha tei ca in bawlmi kha ma hi; Daan a palcattu mipha ngawl, Pathian a simsial ngawlmite le biaknak lam hihen hawvang lam hihen a simsial ngawlte, a nu le pa thattute, mihing thattute daan nei ngawlin a nungte,
10 numei le numei sualnak a bawltute, pano le pano sualnak a bawltute, mihing a ngutute, zolthu sonte, thuman ngawl tei lamah a tangte, ahimata a manmi thupom a kalh zawngin, a nungtu tei ca in bawlmi hi.
11 Mahti bang zilhdunnak cu keima lakah theitik tukin a zilhmi Thuthangpha umin, mah Thuthangpha cu sunloih le upatmi Pathian lak pen a hengmi hi.
Pathian Hehpihnak Hangin Lungdamnak
12 Ka nadeh theihnak tukin thazaang a piatu a Topa uh Jesuh Khrih lakah lungdam thu hilh ing. Ni dang laihin, amah cu sonsia ing, bawlsia in zawnsak awng li naveng,
13 ama nadektu tukin tengin, a nadektu tukin tak hi tin, a ngaihsut hangin thangphat ing. Pathian cu kei hehpihtu hi, itahim titale upnak imah nei mang, ka bawlmi ihim tih hei thei mang hi.Ref 1:13 Nung 8:3; 9:4-5;
14 Topa in, a hehpihnak cangkim cu leihin upnak le itnak pia hi. Mahmi upnak le itnak cu Khrih Jesuh tuah a pehdunnak uh i hangin eimuta hi zo hi.
15 Khrih Jesuh cu misual tei nunpan tukin leihumah tolh hi tihmi cu a manmi awn hi a, cangkim zetin pomtak le santak hi, mah misual tei lak pen kei cu misualbel ing.
16 Mahnaven Pathian in ka humah hehpihnak nei hi. Mahtibang a neihnak cu tunung lam ten Khrih Jesuh cu umin, kumkhua nunnak a ngahtu tuk tei ca in zohtehtak hi tukin misual hempoh lak pen misualbel keimah lakah a langtik zo hangin hi.
17 Kumkhua in Kumpi, thihnak i neh zawh ngawlmi le mitmuh theih ngawlmi Pathian, amah bek Pathian tatak hi a, a lakah upatnak le sunloihnak kumkhua in kho leng tahen! Amen.
18 Ka capa, Timote aw, ni dang laihin nangma ca ngaisungin profet tei hilhnak bangin hi nadeh hi nangmah ap ing. Komno dek thei tukin mah profet tei hilhmite khi hiamnam bangin mang inna,
19 lungmu thiang nei in, na upnak khohtikin hi. Mi khenkhatte cu a sia le pha khen theihnak thu a ngaih nuam haw ngawl hangin a upnak haw siatik mek haw hi.
20 Mahti bangmi tei lakah Himenias le Alexander tel haw in, a pa nih haw in bawlsia ing a, Satan khut sungah hengtik ing. Hitih bangin ka bawlnak cu Pathian a sonsiatnak haw bo hen tihnakin hi.