3
Keimuh Tei Ca In Thungen Un
1 Dawlbelnakin, u le naute aw, Topa i Thuthangpha cu nangmuh tei lakah a pungzai bang bokin manlang zetin, a pungzai pepel theihnak tuk le sunloihnak tuah a co ngah theihnak haw tukin thunget sak un hi.
2 Topa i Thuthangpha cu mi hempohin, a san haw ngawl hangin, Pathian in mipha ngawl le mi sesuak tei sung pepan suak tukin thunget sak un hi.
3 Mahnaven Pathian cu muantak zetin amah in ngilnak pia in, mi ngilo tei khut sung pen humhim tuk hi.
4 Nangmuh ka muansannak lungmu cu Topa in pia in, ka zilh uhmite atu zui in mailam hun hei ah zui tuk uh ci tin um ung hi.
5 Pathian itnak le Khrih i piakmi thuakzawhnak cu tam sesemin thuak theihnak tukin Pathian in lamhuai sesem tahen.
Nadeh Tuk Dehvo
6 U le naute aw, Topa Jesuh Khrih minin, mi thazawng le ka thuzilh uhmi bangin a zui ngawltu, u le naute cu pial un tin hilh ing.
7 Keimu deh bang bokin nadeh uh tuk cu theiciang zo uh ci. Nangmu lakah ka umlaihin thazawngin umthong mang hi.
8 Man pia ngawlin ka lak thong uhmi imah umma hi, keimuh loli heh tin dekin kuamah bawmngit kha tuk ngawlin, sun le zanin dek ung hi.
9 Hitih bangin ka dehnak uh cu nangmu bop tukin nget theihnak thu ka neih uh ngawl hang kha ma hi. Nangmuh tei zui tukin dek saw ung hi.
10 Nangmu lakah ka umlaihin, “Nadek nap ngawltu cu an hei ei pahsuh hen,” tin hilh ing.
11 Hitih hangin ka hilhnak cu nangmu sung pen mi khenkhat thazawng zetin, nadek ngawlin mi dangte nawngkaitik tuk bek bawl hi, tih ka zak uh hangin hi.
12 Mahti bangin a nungca mitei lakah nuncan phano a nun theihnak haw tuk le mai pum cawmnak ca dek thei bok tukin, Jesuh Khrih minin ka bawltik uhmi le ngallinnak ka piak nuam uhmi hi haw hi.
13 Mahnaven u le naute aw, thilpha bawl tukin ciat pahsuh un.
14 Hi laikuat sung a thu bangin a zui le a mang nuam ngawltu nangmu sungah um tuk uh ci. Mahtibang mihing cu kuamah in phial pahsuh un, a zakca tahen.
15 Mahnaven ngal bangin zo pahsuh un, u le nau bangin nun hilh un hi.
Thupha Piaknak
16 Lemdaihnak bulpi ohtei Topa in lemdaihnak cu a phunkimin, i hun bang hunah hei in, pia tahen. Topa cu nangmu venghawng lakah um tahen.
17 \k Keimah Paul in nuksat ing hi, \k* tihmi keima kut loli tuah ngan ing. Lai ka kuatmi hempoh ah hitin ka min khenin, ka ngatdan hi.
18 Ohtei Topa Jesuh Khrih i hehpihnak thupha cu na venghawng uh humah um leleng tahen.