8
David i Ngaldonak
(1Khang 18:1-17)
1 David in Filistin mite cu nehin, Filistin mitei ukmi ngam vang sut khawng haw hi.
2 Moab mite vang nehin, a mat mite cu leihumah boktikin, khau tuah a ken nungten khen thum, khen nih cu thatin khenkhat cu khawih hi. Mah hangin Moab mite cu David i khutnuai ah umin siah pia haw hi.
3 Eufrates Ngun elkim ngamte nehleh nuam a hih haw ten Zobah ngam kumpi, Rehob i capa Hadadezer cu David in do in neh hi.
4 David in Hadadezer i cipuh ngalkap thawng khat le za salih le ke ngalkap thawng sawm nih manin, lengkaitu cipuhte cu a za satcat khawng hi. Cipuh leng za khat dok thei tuk bek khawih hi.
5 Damaskas khua a, Siria ngalkapte cu Hadadezer bawm tukin hung haw a, ngalkap thawng sawm nih le pa nih cu David in that hi.
6 Siria ngam sungah ngalkap koihin, a khutnuai ah siah pia in um haw hi. A hawhnak hempoh ah Topa in David cu ngalnehtu hitik hi.
7 Hadadezer kumpipa i ngalbawi tei kenmi sui lumphawte cu David in la in, Jerusalem ah hawhpih hi.
8 Hadadezer i ukmi Betah le Berothai khuapi pen daak tampi vang la hi.
9 Hadadezer i ngalkap hempoh cu David in neh khawng hi, tih cu Hamath khua kumpi Toi in, a zak ten,
10 a capa Joram cu David nuksat tukin le lungdampih tukin David lakah hah hi. David i nehmi Hadadezer cu kumpi Toi in vei tampi do zo hi. Mah hangin Joram in sui le ngun le daal tuah bawlmi khokhengte David lak khokhengte tuah David laksawng pia tukin hunpih hi.
11 David Kumpi in khokhengte cu Pathian biaknakah man tukin pia hi. Edom ngam, Moab ngam, Ammon ngam, Filistin ngam le Amalek ngamte a nehnak pen a lakmi sui le ngun le
12 Zobah kumpi Hadadezer lak pen a lakmi na sunglawi khenkhatte vang Pathian nelah pia hi.
13 David in Ci Munlawn a um mihing thawng sawm le thawng liat a thah pepan a minthang dedeuh hi.Ref 8:13 Saam 60 Thulu
14 Edom ngamsung mun tampi ah ngalkap koihin, Edom mite cu a khutnuai mi in cang haw hi. Khua tihkimah Topa in David cu nehtu hitik hi.
15 David in Israel ngam buppi cu ukin, a mihingte cu lemno in le thuman zetin uk hi.
16 Zeruiah i capa Joab cu a ngalkapte hotu hi. Ahilud i capa Jehoshafat cu cazin lentu hi.
17 Ahitub i capa Zadok le Abiathar i capa Ahimelek cu thiampi hi haw hi. Seraiah cu zung cazi hi.
18 David kumpi cingtu Kereth mi le Peletha mite hotu cu Jehoiada i capa Benaiah hi. David i capate cu thiampi haw hi.