7
David Lakah Nathan Thucahmi
(1Khang 17:1-27)
1 David kumpipa cu ngal nei ngawlin ngamuktu hi, a kumpi innah himno in, a um ten,
2 Profet Nathan lakah, “Zoh tehin, ka umnak hi sidar thing tuah sakmi inn hi, mahnaven Pathian Thutiam kuang saw cu buk sungah koihin um,” ti hi.
3 Nathan in, “Na bawl nuam mi cu bawlin hi. Topa na lakah um hi,” ti hi.
4 Mahnaven mah zan cu Topa in Nathan lakah,
5 “David ka salpa i lakah hawh inna, ‘Ka umnak tukin biakinn a satu cu nangmah hi tukma ci.
6 Israel mite Izipt ngam pen ka tulpih pepan tuni tianin biakinn sungah um awng mang hi. Ka hawhnak hempoh pen puanbuk sungah um leleng ing.
7 Israel mite tuah ka hawhnak hempoh ah Israel hotu tukin nadeh ka piakmi puitu tei lakah, ita ka ca in sidar thing biakinn sa ma nge uh cim,’ tin ti awng mang hi.”
8 Mah hangin David cu hilh inna, ‘Keimah Cungnungbel Topa i otmi cu hi bangin hi. Ka mihing Israel mite puitu tukin nangmah cu tuu na khalhnak pen sam ing.
9 Keimah cu na hawhnak hempoh ah telin, na ngalte neh khawng ing. Leihum mi ngengbel bangin mi minthang zetin bawl tung hi.
10-11 Ka mihing Israel ca in mun tengin, mahlai ah kuamah in noksak ngawltohin um haw tuk hi. Hi ngam a hen tung haw pepan amuhte cu mi pualthau ten do leleng haw naven, a tih bangin hileh tukma toh hi. Na ngal tei lak pen hup tung a, casuan tampi pia tung hi, tin thutiam ing.
12 Na nunnak bo in, na pu le pa tei lakah vui na hih hei ten na capa pa khat cu kumpi in bawl tung a, a ukmi ngam cu caktik tung hi.Ref 7:12 Saam 89:3-4; 132:11; Jn 7:42; Nung 2:30;
13 Ka ca in biakinn sa tukin, a casuan cu kumkhua in kho tuk hi.
14 Keimah cu a pa hi tung a, amah cu ka capa hi tuk hi. Mihing ten nunhilhnakah ngolhkang aman bangin mang tung hi.Ref 7:14 Saam 89:26-27; 2Kor 6:18; Heb 1:5;
15 Mahnaven na ihnak cu la kik tuk mang hi. Sualnak a bawl hei ten a pa in, a capa cu nun a hilhmek bangbokin amah cu nun hilh tung hi. Mahnaven nangmah kumpi hi tukin Saul ka vawk bangin le ka nunghek bangin nangmah cu nunghek tuk mang hi.
16 Tu le casuan nei pepelin, na uknak cu a kumkhua in khotik tung hi. Na kumpi uknak cu bo awng tukma hi ti hi,’ tin hilhin,” ti hi.Ref 7:16 Saam 89:36-37;
17 Pathian in, a nelah a phuanmi hempoh cu Nathan in David lakah hilh khawng hi.
David i Lungdamsat Thungetnak
(1Khang 17:16-27)
18 David Kumpipa cu Topa i umnak puanbukah hawhin, a khungin thungen hi. “Maw Topa Pathian ka ca in, na bawlmi hempoh co tukin tak hihim mang hi. Ka innkua pihte vang tak haw ma hi.
19 Topa Pathian, hi sangin tam saw deuh vang bawl tuk laih ci. Mailam hun ten ka casuan tei ca in thutiamnak bawl zo ci. Mah thu cu, Topa ka lakah ciangtik zo ci.
20 Maw Pathian aw, nget tuk imah umma toh hi. Na salpa kei hi thei khawng ci.
21 Hi hempoh hi na bawlmi le na tumtahmi hi. Hizahta in, a lamdang nate nangmah in theitik khawng zo ci.
22 Maw Topa Pathian iti zahin thasiahhuai hi cim? Nangmah bang kuamah um haw ma hi; keimuh loli ka theih khawng zo bangin nangmah bang Pathian kuamah um haw ma hi.
23 Nangma mihing hi tukin na patzomi Israel miphun bang leihumah kuamah umma hi. Nangmah in, na min cu thangtikin, na mihing tei ca thasiahhuai nate tampi bawl ci. Miphun dangte le a pathian dang ten na mihing tei lamtuang tukin hawlvawk khawng ci. Israel mite nata hi tukin Izipt ngam pen na luattik zo mi haw hi.Ref 7:23 Thuk 4:34;
24 Na miphun Israel mite cu kumkhua, na mihingin bawlin Topa Nangmah cu a Pathian hi zo ci.
25 “Mah bangin Topa Pathian, keimah le ka innkua ca in, na thutepmi hempoh cu a kumkhua in kimtik zal inna, bawl khawngin hi.
26 Na min cu kumkhua thangin, miten Humtabel Topa cu Israel uktu Pathian hi tin, ti haw tuk hi. Ka tu le casuante catngawlin kumpi hitik zalin hi.
27 Cungnungbel Topa, Israel i Pathian, ka casuante kumpi a hih lelengnak haw tuk cu keimah na salpa i lakah na langtik zo hangin na lakah ngalpha zetin thu ka nget ngamnak hi.
28 “Maw Topa Pathian, nang cu Pathian hi ci a, na thutepmi cu kimtik leleng ci. Ka lakah thutepnak hitihzah pha in bawl zo ci.
29 Mah hangin Topa, na mitmai pha cotu a hih leleng hawnak tukin ka casuante cu nangmah in muicu pia zalin hi. Topa Pathian, nangmah in thutepnak cu bawlin ka casuan tei humah na muicu cu a kumkhua in um zal hen,” ti hi.