9
David le Mefibosheth
1 Ni khat cu, David in, “Saul i innkua pen a nungmi pa khat bek um haw maw. A um haw tale, Jonathan hangin a hum hawah hehpihnak langtik nuam ing,” ti hi.Ref 9:1 1Sam 20:15-17;
2 Saul i umlawhpa khat Ziba tihmi umin, amah cu David lakah hawhtik haw hi. A hawh ten David in, “Ziba hi cim?” tin dong hi. Ziba in, “Hi ing hi bawipa,” ti hi.
3 David kumpipa in, “Pathian nelah thu ka tep zo bangin Saul innkua tei lakah hehpihnak langtik nuam ing hi; a nungmi pa khat bek um haw laih maw?” tin dong hi.
Ziba in, “Jonathan i capa pa khat a nungmi um naven a ke zawng,” ti hi.Ref 9:3 2Sam 4:4;
4 David in, “Ilai ah um kaw?” tin dong hi.
Ziba in, “Lodebar khua, Ammiel i capa Makhir i innah um hi,” tin hilh hi.
5 Jonathan i capa cu David in sam hi.
6 Saul i casuan, Jonathan i capa Mefibosheth a hen ten upat maizahnakin David mai ah kun hi. David in, “Mefibosheth!” tin sam hi. Amah in, “Bawipa hilai ah um ing,” tin don hi.
7 David in, “Na thinsu pahsun. Na pa Jonathan i keimah a ihnak hangin na humah hehpihnak nei ing. Na pu Saul i leingam hempoh cu pialeh khawng tung a, nangmah cu ka lakah an ei leleng tuk ci,” ti hi.
8 Mefibosheth cu a lu kunin, “Bawipa kei hi uico thisa hei bang mang hi. Ita kei hitihzah hehpihzet cim?” ti hi.
9 Kumpi David in, Saul i umlawh Ziba samin, “Saul le a innkua tei neihmi hempoh cu na bawipa Saul i casuan Mefibosheth lakah pia khawng tung hi.
10 Nangmah le na capate le na umlawh ten a lei ngam haw cu dek unna, bawipa Saul innkua tei eih tukin an kawm un hi. Mahnaven Mefibosheth cu ka lakah an ei leleng tuk hi,” ti hi. Ziba in capa sawm le pa nga le umlawh sawm nih nei hi.
11 Ziba in, “Kumpipa na thupiakmi bangin bawl khawng tung,” ti hi.
Mefibosheth cu kumpi capa bangin David lakah an ei leleng hi.
12 Mefibosheth in Mika tihmi capa pa khat nei hi. Ziba i innkuate cu a venghawng haw in Mefibosheth i umlawhin suak hawta hi.
13 a ke zawng mi Mefibosheth cu Jerusalem ah umin an cu kumpipa lak bebekah ei hi.