24
David In Mipumsial
(1Khang 21:1-27)
1 Israel tei humah Topa cu a thinuk lehleu in, a lak hawah haksatnak hengtik tukin David cu, “Hawh inna, Israel le Judah mite mipumsialin hi,” tin so hi.
2 Mah hangin David in, a ngalkap hotu ngalbawi Joab cu samin, “Na khutnuai bawite tuah a ngam uh langkhat mawk Dan pen langkhat mawk Beersheba tian hawh inna, Israel miphun hempoh mipumsialin hi. Mihing i zong um him tih thei nuam ing,” ti hi.
3 Mahnaven Joab in, “Maw kumpipa, Topa na Pathian in Israel mite atu sangin, a letin pungzaitik zal henna, na nun sungah mu tukin bawl zazal tahen. Mahnaven maw kumpipa, ita mipumsial cu nuam cim,” ti hi.
4 Kumpipa in Joab le a khutnuai bawite cu a thupiakmi bangin a zuitik hangin, a lak pen tulin Israel mipumsial tukin hawh haw hi.
5 Jordan ngun kaltanin Gad ngamsung munlawn a um Aroer khuapi hanglamah cam haw hi. Mahlai pen Jazer ah hawh haw in,
6 Gilead le Hit ngamsung Kadesh ah heng haw hi. Dan ah a hen nung haw ten nitumnak lamah hekin, Sidon heng haw hi.
7 Mah nungten khuapi kulhtian Taiya khua ah hawhin, mah laih pan Hiv khuapi le Kanaan khuapi ah heng haw hi.
8 a ngam buppi ah zin khawngin, ha kua le ni sawm nih a ngei nungten Jerusalem khua ah kik haw hi.
9 Kumpipa i lakah, “Ngaldo tukin hiamnam a cawite hi Israel ngamah pano thawng za liat umin, Judah ngamah thawng za nga um hi,” tin hilh haw hi.
10 Mahnaven mahti bangin mipum sialnak a bawl nungten, David cu a lungmu nop ngawlin, Topa i lakah, “Thil sualzet bawl zo ing. Maw Topa ka sualnak hi ngaidam zalin hi. Sil nadek ing,” tin ngen hi.
11-12 David i thiampi a dektu, profet Gad lakah Topa i awnkam cu hengin, “David i ten tukin thil pa thum pia ing. Pa kha khat teng hen na, a humah kimtik tung hi, tin David hilhin hi,” ti hi. A zingten David a thawh ten,
13 Profet Gad cu a lakah hengin, Topa awnkam cu hilh hi. “Hi pa thum lak pen i bel teng tuk cim? Na uk sung hempoh ah paam kum thum sung tuntik maw? Ahimata na ngal tei lak pen ha thum sung tai lih maw? Ahimata na ngam sungah ni thum sung pulhnat hentik kaw na ten tuk? Phano in ngaisung inna, Topa i lakah hilh kikleh tukin thu hu hilh lehin hi,” ti hi.
14 David in, “Ka ngaihsut hakzet ing! Mihing khut sung hen sangin Topa i khut sungah hen saw nang. Itahim titale Topa cu mi hehpih thiam hi,” ti hi.
15 Mah hangin Topa Israel ngam buppi sungah mah zing pepan a thutepmi hun a kim tianin, pulhnat hengtik hi. Israel ngam buppi sung pen Israel mi thawng sawm salih thi haw hi.
16 Topa vancungmi in Jerusalem khua a siatsuah tuk ten, Israel mite bawlsialeh tuk ngawltohin, Topa cu a lungmu theklehin, mi a that litu vancungmi lakah, “Cawlin hi! Tawk toh hen,” ti hi. Mah laihtakin vancungmi cu Jebus mi Araunah i cangcilnak elah um hi.
17 Israel mi a that litu vancungmi cu David in, amuh ten Topa i lakah, “A khialtu cu keimah ing. Thil sual a bawltu cu keimah ing. Himi bawlsiatnak hi na mihing ten i sualnak kaw a bawl haw? Na bawlsiatnak cu keimah ka innkua humah heng saw hen,” ti hi.
18 Mah ni-in Gad cu David lakah hawhin, “Araunah i cangcilnakah hawh inna, Topa i ca in biaklan dawhin,” ti hi.
19 Profet Gad i hilhmi Topa i thupiak bangin David hawh hi.
20 Araunah in, a zoh ten kumpipa le a khutnuai bawi a hun lih haw cu mu hi. Mahbek ten hawhin, David i mai a lei ah bokin,
21 “Maw kumpipa, ita kei na salpa hi leng nge cim!” tin dong hi.
David in, “ Topa i ca in biaklandawh ka bawl nuam hangin hung ing,” ti hi.
22 Araunah in, “Maw kumpi pa, na kul mi hempoh la inna, Topa i lakah pia in hi. Biaklandawh humah meihal biakpiaknak tukin hilai ah khuicang um hi. Tuah tukin thing, khui ngawngkol le cangcilnak solte vang um hi,” ti hi.
23 Araunah in, a neihmi hempoh cu kumpipa i lakah pia in, “ Topa na Pathian in, na biakpiaknak cu sang zal tahen,” ti hi.
24 Mahnaven kumpipa in, “Kha ma hi, amah in pia khawng tung ti hi. Amah in imah ka piak ngawlmi cu Topa ka Pathian nelah biakpiaknakin pia tuk mang hi,” ti hi. Araunah i cangcilnak mun le khuicang cu tangka sawm nga in lei hi.
25 David in Topa ca tukin biaklan dawhin, mah humah halkang biakpiaknak, pawlkom biakpiaknak pia hi. Topa in, a thungetnak haw ngai in, Israel ngamsung a pulhnat cu cawl hi.