KUMPI
Laibu
(The First Book of Kings)
Thulamsial
1 Kumpi laibu hi Samuel laibu sung a, Israel tei tangthu pehzommi hi. Hi laibu hi khen thumin khen theih hi.
(1) Solomon i Israel le Judah tei kumpi a hihnak le a pa David i thihnak thu.
(2) Solomon i uknak le nehnak sialsiah tuk a takmi pa khat cu Jerusalem Biakinnpi thu hi.
(3) Saklam ngampi uknak le hanglam ngampi uknak tin, a khennak haw thu le mah ngam cu 850 BC tiang a uktu kumpi tei tangthu vang um hi.
Kumpi laibu a pa nihnak sungah uktu cu Pathian nelah muantak haw maw muantak haw ma hum tihmi in, a nadeh haw lawhting tuk le lawhting tuk ngawl ciangtik hi. Milim biaknak le thu ngaih ngawlnakin siatlalnak hengtik hi. Saklam ngam kumpi cu hi thu ah lawhting haw ma hi. Hanglam Judah kumpite cu lawhting le ting ngawl um haw hi.
Kumpi laibu a pa khatnak sungah, a lang cuang deuh mi cu Topa i profet tei nadehnak hi a, amuh ten ngalpha zetin milim bia tuk ngawlin le Pathian thu ngai tukin sosuah haw hi. Mah tei lak pen sialsiah tak minthang cu Elijah hi a Baal profet tuah a eldunnak haw mu thei hung hi.
1
David Tek Zo
1 David Kumpi cu tekzet tohin puan a thuah li haw hei in, a khua lum thei cuang ma hi.
2 Mah hangin a khutnuai a, bawi ten, “Kumpipa, na lakah um tukin le nangmah zotu tukin khanglai him pa khat zei tuk ung. Na lakah zau tuk a, na khua lum tuk hi,” tin ti haw hi.
3 Israel ngamsung hempoh ah khanglai mawi zei haw in, Shunem khua ah Abishag tihmi khanglai mu haw a, kumpipa i lakah hawhpih haw hi.
4 Abishag cu khanglai mawizet na hi a, kumpipa cu phano in zo hi. Mahnaven kumpipa in zi bangin zaupih ma hi.
Adonijah In Kumpi Cuh Hi
5-6 Absalom a thih nungten David le Haggith tei capa Adonijah cu a nungdammi tei lak pen capa upabel hi. Mi piangzet hi a, kumpi deh a tum leleng pa hi, mah hangin, “Kumpi dek tung hi,” tin na timek hi. Mahnaven, David in liat awng ma hi. Adonijah in amata tukin cipuh le cipuhleng nei in, amah cingtu tukin mihing sawm nga koih hi.Ref 1:5-6 2Sam 3:4;
7 Adonijah in Zeruiah i capa Joab le thiampi Abiathar tawkin amuh vangin a tupmi cu lungkimpih haw hi. (Zeruiah cu Joab i nu hi)
8 Mahnaven thiampi Zadok, Jehoiada capa Benaiah, profet Nathan, Shimei, Rei le David cingtu ngalkapte cu Adonijah lamah tang haw ma hi.
9 Vei khat cu Adonijah in Enrogel tuikhuk el um Zoheleth Suangpi a tih haw munah biakpiaknak bawlin tuu le khui le a thau zetmi khuino tampi ngo in, an ei tukin a unau dangte le kumpi David khutnuai bawite vang sam khawng hi.
10 Mahnaven a nau Solomon, profet Nathan le Benaiah cu sam kha ma hi. Kumpi cingtute vang kuamah sam ma hi.
Solomon Kumpi Dek
11 Nathan cu Solomon i nu Bathsheba lakah hawhin, “Haggith capa Adonijah kumpi dek zo hi tih za zo ci mei? Mah thu cu David Kumpi in imah thei ma hi.Ref 1:11 2Sam 12:24;
12 Nangma nunnak le na capa Solomon i nunnak na hup nuam tale na bawl tukmi hilh tung.
13 David Kumpi lakah manlang zetin hawh inna, a lakah, ‘Maw kumpi pa, ka capa Solomon cu nangmah thektu tukin ka lakah thutiam zo mata cim?’ Ita tubang ten Adonijah saw kumpi a deh tumsial theihnak?” ti in hi.
14 “Kumpipa na otpih laihin keimah vang tum bok tung a, na thuhilhmi man hi tih thu hilh bok tung,” ti hi.
15 Mah hangin Bathsheba cu kumpipa i zaunak khanah David tawk tukin hawh hi. David cu a kum upazet toh a hih hangin Shunem khanglainu Abishag in phano in, na zo hi.
16 Bathsheba cu kumpi David mai ah kunin, David in, “Ikaw na kin?” tin dong hi.
17 Bathsheba in, “Kumpi bawipa, ka capa Solomon cu nangma ai-awhtu kumpi hi tukin Topa na Pathian min salin thutiam zo ci.
18 Mahnaven atu-in Adonijah cu kumpi hi zo in, nangin imah thei ma ci.
19 Khui tampi le tuu le a thaumi khuino tampi ngo in biakpiaknak bawlin, an eih khawmnakah na capate, thiampi Abiathar le ngalbawi Joab zawm haw hi. Mahnaven na capa Solomon cu zawm kha ma hi.
20 Maw Kumpi bawipa, nangma nungten akua in kumpi dek tuk him tih thei nuamin, ituk ten kumpipa in thutheitik tuk nen tim tin, Israel mi hempoh ten nangmah bek zo haw hi.
21 Na hilh ma tale, na thih nungten keimah le ka capa Solomon cu misualin bawl haw tuk hi,” ti hi.
22 Mahti bangin a otlih laih takin
23 profet Nathan heng zo hi, tin kumpipa cu hilh haw hi. Nathan cu tumin, kumpipa i mai ah kunin,
24 kumpipa cu, “Maw kumpipa, Adonijah cu nangmah thek tukin than zo cim?
25 Tuni in biakpiaknak munah hawh a, khui tampi le tuu le a thaumi khuino tampi ngo in biakpiaknak bawl hi; na capate, na ngalkap hotu bawi Joab le thiampi Abiathar zawm hi. Atu-in an eih puai bawl haw a, ‘Kumpi Adonijah a nunkhua sau tahen,’ tin au li haw hi.
26 Mahnaven keimah le thiampi Zadok, Benaiah le Solomon cu zawm haw ma hi.
27 Na khutnuai bawite hei nangmah thektu tuk hilh laih ngawlin hiti bangin bawl haw hi. Kumpi nangma lungkim pihmi hi maw?” tin ti hi.
28 David Kumpi in, “Bathsheba samleh hem un,” ti hi. Bathsheba cu tumin David i mai ah ding hi.
29 David kumpipa in Bathsheba lakah, “Haksatnak a phunkim lak pen kei a huptu Topa i minsalin thutiam ing.
30 Na capa Solomon cu keimah thektu kumpi hi tuk hi, tin Israel Pathian Topa min salin thu ka tepsa mi cu tuni in kimtik tung,” ti hi.
31 Bathsheba cu kunin, “Kumpi bawipa cu a nunkhua sau zal tahen,” ti hi.
32 David Kumpi in Zadok, Nathan le Benaiah sam tukin thupia hi. Heng haw a,
33 a lak hawah, “Ka khutnuai bawite tuah hawhin, ka capa Solomon cu ka cipuh humah khungtik unna, Gihon lui ah na zui un.
34 Mahlai ah thiampi Zadok le profet Nathan in Solomon cu Israel kumpi tukin sathau thih un hi. Pengkul tum unna, ‘Kumpi Solomon a nunkhua sau zal tahen,’ tin au un hi.
35 Mahceng ten hilai ah zuileh unna, ka kumpi khunnak humah khung tuk hi. Solomon cu Israel le Judah uktu tukin ka tenmi a hih zo hangin keima ai-awhtu hi tuk hi,” ti hi.
36 Jehoiada i capa Benaiah in, “Na hilh bangin bawl hi tuk hi. Topa na Pathian in khotik zal tahen.
37 Topa Pathian nangma lak a um bangin Solomon lak hei ah um zalta henna, a uknak cu nangma uknak sang hei in, khangto pepel zal tahen,” ti hi.
38 Kereth le Peleth miphun thiampi Zadok le profet Nathan, Jehoiada capa Benaiah le kumpi cingtu ngalkap ten Solomon cu kumpi David i cipuh humah khungtik haw a, Gihon lui ah hawhpih haw hi.
39 Puanbuk thiangtho sung pen a cawimi olif thau bung cu Zadok in la a, Solomon cu sathau thih hi. Pengkul tumin, a venghawng haw in, “Kumpi Solomon a nunkhua sau zal tahen,” tin au haw hi.
40 Kumpi Solomon cu a venghawng haw in kumpi innah zui lehin, pheveu tumthahin, lungdam thatui zetin au in mah a authawm haw hangin lei tian hing khawng hi.
41 Adonijah le a sawm mite an a eih celh haw ten mah thawmnging cu za haw hi. Joab i pengkul tum mi a theih ten, khuasung lam a, thawmnging cu ikaw? ti hi.
42 A ot celh laih ngawlin thiampi Abiathar i capa Jonathan cu na heng hi. Adonijah in Jonathan lakah, “Tumin hi. Nang cu muantak hi ci, mah hangin thupha hunpih tuk ci,” ti hi.
43 Jonathan in, “Thupha kha ma,” Kumpi bawi David in Solomon cu kumpi in bawl zo hi.
44 David in Kereth le Peleth miphun thiampi Zadok le profet Nathan, Jehoiada capa Benaiah le kumpi cingtu ngalkapte hahin Solomon zui haw hi. Kumpipa i cipuh humah khungtik haw in,
45 Gihon lui ah Zadok le Nathan in sathau thih haw hi. Mahlai pen kikleh haw a, mi hempohin, a zak uhmi cu mah thawmnging hi.
46 Solomon cu kumpi hi zo hi.
47 Mah hum pen kumpi khutnuai a bawite kumpi David lakah hawhin upatnak a piak nung haw ten, ‘Na Pathian in Solomon cu nangmah sangin minthang deuhin bawl zal tahen. A uknak cu nangma uknak sangin khangto zal hen,’ ti haw hi. Kumpi David cu Pathian upatin, a zaunak humah a lu kunin,
48 “Ka sungsuak ka cano pa khat cu keimah ai-awhtu kumpi in, a bawl hangin le mahmi muta tukin ka nunnak a khawih hangin Israel i Pathian, Topa cu thangphatin um hen,’ tin thungen hi,” ti hi.
49 Adonijah i ngualcamte cu thinsuzet thahin tul haw a, amu nuamnak tekah pin haw hi.
50 Adonijah vang Solomon a lau hangin a thinsu in Puanbuk Thiangtho sung pen hawhin biaklandawh khuamkite pom hi.
51 Adonijah in Solomon a lau hangin biaklandawh khuam pom hi tih thu Solomon kumpipa hilh haw hi. Adonijah in, “Masabelin, keimah that tuk ngawlin Kumpi Solomon in ka lakah thutiam hen,” tin a tihmi vang Kumpi Solomon lakah hilh haw hi.
52 Solomon in, “Ka humah muantak zetin, a um ahi tale, a lu hum a, samzang khat hei siatsuah hi tukma hi. Mahnaven ka humah a muantak ma tale thi tuk,” ti hi.
53 Kumpi Solomon in Adonijah cu samin biaklandawh ata cu pui haw hi. Adonijah cu hungin kumpipa i mai ah kun hi. Solomon in, “Innah pinin hi,” ti hi.