23
David Awnkam Nungdawlbel
1 Jesse capa Pathian i cawisan mi, Jakob i Pathian in, kumpi tukin a tenmi le Israel tei ca in la mawizet a phuahtu David i awnkam nung dawlbel cu hi bangin hi:
2 Topa i hawvangin
ka lak pen hilh hi.
A thu cu ka mukah um hi.
3 Israel i Pathian in hilh zo hi;
Israel huptu in ka lakah,
“Diknak le Pathian kihca in,
mi a uktu kumpi cu,
4 Meingo um ngawl
zinglam a suakmi ni bang,
nguahkam in hampa a detiktu,
5 A pelh thei tuk ngawlmi le,
a kumkhua in, a kho mi
thutepnak tuah Topa in
thu a tep zo hangin
ka casuante cu
Pathian in muicu pia tuk hi.
Mahmi cu ka lungtummi le
ka nehnak hi tuk hi.
Pathian in kimtik
tatak tuk hi.
6 Mahnaven Pathian a kihca
ngawltu cu phillawn
vawkmi ling bang hi.
Khut nguak tuah zen theih
hi haw ma hi.
7 Lak tukin hiamnam le
ceipi man kul hi.
Mei a haal khawng
hi haw tuk ti hi.
David Ngalkap Minthangte
(1Khang 11:10-41)
8 David i ngalkap minthangte cu hite hi haw hi. Pa khatnak cu Takhemon mi Josheb Basshebeth hi a, “Mi Pa thum,” tihmi lak pen a hotu hi. A ceipi pa khat tuah mihing za liat do in, tum khat thu in, a venghawngin that khawng hi.
9 Pa nihnak cu Eleazar hi, “Mi Pa thum” lakah a telbokmi hi. Amah cu Dodo i capa hi. Ahoh hinnam hi. Vei khatah Eleazar le David in ngaldo tukin a khawmdunmi Filistin mite cu lau ngawlin dinpih ngamin, Israel mite cu tai khawng haw hi.
10 Mahnaven Eleazar cu a umnak munah dinglo in, Filistin mite cu a ngalnam tuah satin, a ngalnam suumnak a khut hei phalh thei ngawl toh tianin that hi. Mah ni-in Topa in, a cak zetmi ngal neh hi. Israel mite cu a thi mitei ngalthuam la tuk bekin, Eleazar lakah kik haw hi.
11 Pa thumnak cu Harrar mi Agee capa Shammah hi. Filistin ngalkapte cu Lehi ah khawm haw hi. Lehi ah barli lo pa khat um hi. Filistin miten Israel mite cu hawlvawk khawng haw hi.
12 Mahnaven Shammah cu lo sung a dinnak mun pen dinglo in, lo cu cingin Filistin mi tampi that hi. Mah ni-in Topa in, a cak zetmi ngal neh hi.
13 Lo ancop a hun awn toh ten Filistin ngalkap hon khat cu Refaim munlawnah um haw hi. Mahten, “Mi sawm thum” sung pen pa thumte cu Adullam suanghol a, David lakah hawh haw hi.
14 David cu kulhtian sunglamah umin, Filistin ngalkap hon khat cu Bethlehem ah um haw hi.
15 David cu a lunglengin, “Aw, Bethlehem kongka el a um tuikhuk a tui khuat khatno bek a piatu um le pha, tin tau ua-uan hi.
16 Minthang zetmi ngalkap pa thum ten, Filistin ngalte cu a umnak pen nawk haw a, intuk tui cu cawi in, David cu pia haw hi. David in, tui cu in ma hi. Topa i lakah biakpiaknak tui in mang hi.
17 Maw Topa hi tui hi iti bang in thei tuk kam ing? A nunnak haw pia ngam tianin, a cawi haw mi a hih hangin hi tui ka in tale ka ngalkap pa thum tei thisanin tuah bangten tung hi,” ti hi. Mah hangin mah tui cu in ngawlin biakpiaknakah lei hi.
A hum a pah huai nadehte cu minthang ngalkap pa thum tei bawlmi hi.
18 Joab i nau Zeruiah i capa, Abishai cu mi sawm thum i hotu hi. Vei khat cu a ceipi pa khat tuah ngal za thum do in, that khawng hi. Mi sawm thum sungah a minthang ngangai hi.
19 Sawm thum sung pen minthangbel a hih hangin, a hotu haw in suak naven, “Mi pa thum” cu bang ma hi.
20 Kabzeel khua mi, Jehoiada i capa Benaiah cu ngalkap minthangzet le ngaldonak pen ngalphazet hi. Moab ngalkap minthangzet pa nihte that hi. Vukta ni, ni khat cu khuk sungah tumin, kiosa pa khat vang that hi.
21 Izipt mi ceipi cawitu ngengzet pa vang that hi. Benaiah tembek tuah do in, Izipt pa i khut sung pen ceipi cu sut a, ceipi lala in amah cu that hi.
22 Benaiah i ngalphat zia cu mahti bangin hi. Amah cu, “Mi sawm thum” lak pen pa khat hi.
23 Sawm thum lak pen mi cuangcung naven pa thumte cu bang ma hi. David in amah cingtute hotu in koih hi.
24 Mi minthang “Sawm thum” sung a, telmi midangte cu a nuailamte hi haw hi.
Joab i nau Asahel,
Bethlehem pen Dodo i capa Elhanan,
25 Harod pen Shammah,
Harod pen Elika,
26 Pelet pen Helez,
Tekoa pen Ikkesh i capa Ira,
27 Anathoth pen Abiezer,
Hushah pen Mebunai,
28 Ahoh pen Zalmon,
Netofah pen Maharai,
29 Netofah pen Baanah i capa Heleb,
Benjamin ngam Gibeah pen Ribai capa Ittai,
30 Pirathon pen Bennaih,
Gaash el munlawn ngam pen Hiddai,
31 Arabah pen Abialbon,
Bahurim pen Azmaveth,
32 Shaalbon pen Eliahba,
Jeshen i capa tei sung pen Jonathan,
33 Harar pen Shammah,
Harar pen Sharar i capa Ahiam,
34 Maakah pen Ahasbai capa Elifetelt,
Gilo pen Ahithofel capa Eliam,
35 Karmel pen Hezro,
Arab pen Paarai,
36 Zobah pen Nathan i capa Igal,
Gad pen Bani,
37 Ammon pen Zelek,
Beeroth pen Joab i hiamnam puatu Zeruiah i capa Naharai
38 Jattir pen Ira,
Jattir pen Gareb,
39 Hit mipa Uriah.
A venghawng haw in ngalkap minthang sawm thum le salih um haw hi.