22
David Ngalnehnak La
(Saam 18)
1 David Kumpi cu Saul le midang a ngal tei khut sung pen Topa Pathian in, a luattik ten Topa i lak a sakmi la cu a nuailamte hihi.
2 Topa cu keimah pantu hi.
Amah cu a kho mi
ka ngal kulhtian hi.
3 Ka Pathian cu keimah humtu hi,
amah cu ka himnak hi,
Amah in lumphaw bangin hupin,
a pat hangin him ing.
Topa cu keimah pantu le
huptu hi in,
thisan luannak mun pen luattik hi.
4 Topa cu sam ing a,
ka ngal tei khut sung pen
luattik hi.
5 Thihnak tuicawkin kei kiimin,
siatnak tuicawk ten
ka humah khuh haw;
6 A lauhuai thihnak cu
ka elkimah dim,
khankhukin kei thang siah hi,
7 Ka lungbingin
Topa i lakah au ing,
ka Pathian nelah bopnak ngenin,
a biakinn sungah
ka aw zain, bop ka ngetnak cu
8 Topa cu a thinuk hangin,
leihumpi hing hi;
vanmawk tianin hing khawng hi.
9 A naal sung pen meikhu suah hi.
A kam pen mei alh le
meiling tul hi.
10 Topa in van cu lipin,
tolh hi.
Khawnimte cu a ke nuai ah
koih hi.
11 Cherubim khungin tolh hi,
huih bangin manlang zetin
leng hi.
12 Khuathim tuah zialdunin,
khua nim sah zetin kim hi.
13 Amai khuaphelep sung pen,
meiling tul zawzuak hi.
14 Topa cu van pen,
vanthum bangin thum hi.
Cungnungbel Topa i aw cu
nging dudum hi.
15 A thalcangte cu kapin;
a ngalte cu lengkek
khawng haw hi.
A khuaphelepin,
a ngalte cu tai khawng hi.
16 Topa in, a ngalte cu
liatin, a thinukin, a thum ten,
Tuipi thuanthum taw tian le
leipi mawk tianin
lang khawng hi.
17 Topa in van pen
sawksuk a,
kei cu man ngah hi.
A thuk zetmi tui sung pen
kei cu suah hi.
18 Ka ca in, a cak zetmi
ka ngalleh, kei a haw tu tei
khut sung pen pan zo hi.
19 Ka lungbing laihtakin
kei cu do haw hi.
Mahnaven Topa in
kei cu hup hi.
20 Launak mun pen kei cu
puitulin, zalennak munah
henpih hi.
Ka humah a lungdam hangin,
kei cu hup hi.
21 Midik ka hih man cu
Topa in kei pia hi.
Mawhnak ka neih ngawl hangin
muicu pia hi.
22 Topa i piakmi daan cu
zui ing, ka Pathian cu
langpang awng mang.
23 Ama daan hempoh cu zui ing.
A thupiakmite el awng mang.
24 Sualnak cu pial ing, soiselnak
ka humah umma hi
tih cu thei ing.
25 A dikmi ka bawl hangin
Topa in laksawng pia hi.
Mawhnak nei ngawl ka hihlam
a theih hangin laksawng pia hi.
26 Muantakmi tei lakah
muantak Topa hi ci.
A cangkimmi tei lakah
cangkim mi Pathian hi ci.Ref 22:26 Saam 18:25;
27 Mi thiangtho tei humah
thiangtho ci.
Mi awklawl humah,
ticikcek ci.
28 Mi nuai ah niamkhiat theite cu
pan ci.
Mi ultungte cu nemsuk ci.
29 Topa aw, nang cu
ka khuavaknak hi ci,
ka thimnak hempoh cu vaktikin;
30 Ka ngalte do tukin
thazaang pia ci.
A ngal kulhtian lek thei tukin,
31 Hi Pathian i na bawlte hi
cangkim zetin, a thute cu
iti zahin, muantak haw him!
Ama humhimnak
a zeitu tei ca in, amah cu
ngal lumphaw bang hi.
32 Topa amah bek
Pathian hi,
Pathian amah bek
a ngal lumphaw uh hi.
33 Pathian cu a cangkim zetmi
ka ngelhnak hi,
Amah in ka lampi tuangtik hi.
34 Ka ke cu sazuk ke bangin
manlangin hi.
Mualhumah himdamno in
umtik hi.Ref 22:34 Hab 3:19;
35 A khohbelmi thal le thalcang
mang thei tukin, ngaldo hilh hi.
36 Topa aw,
nangmah in hupin
kei cu luattik ci,
Kei cu bawmin mi thupi in
suaktik ci.
37 Matnak tawk ngawlin kei cu
luattik ci, bahnak tawk
awng mang hi.
38 Ka ngalte cu hilin,
siatsuah khawng ing hi,
Ka neh khawng laklawh
pin awng mang hi.
39 Vatvawk ing a, tho thei ngawltohin,
ka ke bulah bok vawk haw hi.
40 Ngaldonak tukin cahnak pia ci.
Ka ngalkap tei humah
nehnak pia ci.
41 Ka ngalte cu ka lak pen
taitik ci.
Kei a huatute cu
siatsuah khawng ing.
42 Bopnak ngen haw naven
kuamah in pan thei haw ma;
Topa sam haw naven,
a aunak haw don ma hi.
43 Ngawi ing a, leivul bangin
cang haw in,
Cilpekin, a, lampi ah
cinciak bangin cang haw hi.
44 Keimah a dodaltu tei lak pen
luattikin,
miphun tampi humah uktu
bawi in bawl hi.
Ka zak awng ngawlte vang
ka ukmi in suak haw hi.
45 Ngamdang mite ka mai ah
kun haw in,
ka thupiakmi zui haw hi.
46 Ngamdang mite a thinnau in,
a kulhtian sung pen
cantawtokin tul haw hi.
47 Topa cu a nung hi!
Ka belhnak suangpi cu
thangphat un!
Pathian thawm ngengnak cu
thangtik un,
ka nunpatnak suangpi cu!
48 Ka ngal tei humah nehnak pia ci,
ka khutnuai mihingte cu
bawlsia in,
49 Ka ngal tei khut sung pen
kei luattik hi.
Topa aw,
ka ngal tei humah
nangmah in nehnak pia ci.
Mi siatsuahtu tei
khut sung pen hup ci.
50 Mah hangin miphun hempoh tei
lakah nang cu
thangphat tung hi.
Na lakah thangphatnak
lasa tung hi.Ref 22:50 Rom 15:9;
51 Pathian in, a kumpi lakah
nehnak pia hi.
A tensa David le a casuan lakah,
a cat ngawlmi a itnak cu
kumkhua in langtik hi.