21
Saul Casuante That Haw
1 David uk sungin kum khat nung kum khat a pehin kum thum pikpek paampi tung hi. Mah hangin Topa Pathian nelah David in dongin Topa in, “Saul in Gibeon mite a thah hangin Saul le a innkuate cu laithat haw,” ti hi.
2 Gibeon mite cu Israel mi hi haw ma. Israel miten hup tukin a tep haw mi Amor miphun tei lakah miphun neuno pa khat hi haw hi. Mahnaven Saul in Israel mi le Judah mite a ham leita hangin Gibeon mite cu a cimittik khawng tuk tum hi.Ref 21:2 Josh 9:3-15;
3 Mah hangin David in Gibeon mite cu samin, a lak hawah, “Na ca uhin ka bawl theihmi i um kaw? Pathian i miphun humah muicu um zal tahen, tin thungentu na hihnak tukin, na humah a, na pha ngawl a bawl zo mi lemleh nuam ing,” ti hi.
4 Amuh ten, “Saul le a innkuate tuah ka ngaldunnak uh cu sui le ngun hei in lem thei tukma hi; Israel mi kuamah hei that nuam ma ung,” ti haw hi.
“Mah ahi tale na ca uhin i ka bawl a hin deih kam uh ci?” tin David in dong hi.
5 Amuh ten, “Saul in Israel ngam sungah pa khat hei tang ngawlin ka ci uh mittik khawng tum hi.
6 Mah hangin Saul i casuan pano salih pia inna, Pathian i tenmi kumpi Saul i khuapi Gibeah loli ah Topa Pathian mai ah that tuk ung,” ti hi.
“Pia tung hi,” tin David in ti hi.
7 Mahnaven Topa i min salin, David le Jonathan in thutepdunnak a bawl zo haw hangin, Saul i tupa Jonathan i capa Mefibosheth cu David in luattik hi.Ref 21:7 1Sam 20:15-17; 2Sam 9:1-7;
8 Saul i capa pa nih, Aiah i canu Rizpah tuah a hin haw mi Armoni le Mefibosheth cu man hi. Saul i canu Merable le Meholak khua mi Barzillai capa Adriel hin mi capa pa ngate vang man haw hi.Ref 21:8 1Sam 18:19;
9 A salih haw in David in Gibeon mitei lakah pia in, mualhum a, Topa i mai ah that haw hi. A salihin munkhatah thi haw hi. A thah hun haw cu khua khal bo lam, barli sangvut cop pat hunin hi.
10 Aiah i canu, Saul i zineu Rizpah cu thangkhau puan la in, suang humah phah a, an cop hun pepanin cuk nguah a zuk laklawh a luang haw cu sunlam vanote hei hihen, zan ngamsate hei in hihen ei tuk ngawlin cing leleng hi.
11 Rizpah i na bawlmi cu David in, a zak ten,
12 hawhin, Saul le a capa Jonathan i nguhte cu Gilead a, Jabesh mitei lak pen la hi. Gilboa mualhum Filistin miten Saul a thah ni haw in, Saul le Jonathan i luang cu Filistin miten Bethshan a mipi khopnak munah khaih haw hi. Mahlai mun pen Jabesh miten ngu haw hi.Ref 21:12 1Sam 31:8-13;
13 David in Saul le Jonathan i nguhte cu la in Saul i casuan salih a thah tei nguh vang cawm hi.
14 Benjamin ngam Zela khua um Saul i pa Kish i khanah Saul le a capa Jonathan i nguhte cu vui haw hi. David Kumpi i thupiakmi bangin i bawl khawng haw hi. Mahnung bek ten a ngam haw ca in, a thunget haw mi cu Topa Pathian in sang hi.
Filistin Mingengte Do Haw
(1Khang 20:4-8)
15 Filistin mi le Israel mite cu dodun leleu haw in, David le a ngalkap ten, Filistin mite cu do haw hi. A dodun haw laihin, David cu cawlzet hi.
16 Mi ngengzet Ishbibenob a tih haw pa cu ngalnam phundang pua in, cuai thum ngit daal ceipi cawi in hung a, David cu thah tum hi.
17 Mahnaven mahlai takin Zeruiah i capa Abishai in David cu panin, Filistin pa cu zuanin that hi. David ngalkap ten a lak hawah hawhin, ngaldo bok tuk ngawlin David cu thutiam bawltik haw hi. “Israel tei ca in muan le suanmi na hih hangin na paihkhak tuk cu phal ma ung ti haw hi.”Ref 21:17 1Kum 11:36; Saam 132:17;
18 Gob a tih haw munah Israel mi le Filistin mite cu dodunleh haw hi. Mahlai munah Hushah mi Sibbecai in tawmi bang mi ngengzet Saf cu that hi.
19 Mah nungten Gob ah Filistin mite tuah dodun leleu haw hi. Mahlai ah Bethlehem khua mi Jair i capa Elhanan in Gath khua mi ngengzet pa, a ceipi kung thiampheng tia tuah Goliath cu that hi.
20 Gath ah dodunnak um leleu in, mahlai khua ah ngaldo napzet mi ngengpi pa khat um hi. Amah cu a khut zung luk le a ke ah zung luk ten nei in, a venghawngin zung sawm nih le zung li nei hi.
21 Israel mite cu zuamin mahten David i unau Shammah i capa Jonathan in mahpa cu that hi.
22 Hih tawmi bangin a ngengmi mihing pa li cu Gath mi ngengpi tei casuante hi haw a, David le a ngalkap ten that haw hi.