20
Sheba Ngaltho
1 Mahlai in Benjamin hinnam Bikri i capa Sheba a tih haw pa khat umin, amah cu mipha ngawlzet hi. Sheba cu pengkul tumin,
“David tuah imah sengdun
kha ma ung!
Amah zui tukma ung!
Israel mite, pin khawng un,”
au leilui haw hi.Ref 20:1 1Kum 12:16; 2Khang 10:16;
2 Mah hangin Israel miten David cu taisanin, Sheba lakah hawh haw hi. Mahnaven Judah miten David leleng deih haw in, Jordan pen Jerusalem tian zui haw hi.
3 David cu Jerusalem a kumpi innah hawhin, a inncingtu tukin a koihmi, a zineu sawm khatte pui in, palikte cingtik hi. A kul haw hempoh pia khawng naven a lak hawah zau ma. A thih ni haw tian a dangno in koihin, meivong bangin umthong haw hi.Ref 20:3 2Sam 16:22;
4 Kumpipa in Amasa lakah, “Judah mite cu munkhatah sam khawng inna, zinglawi ten hilai ah hung un,” ti hi.
5 A tih bangin Amasa cu hawhin Judah mite cu sam naven kumpipa i ni tep ni-in, Amasa cu kik ma hi.
6 Mah hangin kumpipa in Abishai cu samin, “Absalom sangin Sheba in haksatnak pia saw tuk hei! Ka ngalkapte hawhpih inna, Sheba cu hil un. Mahma tale, a kipcih ngah uhmi khuapi khenkhat la in, a khut sung uh pen luat kha haw kawn,” ti hi.
7 Mah hangin Joab i mihingte Kereth mi, Peleth mi le ngalkap dang ten Abishai cu zui haw hi. Sheba hil tukin Jerusalem pen tul haw hi.
8 Gibeon a um suang ngengpi umnak a hen haw ten Amasa tuah tawkdun haw hi. Joab cu a ngalthuam silhin, a ngalnam cu a kawng sungah thanin, a taikhapah khaih hi. Mai ah tulin a ngalnam cu cawikuh den hi.
9 Joab in Amasa lakah, “Ka ngual, dam cim maw?” ti in nam tuk bangkekin, a taklam khutin Amasa i khamul cu man hi.
10 Joab i ngalnam a cawi lam cu thei ngawlin Amasa cu ngalling ma hi. Mah hangin Joab in Amasa cu a pum pen sun vawkin, a sungngilte cu leihumah tul khawng hi.
Sut betleh hei kul ngawlin Amasa cu thi paih hi. Joab le a nau Abishai in Sheba cu hil ngut haw hi.
11 Amasa i luang elah Joab i ngalkap pa khat dingin, “David le Joab lam tang hempohin Joab cu zui un,” tin au hi.
12 Lampi laizangah Amasa i luang cu a thi tuah diahcihin um hi. Mah amutu hempoh ten cawlhih in, a zohta mek haw hangin Joab i ngalkap pa in Amasa i luang cu lampi pen hampa lakah dokin puan pa khat khuh zam hi.
13 Lampi pen a luang a dawh vawk nung haw ten Sheba hil tukin a venghawng haw in, Joab zui haw hi.
14 Israel miphun tei umnak ngam hempoh bang thahin, Sheba cu hawh pepel a, Abel Beth Maakah tihmi khuapi ah heng hi. Bikri miphunte cu samdun khawmin mah khuapi ah zui haw hi.
15 Joab i ngalkapte vang heng bok haw a, mah khuapi cu kiim haw hi. A khuapi kulhtian cim hen tin, Joab i ngalkap ten kulhtian nuai lei cu co het haw hi. Kulhtian pawlam dawkvawk theihnak tukin lei cu vunmunin leih haw hi.
16 Mah khuapi sungah numei cip pa khat umin, khuasung a, kulhtian hum pen, “Ngai kek un, ngai kek un! Joab cu hilai ah hungtik zal un hi, a lakah thuhilh nuam ing,” tin au hi.
17 Joab cu hawhin, “Joab cim?” tin dong hi.
“Hi ing hi,” tin Joab in ti hi.
“Bawipa, ngai hih tehin,” ti hi.
“Ngai leng ing hi,” tin Joab in ti hi.
18 Numei nu in, “Tanglaih cawng pepanin, ‘Abel khuapi,’ ah hawh unna, thu leiceng tuk poh tin, timek haw in, a tih haw bangin hi ngangai hi.
19 Ka khua uh hi lemdunnak khua le a zohtoh haw mi khuapi hi, Israel ngam sungah inncingtu nu bang hi. Ita mahti bang khua cu siatsuah tum cim? Pathian ta cu siatsuah ngam tuk cim?” tin ti hi.
20 Joab in, “Kha ma hi, na khuapi uh cu siatsuah hihim tuk mang hi.
21 Ka tup uhmi hei hi ma hi. Efraim mualhum mi Bikri i capa Sheba a tih haw in kumpi David a do hang hi. Mahpa pa khat cu pia unna, hi khua pen kik tung,” ti hi.
Numei nu in, “Mahpa i lu cu kulhtian hum pen na lakah vawk tuk ung,” ti hi.
22 Hawhin, a ngaihsutnak hempoh cu khuasung mite hilh hi. Sheba i lu cu tan ngangai haw in, Joab lakah kulhtian hum pen vawk haw hi. Joab in pengkul tumin, a ngalkapte tuah mah khuapi cu zamin, a khua ah pin haw hi. Joab cu Jerusalem a, kumpipa i lakah kik hi.
David Khutnuai Bawite
23 Joab cu Israel ngalkapte hotu hi. Jehoiada i capa Benaiah cu David i inn cingkhawitu Kereth mi le Peleth mite hotu hi.
24 Adoniram cu leingam a dehtikmi hempoh hotu hi; mahten Ahilud i capa Jehoshafat cu ngankhumtu hi.
25 Sheva cu zung cazipi hi. Zadok le Abiathar cu thiampi haw hi.
26 Jair khua mi Ira vang David i thiampi pa khat hi bok hi.