15
Absalom Ngal Tho
1 Mahnung ten Absalom in cipuhleng le cipuhte lei in amah cingtu tukin ngalkap sawm nga koih hi.
2 Zingtungno in tho in, a khuapi kongkhah elah ding mek hi. Thuneitu pa kha khat, kumpipa in ka thu son sak hen, tin, a hung amuh ten Absalom in samin, “I lai pen hung kam,” tin dong hi. Thuneitu pa in, “Bawipa, Israel ngam mahlai, mah khua pen hungin, mah miphun, mah hinnamte ing,” tih bangin timek hi.
3 Absalom in, “Ngai hih kekin, na thu hi nangma neh loli tukmi hi. Mahnaven kumpipa in, na thu hi ngaihsut sak sap tukma hi.
4 Aw, hih ngamah thusontu ka hi ahin nuam naveng! Thukhentu ka hi ahin thuneitu le nget tuk le dot tuk a nei mite ka lakah a hun haw ten dikzet le kom zetin sonsak tuk naveng!” tin timek hi.
5 Mahpa cu upatnakin Absalom in, a khut pia in, a kawi nungten nam mek hi.
6 Ka thuson sak hen tin, kumpipa i lak a hungmi Israel mi hempoh cu Absalom in mah ti bangin ti leleng hi. Absalom in, a lungmu haw na kuai ngahtik khawng hi.
7 Kum li ngei nungten Absalom in kumpi David lakah, “ Topa Pathian nelah ka thutepnak bangin Hebron ah hawhtik zalin hi.
8 Geshur ngam a, ka umlaihin Topa i lakah Jerusalem ah na hengtikleh ahi tale Hebron ah nangmah bia tung tukin thutiam ing,” ti hi.
9 Kumpipa in, “Lungmuang zetin hawhin hi,” ti ing a, Absalom cu Hebron ah hawh hi.
10 Mahnaven Absalom in Israel miphun hempoh lakah mi hahin, “Pengkul tum mi aw na zak uhten, ‘Hebron ah Absalom cu kumpi hi zo hi,’ tin au un,” tin thucah khawng hi.
11 Absalom i sawmmi mihing za nih vang amah tuah Jerusalem ah hawh bok haw hi. Absalom i thusia hilhmi cu thei haw ma hi. Lungthiang zetin hawh haw hi.
12 biakpiaknak a bawl lih laihtakin, Absalom in kumpi David i thu a son pih mekmi pa khat Gilo khua mi Ahithofel cu cahin, biakpiaknak a piak laih takin heng hi. Kumpi a bawlsiatnak haw cu na sia deuhin Absalom zuitu vang tam dedeuh haw hi.
Jerusalem Pen David Tai
13 David lakah mi pa khat hungin, “Israel tei lungmu cu Absalom lakah hek kik khawng zo hi,” tin hilh hi.
14 David in Jerusalem a um, a khutnuai bawite cu, “Absalom i khut pen luat a nuam uh tale manlangin, a tai uh kul hi. Manlang un hi! Mah ahimata hilai ah heng paihin, eimuhte nehin khuasung mi hempoh cimit khawng tuk hung,” ti hi.
15 “Mahzuh hi, kumpipa na hilhmi hempoh cu bawl tuk ung,” tin ti haw hi.
16 Kumpipa cu tulin a innkua le a khutnuai bawi hempoh ten zui haw hi. Mahnaven kumpi inncingtu tukin a zineu nungdawl saw cu zam hi.
17 Kumpipa le a mihingte cu Jerusalem khuasung pen a tul haw ten dawltabel innah cawl haw hi.
18 A khutnuai bawite cu a elah dingin kumpi cingtu Kereth ngalkapte le Peleth ngalkapte cu mai ah hawh vawk ngut haw hi. Gath pen a zuitu ngalkap za luk tuah hawh vawk haw hi.
19 A hotu haw Ittai lakah David in, “Ita ka lakah hawh bok cim? Kikleh inna, kumpi thak lakah um saw in hi. Nang cu ngamdang mite hi ci a, na ngam zamsantu ci.
20 Hilai ah hun comno sung bek umin, ita ka lakah vakvai li in bawl kam nang? Mah hum pen keimah vang ilai hawh kam nang tihvang thei ma laih ing. Kik inna, na ngam mihingte vang kihpihin hi. Topa cu na humah hehpihnak a neimi le muansan takmi hi leleng zal hen,” tin ti hi.
21 Mahnaven Ittai in, “Maw kumpi pa, Pathian minsalin tiam ing hi; Na hawhnak hempoh ah thihnak mun ahi vangin hawh bok tung hi,” tin ti hi.
22 David in, “Pha hi! Mah ahi tale hawhin hi,” ti hi. Mah hangin Ittai cu a ngalkapte le a innkua a canaute tuah hawh haw hi.
23 David zuitute a hawh haw ten mi honpi cu nase zetin kap haw hi. Kumpi David in Kidron ngun cu kaltanin, a mipite vangin a kaltan nung haw ten ngamkhing lamah hawh pepel haw hi.
24 Thiampi Zadok le Levi mite vang Thutiam Kuang pua thahin tel bok haw hi. Mi hempoh khuapi sung pen a hawh khawng haw lak lawh Thutiam Kuang cu mahlai ah koih haw hi. Thiampi Abiathar vang tel bok hi.
25 kumpipa in Zadok lakah, “Thutiam Kuang cu khua sungah kih pihlehin hi. Topa i mitmai pha ka mu ahi tale ni kha khat ten kiktikleh tuk a, Thutiam Kuang le a umnak cu muleh tuk laih poh ing.
26 Mahnaven Pathian mitmai pha ka tawk ma tale son ham thei mang. Ama lungkimmi cu amah in bawl tahen,” tin ti hi.
27 Zadok lakah, “Nangmah le na capa Ahimaaz, Abiathar le a capa Jonathan cu thinkhat zetin khua sungah kik un.
28 nangmu lak pen thu ka zak laklawh ngamkhing tui kaltannak mun pen ngak leleng tung hi,” tin ti hi.
29 Mah hangin Zadok le Abiathar in Thutiam Kuang cu Jerusalem ah kikpihin, mahlai ah umta hi.
30 David cu olif mualah kapthahin kai hi. A ke tuah kaito in, a lu khuhin kap hi. A zuitu hempoh vang a lu haw khuhin, kapthahin mual kaito haw hi.
31 kumpipa suamtu lak pen Ahithofel vang tel bokin, Absalom lam tang hi tih cu David hilh haw hi. David cu, “ Topa aw, na hehpihnakin Ahithofel ngaihsutnak a piakmi cu thu imah ngawlin cangtik zalin hi,” tin, Pathian nelah thungen hi.
32 David cu mualhum Pathian a biakmeknak mun a hen ten a muanzetmi, Arkhi mi Hushai in muak hi. Hushai cu a puante botkek khawngin, a lu ah leivul sawh hi.
33 David in, “Ka lakah na tel vangin nemcuam cuang tukma ci.
34 Mahnaven khuapi sungah kikin Absalom lakah maw kumpipa na pa i nadektu ka hih bangin atu-in nangma nadektu hi tuk toh ing tin ti inna, Ahithofel i ngaihsutnak piakmi cu el lelengin, mahten ka ca in nemcuam ngangai tuk ci.
35 Thiampi Zadok le thiampi Abiathar um haw tuk hi, mah hangin kumpi inn a, na thu zakmi hempoh cu a lak hawah than lelemin hi.
36 A capa haw Ahimaaz le Jonathan vang a lakah um haw hi. A capa tei lak pen thu la na zakmi hempoh keimah theitik lelemin hi,” tin Hushai cu ti hi.
37 Mah hangin David i ngualcam Hushai cu Jerusalem ah kikin, Absalom a hen ten heng bok hi.