14
Absalom Kikleh
1 Zeruiah i capa Joab in kumpi David in, a capa Absalom ngaizet tih thei hi.
2 Mah hangin Tekoa khua a um numei micip pa khat lakah, “Mi thi ngai bangin um hem inna, mithi ngaihnak puansilh inna, na sam vang kiat ngawlin umin hi. Ngeipi mithi ngai numei bangin umin hi.
3 Kumpipa i lakah hawh inna, ka tepmi hi hilhin hi,” tin ti in, a hilh tukmi thu cu Joab in tiam khawngta hi.
4 Numei nu cu kumpipa i lakah hawhin, upatnak tuah a lu a kun nungten, “Maw kumpi pa, kei hi hu bawm zazalin,” ti hi.
5 Kumpipa in, “Ikaw na deih?” tin dong hi.
Numei nu in, “Bawipa kei cu meivong mi ca-ngah ing.” “Ka pasalin thihsan zo.
6 Bawipa capa pa nih nei ing. Mahnaven ni khat cu hampa lak pen a unau haudunin, a khentu a um haw ngawl tak pa khatin pa khat saw cu that hi.
7 bawipa, ka unaupih hempoh ten, “Tu a nunglaihmi na capa cu ka lak uhah pia in hi, a unau pih a thah hangin amah that tuk ung,” ti haw hi. A that ngangai haw tale kei cu capa nei ngawl hi tuk toh ing. Ka nunsanbel ka capa neihcalam cu pailaltikin, ka pasal cu minsia dawntu capa nei ngawlin cangtik haw tuk,” ti hi.
8 Kumpipa in, “Na innah pinin hi. Na thu cu ngaihsut sak tung,” ti hi.
9 Numei nu in, “Maw kumpi pa, iti bangin na son hei in, a kulmi hempoh cu keimah le ka innkua ten thuak tuk poh ung hi. Nangmah kumpipa le na innkua humah sualnotnak um tukma,” ti hi.
10 Kumpipa in, “Akua hei in, nangmah a thum haw tale ka lakah hunpih inna, haksatnak pialeh tukma toh,” ti hi.
11 Numei nu in, “Maw kumpipa ka unau pih ten a thi mi ka capa phu la tumin, a nunglaihmi ka capa thah a tum haw hi thilpha ngawl bawl tum a hih haw hangin, mahti bangin a bawlsuak haw ngawlnak tukin Topa na Pathian nelah thunget sak zalin hi,” tin ngen hi.
Kumpipa in, “A nungmi Pathian minin tiam ing hi; iti bang hei in, na capa cu liamsuah hihim haw tukma hi,” ti hi.
12 Numei nu in, “Maw kumpi pa, hehpih inna, awnkam khatno na lakah hilhtik zal hihin hi,” tin ngen leleu hi.
Kumpipa in, “Hilhin,” ti hi.
13 Numei nu in, “Ita hi tibang thilpha ngawl hi Pathian mihing tei humah bawl cim? Na capa cu a tainak pen na kiktik laih ngawl hangin atu na otmi lelengin, na humah sual umtik hi.
14 Mihing cu thi ten tuk hung hi, leihumah a leih haw mi tui cu luah kikleh theih ngawl toh bangin mihing a nunnak uh cu copleh theih ma toh hi. Pathian hei in mithi cu nunglehtik ma toh hi. Mahnaven kumpipa in ngam sungah um ngam ngawlin a taimi pa cu sam kikleh thei hi.
15 Maw kumpi pa, miten a thup haw hangin na lakah ka hunnak hi, ka ngetmi cu bawlsak tuk ci tih muansannak nei ing.
16 Ka thu hilhmi hi ngai zalin, Pathian in, na mihing tei lakah a piakmi ngam pen ka capa le keimah cimihtik a tumtu pa i lak pen hup tuk ci,” tin ngaisung ing.
17 Maw, kumpi pa, nang cu Pathian vancungmi bang hi ci, a sia le pha ihempoh na deidat thiam hangin na thutepnakin hup tuk hi tin ngaisung ing. Topa na Pathian cu na lakah um leleng zal hen,” ti hi.Ref 14:17 2Sam 19:27;
18 Kumpipa in, “Thu pa khat dong nang inna, im viang ngawlin hilh khawngin,” tin ti hi.
“Bawipa, dongin hi,” tin numei nu in ti hi.
19 Kumpipa in, “Hi thu ah Joab i ngaihsutnak piakmi hi cim maw?” tin dong hi.
Numei nu in, “Kumpi pa aw, lei le van samin hilh ing. Na thudotmi hilhleh tuk ngawl cu cangthei tukma hi. Na ngalbawi nang cu Joab i hilhmi ngeh hi. Amah in bawl tukmi hempoh hilhtik khawng hi.
20 Hi bangin a tihnak cu na thu la uh hi tuang deuh hen tin, a melh nuam hang hi. Maw kumpi pa, nang cu Pathian vancungmi bangin cipin, na a piangmi hempoh thei khawng ci,” ti hi.
21 A sawdeuh ten kumpipa in Joab lakah, “Na deihmi bawl tukin soncat zo ing. Hawh inna, tangval Absalom cu samin, hilai ah pui in,” ti hi.
22 Joab cu upatnakin David mai leihumah bokin, “Maw, kumpi pa, Pathian in muicu pia zal tahen, ka ngetmi na piak hangin na lak pen mitmai pha ngah ing hi tih cu thei ing,” ti hi.
23 Mahten tho in, Geshur ngamah hawhin, Absalom cu Jerusalem ah pui hi.
24 Mahnaven Absalom cu kumpi innah um tuk ngawlin David in thupia hi, “Mu nap mang,” ti hi. Mah hangin Absalom cu ama innah umin kumpipa i mai ah lak awng hihim ma hi.
Absalom le David Lemdun Leh
25 Absalom cu mipiangzet hi, Israel ngam sungah amah bangin mitei son lih kuamah um haw ma hi. A sip pen a ke cawk tian sonbang tuk pa khat hei umma hi.
26 A sam sau in, phazet, a ngit leita hangin kum khatah vei khat bek met hi. A sam cu kumpi cuai khainak tuah khai ten cuai nih bang ngit hi.
27 Absalom in capa pa thum le Tamar a tih haw mi canu pa khat nei in Tamar cu khanglai mawi ngangai hi.
28 Absalom cu kumpipa mu ngawlin Jerusalem ah kum nih um hi.
29 ama ai-in kumpipa tawk tukin Joab sam naven hung ma hi. Samleh naven Joab cu hung leleng ma hi.
30 Mah hangin Absalom in, a umlawh tei lakah, “Zo hem un, ka lo elno a, lo cu Joab i lo hi. Barli sangvutte a sungah um hi. Hawh unna, mei tuah haal un,” tin thupia hi. Mah hangin hawhin Joab i lo cu mei tuah haal haw hi.
31 Absalom innah Joab cu tai in, “Ita na umlawh ten ka lo haal haw kaw?” tin liat hi.
32 Absalom in, “Kumpipa i lakah ka hah theihnak tukin, hilai ah hung tukin ka samnak hi. Kumpipa i lakah hawh inna, ka ai-in hi bangin hilhin hi, ‘Itakaw Geshur ngam zamin, hilai ah ka hun? Hilai sangin Geshur ngamah ka um ahin ka ca in pha saw tuk naven,’ ti in hi. Kumpipa ka tawh theihnak tukin tuangtim sakin, mi khial hi tin, kei amu tale that hen,” ti hi.
33 Joab cu kumpipa i lakah hawhin hilh hi. Absalom cu kumpipa in sam hi. Hawhin kumpipa i mai ah a lu lei tawngkha tian kun hi. Kumpipa in Absalom cu nam hi.