16
David le Ziba
1 David cu mualhum pen dawm a hawh ten ngaihsut khak ngawlpi in Mefibosheth i umlawhpa Ziba in muak hi. Ziba in, laak pa nih tuah cangho zawl za nih, sabitko bawk za khat, thingngah thoih semmi bawk za khat le sabittui saphaw thawl khat pua haw hi.Ref 16:1 2Sam 9:9-10;
2 David Kumpi in, “Thil hi zazah, ilai ah hen tuk kam?” tin dong hi. Ziba in, “Laakte cu kumpipa i innkuapih tei khunnak tuk hi; cangho le thingngahte cu na mihing tei eih tuk hi; sabittui cu na mihingte ngamkhing lak pen a cawl haw ten a in haw tuk,” ti hi.
3 Kumpipa in, “Na bawipa Saul i capa Mefibosheth cu ilai ah kaw a um?” tin dong hi.Ref 16:3 2Sam 19:25-27;
Ziba in, “Jerusalem ah um hi; itahim titale a pu Saul i uknak cu tutumin Israel miten ka lakah pialeh tuk, tin, a up hangin,” ti hi.
4 Kumpipa in Ziba lakah, “Mefibosheth ta hempoh cu nata hi khawng zo,” ti hi. Ziba in, “Kei cu na sal ing. Kumpipa na mitmaipha cotu hi leleng zal nang ngei,” ti hi.
David le Shimei
5 David Kumpi cu Bahurim khua a hen haw ten, Saul i innkua Gera i capa Shimei cu David tawk tukin tam thathahin tul hi.
6 Shimei in, David le a khutnuai bawite cu suang tuah sepin, ngalkapte le a cingtu ten David cu kil tiptep haw naven sep leleng hi.
7 Shimei in, David cu tamin, “Tai in, tai nawmin; laithat pa, mi sual pa,
8 Saul i uknak cu lonsakin, Saul i unaupih tampi na thah hangin Topa Pathian in atu-in nangma humah phula hi. Atu-in Topa in, na uknak cu na capa Absalom lakah pia zo hi. Bo zo ci, laithat pa!” tin tam het hi.
9 Zeruiah i capa Abishai in kumpipa i lakah, “Maw kumpi pa, ita hih uico pa i tam hi thuak thong nge cim? Hawh nang inna, a lu tanta nang,” ti hi.
10 Kumpipa in Abishai le a u Joab lakah, “Hite cu noh tuah sengdun kha ma hi. Pathian in, a hilh hangin a tamsia tale, Ita tamsia kam, tin akua him a tithei tuk?” tin ti hi.
11 David in Abishai le a khutnuai bawi tei lakah, “Ka sungsuak ka capa loli hei in, keimah thah tum hangin hi Benjamin pa i bawlmi humah ap tuk imah umma hi. Topa in, a hilhmi bangin a humah imah ti pahsuh un, a deih zahin tam hen.
12 Topa in ka haksatnak mu tuk tohin, atu keimah a tam lih ai-in, Topa in muicu tampi pia saw hei hi thei,” ti hi.
13 Mah hangin David le a zuitute cu hawh ngut haw hi. Shimei in, a nung haw pen zui pepel bokin, a hawhnak haw mualhum lampi el pen a hawh thahin tam pepel a, suang le buak tuah sep pepel hi.
14 Kumpipa le a mihingte cu Jordan a hen haw ten cawl dikdek haw a, mahlai ah cawl hih haw hi.
Absalom Jerusalem Heng
15 Absalom le a lak a, tangmi Israel mi hempoh cu Jerusalem khua ah tumin, Ahithofel vang tel hi.
16 David muansan mi a ngual pa Hushai in, Absalom cu tawkin, “Kumpipa a nunkhua sau zal hen!” tin ti hi.
17 Absalom in, “Na ngualcampa David i mihing hi ma toh cim? Ita amah zui ma kam?” tin dong hi.
18 Hushai in, “Itin kaw ka zui theih tuk? Topa Pathian i tenmi mihingte le Israel mipi tei tenmi bek cu zui tung a, na lakah um tung hi.
19 Thungai in ti a hin, ka bawipa i capa nadek ngawlin akua i na kaw ka deh cuang tuk? Na pa i na ka deh bangin nangma nadek tung,” tin Absalom cu ti hi.
20 Absalom cu hekin, Ahithofel lakah, “Na ngaihsutnak hilh hemin! Itin bawl kam nung?” tin dong hi.
21 Ahithofel in, “Hawh inna, na pa i kumpi inn cingkhawitu tukin a zamta mi a zineute zaupihin hi. Mahtin na bawl tale, a pa nase zetin thinuktik zo hi tin, Israel mi hempohin thei in, na lak a tangtute cu tam dedeuh haw tuk,” ti hi.
22 Mah hangin kumpipa i inn humah puanbuk sa in, mipi mitmuhah a pa i zineute zaupih hi.Ref 16:22 2Sam 12:11-12;
23 Mah hunin, Ahithofel i ngaihsutnak cu Pathian i awnkam ngangai bangin zui haw hi. David vangin zui in Absalom vangin zui bok hi.